1. A eia kekahi, hele aku la lakou, a hoomaka ae la e hai aku i ka olelo a ke Akua i na kanaka, e komo ana iloko o ko lakou mau halepule, a iloko o ko lakou mau hale; he oiaio, hai aku la no hoi lakou i ka olelo ma na alanui o lakou la.

2. A eia kekahi, mahope iho o ka hana nui mawaena o lakou la, hoomaka ae la lakou e loaa ka pomaikai mawaena o ka poe hune o na kanaka; no ka mea, ua hookuke ia ae lakou mawaho o ko lakou mau halepule, no ka nani ole o ko lakou kapa;

3. Nolaila, aole lakou i ae ia e komo iloko o ko lakou mau halepule e hoomana aku i ke Akua, i manao ia ai me he pelapela la; nolaila, ua ilihune lakou; he oiaio, i manao ia ai lakou e ko lakou poe hoahanau me he oka la; nolaila, ua hune lakou ma na mea o ko ke ao nei; a ua hune no hoi ma ka naau.

4. Ano, ia Alama e ao ana a e olelo ana i na kanaka maluna o ka puu o Onida, hele mai la he poe paapu a nui loa io na la, o lakou no ka poe i olelo ia iho nei e makou, o ka poe hune ma ka naau, no ko lakou nele ma na mea o ko ke ao nei.

5. A hele mai la lakou io Alama la; a o ka mea mua loa o lakou, i mai la oia ia ia, Aia hoi, heaha la ka keia poe, koʻu poe hoahanau e hana ai, no ka mea, ua hoowahawaha ia lakou e na kanaka a pau, no ko lakou ilikole; he oiaio, a nui loa ae e ko makou poe kahuna; no ka mea, ua hookuke mai lakou ia makou mawaho o ko makou mau halepule a makou i hana nui loa ai e kukulu, me ko makou mau lima ponoi; a ua hookuke mai lakou ia makou no ko makou ilikole loa, a, aole o makou wahi e hoomana aku ai i ko makou Akua; a, aia hoi, heaha la ka makou e hana ai?

6. Ano, ia Alama i lohe ai i keia, huli koke ae la oia me kona maka ia ia, a ike aku la oia, me ka olioli nui; no ka mea, ua ike oia ua hoohaahaa io ae ko lakou mau pilikia ia lakou, a e makaukau ana lakou e lohe i ka olelo;

7. Nolaila, aole oia i olelo hou ae i ua poe e la, aka, hohola ae la oia i kona lima, a hea aku la i ka poe ana i ike ai, ka poe i mihi io, a i aku la ia lakou,

8. Ke ike nei au, ua haahaa oukou ma ka naau; a ina pela, pomaikai oukou.

9. Aia hoi, ua i mai kou hoahanau, Heaha la ka makou e hana ai? No ka mea, ua hookuke ia mai makou mawaho o ko makou mau halepule, i hiki ole ai ia makou ke hoomana aku i ko makou Akua.

10. Aia hoi, ke i aku nei au ia oukou, ke manao nei anei oukou ua hiki ole ia oukou ke hoomana aku i ke Akua, ke ole ia iloko o ko oukou mau halepule wale no?

11. A eia hou kaʻu e ninau aku ai, ke manao nei anei oukou e hoomana aku oukou i ke Akua i hookahi hoomana ana wale no e pono ai ma ka hebedoma?

12. Ke i aku nei au ia oukou, ua pono ko oukou hookuke ia ana aku mailoko aku o ko oukou mau halepule, i haahaa oukou, a i ao ia ai hoi oukou i ka naauao; no ka mea, he mea e pono ai no oukou e ao ia i ka naauao; no ka mea, no ko oukou hookuke ia ana, ua hoowahawaha ia oukou e ko oukou poe hoahanau, no ko oukou ilikole loa, ua lawe ia oukou i ka haahaa o ka naau; no ka mea, ua koi ia oukou e lilo i haahaa.

13. A no ko oukou koi ia ana e lilo i haahaa, ua pomaikai oukou; no ka mea, o ke kanaka i kekahi manawa ea, ina i koi ia oia e lilo i haahaa, e imi oia i ka mihi; ano, he oiaio, o ka mea e mihi ana, e loaa no ia ia ke aloha; a o ka mea e loaa ana ke aloha a e hoomau ana i ka hopena, oia ke hoola ia auanei.

14. Ano, me aʻu i olelo aku ai ia oukou, no ko oukou koi ia ana e lilo i haahaa, ua pomaikai oukou, aole anei oukou i manao ua pomaikai nui ae ka poe i hoohaahaa io ia lakou iho no ka olelo?

