1. A eia kekahi, a pau ae la ka olelo ana aku a Alama i na kanaka o ka ekalesia, i kukulu ia ma ke kulanakauhale o Zarahemela, hoolilo iho la oia i na kahuna a me na lunakahiko, ma ke kau ana aku i kona mau lima e like me ka aoao o ke Akua, e noho luna a e kiai maluna o ka ekalesia.

2. A eia kekahi, o na mea i hui ole ia me ka ekalesia, ka poe i mihi i ko lakou mau hewa, ua bapetizo ia i ka mihi, a ua hookomo ia iloko o ka ekalesia.

3. A eia hoi kekahi, o na mea i hui ia me ka ekalesia, ka poe i mihi ole i ko lakou hewa, a hoohaahaa ia lakou iho imua o ke Akua; ke olelo nei au no ka poe i hookiekie ia ma ka haaheo o ko lakou mau naau; ua kiola ia aku ua poe nei, a holoi ia ae la na inoa o lakou, i helu pu ole ia ko lakou poe inoa me ko ka poe pono;

4. A pela lakou i hoomaka ai e hookupaa aku i ka noho pololei ana o ka ekalesia ma ke kulanakauhale o Zarahemela.

5. Ano, ua makemake au e ike oukou ua haawi like ia ka olelo a ke Akua i na mea a pau, aole i hoonele ia kekahi i ka pono o ka hoakoakoa ana ia lakou iho e hoolohe i ka olelo a ke Akua;

6. Aka hoi, ua kauoha ia mai na keiki a ke Akua e hoakoakoa pinepine ia lakou iho, a e hui ma ka hookeai ana a ma ka pule mana, no ka pomaikai o na uhane o ka poe i ike ole i ke Akua.

7. Ano, eia kekahi, ia Alama i hooholo mai ai i ua mau mea hooponopono nei, haalele aku la oia ia lakou, he oiaio, i ka ekalesia ma ke kulanakauhale o Zarahemela, a hele aku la ma ka hikina o ka muliwai o Sidona iloko o ke awawa o Gideona, malaila ua kukulu ia kekahi kulanakauhale i kapa ia o ke kulanakauhale o Gideona, ma ke awawa i kapa ia o Gideona, i kapa ia ai mamuli o ke kanaka i pepehi ia ai ma ka lima o Nehora me ka pahikaua.

8. A hele aku la o Alama, a hoomaka ae la e hai aku i ka olelo a ke Akua i ka ekalesia i kukulu ia ma ke awawa o Gideona, e like me ka hoike ana o ka oiaio o ka olelo i olelo ia ai e kona poe kupuna, a e like me ka Uhane o ka wanana iloko ona, e like me ka hoike ana o Iesu Kristo, ke Keiki a ke Akua, ka mea e hele mai ana e hoolapanai i kona poe kanaka mai ko lakou mau hewa ae, a me ka aoao hemolele hoi ana i hea ia ai. A pela ia i palapala ia ai. Amene.