1. Ano, e kaʻu keiki Helamana, ke kauoha aku nei au ia oe e lawe oe i na mooolelo i waiho ia mai me au;

2. A ke kauoha aku nei au ia oe e kakau iho oe i mooolelo no keia poe kanaka, me aʻu i hana ai, maluna iho o na papa o Nepai, a e malama laa i ua mau mea nei a pau aʻu i malama ai, e like me aʻu i malama ai ia mau mea; no ka mea, no kekahi kumu nui naauao i malama ia ai ia mau mea;

3. A me keia mau papa keleawe i piha ai me keia mau kaha, me na mooolelo o na palapala hemolele maluna iho o ia mau mea, a me ke kuauhau o ko kakou poe kupuna, mai kinohi mai.

4. Aia hoi, ua wanana ia mai e ko kakou poe kupuna, e malama ia ua mau mea nei, a e haawi ia aku mai kekahi hanauna aku i kekahi hanauna aku, a e malama ia a e pulama ia ma ka lima o ka Haku, a hiki i ka wa e hele aku ai ia mau mea i na lahuikanaka, a me na ohana, i na olelo, a me na kanaka a pau, i ike ai auanei lakou no na mea pohihihi i kakau ia ai maluna olaila.

5. Ano hoi, ina e malama ia ia mau mea, e mau ko lakou huali e pono ai; he oiaio, a e mau no ko lakou huali; he oiaio, a me na papa a pau no hoi i piha ai me na palapala hemolele.

6. Ano, e manao paha oe he mea naaupo keia iloko oʻu; aka hoi, ke i aku nei au ia oe, ma o na mea uuku a ano ole la, e lawe ia mai ai a ko na mea nui; a e hoohoka ana na mea uuku i ka poe naauao ma na manawa he nui.

7. A ke hana la ka Haku ke Akua ma o na hana la e lawe mai ai i kona mau kumumanao nui a mau loa; a ma o na mea uuku loa la e hoohoka ana ka Haku i ka poe naauao, a e lawe mai ana i ke ola no na uhane he nui loa.

8. Ano, a hiki i keia manawa, he mea naauao keia i ke Akua i malama ia ai ua mau mea nei; no ka mea hoi, ua hooakea mai ua mau mea nei i ka hoomanao ana o keia poe kanaka, he oiaio, a hoomaopopo hoi i na mea he nui i ka hewa o ko lakou mau aoao, a lawe mai la ia lakou i ka ike i ko lakou Akua, i ka hoola ia ana o ko lakou mau uhane.

9. He oiaio, ke i aku nei au ia oe, ina aole no keia mau mea a ua mau mooolelo nei i piha ai, i kakau ia ai maluna iho o ua mau papa nei, ina ua hiki ole ia Amona a me kona mau hoahanau ke hoomaopopo aku i na tausani he nui wale o ko Lamana poe, no na mooolelo pololei ole o ko lakou poe kupuna; he oiaio, ua lawe mai ua mau mooolelo nei a me ka lakou mau olelo ia lakou la i ka mihi; oia, ua lawe mai ua mau mooolelo nei ia lakou la i ka ike i ka Haku, ko lakou Akua, a e hauoli iloko o Iesu Kristo, ko lakou Mea Hoolapanai.

10. A owai la ka mea i ike, anoai e lilo ua mau mea nei i mea hana i ka lawe ana mai i na tausani he nui wale o lakou, he oiaio, a me na tausani he nui wale hoi o ko kakou poe hoahanau ai oolea, ko Nepai poe, ka poe e hoopaakiki ana ano i ko lakou mau naau iloko o ka hewa a me ka hana ino, i ka ike i ko lakou Mea Hoolapanai?

11. Aole i hoike ia mai kela mau mea pohihihi a pau loa iaʻu i keia manawa; nolaila e hooki no au.

12. A e lawa paha ia ke olelo wale no au, ua malama ia ua mau mea nei no kekahi hana naauao, a ua ikea keia hana e ke Akua; no ka mea, ke ao mai la oia ma ka naauao maluna iho o kana mau hana a pau, a ua pololei kona mau ala, a o kana hana ana, oia hookahi mau loa no ia.

13. E hoomanao, e hoomanao, e kaʻu keiki Helamana, i ka nui o ka ikaika o na kauoha a ke Akua. A i mai la oia, Ina e malama mai oukou i kaʻu mau kauoha, e hoopomaikai ia oukou ma ka aina; aka, ina e malama ole oukou i kana mau kauoha, e hooki ia aku oukou mai kona alo aku.