15. He oiaio, o ka mea e hoohaahaa io ana ia ia iho, a e mihi ana i kona mau hewa, a e hoomau ana i ka hopena oia ke hoopomaikai ia auanei; he oiaio, e hoopomaikai nui loa ia mamua o ka poe i koi ia e lilo i haahaa, mamuli o ko lakou ilikole loa;

16. Nolaila, pomaikai lakou ka poe hoohaahaa ia lakou iho me ke koi ole ia mai e lilo i haahaa; a ma kekahi olelo e, pomaikai ka mea i manaoio i ka olelo a ke Akua, a i bapetizo ia me ka paakiki ole o ka naau; he oiaio, me ke koi ole ia mai e ike i ka olelo, aohe hoi i koi ia e ike mamua o ko lakou manaoio ana.

17. He oiaio, he nui ka poe i olelo mai, Ina e hoike mai oe ia makou i hoailona mai ka lani mai, alaila, e ike oiaio makou; alaila, e manaoio no makou.

18. Ano ke ninau nei au, he manaoio anei keia? Aia hoi, ke i aku nei au ia oukou, aole; no ka mea, ina e ike kekahi kanaka i kekahi mea, aohe ona kumu e manaoio ai, no ka mea, ua ike no oia ia mea;

19. A, ano, ua oi aku ka poino o ka mea e ike ana i ka makemake o ke Akua, a e hana ole, mamua o ka mea e manaoio wale ana, i ole, e loaa ana paha ke kumu wale no e manaoio ai, a i haule iho iloko o ka hala!

20. Ano, no keia mea, e noonoo pono oukou. Aia hoi, ke i aku nei au ia oukou, ua like ia ma kekahi ano, me ia ma kekahi; a e hana ia auanei i kela kanaka keia kanaka e like me kana hana.

21. Ano, me aʻu i olelo aku ai no ka manaoio: O ka manaoio, aole ia he ike lea i na mea; nolaila, ina he manaoio ko oukou, ke manaolana nei oukou no na mea i ike ole ia, he oiaio nae.

22. Ano, aia hoi, ke i aku nei au ia oukou ke makemake nei au e hoomanao oukou ua lokomaikai ke Akua i ka poe a pau i manaoio ma kona inoa; nolaila, ke makemake nei oia, o ka mea mua, e manaoio oukou, he oiaio, ma kana olelo.

23. Ano, ke haawi mai la oia i kana olelo ma o na anela la i na kanaka; he oiaio, aole i na kanaka wale, aka, i na wahine no hoi. Ano, aole o keia wale no: o na keiki uuku ua haawi ia mai na olelo ia lakou i na manawa he nui wale, i hoohoka aku ai i ka poe naauao a me ka poe i aoia.

24. Ano, e oʻu poe hoahanau i aloha ia, me oukou i makemake mai ai e ike mai aʻu aku i ka mea a oukou e hana ai no ko oukou hoopilikia ia ana a hookuke ia ana; ano, aole oʻu makemake e kuhi mai oukou e manao ana au e hoohewa aku ia oukou, eia wale no, e like me ka oiaio;

25. No ka mea, aole au i manao ua koi ia oukou a pau e hoohaahaa ia oukou iho; no ka mea, ke manaoio maoli nei au aia no kekahi poe mawaena o oukou e hoohaahaa ana ia lakou iho, ina paha ma kela ano o ka noho ana ma keia ano o ka noho ana.

26. Ano, me aʻu i olelo aku ai no ka manaoio, aole ia he ike lea, pela no hoi me kaʻu mau olelo nei. Aole e hiki ia oukou ke ike i ka oiaio o ia mau mea i kinohi, i ka ike lea ana, e like me ka manaoio aole ia he ike lea.

27. Aka, ina e ala oukou a e hooeueu ae i na mea ikaika o na naau o oukou, a hoao mai i kaʻu mau olelo, a e hana me kekahi huna o ka manaoio; he oiaio, ina e hiki ia oukou ke makemake wale no e manaoio, e kuu aku i keia makemake e hana iloko o oukou, a hiki ia oukou ke manaoio ma ke ano kupono e hookaawale ae i wahi no kau wahi o kaʻu mau olelo.

28. Ano, e hoohalike kakou i ka olelo i kekahi hua. Ano, ina e hookaawale ae oukou i wahi, e hiki ke kanu ia kahi hua iloko o ko oukou mau naau, aia hoi, ina he hua oiaio, a he hua maikai, ina aole oukou e hoolei aku ia mea no ko oukou manaoio ole, i ku e ai oukou i ka Uhane o ka Haku, aia hoi, e hoomaka no ia e kupu ae iloko o ko oukou mau naau; a ia oukou e ike ai i keia kupu ana, e hoomaka no oukou e nalu iloko o oukou iho, he oiaio, he hua maikai neia, a oia hoi, ua maikai ka olelo, no ka mea, ke hoomaka nei ia e hooakea ae i kuu naau; he oiaio, ke hoomaka nei ia e hoomalamalama mai i kuu hoomaopopo ana; he oiaio, a ke hoomaka nei ia e lilo i ono loa iaʻu.

