1. A eia kekahi, kena aku la ke alii Lamoni i kana poe kauwa e ku mai, a e hoike mai i na mea a pau a lakou i ike ai no ia mea.

2. A ia lakou a pau i hoike aku ai i na mea a lakou i ike ai, a ua ike oia i ka malama pono ana o Amona ma ka hoopakele ana i na pua ona, a no kona mana nui hoi i kona paio ku e ana aku i ua poe la, ka poe i imi e pepehi mai ia, ia, ua kahaha nui loa oia, a i ae la, He oiaio ae la, ua nui ae oia nei mamua o ke kanaka. Aia hoi, aole anei keia ka Uhane Nui nana i hoouna mai i na hoopai nui me neia maluna iho o keia poe kanaka, no ko lakou pepehi kanaka ana?

3. A pane aku la lakou i ke alii, a i aku la, Ina paha oia ka Uhane Nui, ina paha he kanaka, aole o makou i ike; eia ka makou i ike ai, aole oia e hiki ke pepehi ia mai e na enemi o ke alii; aole hoi e hiki ia lakou ke hoopuehu mai i na pua o ke alii ia ia e hele pu ana me makou, no kona akamai a ikaika nui; nolaila, ua ike makou he hoaaloha oia no ke alii. Ano, e ke alii, aole makou i manaoio na kekahi kanaka ka mana me neia, no ka mea, ua ike makou aole oia e hiki ke pepehi ia mai.

4. A, ano, i ka wa a ke alii i lohe ai i ua mau olelo nei, i ae la oia ia lakou, Ano, ke ike nei au oia no ka Uhane Nui; a ua iho iho nei oia i keia manawa e malama mai i ko oukou mau ola, i pepehi ole aku ai au ia oukou, me au i ko oukou poe hoahanau. Ano, o keia no ka Uhane Nui nona i olelo mai ai ko kakou poe kupuna.

5. Ano, oia no ka mooolelo o Lamoni, ana i loaa ai mai kona makua mai, aia no he Uhane Nui. Me ko lakou manaoio i kahi Uhane Nui, ua manao iho la nae lakou o ka mea a lakou i hana ai, he pololei ia; aka hoi, hoomaka iho la o Lamoni e makau nui loa, me ka makau no ka manao ua hana hewa paha ia i ka pepehi ana i kana poe kauwa;

6. No ka mea, ua pepehi oia i na mea he nui o lakou, no ka hoopuehu ana o ko lakou poe hoahanau i na pua o lakou ma kahi o ka wai; a pela ae la no ka hoopuehu ia ana o na pua o lakou, ua pepehi ia iho la lakou.

7. Ano, he mea maa i ko Lamana poe, e ku ma na wai o Sebusa, e hoopuehu aku i na pua o kanaka, i hiki ia lakou ke hoa aku i kekahi poe he nui i hoopuehu ia ai, i ko lakou aina iho, he hana ia e powa ai mawaena o lakou.

8. A eia kekahi, ninau ae la ke alii Lamoni i kana poe kauwa, i ka i ana, Ai la ihea ua kanaka nei nona keia mana nui?

9. A i aku la lakou ia ia, Aia hoi, e hanai ana oia i kou mau lio. Ano, ua kauoha e mai la ke alii i kana poe kauwa mamua aku o ka wa i hoohainu ai i na pua o lakou, e hoomakaukau lakou i kona mau lio a mau kaakaua, a e alakai aku ia ia i ka aina o Nepai; no ka mea, ua kukala ia he ahaaina nui ma ka aina o Nepai, e ka makuakane o Lamoni, oia no ke alii maluna iho o ka aina a pau.

10. Ano, i ke alii Lamoni i lohe ai e hoomakaukau ana o Amona i kona mau lio a me kona mau kaakaua, ua pihoihoi nui loa ae oia, no ka malama pono o Amona, i ka i ana, He oiaio, aole kekahi kauwa mawaena o kaʻu poe kauwa a pau, i malama pono me keia kanaka; no ka mea, ke hoomanao iho nei oia i kaʻu mau kauoha a pau e hana aku ia mau mea.

11. Ano, ke ike lea nei au o keia no ka Uhane Nui; a ua makemake au ia ia e komo mai iloko ioʻu nei, aka ke aa ole nei au.

