1. A eia kekahi, o ko Amaleki poe, a me ko Amulona poe, a me ko Lamana poe e noho ana ma ka aina o Amulona, a ma ka aina o Helama no hoi, a ma ka aina o Ierusalema, a ma ka aina a pau a puni, ka poe i hoohuli ole ia ai, a i lawe ole ai maluna iho o lakou i ka inoa o Anati-Nepai-Lehi, ua hookonokono ia ae e ko Amaleki poe, a e ko Amulona poe, e huhu aku i ko lakou poe hoahanau;

2. A lilo iho la ko lakou inaina ku e ia lakou i mea eha nui loa, a hoomaka ae la lakou e kipi aku i ko lakou alii, a aole lakou i makemake ia ia i alii no lakou; nolaila, lalau aku la lakou i na mea kaua e ku e mai i ka poe kanaka o Anati-Nepai-Lehi.

3. Ano, hooili iho la ke alii i ke aupuni maluna iho o kana keikikane a kapa iho la oia i kona inoa o Anati-Nepai-Lehi.

4. A make aku la ke alii i ua makahiki hookahi la a ko Lamana poe i hoomaka ai e hoomakaukau iho no ke kaua ku e mai i ka poe kanaka o ke Akua.

5. Ano, i ka wa a Amona a me kona mau hoahanau, a me ka poe a pau i pii pu me ia, i ike ai i ka hoomakaukau ana o ko Lamana poe e luku mai i ko lakou poe hoahanau, hele ae la lakou i ka aina o Midiana, a malaila o Amona i halawai pu ai me kona mau hoahanau a pau; a mailaila i hele aku ai lakou i ka aina o Isemaela, e hiki ia lakou ke kukakuka pu me Lamoni, a me kona kaikuaana hoi o Anati-Nepai-Lehi, no ka mea a lakou e hana ai e hoomalu ia lakou iho i ko Lamana poe.

6. Ano, aole kekahi mea mawaena o ka poe kanaka i hoohuli ia ai i ka Haku, nana e lalau aku i na mea kaua e ku e i kona poe hoahanau; aole loa, aole hoi e hoomakaukau aku i kekahi mea no ke kaua; he oiaio, a kauoha mai la no hoi ko lakou alii ia lakou, i ole ai lakou e hana pela;

7. Ano, eia na olelo ana i olelo aku ai i na kanaka no ia mea: Ke aloha aku nei au i koʻu Akua, e koʻu poe kanaka i aloha ia, ua hoouna mai ko kakou Akua nui ma ka lokomaikai i ko kakou poe hoahanau nei, ko Nepai poe, ia kakou e haiolelo mai ia kakou, a e hoomaopopo mai ia kakou no na mooolelo o ko kakou poe kupuna hewa.

8. A, aia hoi, ke aloha nei au i koʻu Akua nui no kona haawi ana mai ia kakou i kekahi hapa o kona Uhane e hoopalupalu mai i na naau o kakou, i hoomaka ai kakou e hoolauna aku me keia poe hoahanau, me ko Nepai poe;

9. A, aia hoi, ke aloha aku nei hoi au i kuu Akua no ka hoomaopopo ia ana o kakou ma keia hoolauna ana no na hala o kakou, a no ka nui o na pepehi kanaka ana a kakou i hana ai;

10. A ke aloha aku nei no hoi au i kuu Akua, he oiaio, i kuu Akua nui, no kona ae ana mai ia kakou e mihi i ua mau mea nei, a no kona kala ana mai no hoi ia kakou i ua mau mea nei, i ko kakou mau hala a mau pepehi kanaka ana he nui a kakou i hana ai, a lawe ana aku i ka hewa mai na naau o kakou aku, ma o na hana maikai la a kana Keiki.

11. Ano, aia hoi, e koʻu poe hoahanau, he mea ane hiki ole ia kakou (no ka mea, o ka poe lilo loa kakou o na kanaka a pau,) ke mihi i ko kakou mau hewa a pau a me na pepehi kanaka ana he nui loa a kakou i hana ai, a e noi i ke Akua e lawe aku ia mau mea mai na naau aku o kakou, no ka mea, he mea ane hiki ole ka lawa ana o ko kakou mihi imua o ke Akua, i lawe aku ai oia i ko kakou kohu.

