1. Ano, eia kekahi, ia Moroni i loaa ai ua episetole nei, hooikaika ia iho la kona naau, a ua hoopiha ia me ka olioli nui loa, no ka onipaa ana o Pahorana, i ole ai oia no hoi he kipi i ke kuokoa ana a me ka aoao o kona aina.

2. Aka, uwe nui loa iho la no hoi oia, no ka ino o ua poe la nana i kipaku aku ia Pahorana mai ka noho hookolokolo aku; he oiaio, no ua poe la nana i kipi mai i ko lakou aina, a i ko lakou Akua no hoi.

3. A eia kekahi, lawe ae la o Moroni i kekahi poe kanaka uuku, e like me ka makemake o Pahorana, a haawi ae la oia ia Lehi laua me Teanakuma i ka noho luna ana maluna iho o ke koena o kona poe kaua, a hele aku la oia i ka aina o Gideona.

4. A hooku ae la oia i ka hae kuokoa ma kela wahi keia wahi ana i komo ai, a loaa ia ia kela kokua keia kokua i hiki ia ia i kona hele ana a pau i ka aina o Gideona.

5. A eia kekahi, akoakoa mai la na tausani i kona hae, a lalau iho la i na pahikaua a lakou e hoomalu i ko lakou kuokoa ana, i ole ai lakou e komo iloko o ka noho hooluhi ana.

6. A pela ia Moroni i houluulu mai ai i na kanaka a pau i hiki ia ia ma kona hele ana, hiki ae la oia i ka aina o Gideona; a i ka hui pu ana o kona poe me ko Pahorana, lilo iho la lakou i poe ikaika loa, e oi aku ana mamua o ka poe kanaka o Pakusa, oia no ke alii o ua poe kuee la, ka poe i kipaku mai i ka poe-kuokoa mailoko aku o ka aina o Zarahemela, a i loaa ka aina.

7. A eia kekahi, iho aku la o Moroni laua me Pahorana me na puali o laua iloko o ka aina o Zarahemela, a hele ku e aku la i ke kulanakauhale, a halawai aku la me ka poe kanaka o Pakusa, a o ke kaua aku la no ia.

8. A, aia hoi, ua pepehi ia a make o Pakusa, a ua hoopio ia aku kona poe kanaka; a ua hoihoi hou ia o Pahorana i kona noho hookolokolo.

9. A ua hookolokolo ia aku ka poe kanaka o Pakusa, mamuli o ke kanawai, a me kela poe-makemake-alii, ka poe i hopu ia a hahao ia iloko o ka halepaahao; a ua pepehi ia lakou mamuli o ke kanawai; he oiaio, ua poe kanaka la o Pakusa, a me ua poe-makemake-alii la hoi, o kela mea keia mea i lalau ole iho ai i na mea kaua e hoomalu aku i ko lakou aina, aka, i kaua ku e mai ia ia, ua pepehi ia aku a make.

10. A pela ia i lilo i mea e pono ai e malama ikaika i keia kanawai, no ka maluhia o ko lakou aina; he oiaio, a o kela mea keia mea i loaa e hoole ana i ko lakou kuokoa ana, ua pepehi koke ia aku mamuli o ke kanawai.

11. A pela i pau ai ka makahiki kanakolu o ke au o na lunakanawai maluna iho o ka poe kanaka o Nepai; ua hoihoi ia ka maluhia e Moroni laua me Pahorana i ka aina o Zarahemela, mawaena o ko lakou lahuikanaka ponoi, me ka hookau iho i ka make maluna iho o ka poe a pau i paa io ole i ka aoao o ke kuokoa.

12. A eia kekahi, ma ka makamua o ka makahiki kanakolukumamakahi o ke au o na lunakanawai maluna iho o ka poe kanaka o Nepai, kena koke ae la o Moroni e hoouna ia aku he ai a me kekahi poe koa eono tausani io Helamana la, e kokua aku ia ia i ka malama ana i kela aoao o ka aina;

13. A kena ae la no hoi oia e hoouna ia aku kekahi poe koa eono tausani, me ka ai lawa ku pono, i na puali la o Lehi laua me Teanakuma. A eia kekahi, ua hana ia aku keia, no ka pale ana i ka aina mai ko Lamana poe ae.

