1. Ano, mahope iho o ko Alama olelo ana i neia mau olelo, hoouna mai la lakou io na la, e makemake ana e ike, ina paha lakou e manaoio i ke Akua hookahi e hiki ia lakou ke loaa ua hua nei ana i olelo ai, a i ke ano o ko lakou kanu ana i ka hua, oia hoi ka olelo, ana i olelo aku ai, ana i i aku ai e kanu ia e pono ai iloko o ko lakou mau naau; a i ke ano hea hoi lakou e hoomaka ai e hoohana i ko lakou manaoio.

2. A i aku la o Alama ia lakou, Aia hoi, ua i mai oukou ua hiki ole ia oukou ke hoomana aku i ko oukou Akua, no ka mea, ua hookuke ia mai oukou mailoko ae o ko oukou mau halepule. Aka hoi, ke i aku nei au ia oukou, ina e manao ana oukou ua hiki ole ia oukou ke hoomana aku i ke Akua, ua kuhihewa nui oukou, a he mea pono ia oukou ke imi i na palapala hemolele, ina e manao ana oukou ua ao mai ua mau palapala la i keia mea ia oukou, aole oukou i hoomaopopo ia mau mea.

3. Ke hoomanao nei anei oukou i ka heluhelu ana i ka mea a Zenosa, ke kaula o ka wa kahiko, i olelo mai ai no ka pule, a no ka hoomana ana?

4. No ka mea, i mai la oia, Ua lokomaikai oe, e ke Akua, no ka mea, ua lohe oe i kaʻu pule, iaʻu iloko o ka waonahele; he oiaio, ua lokomaikai oe i ka wa aʻu i pule aku ai no koʻu poe enemi, a nau i hoohuli mai ia lakou ioʻu nei;

5. He oiaio, e ke Akua, ua lokomaikai oe i ka wa aʻu i hea aku ai ia oe ma koʻu kihapai; iaʻu i hea aku ai ia oe ma kuu pule, ua maliu mai oe iaʻu.

6. A eia hou, e ke Akua, iaʻu i huli ae ai i koʻu hale ua maliu mai oe iaʻu ma kaʻu pule.

7. A iaʻu i huli ae ai i koʻu keena mehameha, e ka Haku, a pule aku la ia oe, ua maliu mai oe iaʻu;

8. He oiaio, ua lokomaikai oe i kaʻu mau keiki ia lakou i hea aku ai ia oe e maliu ia e oe, aole e na kanaka, a e maliu mai no oe ia lakou;

9. He oiaio, e ke Akua, ua lokomaikai oe iaʻu a maliu mai i kaʻu hea ana mawaena konu o na anaina ou;

10. He oiaio, a ua maliu mai no hoi oe iaʻu i ka wa aʻu i kipaku ia mai ai iwaho, a i hoowahawaha ia hoi e koʻu poe enemi; he oiaio, ua maliu mai oe i kaʻu hea ana, a huhu ae la i koʻu poe enemi, a ua hoopai ae oe ia lakou iloko o kou inaina, me ka luku koke;

11. A ua maliu mai iaʻu no kuu mau popilikia a me koʻu oiaio; a no kau Keiki pela oe i lokomaikai mai ai iaʻu; nolaila, e kahea aku no au ia oe iloko o koʻu mau popilikia a pau; no ka mea, aia iloko ou koʻu olioli; no ka mea, ua hoohuli ae la oe i kou mau hoopai mai oʻu aku nei, no kau Keiki.

12. Ano, i aku la o Alama ia lakou, ke manaoio nei anei oukou i ua mau palapala hemolele la i palapala ia e ka poe o ka wa kahiko?

13. Aia hoi, ina pela, alaila e manaoio no oukou i ka mea a Zenosa i olelo mai ai, no ka mea, aia hoi, i mai la oia, Ua hoohuli ae la oe i kou mau hoopai, no kau Keiki.

14. Ano hoi, e koʻu poe hoahanau, ke makemake nei au e ninau aku, ina ua heluhelu oukou i na palapala hemolele? Ina ua heluhelu, pehea la e hiki ai ia oukou ke manaoio ole i ke Keiki a ke Akua?

15. No ka mea, aole ia i palapala ia o Zenosa wale no ka i olelo mai ai no ia mau mea, aka o Zenoka hoi kekahi ka i olelo mai ai no ua mau mea nei;

16. No ka mea, aia hoi, i mai la oia, Ua huhu oe, e ka Haku, i keia poe kanaka, no ka mea, aole lakou i hoomaopopo iho i kou mau lokomaikai au i hookau mai ai maluna iho o lakou, no kau Keiki.

17. Ano, e koʻu poe hoahanau, ke ike nei oukou, ua hoike mai ka lua o ke kaula o ka wa kahiko no ke Keiki a ke Akua; a no ka makemake ole o na kanaka e hoomaopopo iho i kana mau olelo, hailuku ae la lakou ia ia a make loa.

18. Aka hoi, aole o keia wale no; aole o laua wale no na mea i olelo mai no ke Keiki a ke Akua.

19. Aia hoi, ua olelo ia mai nona e Mose; he oiaio hoi, ua hooku ia ae he hoailona iluna ma ka waonahele, i hiki i ka mea makemake ke nana aku i ua mea la a ola.

20. A ua nana aku kekahi poe he nui wale a ola iho la. Aka, he kakaikahi ka poe i hoomaopopo iho i ke ano o ua mau mea nei, a o keia no ka paakiki o ko lakou mau naau. Aka he nui wale na mea no ka paakiki loa aole lakou i nana aku; nolaila, make aku la lakou. Ano, o ke kumu o ko lakou nana ole ana, no ka manaoio ole o lakou e hoola mai ana ia mea ia lakou.

21. E koʻu poe hoahanau, ina ua hiki oukou ke hoola ia, ma ka alawa ana ae o ko oukou mau maka, i hoola ia ai oukou, aole anei oukou e nana koke ae, a i ole ia, e makemake loa paha oukou e hoopaakiki iho i ko oukou mau naau iloko o ka hoomaloka a e molowa, i ole ai oukou e alawa ae i ko oukou mau maka, i make ai oukou?

22. Ina pela, e hiki mai ka poino maluna o oukou; aka ina aole pela, alaila e alawa ae oukou i ko oukou mau maka; a e hoomaka e manaoio aku i ke Keiki a ke Akua, ka mea e hele mai a hoolapanai mai i kona poe kanaka, a ka mea hoi e hoomainoino ia auanei a e make i kalahala no ko lakou mau hewa; a e ala hou mai auanei oia mai ka make mai, i mea ia e lawe mai ai i ke alahouana, i ku iho ai auanei na kanaka a pau imua ona, e hookolokolo ia, ma ka la hookolokolo hope, e like me ka lakou mau hana.

23. A, ano, e koʻu poe hoahanau, ke makemake nei au ia oukou e kanu iho i keia olelo iloko o ko oukou mau naau, a me ia e hoomaka ai e kupu, pela hoi e malama iho ai ia mea ma ko oukou manaoio. Aia hoi, e lilo ae ia i laau, e ulu ae ana iloko o oukou i ke ola mau loa. Alaila, na ke Akua e ae mai ia oukou i mama ko oukou mau ukana, ma o ka olioli la o kana Keiki. A o keia a pau ua hiki ia oukou ke hana, ke makemake oukou. Amene.