12. Ano, e oʻu poe hoahanau i aloha loa ia, mahope iho o ko ke Akua lawe ana aku i ko kakou mau kohu, a ua lilo na pahikaua a kakou i huali, mai hookohu hou aku kakou i na pahikaua a kakou ma neia hope aku ma ke koko o ko kakou poe hoahanau.

13. Aia hoi, ke i aku nei au ia oukou, aole, aka e hoopaa kakou i na pahikaua a kakou, i hookohu ole ia ai lakou me ke koko o ko kakou poe hoahanau; no ka mea malia paha ina e hookohu hou aku kakou i na pahikaua a kakou, aole e hiki ke holoi huali hou ia ua mau mea nei ma o ke koko la o ke Keiki a ko kakou Akua nui, e hookahe ia auanei no ke kalahala ana o ko kakou mau hewa.

14. A ua aloha mai ke Akua nui ia kakou, a hoike mai la i ua mau mea nei ia kakou, i make ole ai kakou; he oiaio, a ua hoike mai oia i ua mau mea nei ia kakou mamua o ka hiki ana mai, no ka mea, e aloha mai ana oia i na uhane o kakou e like me kona aloha ana i ka kakou poe keiki; nolaila, ma kona aloha ke hoalauna mai nei oia ia kakou ma o kona poe anela la, i hiki i ke kumumanao hoola ke hoike ia mai ia kakou no hoi e like me ia i na hanauna e hiki mai ana.

15. E, nani wale ke aloha o ko kakou Akua! Ano, aia hoi, he mea ane hiki ole ia kakou ke loaa ka lawe ana aku o na kohu o kakou mai o kakou aku, a ua hoohuali ia na pahikaua e kakou, ea, e huna aku kakou ia mau mea i malama huali ia ai ua mau mea la, me he mea hoike la i ko kakou Akua ma ka la hope, a ma ka la a kakou e lawe ia mai ai e ku imua ona e hookolokolo ia, aole kakou i hookohu aku i na pahikaua a kakou iloko o ke koko o ko kakou poe hoahanau mahope iho o kona haawi ana i kana olelo ia kakou, a i hoomaemae mai ai ia kakou ma o ua mea la.

16. Ano, e koʻu poe hoahanau, ina e imi mai ko kakou poe hoahanau e luku mai ia kakou, aia hoi, e huna aku kakou i na pahikaua a kakou, he oiaio, e kanu hohonu aku kakou ia mau mea iloko o ka honua, i malama huali ia ai ia mau mea, me he hoike la ma ka la hope aole kakou i hana aku me ua mau mea la; a ina e luku mai ko kakou poe hoahanau ia kakou, aia hoi, e haele aku no kakou i ko kakou Akua la a e hoola ia.

17. Ano, eia kekahi, i ka wa a ke alii i hoopau ai i keia mau olelo, a i hoakoakoa pu ia mai ai na kanaka a pau, lalau aku la lakou i na pahikaua a lakou, a me na mea kaua a pau i hana ia ai no ka hookahe ana i ko ke kanaka koko, a kanu hohonu iho la lakou ia mau mea iloko o ka honua;

18. A o keia ka lakou i hana ai, he mea ia ma ko lakou manao e hoike aku ai i ke Akua, a i na kanaka hoi, aole lakou e hana hou aku me na mea kaua no ka hookahe ana i ko ke kanaka koko; a o keia ka lakou i hana ai, e hoohiki ana a e hana berita ana me ke Akua, ua makemake loa lakou e haawi aku i ko lakou mau ola iho, mamua o ka hookahe ana i ke koko o ko lakou poe hoahanau; a ua makemake loa lakou e haawi aku na kekahi hoahanau, mamua o ka lawe ana mai mai ona mai; a ua makemake lakou e hana nui me ko lakou mau lima, mamua o ka hoomaunauna ana i na la o lakou ma ka palaualelo;

19. A pela kakou i ike ai i ka wa i hoohuli ia mai ai keia poe o Lamana e manaoio a e ike i ka oiaio, ua kupaa lakou, a e hoomanawanui aku a hiki aku i ka make, mamua o ka hana hewa aku; a pela kakou i ike ai, ua kanu iho la lakou i na mea o ka malu, oia hoi ua kanu iho la lakou i na mea kaua, i loaa ai ka malu.

