1. Eia kekahi, hoi aku la o Alama mai ka aina o Gideona ae, mahope iho o kona ao ana i na kanaka o Gideona i na mea he nui i hiki ole ai ke palapala ia, a ua hoonohonoho i na mea o ka ekalesia, me kana i hana e ai mamua ma ka aina o Zarahemela; he oiaio, hoi aku la oia i kona hale iho ma Zarahemela e hoomaha ia ia iho mai na hana ana i hana aku ai.

2. A pela i pau ai ka iwa o ka makahiki o ke au o na lunakanawai maluna iho o ka poe kanaka o Nepai.

3. Eia kekahi, i ka makamua o ka makahiki umi o ke au o na lunakanawai maluna iho o ka poe kanaka o Nepai, haalele aku la o Alama ia wahi, a hele aku la ma o ma ka aina o Meleka, ma ke komohana o ka muliwai o Sidona, ma ke komohana, ma na palena o ka waonahele;

4. A hoomaka ae la oia e ao aku i na kanaka ma ka aina o Meleka, mamuli o ka aoao hemolele o ke Akua, ona i hea ia mai ai; a hoomaka ae la oia e ao aku i na kanaka a pau ma ka aina o Meleka a puni.

5. Eia kekahi, hele mai la na kanaka io na la, mai o a o, o na palena a pau o ka aina ma ka aoao waonahele. A ua bapetizo ia lakou mai o a o, o ka aina a puni;

6. A i ka wa i pau ai kana hana ma Meleka, haalele iho la oia ia wahi, a hele aku la i ko na la ekolu hele ana ma ka akau o ka aina o Meleka; a hiki aku la oia i kekahi kulanakauhale i kapa ia o Amoniha.

7. Ano, he mea mau ia me ko Nepai poe, e kapa aku i ko lakou mau aina, a i ko lakou mau kulanakauhale, a me ko lakou mau kauhale, he oiaio, i ko lakou mau kauhale uuku hoi a pau, mamuli o ka inoa o ka mea nana i noho mua ma ia mau wahi; a pela hoi ia me ka aina o Amoniha.

8. A eia kekahi, ia Alama i hiki ai i ke kulanakauhale o Amoniha, hoomaka ae la ia e hai aku i ka olelo a ke Akua i kolaila poe.

9. Ano, ua nui ka mana o Satana maluna iho o na naau o na kanaka o ke kulanakauhale o Amoniha; nolaila, aole lakou i hoolohe i na olelo a Alama.

10. Aka hoi, hana nui iho la o Alama ma ka Uhane, e hakoko ana me ke Akua ma ka pule ikaika, e ninini mai oia i kona Uhane maluna o na kanaka iloko o ke kulanakauhale; a nana hoi e ae mai ia ia e bapetizo aku ia lakou i ka mihi;

11. Hoopaakiki iho la nae lakou i ko lakou mau naau, i ka i ana ia ia, Aia hoi, ua ike makou ooe no o Alama; a ua ike makou ooe no ke kahuna nui maluna iho o ka ekalesia au i kukulu ai ma na wahi he nui o ka aina, e like me ko oukou mooolelo; aole makou no kou ekalesia, aole makou i manaoio i na mooolelo lapuwale me neia.

12. Ano, ke ike nei makou no ko makou komo ole iloko o kou ekalesia, ua ike makou aole ou mana maluna o makou; a ua haawi aku oe i ka noho hookolokolo ia Nepaiha; nolaila, aole oe ka lunakanawai nui maluna o makou.

13. Ano, i ka wa o na kanaka i olelo mai ai i keia, a i ku e mai ai i kana mau olelo a pau, a i hoino mai ai ia ia, a i kuha mai ai maluna iho ona, a i kipaku mai ai ia ia iwaho o ko lakou kulanakauhale, haalele iho la oia ia wahi a hele aku la i ke kulanakauhale i kapa ia o Aarona.

14. Eia kekahi, oiai oia e hele ana ilaila, i hookaumaha ia ilalo me ka eha o ka naau, e auhele ana mawaena o ka pilikia a kaumaha nui loa o ka naau, no ka hewa o na kanaka iloko o ke kulanakauhale o Amoniha, oiai o Alama i hookaumaha ia peia ilalo me ka eha, aia hoi, ikea ae la kekahi anela a ka Haku e ia, a i mai la:

15. Pomaikai ooe, e Alama; nolaila, e hooea mai i kou poo a e hauoli, no ka mea, he kumu nui kou e hauoli ai; no ka mea, ua ikaika oe i ka malama ana i na kauoha a ke Akua mai ka wa au i loaa ai kau kauoha mua mai ona mai. Aia hoi, owau no ka mea nana i haawi aku ia mea ia oe;

16. A, aia hoi, ua hoouna ia mai au e kauoha aku ia oe e hoi aku i ke kulanakauhale o Amoniha, a e hai hou aku i ka poe kanaka o ua kulanakauhale la; he oiaio, e hai olelo ia lakou. He oiaio, e i aku ia lakou, ke ole lakou e mihi, e luku no ka Haku ke Akua ia lakou.

