1. Ano, eia kekahi, i ka wa a kela poe o ko Lamana, ka poe i hele aku e kaua ku e aku i ko Nepai poe, i ike ai, mahope iho o na aumeume he nui o lakou e anai mai ia lakou la, ua makehewa ke imi ae i ko lakou anai ia ana, hoi hou aku la lakou i ka aina o Nepai.

2. A eia kekahi, ua huhu nui loa iho la ko Amaleki poe, no ko lakou poino. A ia lakou i ike ai ua hiki ole ia lakou ke hoopai aku i ko Nepai poe, hoomaka ae la lakou e hookonokono ae i na kanaka e huhu aku i ko lakou poe hoahanau, ka poe kanaka o Anati-Nepai-Lehi; nolaila, hoomaka hou ae la lakou e luku mai ia lakou nei.

3. Ano, hoole hou aku la ua poe kanaka nei e lalau aku i na mea kaua o lakou, a ae aku la lakou e pepehi ia mai e like me ka makemake o ko lakou poe enemi.

4. Ano, ia Amona a me kona poe hoahanau i ike ai i ua hana luku nei mawaena o ka poe a lakou i aloha nui aku ai, a mawaena o ka poe i aloha nui mai ia lakou; no ka mea, ua malama ia lakou nei, me he mea la he poe anela lakou nei i hoouna ia mai mai ke Akua mai e hoola ia lakou mai ka make mau loa; nolaila, ia Amona a me kona poe hoahanau i ike ai i ua hana luku nui nei, ua haehae ae la lakou me ke aloha, a i ae la i ke alii,

5. E, e houluulu aku kakou i keia poe kanaka o ka Haku, a e iho kakou ilalo i ka aina o Zarahemela i ko kakou poe hoahanau, i ko Nepai poe, a e auhee aku mailoko aku o na lima o ko kakou poe enemi, i luku ole ia mai ai kakou.

6. Aka, i mai la ke alii ia lakou, Aia hoi, e luku mai ko Nepai poe ia makou, no ka nui o na pepehi kanaka a me na hewa a makou i hana aku ai ia lakou.

7. A i ae la o Amona, e hele aku no au a e ninau aku i ka Haku, a ina e olelo mai oia ia kakou, e iho aku ilalo i ko kakou poe hoahanau, e hele anei oukou?

8. A i mai la ke alii ia ia, Ae, ina e i mai ka Haku ia makou e hele, e hele aku no makou ilalo i ko kakou poe hoahanau, a e lilo makou i poe kauwa hooluhi na lakou, a hiki aku i ka wa a makou e hoouku aku ai ia lakou, no na pepehi kanaka a me na hewa a makou i hana aku ai ia lakou.

9. Aka, i ae la o Amona ia ia, He mea ku e i ke kanawai o ko kakou poe hoahanau, ka mea i kau ia ai e koʻu makuakane, ka noho kauwa hooluhi ana o kekahi mawaena o lakou; nolaila, e iho kakou ilalo a e hilinai aku i ke aloha o ko kakou poe hoahanau.

10. Aka i mai la ke alii ia ia, E ninau aku i ka Haku, a ina e olelo mai oia ia makou e hele, e hele no makou; i ole ia, e make no makou ma ka aina.

11. A eia kekahi, hele aku la o Amona a ninau aku la i ka Haku, a i mai la ka Haku ia ia,

12. E lawe aku i keia poe kanaka mailoko ae o keia aina, i make ole ai lakou, no ka mea, ua nui ko Satana mana ma na naau o ko Amaleki poe, ka poe e hookonokono ae nei i ko Lamana poe e huhu ae i ko lakou poe hoahanau, e pepehi ae ia lakou; nolaila, e hele aku oe mailoko ae o keia aina; a pomaikai iho la keia poe kanaka ma keia hanauna; no ka mea, naʻu no lakou e hoola.

13. Ano, eia kekahi, hele aku la o Amona a hai ae la i ke alii i na olelo a pau a ka Haku i olelo mai ai ia ia.

14. A houluulu pu aku la lakou i ko lakou poe kanaka; he oiaio, i ka poe kanaka a pau o ka Haku, a houluulu pu iho la i na pua a me na ohana holoholona o lakou, a haele aku la mailoko ae o ka aina, a komo aku la iloko o ka waonahele i hookaawale ae i ka aina o Nepai mai ka aina o Zarahemela ae, a hiki aku la ma o kokoke i na palena o ka aina.

15. A eia kekahi, i ae la o Amona ia lakou, Aia hoi, owau a me koʻu mau hoahanau e hele aku no makou iloko o ka aina o Zarahemela, a e noho no oukou maanei a hiki i ka wa a makou e hoi hou mai ai; a e hoao aku makou i na naau o ko makou poe hoahanau, ina paha e ae mai lakou ia oukou e komo ae iloko o ko lakou aina.

16. A eia kekahi, i ko Amona ma hele ana aku iloko o ka aina, halawai pu ae la oia a me kona poe hoahanau me Alama, ma o ma kahi i olelo e ia; a, aia hoi, he halawai hauoli ana neia.

