1. Ano, eia kekahi, loaa mai la iaʻu kekahi episetole mai ia Amorona mai, ke alii, e olelo ana ina e haawi aku au i keia poe a makou i hoopio mai ai, e haawi mai oia i ke kulanakauhale o Anatipara no makou.

2. Aka, hoouna aku la au i kekahi episetole i ke alii, i ka i ana, ua ike lea makou ua lawa ko makou poe koa e hoopio aku i ke kulanakauhale o Anatipara ma ko makou ikaika; a ua manao makou he naaupo makou ke haawi aku i ka poe pio no ua kulanakauhale la; ma ka hoihoi hou ana mai i na mea o makou i hoopio ia e lakou, malaila wale no makou e haawi aku ai i ka makou poe pio.

3. A hoole mai la o Amorona i ka koʻu episetole, no ka mea, aole oia e haawi mai a haawi aku i na pio; nolaila, hoomakaukau iho la makou e hele ku e aku i ke kulanakauhale o Anatipara.

4. Aka, haalele ae la ko Anatipara i ke kulanakauhale, a hee ae la i kekahi o ko lakou mau kulanakauhale e ae, a lakou i noho ai, e hana paa ai ia mau wahi; a pela i lilo mai ai ke kulanakauhale o Anatipara iloko o na lima o makou.

5. A pela i pau ai ka makahiki iwakaluakumamawalu o ke au o na lunakanawai.

6. A eia kekahi, ma ka makamua o ka makahiki iwakaluakumamaiwa, loaa mai la ia makou ka lako hou o ka ai, a me kekahi poe koa hou i ko makou poe koa, mai ka aina mai o Zarahemela, a mai ka aina kokoke a puni, he mau tausani eono kanaka o lakou, okoa he kanaono o na keiki a ko Amona poe, ka poe i hele mai e hui me ko lakou poe hoahanau, koʻu puali uuku o na tausani elua. Ano hoi, ua ikaika makou; he oiaio, a ua nui no hoi ka ai i lawe ia mai ai ia makou.

7. A eia kekahi, ua makemake makou e kaua aku me ka poe koa i hoonoho ia e hoomalu iho i ke kulanakauhale o Kumeni.

8. Ano hoi, e hoike aku no au ia oe aole liuliu, a hooko aku la makou i ko makou makemake; he oiaio, me ko makou poe ikaika, oia me kekahi hapa o ko makou poe ikaika, hoopuni iho la makou ma ka po, i ke kulanakauhale o Kumeni, mamua iki o ka wa e loaa ai ia lakou he hoahu lako ai.

9. A eia kekahi, hoomoana iho la makou a puni ke kulanakauhale no na po he nui; aka, hiamoe iho la makou maluna o na pahikaua a makou, a hoonoho iho la i na mea kiai, i hiki ole ai i ko Lamana poe ke hiki mai maluna iho o makou ma ka po, a e pepehi mai ia makou, ka mea a lakou i hoao mai ai i na manawa he nui; aka, o kela manawa keia manawa a lakou i hoao mai ai ia mea, ua hookahe ia aku ko lakou koko.

10. A mahope, hiki mai la ka lakou ai, a ua aneane lakou e komo aku i ke kulanakauhale ma ka po. A ma kahi o ko Lamana poe, o ko Nepai poe ka; nolaila, lawe aku la makou ia lakou a me ka lakou mau mea ai.

11. Me ka hooki ia aku o ko Lamana poe mai ko lakou ola ae mamuli o keia ano, ua paa nae ka manao o lakou e malama i ke kulanakauhale; nolaila, ua lilo i mea e pono ai no makou e lawe i ua ai la a e hoouna aku ia mea i Iudea, a me ko makou poe pio i ka aina o Zarahemela.

12. A eia kekahi, aole i hala aku na la he nui wale, mamua o ka pio ana o na manaolana o ko Lamana poe no ke kokua ia mai; nolaila, haawi mai la lakou i ke kulanakauhale iloko o na lima o makou, a pela makou i hooko ai i na manao o makou, i ka loaa ana ke kulanakauhale o Kumeni.