14. A eia kekahi, e waiho ana o Moroni laua me Pahorana i kekahi poe kanaka lehulehu ma ka aina o Zarahemela, a hele aku la me kekahi poe kanaka he nui i ka aina o Nepaiha, me ka manao paa e hoohiolo iho i ko Lamana poe ma ua kulanakauhale la.

15. A eia kekahi, me lakou e hele ana i ka aina, hopu aku la lakou i kekahi poe kanaka he nui o ko Lamana poe, a pepehi aku la i na mea he nui o lakou, a lalau aku la i ka ai a lakou la, a me ka lakou mau mea kaua.

16. A eia kekahi, mahope iho o ko lakou hopu ana ia lakou la, koi aku la lakou ia lakou la e komo iloko o ka berita, i ole ai lakou la e lalau hou iho i na mea kaua a lakou la e ku e mai i ko Nepai poe.

17. A ia lakou la i komo ai iloko o ua berita nei, hoouna aku la lakou ia lakou la e noho pu me ko Amona poe; a he mau tausani eha paha o lakou, i pepehi ole ia aku.

18. A eia kekahi, ia lakou i hoouna aku ai ia lakou la, hoomau aku la lakou i ko lakou hele i ka aina o Nepaiha. A eia kekahi, i ka wa a lakou i hiki aku ai i ke kulanakauhale o Nepaiha, kukulu iho la lakou i na halelewa o lakou ma ke kula o Nepaiha, kokoke no ia i ke kulanakauhale o Nepaiha.

19. Ano, ua makemake o Moroni i ko Lamana poe e hele mai mawaho, e kaua mai ia lakou ma na kula; aka, ua ike ko Lamana poe i ko lakou koa loa ana, a ua ike hoi i ka lehulehu o lakou, nolaila, aole lakou la i aa e hele mai mawaho e ku e mai ia lakou; nolaila, aole lakou i hoouka i ke kaua ia la.

20. A i ka po ana, hele aku la o Moroni i ka pouli o ka po, a hiki aku la maluna iho o ka pa e hoomakakiu i kahi o ke kulanakauhale a ko Lamana poe i hoomoana ai me ko lakou poe koa.

21. A eia kekahi, ma ka hikina lakou, ma ka puka; a ua hiamoe iho la lakou a pau. Ano, hoi ae la o Moroni i kona poe koa, a kena ae la e hoomakaukau wikiwiki ia na kaula ikaika a me na alapii, e hookuu ia ilalo mailuna iho o ka pa iloko o ka pa.

22. A kena ae la o Moroni i kona poe kanaka e hele aku e pii ae maluna ae o ka pa, a e hookuu iho ia lakou iho ilalo iloko o kela aoao o ke kulanakauhale, he oiaio, ma ke komohana, kahi a ko Lamana i hoomoana ole ai i na puali o lakou.

23. A eia kekahi, ua hookuu ia iho lakou a pau ilalo iloko o ke kulanakauhale ma ka po, ma o na kaula ikaika la o lakou a me na alapii o lakou; a pela i ka wehe ana o ke alaula, ua pau loa lakou iloko o na pa o ke kulanakauhale.

24. Ano, i ke ala ana o ko Lamana poe, a i ka ike ana aia no na puali koa o Moroni iloko o na pa, ua weliweli nui loa lakou, a holo aku la lakou mawaho ma ke alahele.

25. Ano, ia Moroni i ike aku ai e holo ana lakou imua ona, kena ae la oia i kona poe kanaka e hele ku e aku ia lakou, a pepehi aku la lakou i na mea he nui, a hoopuni ae la i na mea he nui wale, a hoopio aku la ia lakou; a holo aku la ke koena o lakou iloko o ka aina o Moroni, ma na palena ia ma ke kahakai.

26. Pela i loaa ai ia Moroni laua me Pahorana ke kulanakauhale o Nepaiha, me ka lilo ole o kekahi mea; a ua nui wale o ka poe o ko Lamana i pepehi ia aku.

27. Ano, eia kekahi, he nui loa na mea o ko Lamana poe i pio me ka makemake e hui mai me ka poe kanaka o Amona, a e lilo i poe kanaka kuokoa.

