1. A eia kekahi, o ko Nepai poe ka poe i pepehi ole ia ma na mea kaua, mahope iho o ko lakou kanu ana i pepehi ia; ano, aole i helu ia ka poe i pepehi ia, no ka nui loa o lakou; mahope iho ka pau ana o ko lakou kanu ana i ko lakou poe make, hoi aku la lakou a pau i na aina o lakou, a i na hale o lakou, a i na wahine a lakou, a me na keiki a lakou.

2. Ano, ua pepehi ia na wahine a me na keiki he nui me ka pahikaua, a me na pua holoholona o lakou, a me na ohana holoholona o lakou he nui loa no hoi; a ua nui na kihapai hoi o ka hua liilii i hoopau ia, no ka mea, ua hahi ia ilalo e na puali o kanaka.

3. Ano, o ka poe o ko Lamana poe a me ko Amaliki poe i pepehi ia ma ke kapa o ka muliwai Sidona, ua kiola ia aku iloko o na wai o Sidona; a, aia hoi na iwi o lakou iloko o ka hohonu o ke kai, a he nui loa lakou.

4. A ua ike okoa ia ko Amaliki poe mai ko Nepai poe ae; no ka mea, ua hoailona aku la lakou ia lakou iho me ka ulaula ma ko lakou mau lae, mamuli o ke ano o ko Lamana poe; aka hoi, aole lakou i kole i ko lakou mau poo e like me ko Lamana poe.

5. Ano, ua kole ia na poo o ko Lamana poe; a ua olohelohe lakou, koe wale no kahi ili i kaei ia a puni ko lakou mau puhaka, a me ko lakou aahu pale kaua, i kakoo ia a puni lakou, a me na kakaka a lakou, a me na pua, a me na ala a lakou, a me na maa a lakou, a ia mea aku ia mea aku.

6. A ua haulaula na ili o ko Lamana poe e like me ka hoailona i hookau ia mai maluna iho o ko lakou poe kupuna, oia no kekahi poino maluna o lakou no ka lakou lawehala a me ko lakou kipi ana i ko lakou mau hoahanau, oia o Nepai, o Iakoba, o Iosepa, a me Sama, he mau kanaka pono a hemolele lakou.

7. A imi mai la ko lakou poe kaikuaana e luku mai ia lakou; nolaila, ua hoomainoino ia lakou; a hookau ae la ka Haku ke Akua i hoailona maluna iho o lakou, he oiaio, maluna iho o Lamana laua me Lemuela, a me na keikikane a Isemaela, a me na wahine a ko Isemaela;

8. A ua hana ia keia, i ike okoa ia ka lakou poe mamo, mai ka poe mamo ae a ko lakou mau hoahanau, e hiki i ka Haku ma ia mea ke hoola mai i kona poe kanaka, i hui pu ole ai lakou a e manaoio ma na mooolelo pololei ole, na mea hoi e luku ia mai ai lakou.

9. A eia kekahi, o ka mea nana i hoohui pu i kana hua me ka ko Lamana poe, ua lawe mai la oia i ua poino hookahi la maluna o kana hua;

10. Nolaila, o ka mea nana i ae aku e alakai ia aku e ko Lamana poe, ua kapa ia ma kela inoa, a ua hookau ia kekahi hoailona maluna ona.

11. A eia kekahi, o ka poe i manaoio ole i ka mooolelo o ko Lamana poe, aka, i manaoio i kela mau mooolelo i lawe ia mai ai mailoko mai o ka aina o Ierusalema, a ma na mooolelo pololei hoi a ko lakou poe kupuna, ka poe i manaoio i na kauoha a ke Akua, a malama aku ia mau mea, ua kapa ia ko Nepai poe, a o ka poe kanaka hoi o Nepai, mai ia manawa aku;

12. A o lakou no ka poe i kakau i na mooolelo oiaio o ko lakou poe kanaka, a me ka poe kanaka hoi o ko Lamana.

13. Ano, e hoi hou aku kakou i ko Amaliki poe, no ka mea, ua hookau ia ae la i hoailona no hoi maluna iho o lakou; he oiaio, hookau ae la lakou i ka hoailona maluna o lakou iho, he oiaio, he hoailona ulaula ma ko lakou mau lae.