13. Aka, eia kekahi, no ka nui loa o na pio o makou, ua koi ia makou, me ka lehulehu loa nae o makou, e hoohana aku i ko makou poe a pau e malama ai ia lakou, a i ole ia e pepehi aku ia lakou a make.

14. No ka mea, e kipi mai no lakou he nui loa, a e hakaka mai me na pohaku a me na newa, a me kela mea keia mea i hiki ai ia lakou ke loaa ma ko lakou mau lima, a pepehi aku la makou a make i elua tausani a keu o lakou, mahope mai o ko lakou hookuu ana mai ia lakou iho i poe pio o ke kaua;

15. Nolaila, ua lilo ia i mea e pono ai no makou, e hoopau aku makou i na ola o lakou, a i ole ia e kiai aku ia lakou, me ka pahikaua ma ka lima, a hiki ilalo i ka aina o Zarahemela; a o ka makou ai hoi aole lawa loa ia mamua o ka mea kupono no ko makou poe kanaka iho, me ia pu nae ka ai a makou i lawe pio mai ai, mai ko Lamana poe mai.

16. Ano, ma keia noho pilikia ana, ua lilo i mea nui ka hooholo pono ana no na mea e pili ana i ua poe pio la o ke kaua; aka hoi, hooholo paa makou e hoouna aku ia lakou ilalo i ka aina o Zarahemela; nolaila, wae ae la makou i kekahi poe o ko makou poe kanaka, a haawi ae la ia lakou i ka malama ana i ka makou poe pio, no ka iho ana ilalo i ka aina o Zarahemela.

17. Aka, eia kekahi, ma ia la ae, hoi mai la lakou. Ano hoi, aole makou i ninau aku ia lakou no ka poe pio; no ka mea, ua hiki mai ko Lamana poe maluna iho o makou, a hoi mai la lakou i ka wa pono e hoopakele mai ai ia makou mai ka haule ana mai iloko o na lima o lakou. No ka mea, aia hoi, ua hoouna ae la o Amorona i ai hou, a me kekahi poe koa he lehulehu no hoi, i kokua no lakou.

18. A eia kekahi, ua hiki mai ua poe kanaka la a makou i hoouna pu aku ai me ka poe pio, i ka wa pono e hooki aku ia lakou la, ia lakou la i aneane ai e lanakila mai maluna iho o makou.

19. Aka hoi, kaua makau ole loa aku la koʻu poe uuku elua tausani a me kanaono; he oiaio, ua naue ole lakou imua o ko Lamana poe, a luku aku la lakou i ka poe a pau i ku e mai ia lakou;

20. A me ke koena o ko makou poe koa e aneane ana e hee aku imua o ko Lamana poe, aia hoi, ua naue ole a hooweliweli ole ia ua mau tausani nei elua a me kanaono;

21. He oiaio, a hoolohe mai lakou a malama pono hoi i ka hooko ana i kela huaolelo i keia huaolelo kauoha me ka pololei loa; he oiaio, a e like me ko lakou manaoio ua hana ia mai ia lakou; a hoomanao iho la au i na olelo a lakou i i mai ai iaʻu ua ao ia lakou e ko lakou poe makuwahine.

22. Ano hoi, no ua poe keiki nei oʻu, me ua poe kanaka la a makou i wae aku ai e kai aku i ka poe pio, keia lanakila nui o makou; no ka mea, o lakou no ka poe i lanakila aku maluna o ko Lamana poe; nolaila, ua hooauhee ia aku lakou i ke kulanakauhale o Manati.

23. A paa ia makou ko makou kulanakauhale o Kumeni, a aole i pepehi pau loa ia me ka pahikaua; ua nui nae ka poino o makou.

24. A eia kekahi, mahope mai o ka hee ana aku, kauoha koke aku la au e lawe ia ae koʻu poe kanaka i hoeha ia ai, maiwaena mai o ka poe make, a kauoha ae la e lapaau ia ko lakou mau palapu.

