1. A eia kekahi, ma ka makahiki umikumamakahi o ke au o na lunakanawai maluna iho o ka poe kanaka o Nepai, ma ka la elima o ka lua o ka malama, ua nui ka malu mamua o kela la ma ka aina o Zarahemela; aole kekahi kaua aole hoi paio no kekahi mau makahiki; a hiki aku i ka la elima o ka lua o ka malama, ma ka makahiki umikumamakahi, ua lohea ka hooho o ke kaua mawaena o ka aina;

2. No ka mea, aia hoi, ua hiki mai ka poe koa o ko Lamana poe ma ka aoao waonahele, ma na palena o ka aina, iloko hoi o ke kulanakauhale o Amoniha, a hoomaka ae la e pepehi i na kanaka, a e anai i ke kulanakauhale.

3. Ano, eia kekahi, mamua o ka wa i hiki ai i ko Nepai ke loaa ka poe koa a lawa e hooauhee aku ia lakou iwaho o ka aina, ua luku e aku la lakou i na kanaka iloko o ke kulanakauhale o Amoniha, a i kekahi poe hoi e kokoke ana ma na palena o Noa, a ua lawe pio aku i kekahi poe e ae iloko o ka waonahele.

4. Ano, eia kekahi, ua makemake ko Nepai poe e loaa ka poe i lawe pio ia aku iloko o ka waonahele;

5. Nolaila, o ka mea i wae ia i alii koa nui maluna o ka poe koa o ko Nepai poe, (a o Zorama kona inoa, a elua ana mau keikikane, o Lehi laua me Aha;) ano, o Zorama a me na keiki ana elua, ua ike no o Alama no ke kahuna nui maluna iho o ka ekalesia, a ua lohe hoi, ia ia ka Uhane o ka wanana, nolaila, hele mai la lakou io na la a noi mai la ia ia e ike, ina ua makemake ka Haku e hele aku lakou iloko o ka waonahele e imi i ko lakou poe hoahanau, ka poe i lawe pio ia aku e ko Lamana poe.

6. A eia kekahi, ninau aku la o Alama i ka Haku no ia mea. A hoi aku la o Alama a i aku la ia lakou, Aia hoi, e hele ae ko Lamana poe i kela kapa o ka muliwai Sidona ma ka waonahele hema, ma o aku o na palena o ka aina o Manati. A, aia hoi, malaila oukou e halawai pu ai me lakou, ma ka hikina o ka muliwai Sidona, a malaila e haawi mai ka Haku ia oukou i ko oukou poe hoahanau, ka poe i lawe pio ia aku e ko Lamana poe.

7. A eia kekahi, hele ae la o Zorama a me kana mau keiki i kela kapa o ka muliwai Sidona, me ko lakou poe koa, a haele aku la ma o aku o na palena o Manati, iloko o ka waonahele hema, aia no ma ke kapa hikina o ka muliwai Sidona.

8. A lele aku la lakou maluna iho o ka poe koa o ko Lamana poe a ua hoopuehu ia aku ko Lamana poe a hooauhee ia aku iloko o ka waonahele; a lawe aku la lakou i ko lakou poe hoahanau, ka poe i lawe pio ia aku e ko Lamana poe, aole kekahi mea o lakou i lilo o ka poe i lawe pio ia. A ua lawe ia mai lakou e ko lakou poe hoahanau e noho ma ko lakou mau aina ponoi.

9. A pela i pau ai ka makahiki umikumamakahi o na lunakanawai, ua hooauhee ia aku ko Lamana poe iwaho o ka aina, a ua luku ia ae ka poe kanaka o Amoniha; he oiaio, ua luku ia kela mea ola keia mea ola o ko Amoniha, a me ka anai ia hoi o ko lakou kulanakauhale nui, a lakou i i mai ai ua hiki ole i ke Akua ke anai mai, no ka nui ona.

