1. Ano, eia kekahi, mahope iho o ka olelo ana a Alama i keia mau olelo ia lakou, noho iho la oia ma ka honua, a ku ae la o Amuleka a hoomaka ae la e ao aku ia lakou, i ka i ana;

2. E koʻu poe hoahanau, ke manao nei au he mea hiki ole ke naaupo oukou no na mea i olelo ia mai ai no ka hiki ana mai o Kristo, ka mea i ao ia aku ai e makou oia ke Keiki a ke Akua; he oiaio, ua ike au ua ao nui loa ia aku ua mau mea nei ia oukou, mamua o ko oukou ku e ana a haalele ana maiwaena aku o makou.

3. A oiai oukou i makemake mai ai i koʻu kaikuaana aloha nei, e hoike aku oia ia oukou i ka mea a oukou e hana ai, no ko oukou mau pilikia; a ua olelo aku oia i kekahi mau mea ia oukou e hoomakaukau ai i ko oukou mau naau; he oiaio, a ua kauleo aku oia ia oukou e manaoio, a e hoomanawanui;

4. He oiaio, i loaa ai ia oukou ka manaoio e hiki ke kanu i ka olelo iloko o ko oukou mau naau, i hoao ai oukou i kona maikai;

5. A ua ike maua o ka ninau nui iloko o ko oukou mau naau, ina paha iloko o ke Keiki a ke Akua ka olelo, a ina aole paha auanei he Kristo.

6. A ua ike no hoi oukou ua hooiaio ae koʻu kaikuaana ia oukou, ma na mea he nui, aia no ka olelo iloko o Kristo, i ka hoola ana.

7. Ua hea ae koʻu kaikuaana i na olelo a Zenosa, e hiki mai ana ka hoolapanai ana ma o ke Keiki la a ke Akua, a i na olelo hoi a Zenoka; a ua hoopii ae oia ia Mose, e hoike mai he oiaio ua mau mea nei.

8. Ano, e hoike au noʻu iho, he oiaio ua mau mea nei. Aia hoi, ke i aku nei au ia oukou, ua ike au e hiki mai auanei o Kristo mawaena o na keiki a kanaka, e lawe maluna iho ona i na lawehala o kona poe kanaka, a e panai aku auanei oia no na hala o ko ke ao nei; no ka mea, ua olelo mai ka Haku ke Akua ia mea;

9. No ka mea, he mea e pono ai e hana ia mai ka mea e kalahala ai; no ka mea, e like me ke kumumanao nui o ke Akua mau loa, e hana ia kahi mea e kalahala ai e pono ai, i ole ia, e make loa na kanaka a pau me ka hiki ole ke pale ae; he oiaio ua paakiki na mea a pau; he oiaio, ua haule na mea a pau, a ua lilo, a e make loa io no, ke ole ma o ke kalahala ana la ka mea e pono ai ke hana ia mai;

10. No ka mea, he mea e pono ai e hana ia he mohai nui a hope, he oiaio, aole he mohai kanaka, aole hoi holoholona, aole hoi o kekahi ano o ka manu; no ka mea, aole loa ia e lilo ana i mohai kanaka; aka, he mohai mana loa a mau loa aku e pono ai.

11. Ano, aole kekahi kanaka e hiki ai ia ia ke mohai aku i kona koko iho i mea e panai ai no na hala o hai. Ano, ina e pepehi kanaka ana kekahi kanaka, aia hoi, e lawe aku anei ko kakou kanawai, ka mea pololei, i ke ola o kona hoahanau? Ke i aku nei au ia oukou, aole.

12. Aka, e koi ana ke kanawai i ke ola o ka mea nana i pepehi i ke kanaka; nolaila, aole kekahi mea, e emi ana malalo iho o ke kalahala mana loa, i ku pono no na hala o ko ke ao nei;

13. Nolaila, he mohai nui a hope e pono ai; a, alaila e hooki ia aku, i ole he mea hoi e pono ai ke hooki aku i ka hookahe ia ana o ke koko; alaila, e hooko ia ai ke kanawai o Mose; he oiaio, e hooko ia mai ia a pau loa; o kela huna a lihi iki keia huna a lihi iki, aole mea e lilo aku.