25. A eia kekahi, ua maule iho elua haneri, noloko o koʻu elua tausani a me kanaono, mamuli o ke kahe ana o ke koko; aka hoi, mamuli o ka lokomaikai o ke Akua, a me ka pihoihoi nui o makou a o na enemi no hoi o ko makou poe koa a pau, aole kekahi mea o lakou i make; he oiaio, aole hoi kekahi mea mawaena o lakou i loaa ole ai na eha he nui.

26. Ano, o ko lakou hoola ia ana he mea e hookahaha ai i ko makou poe koa a pau; he oiaio, i hoola ia mai ai lakou, oiai ua pepehi ia a make i hookahi tausani o ko makou poe hoahanau. A ke haawi pono nei makou ia mea i ka mana kupaianaha loa o ke Akua, no ko lakou paulele nui loa i ka mea a lakou i ao ia ai e manaoio, aia he Akua hoopono, a o na mea i kanalua ole, e hoopakele ia mai lakou ma o kona mana kupanaha la.

27. Ano, oia no ka manaoio o ua poe nei aʻu i olelo ai; ua opiopio lakou, a ua naue ole ko lakou mau naau; a ke paulele mau aku nei lakou i ke Akua.

28. A eia kekahi, mahope iho o ko makou malama ana pela i ko makou poe kanaka eha, a me ke kanu ana i ko makou poe make, a me ka poe make no hoi o ko Lamana, he nui wale no lakou, aia hoi, niele ae la makou ia Gida no ka poe pio a lakou i lawe aku ai ilalo i ka aina o Zarahemela.

29. Ano, o Gida no ka luna nui maluna iho o ka papa i wae ia ai e kiai aku ia lakou a hiki ilalo i ka aina.

30. Ano, eia na olelo a Gida i olelo mai ai iaʻu, Aia hoi, hoomaka aku la makou e iho ilalo i ka aina o Zarahemela, me ka kakou poe pio. A, halawai ae la makou i na kiu o na puali o kakou, ka poe i hoouna ia aku e hoomakakiu i ka poe koa o ko Lamana poe.

31. A hea mai la lakou ia makou, i ka i ana, Aia hoi, e hele ana na puali o ko Lamana poe i ke kulanakauhale o Kumeni; a, aia hoi, e haule iho no lakou la maluna iho o lakou, he oiaio, a e luku ae i ko kakou poe kanaka.

32. A eia kekahi, lohe ae la ka makou poe pio i ka hea ana o lakou, a hooikaika iho la ia mea ia lakou; a kipi mai la lakou ia makou.

33. A eia kekahi, no ko lakou kipi ana, hahau ae la makou i ka makou mau pahikaua maluna iho o lakou. A eia hoi kekahi, holo lokahi mai lakou maluna iho o na pahikaua a makou, a ma ia hana, ua pepehi ia aku ka nui loa o lakou; a puka ae la ke koena o lakou mawaena o makou a holomoku aku la mai o makou aku.

34. A ia lakou i holo aku ai, a ua hiki ole ia makou ke loaa lakou, hele mai la makou me ka wikiwiki i ke kulanakauhale nei o Kumeni; a, aia hoi, hiki mai la makou i ka manawa ku pono e kokua makou i ko makou poe hoahanau i ka hoopakele ana i ke kulanakauhale.

35. Aia hoi, ua hoopakele hou ia mai kakou mailoko mai o na lima o ko kakou poe enemi. A ua hoomaikai ia no ka inoa o ko kakou Akua; no ka mea hoi, nana no kakou i hoopakele mai; he oiaio, i hana mai i keia mea nui no kakou.

36. Ano, eia kekahi i ka wa aʻu, a Helamana, i lohe ai i keia mau olelo a Gida, ua hoopiha ia au me ka olioli nui loa, no ka lokomaikai o ke Akua i ka hoopakele ana ia makou, i make ole ai makou a pau; he oiaio, a ke lana nei koʻu manao ua komo aku na uhane o ka poe i pepehi ia iloko o ka maha o ko lakou Akua.