1. A eia kekahi, mahope iho o na la elua a me na po elua, ua aneane lakou e lawe aku i kona kino a e waiho aku ia ia iloko o kahi halekupapau a lakou i hana ai no ke kanu ia ana o na mea make o lakou.

2. Ano, ua lohe ke aliiwahine i ke kaulana o Amona, nolaila, hoouna mai la oia a makemake ia ia e hele aku io na la.

3. A eia kekahi, hana iho la o Amona me ia i kauoha ia mai ai, a hele aku la iloko i ke aliiwahine la, a ninau aku la ia ia e ike i ka mea ana i makemake ai nana e hana.

4. A i mai la oia ia ia, Ua hoike mai la na kauwa a kaʻu kane iaʻu, he kaula oe na kekahi Akua hemolele, a ia oe ka mana e hana i na hana mana he nui ma kona inoa;

5. Nolaila, ina he oiaio keia, ke makemake nei au ia oe e hele iloko a e ike i kaʻu kane, no ka mea, ua waiho ia oia maluna iho o kona wahi moe no na la elua a no na po elua; a ke olelo mai nei kekahi poe aole oia i make, aka, ke olelo mai nei kekahi poe e ae ua make oia, a ua pilau oia, a he mea e pono ai e waiho ia oia iloko o ka halekupapau; aka, iaʻu nei ea, aole oia i pilau iaʻu.

6. Ano, o keia no ka mea a Amona i makemake ai, no ka mea, ua ike oia malalo iho ke alii Lamoni o ka mana o ke Akua; ua ike oia ua hoolei ia aku ka paku pouli o ka hoomaloka mai kona naau aku, a o ka malamalama nana i hoomalamalama i kona naau, oia no ka malamalama o ka nani o ke Akua, oia he malamalama kupanaha o kona lokomaikai; he oiaio, ua hookomo ua malamalama nei i ka hauoli nui iloko o kona uhane, i hookaawale ia ai ke ao o ka pouli, a ua kuni ia ka olino o ka malamalama mau loa iloko o kona uhane; he oiaio, ua ike oia ua lanakila keia maluna iho o kona kino maoli, a ua kai ia aku oia iloko o ke Akua;

7. Nolaila, o ka mea a ke aliiwahine i makemake ai ia ia, oia wale no ko ia nei makemake. Nolaila, hele aku la oia iloko e ike i ke alii me ke aliiwahine i makemake ai ia ia; a nana aku la oia i ke alii, a ua ike oia aole oia i make.

8. A i aku la oia i ke aliiwahine, Aole oia i make, aka ke moe nei oia i ke Akua, a i ka la apopo e ala hou oia; nolaila, mai kanu ia ia.

9. A i aku la o Amona ia ia, Ke manaoio nei anei oe i keia? A i mai la oia ia ia, Aole oʻu mea hoike, o kau olelo wale no, a me ka olelo a ka maua poe kauwa; ke manaoio nei nae au e ko auanei ia e like me kau olelo.

10. A i aku la o Amona ia ia, Pomaikai ooe, no kou manaoio nui loa; ke i aku nei au ia oe, e ka wahine, aole kekahi manaoio nui e like me neia mawaena o ka poe kanaka o Nepai a pau.

11. A eia kekahi, kiai iho la oia maluna iho o ka wahi moe o kana kane, mai ia manawa aku, a hiki aku i ua manawa la ma ka la apopo a Amona i hoomaopopo aku ai e ala mai ia.

12. A eia kekahi, ala ae la oia, e like me na olelo a Amona; a ia ia i ala ae ai, o ae la oia i kona lima i ka wahine, a i ae la, E hoomaikai ia ka inoa o ke Akua, a pomaikai oe;

13. No ka mea, he oiaio me oe e ola nei, aia hoi, ua ike au i koʻu Mea Hoolapanai; a e puka mai auanei oia, a e hanau ia e kahi wahine, a e hoolapanai mai oia i na kanaka a pau, ka poe i manaoio ma kona inoa. Ano, ia ia i olelo mai ai i keia mau olelo, ua piha kona naau iloko ona, a haule hou iho la oia me ka olioli; a haule iho la no hoi ke aliiwahine ilalo, i uluhia ia e ka Uhane.