12. A eia kekahi, ia Amona i hoomakaukau ai i na lio a i na kaakaua no ke alii a me kana poe kauwa, hele aku la ia iloko i ke alii la, a ike aku la oia ua ano e ae la ka helehelena o ke alii; nolaila, ua anehe oia e hoi aku mai kona alo aku;

13. A i mai la kekahi o ka ke alii poe kauwa ia ia, E Rabana, oia ma ka hoohalike ana, E ke alii nui a mana, e manao ana i ko lakou poe alii, he poe mana; a pela oia i i mai ai ia ia, E Rabana, ke makemake nei ke alii ia oe e kali;

14. Nolaila, hoohuli ae la o Amona ia ia iho i ke alii, a i aku la ia ia, Heaha la kou makemake i hana aku ai au nou, e ke alii? A aole o ke alii i ekemu mai ia ia no hookahi hora ka loihi, mamuli o ko lakou manawa, no ka mea, aole oia i ike i kana mea e olelo mai ai ia ia.

15. A i hou aku la o Amona ia ia, Heaha kou makemake iaʻu? A ekemu ole mai ke alii ia ia.

16. A eia kekahi, ua piha o Amona i ka Uhane o ke Akua, nolaila, ike iho la oia i na manao o ke alii. A i aku la oia ia ia, No kou lohe ana anei ua hoopakele ae au i kau poe kauwa a me kou mau pua, a pepehi aku la i ehiku o ko lakou poe hoahanau me ka maa, a me ka pahikaua, a ooki aku la i na lima o na mea e ae, i hiki ke hoomalu i kou mau pua a i kau mau kauwa; aia hoi, o keia anei ke kumu o kou kahaha ana?

17. Ke i aku nei au ia oe, Heaha la ia, i nui ai kou kahaha ana me neia? Aia hoi, he kanaka no au, a o kau kauwa no; nolaila, o ka mea au i makemake ai i pololei, oia kaʻu e hana ai.

18. Ano, i ke alii i lohe ai i keia mau olelo, kahaha hou iho la oia, no ka mea, ike ae la oia ua hiki ia Amona ke hoomaopopo mai i kona mau manao; aka, me keia nae, oaka mai la ke alii Lamoni i kona waha; a i mai la ia ia, Owai la oe? O kela Uhane Nui anei oe, nana i ike i na mea a pau?

19. Pane aku la o Amona a i aku la ia ia, Aole ia owau.

20. A i mai la ke alii, Pehea la oe i ike mai ai i na manao o koʻu naau? Ua hiki ia oe ke olelo wiwo ole mai a ke hai mai no ua mau mea nei; a e hai mai no hoi, ma ka mana hea oe i pepehi aku ai a i ooki aku ai i na lima o koʻu poe hoahanau, ka poe i hoopuehu mai ai i na pua oʻu.

21. Ano, ina e hai mai oe iaʻu no ua mau mea nei, o ka mea au i makemake mai ai, oia kaʻu e haawi aku ai ia oe; a ina e makemake ia, e hoomalu au ia oe me koʻu poe koa; aka, ua ike au ua nui loa aku kou mana mamua o lakou a pau; aka hoi, o ka mea au e makemake mai ai iaʻu, naʻu ia e haawi aku ai ia oe.

22. Ano, ua naauao o Amona, a kolohe ole nae, i aku la oia ia Lamoni, E hoolohe mai anei oe i kaʻu mau olelo, ina e hai aku au ia oe, ma ka mana hea la aʻu i hana aku ai i ua mau mea nei? A o keia no ka mea aʻu i makemake ai ou mai.

23. A pane mai la ke alii ia ia, a i mai la, Ae, e manaoio no au i kau mau olelo a pau. A pela oia i puni ai i ke akamai.

24. A hoomaka ae la o Amona e olelo aku ia ia me ka wiwo ole, a i aku la ia ia, Ke manaoio nei anei oe aia no he Akua?

25. A pane mai la ia, a i mai la ia ia, Aole au i ike i ke ano o ia mea.

26. A alaila, i aku la o Amona, Ke manaoio nei anei oe aia no he Uhane Nui?

27. A i mai la oia, Ae.

28. A i aku la o Amona, Oia no ke Akua. A i hou aku la o Amona ia ia, Ke manaoio nei anei oe na ua Uhane Nui nei, oia no hoi ke Akua, i hana mai ai i na mea a pau, iloko o ka lani a iloko o ka honua?