29. Ano, aia hoi, aole anei e hoomahuahua keia i ko oukou manaoio? Ke i aku nei au ia oukou, ae; aole nae ia i ulu ae i ka ike lea.

30. Aka hoi, i ka omaka ana o ka hua, a i ka hoomaka ana e ulu, alaila, e pono no oukou ke olelo, ua maikai ka hua; no ka mea hoi, e pehu ana ia, a e omaka ana, a e hoomaka ana e ulu.

31. Ano, aia hoi, ua ike paka anei oukou he hua maikai keia? Ke i aku nei au ia oukou, ae; no ka mea, ke hua mai nei kela hua keia hua i kona ano like;

32. Nolaila, ina e ulu ana kekahi hua, he hua maikai ia, aka, ina e ulu ole ana ia, aia hoi, aole ia he maikai; nolaila, ua hoolei ia aku ia.

33. Ano, aia hoi, no ka hoao ana o oukou ia mea, a kanu iho la i ka hua, a e omaka ana, a e hoomaka ana e ulu, he mea e pono ai oukou ke ike ua maikai ka hua.

34. Ano, aia hoi, ua lawa anei ko oukou ike? Ae, ua lawa ko oukou ike ma ua mea la, a ua moe ko oukou manaoio; a o keia mea no ko oukou ike ana; no ka mea ua ike oukou ua hooakea mai ka olelo i ko oukou mau naau, a ua ike no hoi oukou ua omaka ae ia, a e hoomaka ana ko oukou hoomaopopo ana e hoomalamalama ia mai, a e hoomaka ana ko oukou mau naau e hooakea ia.

35. E! Aole anei keia he oiaio? Ke i aku nei au ia oukou, ae; no ka mea, he malamalama ia; a o ka mea i malamalama he maikai ia, no ka mea, ua hiki ke ike ia; nolaila, he pono no oukou ke ike lea he maikai ia. Ano, aia hoi, mahope iho o ko oukou hoao ana i ua malamalama nei, ua lawa anei ko oukou ike?

36. Aia hoi, ke i aku nei au ia oukou, aole; aole no hoi oukou e waiho ae i ko oukou manaoio, no ka mea, ua hana me ko oukou manaoio wale no ma ke kanu ana i ka hua, e hiki ia oukou ke hoao aku, e ike ina he mea maikai ka hua.

37. A, aia hoi, i ka laau e hoomaka ai e ulu, e olelo no oukou, Ea, e malama pono loa kakou ia ia i komo ai kona aa, i ulu ai ia a e hoohua mai i ka hua ia kakou. Ano hoi, ina e malama pono loa oukou ia ia, e komo no kona aa, a e ulu ae, a e hoohua mai i ka hua.

38. Aka, ina e hoopalaleha oukou i ka laau, a manao ole i kona malama ia ana, aia hoi, aole no e komo na aa ona; a i ka wa e hiki mai ai ka wela o ka la a i hoowela mai ai ia ia, no ke aa ole ona, e mae ia, a e uhuki aku oukou ia ia, a hoolei aku iwaho.

39. Ano, aole keia no ka maikai ole o ka hua i kanu ia; aole no hoi ia mea no ka maikai ole ana o ka hua ona i ohi ia. Aka, no ka panoa o ko oukou lepo, a, no ko oukou malama ole ana i ka laau, nolaila, ua hiki ole ia oukou ke loaa ka hua ona.

40. A pela hoi, ina aole oukou e malama pono i ka olelo, e nana ana imua me ka maka o ka manaoio i ka hua ona, aole loa e hiki ia oukou ke ohi mai i ka hua o ka laau o ke ola.

41. Aka, ina e malama pono oukou i ka olelo, he oiaio, e malama pono i ka laau me ia i hoomaka ai e ulu, ma ko oukou manaoio me ka ikaika nui, a me ka hoomanawanui, e nana ana imua i ka hua ona, e komo no auanei na aa ona; a, aia hoi, e lilo no auanei ia i laau e ulu ana i ke ola mau loa;

42. A no ko oukou ikaika, a me ko oukou manaoio, a me ko oukou hoomanawanui me ka olelo me ka malama ana ia ia, i komo ai ilalo na aa ona iloko o oukou, aia hoi, ma hope e ohi no oukou i ka hua ona, ka mea i maikai loa, a i ono loa hoi mamua o na mea ono a pau, a i keokeo loa mamua o na mea i keokeo a pau, he oiaio, a i maemae loa mamua o na mea i maemae a pau; a e ahaaina auanei oukou ma keia hua, a piha ae oukou, i pololi ole ai oukou, aole e makewai.

43. Alaila, e koʻu poe hoahanau, e ohi no oukou i na uku no ko oukou manaoio, me ko oukou ikaika, a ahonui, a hoomanawanui, e kali ana no ka laau e hoohua mai i ka hua no oukou.