10. Aka hoi, ma ka la hookahi ua waiho neoneo ia oia; a ua haehae ia na heana e na ilio a me na holoholona hihiu o ka waonahele;

11. Aka hoi, mahope iho o kekahi mau la he nui, ua hoahu ia na kino make o lakou maluna iho o ka ili o ka honua, a ua uhi ia lakou me ka lepo papau. A no ka nui o ka pilau o lakou, aole i hele aku na kanaka e noho ma ka aina o Amoniha no na makahiki he nui wale. A ua kapa ia ia ka neoneo o ko Nehora poe; no ka mea, no ka aoao o Nehora lakou, ka poe i pepehi ia; a waiho neoneo ia iho la na aina o lakou.

12. A, aole i hele hou mai ko Lamana poe e kaua ku e mai i ko Nepai poe a hiki aku i ka makahiki umikumamaha o ke au o na lunakanawai maluna iho o ka poe kanaka o Nepai. A pela no ma na makahiki ekolu i loaa ai ka poe kanaka o Nepai ka malu ma ka aina a puni.

13. A hele aku la o Alama laua me Amuleka e hai ana i ka mihi i na kanaka iloko o ko lakou mau luakini, a iloko o ko lakou mau halelaa, a iloko o ko lakou mau halehalawai, i kukulu ia ai mamuli o ke ano o ko ka poe Iudaio.

14. A o ka poe a pau i hoolohe mai i ka laua olelo, ua haawi mau aku laua ia lakou i ka olelo a ke Akua, me ka manao ole i ko ke kanaka helehelena.

15. A pela i hele aku ai o Alama laua me Amuleka, a me na mea e ae no hoi he nui wale, he poe i wae ia no ka oihana, e hai aku i ka olelo mawaena o ka aina a puni. A o ke kukulu ia ana o ka ekalesia ua lilo ia i mea laha mawaena o ka aina, ma na wahi a puni, mawaena o ko Nepai poe.

16. Aole he noho like ole ana mawaena o lakou; ninini mai la ka Haku i kona Uhane maluna iho o ko ka aina a pau, e hoomakaukau mai i na hoomaopopo o na keiki a kanaka, a e hoomakaukau mai i na naau o lakou e hookipa i ka olelo e ao ia ai auanei mawaena o lakou i ka wa o kona hiki ana mai,

17. I hoopaakiki ole ia ai lakou e ku e i kana olelo, i hoomaloka ole ai lakou, a hele aku i ka make, aka i hiki ia lakou ke hookipa i ka olelo me ka olioli, a me he lala la i pakui ia iloko o ke kumuwaina oiaio, e hiki ia lakou ke komo iloko o ka maha o ka Haku, ko lakou Akua.

18. Ano, haiolelo aku la, ua poe kahuna la, ka poe i hele aku mawaena o na kanaka, me ke ku e aku i na wahahee ana, a me na hoopunipuni ana, a me na paonioni ana, a me na paio ana, a me ka hoomauhala, a me na hoino ana, a me ka aihue ana, powa ana, hao ana, pepehi kanaka ana, moekolohe ana, a me kela ano keia ano o ka makaleho a pau, e hea ana aole no ua mau mea nei e pono ai;

19. E hoike ana i na mea e hiki koke mai ana; he oiaio, e hoike ana i ka hiki ana mai o ke Keiki a ke Akua, i kona mau eha a make, a me ke alahouana no hoi o ka poe make.

20. A ninau mai la kekahi poe he nui o na kanaka no ka wahi a ke Keiki a ke Akua e hele mai ai; a ua ao ia mai lakou e hoike mai oia ia ia iho ia lakou mahope iho o kona alahouana; a lohe iho la na kanaka i keia mea me ka olioli a hauoli nui.

21. Ano, mahope iho o ke kukulu ia ana o ka ekalesia mawaena o ka aina a puni, a ua loaa ka lanakila maluna iho o ke diabolo, a ua hai ia ka olelo a ke Akua ma kona maemae ma ka aina a puni, a e ninini mai ana ka Haku i na mea e pomaikai ai ona maluna iho o na kanaka; pela i pau ai ka makahiki umikumamaha o ke au o na lunakanawai, maluna iho o ka poe kanaka o Nepai.