20. A eia kekahi, hoomakaukau iho la ko lakou poe hoahanau, ko Lamana poe, no ke kaua, a pii mai la i ka aina o Nepai, me ka manao e pepehi mai i ke alii, a e hoonohonoho iho i kekahi mea ma kona hakahaka, a e luku mai no hoi i ka poe kanaka o Anati-Nepai-Lehi mailoko aku o ka aina.

21. Ano, i ka wa o ka poe kanaka i ike ai e hele ku e mai ana lakou ia lakou nei, haele aku la lakou nei e halawai pu me lakou, a hoomoe iho la lakou nei ia lakou iho imua o lakou i ka honua, a hoomaka ae la e kahea aku i ka inoa o ka Haku; a pela iho la ke ano o ko lakou mau kino i ka wa i hoomaka ai ko Lamana poe e haule mai maluna iho o lakou, a hoomaka iho la e pepehi mai ia lakou me ka pahikaua;

22. A pela iho la me ke ku e ole ia aku, pepehi mai la lakou la i hookahi tausani a me na mea keu elima o lakou nei; a ke ike nei kakou ua pomaikai lakou, no ka mea, ua haele aku la lakou e noho pu me ko lakou Akua.

23. Ano, i ka wa a ko Lamana poe i ike ai aole e hee aku ko lakou poe hoahanau mai ka pahikaua aku, aole hoi lakou e huli ae i ka lima akau, aole hoi i ka lima hema, aka e moe no lakou ilalo a make, a hoolea aku i ke Akua i ka wa e make ana malalo iho o ka pahikaua;

24. Ano, i ko Lamana poe i ike ai i keia, hooki ae la lakou i ka pepehi ana ia lakou nei; a he nui ka poe no lakou na naau i pilihua iloko o lakou no ka poe o ko lakou poe hoahanau i haule iho malalo iho o ka pahikaua, no ka mea, mihi iho la lakou no na mea a lakou i hana ai.

25. A eia kekahi, hoolei iho la lakou ilalo i na mea kaua o lakou, aole lakou e lalau hou aku ia mau mea, no ka mea, ua walania iho la lakou no na pepehi kanaka a lakou i hana ai; a iho mai la lakou ilalo e like me ko lakou poe hoahanau, e paulele ana i ke aloha o ka poe no lakou na lima i hooaka ia e pepehi mai ia lakou.

26. A eia kekahi, ua hui pu ia me ka poe kanaka o ke Akua ia la kekahi poe he nui ae mamua o ka poe i pepehi ia mai; a o ka poe i pepehi mai he poe kanaka pono lakou; nolaila, aole kumu ko kakou e kanalua ai no ko lakou hoola ia ana.

27. A, aole kekahi kanaka hewa i pepehi ia mawaena o lakou; aka, ua nui ae lakou mamua o ke tausani hookahi i lawe ia mai i ka ike i ka oiaio; a pela kakou i ike ai e hana ana ka Haku ma na aoao he nui e hoola mai i kona poe kanaka.

28. Ano, o ka nui loa o ua poe la o ko Lamana, ka poe i pepehi ae i ko lakou poe hoahanau, no ko Amaleki poe a me ko Amulona poe lakou, a mamuli o ka aoao o ko Nehora ka nui loa o lakou.

29. Ano, mawaena o ua poe la ka poe i hui pu ai me ka poe kanaka o ka Haku, aole kekahi no ko Amaleki poe, aole hoi no ko Amulona poe, aole hoi no ka aoao o Nehora, aka, he poe mamo io na Lamana laua me Lemuela;

30. A pela ua hiki ia kakou ke ike lea, mahope iho o ka hoomalamalama ia ana o na kanaka me ka Uhane o ke Akua, a ua loaa ka ike nui no na mea e pili ana i ka pono, a, alaila haule aku iloko o ka hewa a me ka hala, ua lilo lakou i poe paakiki loa aku, a pela i lilo ai ko lakou noho ana i ino loa ae, mamua o ko lakou, ina aole lakou i ike e i kela mau mea.