14. Ano, i ka ike ana o Amona i ka Uhane o ka Haku ua ninini ia mai e like me kana mau pule maluna iho o ko Lamana poe, kona poe hoahanau, ka poe i hookumu i ka uwe nui ana mawaena o ko Nepai poe, a mawaena o na kanaka a pau o ke Akua, no ka lakou hana hewa ana a me ko lakou mau mooolelo, haule iho la oia ma kona mau kuli, a hoomaka ae la e ninini aku i kona uhane ma ka pule a me ka hoomaikai aku i ke Akua, no ka mea ana i hana mai ai i kona poe hoahanau; a ua uluhia ia oia no hoi i ka olioli; a pela i haule iho ai lakou a pau ekolu i ka honua.

15. Ano, i ka wa a na kauwa a ke alii i ike ai ua haule iho lakou, hoomaka ae la no hoi lakou e kahea aku i ke Akua, no ka mea ua hiki mai ka makau o ka Haku maluna iho o lakou no hoi, no ka mea, o lakou no ka poe i ku imua o ke alii, a hoike aku ia ia no ka mana nui o Amona.

16. A eia kekahi, hea aku la lakou ma ka inoa o ka Haku, ma ko lakou ikaika, a hiki aku i ka wa i haule ai lakou a pau i ka honua, koe wale no hookahi wahine o ko Lamana poe, o Abisa kona inoa, ua hoohuli ia oia i ka Haku no na makahiki he nui, no kekahi hihio kupaianaha a kona makuakane;

17. Pela oia i hoohuli ia ai i ka Haku, me ka hoike e ole aku ia mea mamua; nolaila, ia ia i ike ai ua haule iho na kauwa a Lamoni a pau i ka honua, a me kona hakuwahine no hoi, o ke aliiwahine, a me ke alii, a me Amona i moe papu ma ka honua, ua ike oia o ka mana o ke Akua no ia; a e manao ana he manawa kupono keia, ma ka hoike ana i na kanaka i na mea i hiki mai mawaena o lakou, ma ko lakou ike ana i keia mea, e hoohuli mai oia ia lakou e manaoio i ka mana o ke Akua, nolaila, holo ae la oia ia hale aku ia hale aku, e hoike ana ia mea i na kanaka;

18. A hoomaka lakou e hoakoakoa ia lakou iho i ka hale o ke alii. A hele mai la he poe lehulehu loa, a me ke kahaha nui o lakou, ike aku ai lakou i ke alii, a i ke aliiwahine, a me ka laua poe kauwa, e moe papu ana ma ka honua, a moe iho la lakou ilaila me he mea la ua make lakou; a ike aku la no hoi lakou ia Amona, a, aia hoi, he Nepai oia.

19. A, ano, hoomaka ae la na kanaka e ohumu mawaena o lakou iho; e olelo ana kekahi poe, he mea ino nui ia i hiki mai maluna iho o lakou, a maluna iho o ke alii a me ko kona hale, no kona ae ana i ua Nepai la e noho ma ka aina.

20. Aka, papa aku la kekahi poe e ia lakou, me ka i ana, Ua lawe ke alii i keia ino maluna o ko kona hale, no kona pepehi ana i kana poe kauwa, ka poe no lakou na pua i hoopuehu ia ai ma na wai o Sebusa.

21. A ua papa ia no hoi lakou, e ua poe kanaka la, ka poe i ku ma na wai o Sebusa, a i hoopuehu aku i na pua a ke alii, no ka mea, ua huhu lakou ia Amona, no ka nui o ko lakou poe hoahanau ana i pepehi ai ma na wai o Sebusa, oiai e paku ana i na pua a ke alii.

22. Ano, o kekahi o lakou, nona ka hoahanau i pepehi ia ai me ka pahikaua a Amona, ua huhu nui loa ia Amona, unuhi ae la oia i kana pahikaua a hele aku la e hiki ia ia ke hoohaule ia mea maluna iho o Amona, e pepehi ia ia; a ia ia i hoaka ae ai i ka pahikaua e hahau ia ia, aia hoi! Haule iho la oia a make aku la.

23. Ano, ke ike nei kakou ua hiki ole ke pepehi ia mai o Amona, no ka mea, ua olelo mai la ka Haku ia Mosia, kona makuakane, E hoopakele au ia ia, a e hana ia auanei ia ia e like me kou manaoio; nolaila, ua hookuu aku o Mosia ia ia i ka Haku.

