1. E kaʻu keiki, e haliu mai ka pepeiao i kaʻu mau olelo; no ka mea, ke i aku nei au ia oe, me aʻu i i aku ai ia Helamana, ina e malama oe i na kauoha a ke Akua, e hoopomaikai ia auanei oe ma ka aina; a ina e malama ole oe i na kauoha a ke Akua, e hoolei ia aku oe mai kona alo aku.

2. Ano, e kaʻu keiki, ke lana nei koʻu manao e loaa auanei iaʻu ka olioli nui iloko ou, no kou naueue ole a hoomau pono i ke Akua; no ka mea, me oe i hoomaka ai i kou wa kamalii, e nana aku i ka Haku, i kou Akua, pela au i manaolana ai e hoomau oe i ka malama ana i kana mau kauoha; no ka mea, ua pomaikai ka mea e hoomau pono ana a hiki i ka hopena.

3. Ke i aku nei au ia oe, e kaʻu keiki, ua loaa mai iaʻu ka olioli nui iloko ou ano, no kou hoomau pono ana, a me kou ikaika, a me kou ahonui, a me kou hoomanawanui mawaena o ka poe kanaka o ko Zorama.

4. No ka mea, ua ike au iloko oe o na mea paa; he oiaio, a ua ike no hoi au ua hailuku ia no oe no ka olelo; a ua hoomanawanui oe i keia mau mea a pau me ke ahonui, no ka mea, o ka Haku no kekahi pu me oe; a ke ike nei oe ano ua hoopakele mai no ka Haku ia oe.

5. Ano, e kaʻu keiki Sibalona, ke makemake nei au e hoomanao oe e like me ka nui o kou paulele ana aku i ke Akua, pela ka nui o kou hoopakele ia ana mai mailoko mai o kou mau hoao ia ana, a me kou popilikia, a me kou mau eha; a e hookiekie ia auanei oe ma ka la hope.

6. Ano, e kaʻu keiki, aole oʻu makemake e manao oe ua ike au i keia mau mea ma oʻu iho, aka, o ka Uhane o ke Akua no ia iloko oʻu, nana i hoike mai i keia mau mea iaʻu; no ka mea, ina aole au i hoohanau ia mai e ka Akua, ina ua ike ole au i keia mau mea.

7. Aka hoi, hoouna mai la ka Haku, ma kona aloha nui, i kona anela e hai mai iaʻu, e hooki aku i ka hana luku mawaena o kona poe kanaka; he oiaio, a ua ike au i kekahi anela he maka no he maka; a olelo pu oia me au, a o kona leo me he hekili la ia, a hoohaalulu iho la ia i ka honua holookoa.

8. A eia kekahi, he mau la ekolu a he mau po ekolu wau iloko o ka eha awaawa a walania loa o ka uhane; a, aole loa i loaa iaʻu ke kala ia ana o koʻu mau hala, a hiki i ka wa aʻu i hea aku ai i ka Haku, ia Iesu Kristo, e aloha mai iaʻu. Aka hoi, kahea aku la au ia ia, a loaa iho la iaʻu ka maluhia i koʻu uhane.

9. Ano, e kaʻu keiki, ua hai aku au i keia ia oe, i ao ia ai oe i ka naauao, i ao ia ai oe e au aole kekahi ala e ae, aole hoi kekahi hana e ae, ma o ua mea la i hiki ai ke kanaka ke hoola ia, iloko a ma o Kristo la wale no. Aia hoi, oia no ke ola a me ka malamalama o ke ao nei. Aia hoi, oia no ka olelo o ka oiaio a me ka pono.

10. Ano, me oe i hoomaka ai e ao aku i ka olelo, pela no au e makemake nei e hoomau oe e ao aku; a ke makemake nei au e ikaika a e pakiko oe ma na mea a pau.

11. E makaala, i ole ai oe e hookiekie ia iluna i ka haaheo; he oiaio, e makaala i ole ai oe e kaena aku iloko o kou naauao iho, aole hoi no kou ikaika nui;

12. E hana me ka wiwo ole, aole nae me ka hookaumaha; a e makaala no hoi e kaulawaha oe i kou mau kuko, i piha ai oe me ke aloha; e makaala e haalele oe i ka noho wale ana;

13. Mai pule oe me ka ko Zorama poe i pule ai, no ka mea, ua ike oe e pule ana lakou e lohea e na kanaka, a e hoomaikai ia no ko lakou naauao.

14. Mai olelo, E ke Akua, ke aloha aku nei au ia oe no ka oi aku o makou mamua o ko makou poe hoahanau; aka, e aho e olelo aku, E ka Haku, e kala mai i kuu pono ole, a e hoomanao ae oe i koʻu poe hoahanau i ke aloha; he oiaio, e hai aku i kou pono ole imua o ke Akua i na manawa a pau.

15. A na ka Haku e hoopomaikai mai i kou uhane, a e hookipa aku ia oe ma ka la hope iloko o kona aupuni, e noho ilalo me ka maluhia. Ano, e hele, e kaʻu keiki, a e ao aku i ka olelo i keia poe kanaka. E kuoo. E kaʻu keiki e, aloha.