28. A eia kekahi, o ka poe a pau i makemake ua ae ia aku ia lakou, e like me ko lakou makemake;

29. Nolaila, hui ae la ka poe pio a pau o ko Lamana me ka poe kanaka o Amona, a hoomaka ae la e hana ikaika loa, e mahi ana i ka aina, e hooulu ana i kela ano keia ano o ka hua liilii, a e hoolaha ana i na pua, a me na ohana holoholona o kela ano keia ano; a pela i hoomaha ia ai ko Nepai poe mai ke kaumaha nui ae; he oiaio, ua hoomaha ia mai ka poe pio a pau o ko Lamana.

30. Ano, eia kekahi, mahope iho o ko Moroni loaa ana ke kulanakauhale o Nepaiha, ua hoopio aku i na mea he nui wale, a he mea ia i hoemi nui loa ai i na puali o ko Lamana poe, a ua loaa no hoi na mea he nui o ko Nepai poe, ka poe i lawe pio ia, a he mea i hooikaika nui loa mai ai i ka poe koa o Moroni; nolaila, hele aku la o Moroni mai ka aina o Nepaiha ae i ka aina o Lehi.

31. A eia kekahi, i ka wa a ko Lamana poe i ike mai ai ia Moroni e hele aku ana e ku e ia lakou, ua weliweli hou lakou, a holo aku la imua o ka poe koa o Moroni.

32. A eia kekahi, alualu aku la o Moroni a me kona poe koa ia lakou mai ia kulanakauhale aku ia kulanakauhale aku, a, halawai lakou la me Lehi laua me Teanakuma; a auhee ae la ko Lamana poe mai o Lehi aku laua me Teanakuma, ilalo ma na palena ma ke kahakai, a hiki aku la lakou la i ka aina o Moroni.

33. A ua houluulu ia ae na puali o ko Lamana poe, a pau pu lakou ma kahi hookahi, ma ka aina o Moroni. Ano, o Amorona, ke alii o ko Lamana poe, oia pu no hoi me lakou.

34. A eia kekahi, hoomoana iho la o Moroni, a me Lehi, a me Teanakuma, me na puali o lakou a puni ma na palena o ka aina o Moroni, a ua hoopuni ia ae ko Lamana poe ma na palena ma ka waonahele, ma ka hema, a ma na palena ma ka waonahele, ma ka hikina;

35. A pela lakou i hoomoana ai no ka po. No ka mea hoi, ua maluhiluhi ko Nepai poe a me ko Lamana poe no hoi, no ka loihi o ko lakou hele ana; nolaila, aole lakou i noonoo i kekahi hana maalea i ka po, koe wale no o Teanakuma; no ka mea, ua huhu nui loa oia ia Amorona, a manao iho la oia o Amorona a me Amalikia kona kaikuaana, ke kumu o keia kaua nui a loihi mawaena o lakou a me ko Lamana poe, o ke kumu no ia o ke kaua a me ka hookahe koko nui ana, he oiaio, a me ka wi nui hoi.

36. A eia kekahi, hele ae la o Teanakuma ma kona huhu iloko o ka wahi a ko Lamana poe i hoomoana ai, a hookuu iho la oia ia ia iho ilalo ma kela aoao o na pa o ke kulanakauhale. A hele aku la oia me ke kaula olona, ia wahi aku ia wahi aku, a loaa iho la ia ia ke alii; a pahu aku la oia i kekahi ihe pokole ia ia, a hou iho la oia ia ia ma kahi kokoke i ka puuwai. Aka hoi, hoala e ae la ke alii i kana kauwa mamua o kona make ana, a alualu mai la lakou ia Teanakuma, a pepehi mai la ia ia a make.

37. Ano, eia kekahi, ia Lehi laua me Moroni i ike ai ua make o Teanakuma, ua kaumaha nui loa laua; no ka mea, he kanaka no oia i kaua koa loa no kona aina, he oiaio, he hoaaloha io no ke kuokoa; a ua loaa oia i na popilikia eha he lehulehu. Aka hoi, ua make oia, a ua hele aku i ke ala o ko ka honua nei a pau.

38. Ano, eia kekahi, hele aku la o Moroni ma ia la ae, a hoouka aku la i ko Lamana poe, a luku aku la lakou ia lakou la me ka luku nui, a hooauhee ae la lakou ia lakou la iwaho o ka aina; a naholo aku la lakou la, a aole i hoi hou mai lakou ia manawa e ku e mai i ko Nepai poe.

