1. A eia kekahi, hooki aku la lakou a nee uuku ae la mai o lakou ae. A i aku la o Moroni ia Zerahemana, E nana mai oe, e Zerahemana e, aole makou i makemake e lilo i poe kanaka puni koko. Ke ike nei oukou eia no oukou iloko o ko makou mau lima, aole nae makou i makemake e luku aku ia oukou.

2. Aia hoi, aole makou i hele mai nei e kaua aku ia oukou e hiki ia makou ke hookahe aku i ko oukou koko, i loaa ai ia makou ka mana; aole hoi makou i makemake e kai i kekahi mea malalo iho o ka auamo o ka luhi. Aka, o keia no ke kumu io o ko oukou hele ana mai e ku e mai ia makou; he oiaio, a ua huhu oukou ia makou no ko makou hoomana ana.

3. Aka, ano, ke ike nei oukou eia pu no ka Haku me makou; a ke ike nei oukou ua haawi mai oia ia oukou iloko o ko makou mau lima. Ano, ke makemake nei au e hoomaopopo oukou ua hana ia mai keia ia makou no ko makou hoomana ana a no ko makou manaoio ia Kristo. Ano, ke ike nei oukou ua hiki ole ia oukou ke hoopau mai i ko makou manaoio nei.

4. Ano, ke ike nei oukou o keia no ka manaoio oiaio o ke Akua; he oiaio, ke ike nei oukou e kokua mai no ke Akua, a e malama mai a e hoola mai ia makou i na manawa a pau a makou e pono ai ia ia, a i ko makou manaoio, a i ko makou hoomana ana; aole loa e ae mai ka Haku e anai ia makou, ke ole haule iho makou iloko o ka hala, a hoole aku i ko makou manaoio.

5. Ano, e Zerahemana e, ke kauoha aku nei au ia oe, ma ka inoa o kela Akua mana loa, nana i hooikaika mai i ko makou mau lima, i loaa ai ia makou ka mana maluna iho o oukou ma ko makou manaoio, ma ko makou haipule ana, a ma ko makou mau oihana o ka hoomana ana, a ma ko makou ekalesia, a ma ka hana laa i hooili ia mai ai maluna o makou e malama i ka makou poe wahine a me ka makou mau keiki, ma kela noho kauwa ole ana, ka mea e hoopaa ana ia makou i ko makou mau aina a i ko makou aupuni; he oiaio, a ma ke kokua ana no hoi o ka olelo laa a ke Akua, ma o ua mea la i loaa ai ia makou ko makou pomaikai a pau; a ma na mea a pau i maikai loa ia makou;

6. He oiaio, aole o keia wale no; ke kauoha aku nei au ia oukou ma na makemake a pau o oukou i ke ola, e haawi mai oukou i ko oukou mau mea kaua ia makou, a, aole makou e imi i ko oukou koko, aka e hookoe aku makou i ko oukou mau ola, ina e hele aku oukou, a e hele hou ole mai e kaua mai ia makou.

7. Ano, ina e hana ole oukou i keia mea, eia hoi oukou iloko o ko makou mau lima, a e kena aku au i koʻu poe kanaka e haule iho lakou maluna iho o oukou, a e hoeha ia oukou i na eha o ka make ma ko oukou poe kino, i anai loa ia ai oukou; alaila, e ike kakou i ka poe e loaa auanei ka mana maluna iho o keia poe kanaka; he oiaio, e ike kakou i ka poe e kai ia auanei iloko o ka noho luhi ana.

8. Ano, eia kekahi, ia Zerahemana i lohe ai i keia mau olelo, hele mai la oia a haawi mai la i kana pahikaua, a me kana pahikaua pokole, a me kana kakaka iloko o na lima o Moroni, a i mai la ia ia, Aia hoi, eia no ko makou mau mea kaua; e haawi aku no makou ia mau mea ia oukou, aka aole makou e ae e hoohiki aku ia oukou i ka hoohiki a makou i ike ai e uhai ia auanei e makou, a e ka makou mau keiki no hoi; aka e lawe aku i ko makou mau mea kaua, a e ae mai ia makou e haele aku iloko o ka waonahele; a i ole ia, e aua makou i ka makou mau pahikaua, a e make makou, a i ole ia, e lanakila.

9. Aia hoi, aole makou no ko oukou manaoio: aole makou manaoio na ke Akua i haawi mai ia makou iloko o ko oukou mau lima; aka, ke manaoio nei makou o ko oukou maalea no ka mea i hoopakele mai ai ia oukou mai ka makou pahikaua aku. Aia hoi, o ko oukou mau pale-umauma, a me ko oukou mau pale-lima, oia na mea i hoopakele mai ai ia oukou.

10. Ano, ia Zerahemana i hoopau ai i kana olelo ana i keia mau hua olelo, hoihoi hou aku la o Moroni i ka pahikaua, a me na mea kaua i loaa ai ia ia, ia Zerahemana, i ka i ana, Aia hoi, e kaua kakou a pau ke kaua.

