1. A, ano, eia na olelo a Amona i kona poe hoahanau, penei ua mau olelo nei: E koʻu poe hoahanau, aia hoi, ke i aku nei au ia oukou, he kumu nui ko kakou e hauoli ai; no ka mea, ua hiki anei ia kakou ke manao, i ka wa a kakou i haalele aku ai i ka aina o Zarahemela, e haawi mai ana ke Akua ia kakou i na mea pomaikai nui me neia?

2. A, ano, ke ninau aku nei au, heaha la na mea pomaikai nui ana i hookau mai ai maluna iho o kakou? E hiki anei ia oukou ke hai mai?

3. Aia hoi, ke pane aku nei au no oukou, no ka mea, aia iloko o ka pouli mamua ko kakou poe hoahanau, ko Lamana poe, he oiaio, iloko o ka lua pouli loa; aka, aia hoi, pehea la ka nui loa o lakou i lawe ia mai e ike i ka malamalama kupaianaha o ke Akua? A eia no ka pomaikai ana i hookau mai ai maluna iho o kakou, ua hoolilo ia mai kakou i mau mea hana ma na lima o ke Akua, e hooko i keia hana nui.

4. Aia hoi, ke hauoli nei na tausani o lakou, a ua lawe ia mai iloko o ka pa o ke Akua.

5. Aia hoi, ua oo ka mahinaai, a pomaikai iho la oukou, no ka mea, ua hookomo aku oukou i ka pahikakiwi, a hoiliili iho la me ko oukou ikaika, he oiaio, a hana aku la oukou a pau ae ka la; a, e nana aku oukou i ka nui loa o na pua a oukou, a e hoiliili ia auanei lakou iloko o na halepapaa, i helelei liilii ole ai lakou;

6. He oiaio, aole loa lakou e ulupa ia ilalo e ka makani ino, ma ka la hope; he oiaio, aole e hapuku ia e na puahiohio; aka, i ka wa e hiki mai ai ka makani ino, e hoiliili pu ia lakou ma ko lakou wahi, e hiki ole ai i ka makani ino ke komo iloko o lakou; he oiaio, aole hoi lakou e puhi ia e na makani ikaika, i kahi a ka enemi e makemake ai e hali ia lakou.

7. Aka hoi, aia no lakou ma na lima o ka Haku nona ka mahinaai, a nana no lakou; a e hookiekie mai oia ia lakou iluna ma ka la hope.

8. E hoomaikai ia ka inoa o ko kakou Akua; e memele aku kakou i kona nani, he oiaio, e haawi aku kakou i ke aloha i kona inoa hoano, no ka mea, ke hana la oia i ka pono a mau loa aku.

9. No ka mea, ina ua pii ole mai kakou mailoko mai o ka aina o Zarahemela, ina ua walania ano keia poe hoahanau aloha nui ia o kakou, ka poe i aloha nui mai me neia ia kakou, me ka inaina ku e mai ia kakou, he oiaio, a he poe malihini no hoi lakou i ke Akua.

10. A eia kekahi, ia Amona i olelo ae ai i ua mau olelo nei, papa mai la kona kaikuaana o Aarona ia ia, i ka i ana: E Amona, ke makau nei au e kai ana kou olioli ia oe, e kaena aku.

11. Aka, i ae la o Amona ia ia, Aole au e kaena nei ma koʻu ikaika iho, aole hoi ma koʻu naauao iho; aka hoi, ua piha koʻu olioli, he oiaio, ua piha kuu naau me ka olioli, a e hauoli no au iloko o kuu Akua;

12. He oiaio, ke ike nei au he mea ole au; ma koʻu ikaika, ua nawaliwali au; nolaila, aole au e kaena aku noʻu iho, aka e kaena aku au no koʻu Akua; no ka mea, ma kona ikaika ua hiki iaʻu ke hana aku i na mea a pau; he oiaio, aia hoi, he nui wale na hana mana nani a kakou i hana aku ai ma keia aina, a no ua mau mea nei, ea, e hiilani aku kakou i kona inoa no ka wa pau ole.

13. Aia hoi, nani wale ka nui loa o ko kakou poe hoahanau ana i hookuu mai ai, mai na eha o gehena ae; a ua kai ia mai lakou e memele aku i ke aloha hoolapanai ana; a o keia mea no ka mana o kana olelo iloko o kakou; nolaila, aole anei o kakou he kumu nui e hauoli ai?

14. Ae, he kumu no ko kakou e hoolea aku ai ia ia, ia ao aku ia ao aku, no ka mea, oia no ke Akua kiekie loa, a ua hookuu mai i ko kakou poe hoahanau mai na kaulahao ae o gehena.