39. A pela i pau ai ka makahiki kanakolukumamakahi o ke au o na lunakanawai maluna iho o ka poe kanaka o Nepai; a pela i loaa ai ia lakou na kaua, a me na hookahe koko ana, a me ka wi, a me ka popilikia no na makahiki he nui wale.

40. A he nui na pepehi kanaka, a me na paio, a me na kuee, a me kela ano keia ano o ka hala mawaena o ka poe kanaka o Nepai; aka hoi, no ka pono o ka poe pono, he oiaio, no na pule a ka poe pono, ua hookoe ia lakou.

41. Aka, no ka loihi loa o ke kaua mawaena o ko Nepai poe a me ko Lamana poe, he nui no ka poe i lilo ae i paakiki, no ka loihi loa o ke kaua; a he nui no ka poe i hoopalupalu ia, no na popilikia o lakou, a hoohaahaa lakou ia lakou iho imua o ke Akua, iloko o ka hohonu o ke akahai.

42. A eia kekahi, mahope iho o ko Moroni hana paa ana i kela mau wahi o ka aina e waiho kokoke ana i ko Lamana poe, a ikaika loa ia mau wahi, hoi ae la oia i ke kulanakauhale o Zarahemela, a o Helamana hoi kekahi ka i hoi aku i kahi o kona hooilina; a ua hookupaa hou ia ka maluhia mawaena o ka poe kanaka o Nepai.

43. A haawi ae la o Moroni i ka noho luna ana o kona mau puali koa iloko o na lima o kana keiki, o Moroniha kona inoa; a hoi aku la oia i kona hale iho, i hiki ia ia ke hoopau aku i ke koena o kona mau la ma ka maluhia.

44. A hoi ae la o Pahorana i kona noho hookolokolo; a lawe hou mai la o Helamana maluna iho ona e hai aku i na kanaka i ka olelo a ke Akua; no ka mea, no ka nui loa o na kaua a me na paio, ua lilo ia i mea e pono ai e hooponopono hou iloko o ka ekalesia;

45. Nolaila, hele aku la o Helamana a me kona mau kaikaina, a hai aku la i ka olelo a ke Akua me ka mana nui, i ka hoomaopopo ana i na kanaka he nui no ko lakou mau hewa, a he kumu ia no lakou e mihi ai i ko lakou mau hala, a e bapetizo ia i ka Haku ko lakou Akua.

46. A eia kekahi, hookupaa hou aku la lakou i ka ekalesia o ke Akua, mawaena o ka aina a puni;

47. He oiaio, ua hana ia na mea hooponopono e pili ana i ke kanawai. A ua koho ia na lunakanawai o lakou, a me na lunakanawai nui o lakou.

48. A hoomaka ae la ka poe kanaka o Nepai e hoopomaikai hou ia ma ka aina, a hoomaka ae la e hoolaha a e mahuahua nui hou ma ka ikaika ma ka aina. A hoomaka ae la no hoi lakou e mahuahua nui loa ma ka waiwai;

49. Aka, me ko lakou waiwai, a me ko lakou ikaika, a me ko lakou pomaikai, aole nae lakou i hookiekie ia ae ma ka haakei o ko lakou mau maka; aole hoi lakou i lolohi e hoomanao i ka Haku, i ko lakou Akua; aka, hoohaahaa nui loa lakou ia lakou iho imua ona;

50. He oiaio, hoomanao iho la lakou i na mea nui a ka Haku i hana mai ai no lakou, oiai ua hoopakele mai oia ia lakou mai ka make mai, mai na mea paa mai, a mai na halepaahao mai, a mai kela ano a mai keia ano o ka popilikia; a ua hoopakele mai la oia ia lakou mailoko mai o na lima o ko lakou poe enemi.

51. A ua pule mau aku la lakou i ka Haku ko lakou Akua, a hoopomaikai mai la ka Haku ia lakou, e like me kana olelo, a mahuahua ikaika ae la lakou, a pomaikai aku la ma ka aina.

52. A eia kekahi, ua hana ia mai ua mau mea nei a pau. A make aku la o Helamana, ma ka makahiki kanakolukumamalima o ke au o na lunakanawai maluna iho o ka poe kanaka o Nepai.