14. Ano, e hoomanao, e kaʻu keiki, ua waiho ke Akua ia oe i ua mau mea laa nei, ana i malama laa mai ai, a, ana e malama ai a e pulama ai no hoi no kekahi hana naauao iloko ona, e hiki ia ia ke hoike ae i kona mana i na hanauna e hiki mai ana.

15. Ano, aia hoi, ke hai aku nei au ia oe ma o ka Uhane la o ka wanana, ina e ae oe maluna o na kauoha a ke Akua, aia hoi, e lawe ia aku keia mau mea laa mai ou kau, ma ka mana o ke Akua, a e hookuu ia aku oe ia Satana, nana e kanana mai ia oe me he opala la imua o ka makani;

16. Aka, ina e malama oe i na kauoha a ke Akua, a e hana aku me keia mau mea laa, e like me ka mea a ka Haku e kauoha mai ai ia oe, (no ka mea, he pono nou e hoopii aku i ka Haku no na mea a pau au e hana aku ai me keia mau mea laa,) aia hoi, aohe he mana o ka honua nei a o ka po e hiki ai ke lawe aku i ua mau mea laa la mai ou aku, no ka mea, he mana ke Akua i ka hooko ana i kana mau olelo a pau;

17. No ka mea, e hooko mai no oia i na olelo pomaikai a pau ana e haawi mai ai ia oe, no ka mea, ua hooko mai la oia i na olelo pomaikai ana i haawi mai ai i ko kakou poe kupuna.

18. No ka mea, olelo paa oia ia lakou e hookoe mai oia i ua mau mea nei no kekahi hana naauao iloko ona, i hiki ia ia ke hoike ae i kona mana i na hanauna e hiki mai ana.

19. Ano, aia hoi, ua hooko mai oia i kekahi kumumanao i ka hoihoi hou ana i na tausani he nui wale o ko Lamana poe i ka ike i ka oiaio; a ua hoike mai oia i kona mana iloko o lakou, a e hoike mai no oia i kona mana iloko o lakou no hoi, i na hanauna e hiki mai ana; nolaila, e malama ia ua mau mea nei;

20. Nolaila, ke kauoha aku nei au ia oe, e kaʻu keiki Helamana, e ikaika oe i ka hooko ana i kaʻu mau olelo a pau, a e ikaika hoi oe i ka malama ana i na kauoha a ke Akua, me ia i palapala ia ai.

21. Ano, e olelo aku no au ia oe no kela mau papa he iwakaluakumamaha, i malama ai oe i ua mau mea la, i hoike ia aku ai i keia poe kanaka na mea pohihihi a me na hana o ka pouli, a me ka lakou mau hana malu, oia no na hana malu a kela poe kanaka, ka poe i anai ia ai; he oiaio, e hoike ia aku ko lakou pepehi kanaka ana a pau, a powa ana, a me ko lakou hao wale ana, a me ka lakou hana ino, a mau mea hoopailua, i keia poe kanaka; he oiaio, e malama oe i keia mau mea kuhikuhi nei.

22. No ka mea, aia hoi, ike aku la ka Haku ua hoomaka kona poe kanaka e hana iloko o ka pouli, he oiaio, e hana i na mea hoopailua a me na pepehi kanaka malu; nolaila, i mai la ka Haku, Ina aole lakou e mihi, e anai loa ia lakou mai ka ili aku o ka honua.

23. A i mai la ka Haku, E hoomakaukau no au no kaʻu kauwa o Gazelema, he pohaku, he mea ia e alohi aku ma ka pouli i malamalama, e hiki iaʻu ke hoike aku i koʻu poe kanaka, ka poe a malama ana iaʻu, e hiki iaʻu ke hoike ia lakou i na hana a ko lakou poe hoahanau; he oiaio, i ka lakou mau hana malu, i ka lakou mau hana o ka pouli, a me ka lakou hana ino a mau mea hoopailua.

24. Ano, e kaʻu keiki, ua hoomakaukau ia ua mau mea kuhikuhi nei, i ko ai ka olelo a ke Akua, ana i olelo mai ai, i ka i ana:

25. E hoopuka aku no au noloko mai o ka pouli i ka malamalama, i ka lakou mau hana malu a me ko lakou mau mea hoopailua a pau; a ke mihi ole lakou, e anai loa aku au ia lakou mai ka ili aku o ka honua; a e hoopuka aku no au i ka malamalama i ko lakou mau mea malu a me na mea hoopailua a pau, i kela lahuikanaka i keia lahuikanaka, ka poe e noho ana auanei ma ka aina.