14. A, aia hoi, o keia no ke ano a pau o ke kanawai; o kela huna keia huna e kuhikuhi ana i kela mohai nui a hope; a o ua mohai nui a hope la o ke Keiki a ke Akua no ia; he oiaio, he mana loa a mau loa;

15. A pela oia e lawe mai ai auanei i ke ola i ka poe a pau e manaoio ma kona inoa; o ke kumu no keia o ua mohai hope nei, e lawe mai ai i ka naau o ke aloha, o ka mea ia e lanakila ana maluna o ka hoopai, a e lawe mai ana i na mea i na kanaka i loaa ai ia lakou ka manaoio e mihi ai.

16. A pela e hiki ai i ke aloha ke panai i na koi ana o ka hoopai, a i hoopuni ai ia lakou iloko o na lima palekana, oiai ka mea i hana ole aku me ka manaoio e mihi ai, ua waiho ia i ke kanawai a pau o na koi ana o ka hoopai; nolaila, i ka mea wale no nona ka manaoio e mihi ai, i lawe ia mai ai ke kumumanao nui a mau loa o ka hoolapanai.

17. Nolaila, na ke Akua e ae mai ia oukou, e koʻu poe hoahanau, e hoomaka oukou e hana aku me ko oukou manaoio e mihi, i hoomaka ai oukou e hea aku i kona inoa hoano, i aloha mai ai oia ia oukou;

18. Oia, e hea aku ia ia no ke aloha; no ka mea, he mana kona e hoola mai;

19. Oia, e hoohaahaa iho oukou ia oukou iho, a e hoomau ma ka pule ia ia;

20. E hea aku ia ia oiai oukou iloko o na kihapai o oukou; he oiaio, maluna iho o ka pua holoholona o oukou a pau;

21. E hea aku ia ia iloko o na hale o oukou, he oiaio, maluna iho o ko ko oukou hale, i ke kakahiaka, i ke awakea, a me ke ahiahi;

22. He oiaio, e hea aku ia ia me ke ku e aku i ka mana o ko oukou poe enemi;

23. He oiaio, e kahea aku ia ia me ke ku e i ke diabolo, he enemi no oia i ka pono a pau.

24. E hea aku ia ia maluna iho o na hua o ko oukou mau kihapai, i pomaikai ai oukou ma ia mau mea.

25. E hea aku ia ia maluna iho o na pua holoholona o ko oukou mau kula, i mahuahua ai lakou.

26. Aka, aole o keia mau mea wale; e ninini aku oukou e pono ai i ko oukou mau uhane ma na keena mehameha o oukou, a ma na wahi malu o oukou, a ma ko oukou waonahele;

27. He oiaio, a ia oukou e hea ole aku ai i ka Haku, e hoopiha ia ko oukou mau naau, i kai ia ai ma ka pule mau ia ia no ko oukou pomaikai, a no ka pomaikai hoi o ka poe a puni oukou.

28. Ano, aia hoi, e oʻu poe hoahanau i aloha ia, ke i aku nei au ia oukou, mai manao oukou o keia ka pau ana; no ka mea, mahope iho o ka oukou hana ana i keia mau mea a pau, ina e hookuke ae oukou i ka poe nele, a me ka poe kapa ole, a hele ole e ike i na mea mai a pilikia, a haawi ole aku i ko oukou waiwai, ina he lako ko oukou, i ka poe i nele; ke i aku nei au ia oukou, ina aole oukou e hana i kekahi o keia mau mea, aia hoi ina ua makehewa ka oukou pule, a e hoopomaikai ole ana ia oukou, a me he poe hookamani la oukou i hoole ai i ka manaoio;

29. Ina aole oukou e hoomanao e lokomaikai aku, me he oka la oukou a na mea hoomaemae i hoolei aku ai iwaho, (no ka mea, aohe ia he maikai,) a ua hehi ia malalo o na wawae o kanaka.

30. Ano, e oʻu poe hoahanau, ke makemake nei au mahope iho o ko oukou loaa ana na hoike he nui wale me neia, me ka ike hoi e hoike mai ana na palapala hemolele no keia mau mea, e hele mai oukou a e hoohua ae i ka hua i ka mihi;

31. He oiaio, ke makemake nei au e hele mai oukou a e hoopaakiki hou ole iho i ko oukou mau naau; no ka mea hoi, ano ka manawa, a me ka la o ko oukou mau ola; a, nolaila, ina e mihi oukou a hoopaakiki ole i ko oukou mau naau, e lawe koke ia mai ke kumumanao nui hoolapanai ia oukou.