15. He oiaio, ua hoopuni ia lakou a puni me ka pouli a make mau loa; aka hoi, nana no i kai mai ia lakou iloko o kona malamalama mau loa, he oiaio, iloko o ke ola mau loa; a ua hoopuni ia lakou a puni me ka lokomaikai keu loa o kona aloha; he oiaio, a o kakou no na mea hana ma kona mau lima, i hana ai i ua hana nui a kupanaha nei;

16. Nolaila, e kaena ae kakou, he oiaio, e kaena ae kakou iloko o ka Haku; he oiaio, e hauoli kakou, no ka mea, ua piha ko kakou olioli; he oiaio, e hoonani aku kakou i ko kakou Akua no ka wa pau ole. Aia hoi, owai la ka mea e hiki ke kaena ae iloko o ka Haku mamua o ka mea ku pono? He oiaio, owai la ka mea e hiki ke olelo oi aku mamua o ka mea pono, no kona mana nui, a no kona aloha, a no kona hoomanawanui i na keiki a kanaka? Aia hoi, ke i aku nei au ia oukou, ua hiki ole iaʻu ke olelo aku i ka huna uuku loa aʻu i manao ai.

17. Owai la ka mea i manao he aloha nui ko ke Akua me neia, i kona kaili ana mai ia kakou mai ko kakou wahi weliweli, hewa, a haumia?

18. Aia hoi, haele aku la kakou iloko o ka inaina, me na olelo weliweli ikaika e hoopau aku i kona ekalesia.

19. Aia hoi, no ke aha la oia i haawi ole mai ai ia kakou i ka make weliweli loa; he oiaio, no ke aha la oia i hookuu ole mai ai i ka pahikaua o kona hoopai e haule mai maluna iho o kakou, e hoolilo mai ia kakou i ka poho mau loa o ka manao?

20. E, me he mea la aneane e hee ana kuu uhane ma ua manao la. Aia hoi, aole oia i hana mai i kona hoopai maluna iho o kakou, aka, ma kona aloha nui ua kai mai ia kakou ma keia aoao o kela awawa mau loa o ka make a me ka poino, i ka hoolaa ia ana o ko kakou mau uhane.

21. Ano hoi, e oʻu poe hoahanau, owai la ke kanaka ma kona ano maoli, i ike ai i keia mau mea? Ke i aku nei au ia oukou, aole kekahi i ike i ua mau mea nei, ke ole ia ka mea mihi;

22. He oiaio, o ka mea e mihi ana a e hana ana me ka manaoio, a e hoohua ae ana i na hua maikai, a e pule mau ana me ka hooki ole; i na mea e like me neia ua haawi ia mai e ike i na mea pohihihi o ke Akua; he oiaio, o ka poe me neia e haawi ia mai auanei e hoike aku i na mea i hoike ole ia aku; he oiaio, a e haawi ia mai auanei i ka poe me neia, e kai mai i na tausani o na uhane i ka mihi, oia, e like me ia i haawi ia mai ai ia kakou e kai mai i ua poe hoahanau nei o kakou i ka mihi.

23. Ano, ke hoomanao nei anei oukou, e koʻu poe hoahanau, ua olelo aku kakou i ko kakou poe hoahanau ma ka aina o Zarahemela, Ea, ke pii aku nei makou i ka aina o Nepai, e haiolelo aku i ko kakou poe hoahanau, i ko Lamana poe, a hoomahuakala mai la lakou ia kakou?

24. No ka mea, i mai la lakou ia kakou, Ke kuhi nei anei oukou ua hiki ia oukou ke kai mai i ko Lamana poe i ka ike i ka oiaio? Ke kuhi nei anei oukou ua hiki ia oukou ke hoomaopopo aku i ko Lamana poe i ka hewa o na mooolelo o ko lakou poe kupuna, he poe kanaka ai oolea me lakou la; no lakou na naau e hauoli ana ma ke hookahe ana i ke koko; no lakou na la i lilo ai ma ka hana hewa loa; no lakou na aoao he mau aoao o ka mea lawehala mai kinohi mai? Ano, e koʻu poe hoahanau, ke hoomanao nei oukou oia no ka lakou olelo.

25. A eia hou ka lakou i olelo mai ai, E, e lalau aku kakou i na mea kaua e ku e ia lakou e hiki ia kakou ke hoopau aku ia lakou a me ka lakou hana hewa mailoko aku o ka aina, o kawowo mai lakou maluna iho o kakou a hoopoino mai ia kakou.

26. Aka hoi, e koʻu poe hoahanau, haele mai la kakou iloko o ka waonahele, aole me ka manao e hoopau aku i ko kakou poe hoahanau, aka me ka manao e hiki paha ia kakou ke hoola aku i kekahi mau uhane he uuku o lakou.

27. Ano, i ka wa i kaumaha ai ko kakou mau naau, a aneane kakou e hoi hou, aia hoi, hooluolu mai la ka Haku ia kakou, a i mai la, E hele aku mawaena o ko oukou poe hoahanau, ko Lamana poe, a e haawe me ka hoomanawanui i ko oukou mau popilikia, a e haawi aku au ia oukou i ka pomaikai.

