1. Eia hoi kekahi, hoouna aku la ke alii o ko Lamana poe i olelo hoolaha mawaena o kona poe kanaka a pau, aole lakou e kau i ko lakou mau lima maluna iho o Amona, a me Aarona, o Omanera, a me Himani, aole hoi maluna o kekahi o ko lakou mau hoahanau, ka poe e hele aku e hai ana i ka olelo a ke Akua, ma kela wahi keia wahi a lakou e noho ai, ma na mokuna a pau o ko lakou aina;

2. He oiaio, hoouna ae la oia i kekahi kauoha mawaena o lakou la, aole lakou la e kau i ko lakou la mau lima maluna iho o lakou e nakinaki ia lakou, aole hoi e hoolei ia lakou iloko o ka halepaahao; aole hoi e kuha lakou la maluna iho o lakou, aole hoi e papai ia lakou, aole hoi e hoolei ae ia lakou mawaho o ko lakou mau halehalawai, aole hoi e hahau ia lakou, aole hoi lakou la e nou ae i na pohaku ia lakou, aka e komo lakou me ke keakea ole ia iloko o na hale o lakou la, a i na luakini hoi, a i na halelaa;

3. A pela e hiki ai ia lakou ke hele aku a ke hai aku i ka olelo a ke Akua, e like me ko lakou makemake, no ka mea, ua hoohuli ia mai ke alii i ka Haku, a me ko kona hale a pau; nolaila, hoouna aku la oia i ua olelo hoolaha nei mawaena o ka aina i kona poe kanaka, i alalai ole ia ai ka olelo a ke Akua, aka e hiki ia mea ke holo aku mawaena o ka aina a pau, e hiki i kona poe kanaka ke hoomaopopo ia no na mooolelo ino o ko lakou poe kupuna, e hiki ia lakou ke hoomaopopo ia he poe hoahanau lakou a pau, a he mea e pono ole ai no lakou e pepehi kanaka, aole hoi e powa, aole hoi e aihue, aole hoi e moekolohe, aole hoi e hana i kela ano i keia ano o ka hewa.

4. Ano, eia kekahi, i ka wa a ke alii i hoouna aku ai i ua olelo hoolaha nei, hele aku la o Aarona a me kona mau hoahanau ia kulanakauhale aku ia kulanakauhale aku, a mai kahi hale hoomana aku i kekahi, e kukulu ana i na ekalesia, a e hoolaa ana i na kahuna a me na kumu a puni ka aina mawaena o ko Lamana poe, e hai aku a e ao aku i ka olelo a ke Akua mawaena o lakou; a pela lakou i hoomaka ai e loaa ka pomaikai nui.

5. A ua lawe ia mai na tausani i ka ike i ka Haku, he oiaio, ua lawe ia mai na tausani e manaoio i na mooolelo o ko Nepai poe: a ua ao ia lakou i na mooolelo a me na wanana i haawi ia mai ai, a hiki wale aku i keia manawa;

6. A me ka oiaio o ka Haku e ola nei, me ia o ka poe i manaoio, o ka poe i lawe ia mai i ka ike i ka oiaio, ma o ka haiolelo ana la a Amona a me kona poe hoahanau, e like me ka Uhane o ka hoikeana a o ka wanana, a me ka mana o ke Akua, e hana ana i na hana mana iloko o lakou; he oiaio, ke i aku nei au ia oukou, me ka Haku e ola nei, o ka poe o ko Lamana poe i manaoio mai i ka lakou haiolelo ana, a i hoohuli ia i ka Haku, aole lakou i haule hou aku ma ia hope aku;

7. No ka mea, lilo iho la lakou i poe kanaka pono; waiho iho la lakou ilalo i na mea kaua o ko lakou kipi ana, i ole lakou e kaua ku e hou i ke Akua, aole hoi i kekahi poe o ko lakou poe hoahanau.

8. Ano, eia ka poe i hoohuli ia mai i ka Haku:

9. O ka poe kanaka o ko Lamana poe e noho ana ma ka aina o Isemaela,

10. A o ka poe kanaka hoi o ko Lamana poe e noho ana ma ka aina o Midoni,

11. A o ka poe kanaka hoi o ko Lamana poe e noho ana ma ke kulanakauhale o Nepai,

12. A o ka poe kanaka hoi o ko Lamana poe e noho ana ma ka aina o Sailoma, a e noho ana ma ka aina o Semalona, a ma ke kulanakauhale o Lemuela, a ma ke kulanakauhale o Siminailona;

13. A oia na inoa o na kulanakauhale o ko Lamana poe i hoohuli ia ai i ka Haku; a o lakou nei no ka poe i waiho ilalo i na mea kaua o ko lakou kipi ana, he oiaio, i na mea kaua a pau o lakou; a no ko Lamana poe lakou a pau.

14. Aole i hoohuli ia ae ko Amaleki poe, hookahi mea wale no; aole hoi kekahi o ko Amulona poe; aka, hoopaakiki iho la lakou i ko lakou mau naau, a me na naau hoi o ko Lamana poe ma na wahi o ka aina a lakou i noho ai; he oiaio, a me ko ko lakou mau kauhale a pau, a me ko ko lakou mau kulanakauhale a pau;

15. Nolaila, ua kakau makou i na inoa o na kulanakauhale a pau o ko Lamana poe, iloko olaila lakou i mihi ai a loaa ai ka ike i ka oiaio, a i hoohuli ia ai.

16. Ano, eia kekahi, o ke alii a me ka poe i hoohuli ia ai, ua makemake lakou e loaa kekahi inoa, e hiki ia lakou ma ia mea ke hookoa ia ae mai ko lakou poe hoahanau ae; nolaila, kukakuka pu iho la ke alii me Aarona a me kekahi poe he nui o ko lakou poe kahuna, no ka inoa a lakou e lawe mai ai maluna iho o lakou, i hookoa ia ai lakou.

17. A eia kekahi, kapa iho la lakou i ko lakou inoa o ko Anati-Nepai-Lehi; a ua kapa ia lakou ma keia inoa, a, aole e kapa hou ia ko Lamana poe.

18. A hoomaka ae la lakou e lilo i poe kanaka ikaika loa ma ka hana; he oiaio, a he aloha i ko Nepai poe; nolaila, ua launa palapala lakou me lakou la, a hahai hou ole mai ka hoomainoino o ke Akua ia lakou.