14. Pela i ko ai ka olelo a ke Akua, no ka mea, eia na olelo ana i olelo aku ai ia Nepai; Aia hoi, ua hoomainoino au i ko Lamana poe; a e kau aku au i hoailona maluna iho o lakou, i hookaawale ia ai lakou a me ka lakou poe hua mai ou aku a me kau poe hua, mai keia manawa aku a mau loa aku, ke mihi ole lakou i ko lakou mau hewa a e huli mai iaʻu, i aloha aku ai au ia lakou.

15. A eia hou, e kau aku au i hoailona maluna o ka mea e hui pu ana i kana hua me kou poe hoahanau, i hoomainoino pu ia ai no hoi lakou.

16. A eia hou, e kau aku no au i hoailona maluna o ka mea e kaua mai ana ia oe a i kau poe hua.

17. A ke i hou aku nei au, o ka mea e haalele ae ia oe, aole oia e kapa hou ia kau hua; a e hoopomaikai aku no au ia oe, a pela aku, a me ka mea e kapa ia auanei kau hua, ma neia hope aku a mau loa aku; a oia na olelo hoopomaikai a ka Haku ia Nepai, a i kana poe hua.

18. Ano, aole o ko Amaliki poe i ike e hooko ana lakou i na olelo a ke Akua, ia lakou i hoomaka ai e hoailona ia lakou iho ma ko lakou mau lae; aka hoi, ua puka mai la lakou ma ke kipi ana ma ke akea i ke Akua; nolaila, he mea e pono ai e haule ae ka hoomainoino maluna iho o lakou.

19. Ano, ke makemake nei au e ike oukou ua lawe lakou maluna o lakou iho i ka hoomainoino; a pela no o kela kanaka keia kanaka i hoomainoino ia, i lawe ai maluna iho ona i kona hoohewa ia iho.

20. Ano, eia kekahi, aole he nui na la mahope iho o ke kaua i kaua ia ai ma ka aina o Zarahemela, e ko Lamana a me ko Amaliki poe, hiki mai la kekahi puali koa hou, o ko Lamana poe maluna iho o ka poe kanaka o Nepai ma ua wahi hookahi la, kahi a ka poe kaua mua i halawai pu ai me ko Amaliki poe.

21. A eia kekahi, ua hoouna ia aku la kekahi poe koa e kipaku aku ia lakou la mawaho o ko lakou aina.

22. Ano, ua pilikia iho la o Alama me kahi eha, aole oia i hele e kaua aku i keia manawa i ko Lamana poe;

23. Aka, hoouna aku oia i poe kaua he lehulehu e ku e ia lakou la; a pii aku la lakou a luku iho la i ka poe he nui o ko Lamana poe, a hooauhee aku la i ka poe i koe o lakou mawaho o na palena o ko lakou aina;

24. Alaila, hoi hou ae la lakou, a hoomaka ae la e hookupaa i ka malu ma ka aina, a ua hoopilikia hou ole ia mai no kekahi manawa e ko lakou poe enemi.

25. Ano, ua hana ia iho la ua mau mea nei a pau, he oiaio, ua hoomaka ia ua mau kaua a paio nei, a i hoopau ia hoi ma ka makahiki elima o ke au o na lunakanawai;

26. A i ka makahiki hookahi ua hoouna ia aku na tausani a me na umi tausani o na uhane i ke ao pau ole, e hiki ia lakou ke ohi i ko lakou uku e like me ka lakou hana, ina paha he maikai ia, ina paha he ino ia, e ohi i ka pomaikai mau loa, a i ole ia, i ka poino mau loa, e like me ka uhane a lakou i hoolohe ai a malama, ina paha he uhane maikai, ina paha he ino;

27. No ka mea, e loaa ana i kela kanaka i keia kanaka ka uku mai ka mea ana i hoolohe mai ai a malama, a ua like keia me na olelo a ka Uhane o ka wanana; nolaila, e like ia me ka oiaio. A pela i pau ai ka makahiki elima o ke au o na lunakanawai.