28. A, ano hoi, ua haele mai la kakou, a hele aku la mawaena o lakou; a ua hoomanawanui iho iloko o na eha o kakou, a ua loaa ia kakou kela mea pilikia keia mea pilikia; he oiaio ae la, ua hele aku kakou mai ia hale aku ia hale aku, e hilinai ana maluna o ke aloha o ko ke ao nei; aole maluna o ke aloha o ko ke ao nei wale no, aka maluna ae o ke aloha o ke Akua.

29. A ua komo aku kakou iloko o na hale o lakou a ao aku la ia lakou, a ua ao aku la kakou ia lakou ma na alanui o lakou; he oiaio, a ua ao aku kakou ia lakou maluna ae o na puu o lakou; a ua komo no hoi kakou iloko o na luakini o lakou, a me na halehalawai o lakou, a ao aku la ia lakou; a ua hoolei ia mai kakou mawaho, a hoomaewaewa ia mai, a kuha ia mai, a papai ia mai ma ko kakou mau papalina; a ua hailuku ia mai kakou, a hopu ia mai, a nakinaki ia mai me na kaula ikaika, a hahao ia mai iloko o ka halepaahao; a ma o ka mana a naauao la o ke Akua, ua hoopakele hou ia mai kakou;

30. A ua loaa ia kakou kela ano keia ano o ka pilikia, a o keia mau mea a pau, i hiki ia kakou paha ke lilo i poe e hoola i kekahi uhane; a ua manao wale kakou e piha ana ko kakou olioli, ina paha ua hiki ia kakou ke lilo i poe hoola i kekahi poe.

31. Ano, aia hoi, ua hiki ia kakou ke nana aku a ke ike aku i na hua o ka kakou hana; a he kakaikahi anei lakou? Ke i aku nei au ia oukou, aole, he nui loa aku lakou; he oiaio, a ua hiki ia kakou ke hoike aku no ko lakou oiaio, no ko lakou aloha i na hoahanau o lakou, a ia kakou no hoi.

32. No ka mea, aia hoi, ua makemake loa ka, lakou e mohai aku i na ola o lakou, mamua o ke kaili aku i ke ola o ko lakou poe enemi; a ua kanu hohonu iho la lakou i ko lakou mau mea o ke kaua iloko o ka honua, no ko lakou aloha i ko lakou poe hoahanau.

33. A, aia hoi, ke olelo aku nei au ia oukou, he aloha nui anei me neia mamua ma ka aina a puni? Aia hoi, ke i aku nei au ia oukou, aole, aole hoi mawaena o ko Nepai poe.

34. No ka mea hoi, ua lalau no lakou i na mea kaua e ku e i ko lakou poe hoahanau; aole lakou i ae aku e pepehi ia mai lakou. Aka hoi, e nana aku i ka nui loa o ua poe nei i waiho aku ilalo i na ola o lakou; a ua ike kakou ua haele aku la lakou i ko lakou Akua la no ko lakou aloha, a no ko lakou inaina i ke hewa.

35. Ano, aole anei o kakou he kumu e hauoli ai? Ae, ke i aku nei au ia oukou, aole loa he poe kanaka no lakou ke kumu nui me neia e hauoli ai e like me kakou nei, mai ka makamua mai o ke ao nei; he oiaio, a ua kai ia aku la kuu olioli ma ke kaena ma koʻu Akua; no ka mea, nona ka mana a pau, ka naauao a pau, a me ka ike maopopo a pau; ke hoomaopopo mai nei oia i na mea a pau, a he Mea aloha, a hiki aku i ka hoola ana i ka poe e mihi ana a e manaoio ana i kona inoa.

36. Ano, ina he kaena keia, alaila pela au e kaena aku ai; no ka mea, o keia no kuu ola a me kuu malamalama, koʻu olioli a me koʻu hoola ia ana, a me koʻu hoolapanai ia ana mai ka poino mau loa mai. He oiaio, e hoomaikai ia ka inoa o koʻu Akua, nana i malama mai i keia poe kanaka, he lala lakou o ka laau o Iseraela, a ua lilo ae la mai kona kino aku, iloko o kahi aina e; he oiaio, ke i aku nei au, e hoomaikai ia ka inoa o koʻu Akua, nana i malama mai ia kakou, he poe aea iloko o kahi aina e.

37. Ano, e koʻu poe hoahanau, ke ike nei kakou e malama ana ke Akua i kela lahuikanaka i keia lahuikanaka, ma kela aina keia aina a lakou i noho ai; he oiaio, ke helu mai la oia i kona poe kanaka, a, aia no kona aloha maluna iho o ko ka honua a pau. Ano, oia no koʻu olioli, a me koʻu hoolea nui ana aku; he oiaio, a e aloha aku au i koʻu Akua no ka wa pau ole. Amene.