32. No ka mea, aia hoi, o keia ola ana oia no ka manawa no na kanaka e hoomakaukau ai e halawai pu me ke Akua; he oiaio hoi, o ka la o keia ola ana oia no ka la no na kanaka e hana ai i na hana a lakou.

33. Ano, me aʻu i olelo e ai ia oukou mamua, oiai ua loaa ia oukou na hoike he nui wale me neia, nolaila, ke noi aku nei au ia oukou, e hoopanee ole aku oukou i ko oukou la e mihi ai a hiki i ka hopena; no ka mea, mahope iho o keia la o ke ola, i haawi ia mai ai ia kakou e hoomakaukau ai no ke ao pau ole, aia hoi, ina aole kakou e hoonui ae i ko kakou manawa oiai ma keia ola ana, alaila, e hiki mai ai ka po o ka pouli, iloko olaila e hiki ole ai ka hana ke hana ia.

34. Aole e hiki ia oukou ke olelo, ia oukou e lawe ia mai ai i keia manawa pilikia weliweli, E mihi no au, e hoi no au i koʻu Akua. Aole, aole loa e hiki ia oukou ke olelo ae i keia; no ka mea, o kela uhane hookahi nana i noho ma ko oukou kino i ka manawa a oukou e puka aku ai mai keia ola ana aku, na ua uhane hookahi la auanei ka mana e noho ma ko oukou kino ma kela ao mau loa.

35. No ka mea, aia hoi, ina ua hoopanee ae oukou i ko oukou la e mihi ai, a hiki wale aku i ka make, aia hoi, ua lilo ae oukou malalo iho o ka uhane o ke diabolo, a e hoopaa ana oia ia oukou nona; no ia mea, ua haalele iho ka Uhane o ka Haku ia oukou, aohe ona kuleana iloko o oukou, a no ke diabolo ka mana a pau maluna iho o oukou; a oia no ka noho hope ana o ka poe hewa.

36. A o keia kaʻu i ike ai, no ka mea, ua i mai ka Haku, aole oia e noho ana iloko o na luakini hemolele ole, aka iloko o na naau o ka poe pono oia i noho ai; he oiaio, a ua i mai no hoi oia, e noho iho no ka poe pono iloko o kona aupuni, e hele hou ole ai iwaho; aka e hookeokeo ia ko lakou mau aahu, ma o ke koko la o ke Keikihipa.

37. Ano, e koʻu poe hoahanau aloha, ke makemake nei au e hoomanao oukou i keia mau mea, a e hana aku oukou i ko oukou ola ana me ka makau imua o ke Akua, a e hoole hou ole oukou i ka hiki ana mai o Kristo;

38. E paio ku e hou ole aku oukou i ka Uhane Hemolele, aka e hookipa aku oukou ia ia, a e lawe ae maluna iho o oukou i ka inoa o Kristo; a e hoohaahaa oukou ia oukou iho i ka lepo, a hoomana aku i ke Akua ma kela wahi keia wahi a oukou e noho ai, iloko o ka uhane a iloko o ka oiaio; a e noho oukou me ke aloha aku i kela la i keia la, no ka nui o na mea aloha a me na mea pomaikai ana i hookau mai ai maluna iho o oukou;

39. He oiaio, a ke kauleo aku nei no hoi au ia oukou, e oʻu poe hoahanau, e makaala oukou i ka pule mau, i alakai ole ia aku ai oukou e ka hoowalewale ana o ke diabolo, i ole ai e lanakila oia maluna iho o oukou, i ole ai oukou e lilo i poe kauwa nana ma ka la hope; no ka mea hoi, aole e uku ana oia ia oukou i kekahi mea maikai.

40. Ano, e oʻu poe hoahanau aloha, ua makemake au e kauleo aku ia oukou e ahonui, a e hoomanawanui oukou ma kela ano o ka pilikia keia ano o ka pilikia; i ole ai oukou e hoino aku i ka poe i hookuke mai ia oukou iwaho no ko oukou ilikole nui, o lilo oukou i poe lawehala e like me lakou;

41. Aka, i ahonui oukou, a hoomanawanui me ua mau popilikia la, me ka manaolana paa e hoomaha auanei oukou i kekahi la mai ko oukou mau popilikia a pau.