11. Ano, aole e hiki iaʻu ke hoole i na olelo aʻu i olelo aku ai; nolaila, me ka Haku e ola nei, aole loa oukou e haele, ke ole haele oukou me ka hoohiki, e hele hou ole mai ai oukou e ku e mai ia makou e kaua. Ano, eia no oukou ma ko makou mau lima, a e hookahe no makou i ko oukou koko ma ka honua, a i ole ia, e ae mai oukou i na mea aʻu i olelo aku ai.

12. Ano, ia Moroni i olelo aku ai i keia mau hua olelo, hoopaa iho la o Zerahemana i kana pahikaua, a ua huhu oia ia Moroni, a holo kiki mai la ia i hiki ia ia ke pepehi mai ia Moroni; aka, ia ia i hoaka ai i kana pahikaua, aia hoi, hahau aku la kekahi o ko Moroni poe koa ia mea i ka honua; a haki aku la ia mea ma ke au; a hahau aku la oia ia Zerahemana, a oki i ka ili o kona poo, a haule iho la ia mea i ka honua. A emi aku la o Zerahemana mai ko lakou alo aku, mawaena o kona poe koa.

13. A eia kekahi, o ke koa e ku pu ana, nana i oki aku i ka ili poo o Zerahemana, lalau iho la oia i ka ili poo mai ka honua ae, ma ka lauoho, a kau ae la ia mea ma ka welau o kana pahikaua, a o aku la ia mea ia lakou, i ka i ana ia lakou me ka leo nui,

14. Me keia ili poo i haule iho ai i ka honua nei, oia no hoi ka ili poo o ko oukou alii, pela no oukou e haule iho ai i ka honua nei, ke ole haawi mai oukou i ko oukou mau mea kaua, a e haele aku, me kekahi berita o ka malu.

15. Ano, aia no kekahi poe he nui wale, ia lakou i lohe ai i keia mau hua olelo, a ike mai la no hoi i ka ili poo i kau ia ma ka pahikaua, loohia iho la lakou me ka makau, a hele mai la na mea he nui wale a hoolei mai la i na mea kaua ma na wawae o Moroni, a komo iho iloko o ka berita o ka malu. A o ka poe a pau nana i hana iho i ka berita, ua hookuu ia e lakou e haele aku iloko o ka waonahele.

16. Ano, eia kekahi, ua ukiuki nui loa iho la o Zerahemana, a hookonokono ae la oia i ke koena o kona poe koa i ka huhu, e paio ikaika nui loa mai i ko Nepai poe.

17. Ano, ua huhu o Moroni, no ka paakiki o ko Lamana poe; nolaila, kena ae la oia i kona poe kanaka e lele lakou maluna iho o lakou la, a e pepehi aku ia lakou la; he oiaio, a paio mai la ko Lamana poe me ka lakou mau pahikaua a me ko lakou ikaika.

18. Aka hoi, ua waiho wale ko lakou ili olohelohe, a me ko lakou mau poo pale ole, i na pahikaua oi a ko Nepai poe; he oiaio, ua hou ia a ua hahau ia; he oiaio, a hiki wawe ka haule ana imua o na pahikaua a ko Nepai poe; a hoomaka ae la lakou e kulai ia ilalo e like me ka ke koa o Moroni i wanana aku ai.

19. Ano, ia Zerahemana i ike ai ua aneane lakou a pau e anai ia aku, hea ikaika mai la oia ia Moroni, e olelo ana e hana berita no oia, a me kona poe kanaka no hoi, me lakou, ina e hookoe lakou i na ola o ka poe i koe, aole lakou la e kaua hou mai ia lakou ma ia hope aku.

20. A eia kekahi, kena ae la o Moroni e hooki ia ka hana o ka make mawaena o na kanaka. A lawe mai la oia i na mea kaua mai ko Lamana mai; a mahope iho o ko lakou komo ana iloko o ka berita o ka malu me ia, ua ae ia lakou e haele aku iloko o ka waonahele.

21. Ano, aole i helu ia ka nui o ko lakou poe make, no ka nui loa o lakou; he oiaio, ua nui loa iho la ka helu o ko lakou poe make ma ko ko Nepai poe, a ma ko ko Lamana poe no hoi.

22. A eia kekahi, hoolei aku la lakou i ko lakou poe make iloko o na wai o Sidona; a ua lawe ia aku la lakou, a ua kanu ia iloko o ka hohonu o ke kai.

23. A hoi ae la ka poe koa o ko Nepai, oia hoi ko Moroni, a hiki ae la i ko lakou mau hale, a me ko lakou mau aina.

24. A pela i pau ai ka makahiki umikumamawalu o ke au o na lunakanawai maluna iho o ka poe kanaka o Nepai. A pela i pau ai ka mooolelo a Alama, i kakau ia maluna iho o na papa a Nepai.