29. A i mai la oia, Ae, ke manaoio nei au nana i hana mai i na mea a pau iloko o ka honua; aka aole au i ike i na lani.

30. A i aku la o Amona ia ia, O na lani oia kahi a ke Akua e noho la, a me kona poe anela hemolele a pau.

31. A i mai la ke alii Lamoni, Aia anei ia maluna o ka honua?

32. A i aku la o Amona, Ae, a ke nana mai la oia ilalo nei maluna o na keiki a pau a kanaka; a ua ike oia i na manao a me na makemake a pau o ka naau; no ka mea, ma kona lima i hana ia ai lakou a pau, mai kinohi mai.

33. A i mai la ke alii Lamoni, Ke manaoio nei au i keia mau mea a pau au i olelo mai ai. Ua hoouna ia mai anei oe mai ke Akua mai?

34. I aku la o Amona ia ia, He kanaka no au; a ua hana ia mai ke kanaka i kinohi, mamuli o ke ano like o ke Akua, a ua kahea ia mai au e kona Uhane Hemolele e ao aku i ua mau mea nei i keia poe kanaka, e lawe ia mai lakou e ike i ka mea i pololei a oiaio;

35. A ke noho nei kekahi hapa o ua Uhane la iloko oʻu, e haawi mai ana iaʻu i ka ike, a i ka mana hoi, e like me koʻu manaoio a me na makemake iloko o ke Akua.

36. Ano, ia Amona i olelo aku ai i ua mau olelo nei, hoomaka ae la oia ma ka hana ia ana o ke ao nei, a me ka hana ia ana hoi o Adamu, a hai aku la ia ia i na mea a pau no ka haule ana o kanaka, a hai aku la a waiho ae la imua ona i na mooolelo a me na palapala hemolele o ka poe kanaka, i olelo ia ai e na kaula, a hiki aku i ka wa a ko lakou kupunakane o Lehi i haalele aku ai ia Ierusalema;

37. A hai aku la no hoi oia ia lakou, (no ka mea, i ke alii a i kana poe kauwa ia olelo,) i na kaahele ana a pau o ko lakou poe kupuna ma ka waonahele, a me ko lakou mau pilikia a pau me ka pololi a makewai, a me ko lakou hele ana, a ia mea aku ia mea aku;

38. A hai aku la no hoi oia ia lakou no na kipi ana o Lamana laua me Lemuela, a me na keikikane a Isemaela, he oiaio, o ko lakou kipi ana a pau oia kana i hai aku ai ia lakou; a hoomaopopo aku la oia i na mooolelo a me na palapala hemolele a pau, mai ka manawa a Lehi i haalele aku ai ia Ierusalema, a hiki mai i keia manawa;

39. Aka, aole o keia wale no; no ka mea, hoomaopopo aku la oia ia lakou i ke kumumanao hoolapanai, i hoomakaukau ia ai mai ka hookumu ia ana mai o ke ao nei; a hoike aku la no hoi oia ia lakou no ka hiki ana mai o Kristo; a no na hana a pau a ka Haku i hoike aku ai ia lakou.

40. A eia kekahi, mahope iho kana olelo ana aku i ua mau mea nei a pau, a wehewehe aku la i ke alii, ua manoio iho la ke alii i kana mau olelo a pau.

41. A hoomaka aku la oia e kahea aku i ka Haku, i ka i ana; E ka Haku, e aloha mai oe; e like me kou aloha nui loa au i aloha mai ai i ka poe kanaka o Nepai, pela e aloha mai ai iaʻu a me koʻu poe kanaka.

42. Ano, ia ia i olelo mai ai i keia, haule iho la oia i ka honua, me he mea la ua make oia.

43. A eia kekahi, lalau iho la na kauwa ana ia ia a halihali aku la ia ia iloko i kana wahine la, a waiho iho la ia ia ma kekahi wahi moe; a moe iho la oia me he mea la ua make oia, no na la elua a me na po elua; a uwe iho la kana wahine, a me kana mau keikikane, a me kana mau kaikamahine nona, mamuli o ke ano o ko Lamana poe, e kanikau nui ana no kona make.