24. A eia kekahi, i ka wa i ike ai ka lehulehu ua haule ke kanaka a make loa, ka mea i hoaka ae i kana pahikaua e pepehi ia Amona, hiki mai la ka makau maluna iho o lakou a pau, aole lakou i aa e o ae i ko lakou mau lima e hoopa mai ia ia, aole hoi i kekahi o ka poe i haule; a hoomaka ae la lakou e kahaha hou mawaena o lakou iho no ke kumu o keia mana nui, a me ke ano o keia mau mea.

25. A eia kekahi, ua nui wale ka poe mawaena o lakou, i olelo ae, o Amona oia no ka Uhane Nui, a olelo ae la kekahi poe e ae ua hoouna ia mai oia e ka Uhane Nui;

26. Aka, papa aku la kekahi poe e ia lakou a pau, i ka i ana, He mea ano e oia, he mea i hoouna ia mai, mai ko Nepai poe mai e hoeha mai ia kakou;

27. A aia kekahi poe i olelo ae, ua hoouna ia mai o Amona e ka Uhane Nui e hoopilikia mai ia lakou, no ka lakou hana hewa; a o ka Uhane Nui ia, ka mea i hele pu mau me ko Nepai poe, nana i hoopakele mau ia lakou mailoko aku o ko lakou nei mau lima; a i ae la lakou o ua Uhane Nui nei ia, nana i luku mai i kekahi poe he nui o ko lakou poe hoahanau, ko Lamana poe;

28. A pela i hoomaka ai ka paio ana e ikaika nui loa ae mawaena o lakou. A oiai lakou e paio ana peia, hele mai la ke kauwa wahine nana i hoakoakoa ai i na kanaka; a ia ia i ike ai i ka paio mawaena o na kanaka, ua kaumaha nui loa iho la oia, a kulu kona waimaka.

29. A eia kekahi, hele aku la oia a lalau aku la i ke aliiwahine ma ka lima, e hiki paha ia ia ke hoala mai ia ia mai ka honua ae; a i kona hoopa ana i kona lima, ala ae la oia a ku iluna ma kona mau wawae, a kahea aku la me ka leo nui, i ka i ana, E Iesu pomaikai, nana i hoola mai iaʻu mai kahi gehena weliweli mai! E ke Akua pomaikai, e aloha mai i keia poe kanaka.

30. A ia ia i olelo mai ai i keia, puili iho la oia i kona mau lima, ua piha hoi i ka olioli, e olelo ana i na olelo he nui i hoomaopopo ole ia; a ia ia i hana ai i keia, lalau aku la oia i ke alii, ia Lamoni, ma ka lima, a, aia hoi, ala ae la oia a ku iho la ma kona mau wawae;

31. A i kona ike ana i ka paio mawaena o kona poe kanaka, hele koke aku la oia, a hoomaka ae la e papa aku ia lakou, a e ao aku ia lakou i na olelo ana i lohe ai mai ka waha mai o Amona; a o ka poe i lohe i kana mau olelo, manaoio iho la, a ua hoohuli ia mai i ka Haku.

32. Aka, ua nui ka poe mawaena o lakou i hoolohe ole ae i kana mau olelo; nolaila, haele aku la lakou.

33. A eia kekahi, ia Amona i ala ae ai; lawelawe iho la no hoi oia ia lakou, a me na kauwa a pau a Lamoni no hoi; a hai aku la lakou i na kanaka i ka mea hookahi; ua hoololi ia ko lakou mau naau; i ole lakou i makemake hou e hana aku i ka ino.

34. A, aia hoi, hai aku la kekahi poe he nui i na kanaka ua ike lakou i na anela, a ua kamailio pu me lakou; a pela i hai ia mai ai ia lakou i na mea o ke Akua, a o kona pono.

35. A eia hoi kekahi, ua nui loa ka poe i manaoio i ka lakou mau olelo; a o ka poe a pau i manaoio, ua bapetizo ia; a lilo iho la lakou i poe kanaka pono, a kukulu iho la lakou i ekalesia mawaena o lakou;

36. A pela i hoomaka ai ka hana a ka Haku mawaena o ko Lamana poe; a pela ka Haku i hoomaka ai e ninini mai i kona Uhane maluna iho o lakou; a ke ike nei kakou ua o ia kona lima i na kanaka a pau, ka poe e mihi a manaoio i kona inoa.