17. Ano, no ka nui loa o ka olioli o Amona ua piha iho la oia; he oiaio, ua ale ia oia iloko o ka olioli o kona Akua, i ka hoopau ana o kona ikaika; a haule hou iho la oia i ka honua.

18. Ano, aole anei keia he olioli nui loa? Aia hoi, he olioli keia a kekahi e loaa ole ai ke ole ia he mea mihi oiaio a imi haahaa i ka pomaikai.

19. Ano, o ka olioli o Alama i ka halawai ana me kona poe hoahanau ua nui io no ia, a me ka olioli no hoi o Aarona, a o Omanera, a me Himani; aka hoi o ko lakou olioli aole ia i oi aku maluna o ko lakou ikaika.

20. Ano, eia kekahi, alakai aku la o Alama i kona poe hoahanau i ka aina o Zarahemela, i kona hale iho. A haele aku la lakou a hai ae la i ka lunakanawai nui i na mea a pau a lakou i loaa ai ma ka aina o Nepai, mawaena o ko lakou poe hoahanau, ko Lamana poe.

21. A hoouna aku la ka lunakanawai nui i kekahi olelo hoolaha mawaena o ka aina a pau, e noi ana i ka leo o na kanaka no ka hookomo ana i ko lakou poe hoahanau, ka poe kanaka o Anati-Nepai-Lehi.

22. A hiki mai la ka leo o na kanaka, i ka i ana, Aia hoi, makou e haawi aku makou i ka aina o Ieresona, aia no ia ma ka hikina ma ke kai, e pili ana i ka aina Momona, a aia no ia ma ka hema o ka aina o Momona; a o ua aina Ieresona nei oia no ka aina a makou e haawi aku ai i ko makou poe hoahanau i hooilina.

23. A, aia hoi, e hoonoho aku makou i ko makou poe koa mawaena o ka aina Ieresona a me ka aina o Nepai, e hiki ia makou ke hoomalu i ko makou poe hoahanau ma ka aina o Ieresona; a o keia mea ka makou e hana ai no ko makou poe hoahanau, no ko lakou makau e lalau aku i na mea kaua e ku e i ko lakou poe hoahanau, o hana lakou i ka hewa; a ua hiki mai ua makau nui nei o lakou, no ko lakou mihi maoli ana, no ka nui loa o na pepehi kanaka o lakou, a me ka lakou hana hewa weliweli.

24. Ano hoi, o keia ka makou e hana ai i ko makou poe hoahanau, i lili ai no lakou ka aina o Ieresona; a e paku makou ia lakou nei mai ko lakou poe enemi aku me ko makou poe koa, ina e haawi mai lakou i kau wahi o ko lakou waiwai e kokua mai ia makou, e hiki ia makou ke malama pono i ko makou poe koa.

25. Ano, eia kekahi, ia Amona i lohe ai i keia mea, hoi aku la oia i ka poe kanaka o Anati-Nepai-Lehi, a o Alama no hoi kekahi pu me ia, iloko o ka waonahele, i kahi o lakou i kukulu ai i na halelewa o lakou, a hoike aku la ia lakou i keia mau mea a pau. A hai aku la no hoi o Alama i kona hoohuli ia ana me Amona, a me Aarona, a me kona poe hoahanau.

26. A hoohauoli nui iho la ia mea ia lakou. A iho aku la lakou ilalo iloko o ka aina o Ieresona, a noho iho la ma ka aina o Ieresona; a ua kapa ia ae lakou e ko Nepai poe, ka poe kanaka o Amona; nolaila, ua hoomaopopo loa ia lakou ma ia inoa ma ia hope aku;

27. A mawaena o ka poe kanaka o Nepai lakou, a ua helu pu ia no hoi lakou maweana o ka poe kanaka no ka ekalesia o ke Akua. A ua kaulana no hoi lakou no ko lakou manao ikaika i ke Akua, a i na kanaka hoi; no ka mea, ua pono loa lakou a pololei ma na mea a pau; a ua kupaa lakou ma ka manaoio o Kristo, a hiki aku i ka hopena.

28. A ua nana aku la lakou i ka hookahe ana i ke koko o ko lakou poe hoahanau me ka hoopailua nui loa; aole hoi i hiki ia lakou ke koi ia mai e lalau aku i na mea kaua e ku e i ko lakou poe hoahanau; aole hoi lakou i nana aku i ka make me ka makau iki, no ko lakou manaolana e ike ia Kristo a me ke alahouana; nolaila, ua ale ia ka make ia lakou ma ka lanakila ana o Kristo maluna o ia mea;

29. Nolaila, e ae aku lakou e make ma ke ano hoomainoino a hoopopilikia loa i hiki ke hana ia mai e ko lakou poe hoahanau, mamua o ko lakou lalau ana i ka pahikaua a i ka pahikaua pokole paha e hahau aku ia lakou.

30. A pela iho la he poe kanaka manao ikaika a aloha ia lakou, he poe kanaka i hoomaikai nui loa ia e ka Haku.