26. Ano, e kaʻu keiki, ke ike nei kaua aole lakou i mihi; nolaila, ua anai ia mai lakou, a pela ma keia mea ua ko ka olelo a ke Akua; he oiaio, o ka lakou hana malu ino ua hoopuka ia mai noloko mai o ka pouli, a ua hoike ia mai ia kakou.

27. Ano, e kaʻu keiki, ke kauoha aku nei au ia oe e aua oe i ka lakou mau hoohiki a pau, a me ka lakou mau berita, a me ka lakou ae like ana iloko o ko lakou mau hana ino malu; he oiaio, a me ko lakou mau hoailona a me ko lakou mau mea ano e, nau e aua mai mai keia poe kanaka mai, i ike ole ai lakou ia mau mea, o haule iho paha lakou iloko o ka pouli no hoi, a e anai ia mai auanei.

28. No ka mea, aia hoi, aia no he olelo hoopoino maluna iho o keia aina a pau, e hiki mai ai ka anai ana maluna iho o kela poe a pau e hana ana i ka pouli, e like me ka mana o ke Akua, ia lakou e oo loa ai; nolaila, au e makemake nei e anai ole ia mai keia poe kanaka.

29. Nolaila, e aua oe i keia mau mea i kukakuka malu ia no ka lakou mau hoohiki a me ka lakou mau berita, mai keia poe kanaka ae: a no ka lakou hana ino, a me ka lakou pepehi kanaka ana, a me ko lakou mau mea hoopailua, kau wale no ia e hoike aku ai ia lakou; a e ao aku oe ia lakou e hoowahawaha aku i ka hana ino e like me ia, a me na mea hoopailua a pepehi kanaka ana; a e ao aku no hoi ia lakou, ua anai ia mai ua poe kanaka nei no ka lakou hana ino, a me na mea hoopailua, a me ko lakou pepehi kanaka ana.

30. No ka mea, aia hoi, pepehi aku la lakou i na kaula a pau o ka Haku a make loa, ka poe i hele ae mawaena o lakou e hai aku ia lakou no ka lakou mau hana ino; a hea ae la ke koko o ka poe a lakou i pepehi iho ai, i ka Haku, i ko lakou Akua, no ka hoopai maluna iho o ka poe nana lakou i pepehi; a pela i hiki mai ai na hoopai o ke Akua maluna iho o ua poe nei i hana i ka pouli a me ka hui pu malu ana;

31. He oiaio, a e hoopoino ia ka aina ia wa aku ia wa aku i ua poe la e hana ana i ka pouli a me na hui pu malu ana, ma ka anai ia ana, ke mihi ole lakou mamua o ko lakou oo loa ana.

32. Ano, e kaʻu keiki, e hoomanao oe i na olelo aʻu i olelo aku ai ia oe; mai waiho aku i kela mau mea i kuka malu ia i keia poe kanaka, aka e ao aku ia lakou i ka inaina mau loa i ka hewa a me ka ino;

33. E hai aku ia lakou i ka mihi, a me ka manaoio i ka Haku, ia Iesu Kristo; e ao aku ia lakou e hoohaahaa ia lakou iho, a e akahai a e haahaa ma ka naau; e ao aku ia lakou e pale aku i kela hoowalewale i keia hoowalewale o ke diabolo, me ko lakou manaoio i ka Haku o Iesu Kristo;

34. E ao aku ia lakou e hoopalaleha ole i na hana maikai, aka e akahai a e haahaa ma ka naau; no ka mea, o ka poe me neia e loaa ia lakou ka maha no ko lakou mau uhane.