17. No ka mea hoi, ke kuka nei lakou i keia manawa e hiki ia lakou ke hoopau i ke kuokoa ana o kou poe kanaka, (no ka mea, pela wahi a ka Haku,) he mea ku e ia i na olelo kupaa, a me na kauoha, a me na kanawai ana i haawi mai ai i kona poe kanaka.

18. Ano hoi, mahope iho o ko Alama loaa ana ka olelo mai ka anela mai a ka Haku, hoi koke aku la oia i ka aina o Amoniha. A komo aku la i ke kulanakauhale ma kekahi ala e, he oiaio, ma ke ala ma ka hema o ke kulanakauhale o Amoniha.

19. A i kona komo ana i ke kulanakauhale ua pololi oia, a i aku la oia i kekahi kanaka: E, e haawi mai anei oe i kekahi kauwa haahaa a ke Akua i kau wahi mea e ai ai?

20. A i aku la ke kanaka ia ia, No Nepai no wau, a ua ike au he kaula hemolele oe no ke Akua, no ka mea, ooe no ke kanaka a kahi anela i i mai ai ma ka hihio, E hookipa oe; nolaila e hele pu me au iloko o koʻu hale, a e haawi aku no au ia oe i kaʻu ai; a ua ike au e lilo ana oe he mea noʻu a me koʻu hale e pomaikai ai.

21. A eia kekahi, hookipa mai la ke kanaka ia ia iloko o kona hale; a ua kapa ia ua kanaka nei o Amuleka; a lawe mai la oia i berena a i ia, a kau mai la imua o Alama.

22. Eia kekahi, ai berena iho la o Alama a ua maona; a hoopomaikai iho la oia ia Amuleka a me kona hale, a aloha aku la oia i ke Akua.

23. A mahope iho o kona ai ana a maona, i aku la oia ia Amuleka, Owau no o Alama, a o ke kahuna nui no au maluna o ka ekalesia o ke Akua mawaena o ka aina.

24. A, aia hoi, ua kahea ia mai au e hai aku i ka olelo a ke Akua mawaena o keia poe kanaka a pau, e like me ka Uhane o ka hoike ana a me ka wanana; a ma keia aina no au, aole lakou i hookipa mai iaʻu, aka kipaku aku la lakou iaʻu iwaho, a, aneane au e hoohuli ae i kuu kua i ua aina nei no ka wa pau ole.

25. Aka hoi, ua kauoha ia mai au e huli hou mai au a e wanana aku i ua poe kanaka nei, he oiaio, a e hoike ku e aku ia lakou no ka lakou mau hala.

26. Ano, e Amuleka, no ko hanai ana mai iaʻu a hookipa ana mai iaʻu, ua pomaikai oe; no ka mea, ua pololi au, no ka mea, ua hookeai au i na la he nui.

27. A noho iho la o Alama i na la he nui me Amuleka, mamua o kona hoomaka ana e hai aku i ka olelo i kanaka.

28. A eia kekahi, mahuahua nui loa aku la na kanaka ma ka lakou hana hewa.

29. A hiki mai la ka olelo ia Alama, i ka i ana, O hele; a e olelo aku hoi i kaʻu kauwa o Amuleka, e hele aku a e wanana aku i keia poe kanaka, i ka i ana, E mihi oukou, no ka mea, penei wahi a ka Haku, ke ole oukou e mihi, e hoopai aku au i keia poe kanaka iloko o koʻu inaina; he oiaio, aole au e hoohuli ae i kuu inaina wela.

30. A hele aku la o Alama, a o Amuleka hoi, mawaena o na kanaka e hai aku i na olelo a ke Akua ia lakou; a ua piha laua i ka Uhane Hemolele;

31. A ia laua ka mana i haawi ia mai ai, i hiki ole ai ia laua ke hoopaa ia iloko o na halepaahao; aole hoi i hiki i kekahi kanaka ke pepehi mai ia laua; aole nae laua e hana aku me ko laua mana a hiki i ka wa i nakinaki ia laua ma na mea paa, a i hoolei ia iloko o ka halepaahao. Ano, ua hana ia mai la keia i hiki i ka Haku ke hoike mai i kona mana ma o laua la.

32. A eia kekahi, hele aku la laua a hoomaka ae la e hai aku a e wanana aku i na kanaka, e like me ka Uhane a me ka mana a ka Haku i haawi mai ai ia laua.