35. E hoomanao, e kaʻu keiki, a e ao i ka naauao i kou wa opio; he oiaio, e ao ma kou wa opio e malama i na kauoha a ke Akua;

36. He oiaio, a e hea aku i ke Akua no kou kokua ia mai a pau; he oiaio, e hana aku oe i kau hana ana a pau i ka Haku, a i kela wahi keia wahi au e hele aku ai, e hele oe iloko o ka Haku; he oiaio, e kau ia kou mau manao a pau i ka Haku; he oiaio, e kau ia na kuko o kou naau maluna iho o ka Haku no ka wa pau ole;

37. E kuka oe me ka Haku i na mea a pau au e hana ai, a e kuhikuhi mai no oia ia oe no ka maikai; he oiaio, ia oe e moe iho ai i ka po, e moe iho i ka Haku, i kiai mai oia maluna iho ou i kou hiamoe ana; a ia oe e ala ai i ke kakahiaka, e piha kou naau me ke aloha aku i ke Akua; a ina e hana oe i keia mau mea, e hookiekie ia auanei oe iluna ma ka la hope.

38. A, ano, e kaʻu keiki, he mea kaʻu e olelo aku ai ia oe no ka mea a ko kakou poe kupuna i kapa ai he mea poepoe, a he mea kuhikuhi; no ka mea, kapa aku la ko kakou poe kupuna ia mea, liahona, oia no ma ka hoohalike ana, he panana; a na ka Haku ia i hoomakaukau.

39. Aia hoi, aole e hiki i kekahi kanaka ke hana mamuli o ke ano o ka hana akamai me ia, aia hoi, ua hoomakaukau ia ia mea e hoike ai i ko kakou poe kupuna i ke ala a lakou e hele aku ai ma ka waonahele;

40. A hana aku la ia no lakou e like me ko lakou manaoio i ke Akua: nolaila, ina he manaoio ko lakou e manaoio ai ua hiki i ke Akua ke kauoha mai i kela manamana e kuhikuhi i ke ala a lakou e hele aku ai, aia hoi, ua hana ia ia; nolaila, ua loaa ia lakou keia hana mana, a me na hana mana e ae he nui i hana ia mai ai ma ka lima o ke Akua, ia la aku ia la aku;

41. Aka hoi, no ka hana ia ana o kela mau hana mana ma na mea uuku, ua hoike mai la no nae ia mea i na hana kupaianaha ia lakou. Ua hoopalaleha lakou, a hoopoina iho la e hana me ko lakou manaoio a ikaika, alaila, ua oki iho la kela mau hana kupaianaha, a, aole lakou i holomua ma ko lakou hele ana;

42. Nolaila, noho iho la lakou ma ka waonahele, i ole, aole lakou i hele ma ke ala pololei, a ua hoopilikia ia mai i ka pololi a me ka makewai, no ka lawehala ana.

43. Ano, e kaʻu keiki, ke makemake nei au e hoomaopopo oe, aole o keia mau mea me ke aka ole; no ka mea, me ko kakou poe kupuna i palaleha ai i ka malama ana i ua panana nei, (ano, no ko ke kino keia mau mea,) aole o lakou pomaikai; pela no hoi ia me na mea o ko ka uhane;

44. No ka mea, aia hoi, ua like ka oluolu o ka malama ana aku i ka olelo a Kristo, ka mea e kuhikuhi mai i ke ala pololei i ka pomaikai mau loa, me ia no ko kakou poe kupuna e malama aku ai i ua panana nei, ka mea nana i kuhikuhi mai ia lakou i ke ala pololei i ka aina i olelo mua ia ai.

45. Ano, ke i aku nei au, aole anei he hoailona ma keia mea? No ka mea, e like me ka oiaio o ka lawe ana o keia mea kuhikuhi i ko kakou poe kupuna, ma ka hahai ana i kona ihu, i ka aina i olelo mua ia ai, pela no hoi me na olelo a Kristo ke hahai aku kakou i ke kuhikuhi ana o ia mau olelo, e halihali aku ai ia kakou ma o loa aku o keia awawa o ke kaumaha, iloko o kahi aina i olelo mua ia ai, i oi loa aku ka pomaikai.

46. E kaʻu keiki, mai hoopalaleha kaua no ka paakiki ole o ke ala; no ka mea, pela no ia me ko kakou poe kupuna; no ka mea, pela no ia i hoomakaukau ia ai no lakou, ina e nana lakou, e hiki ia lakou ke ola; pela no hoi ia me kakou. Ua hoomakaukau ia ke ala, a ina e nana aku kakou, e hiki ia kakou ke ola no ka wa pau ole.

47. Ano, e kaʻu keiki, e makaala oe e malama i ua mau mea laa nei; he oiaio, e makaala e nana aku oe i ke Akua a e ola. E hele aku i keia poe kanaka, a e hai aku i ka olelo, a e kuoo. E kaʻu keiki e, aloha.