1. Ano, e kaʻu keiki, he mau mea kaʻu e olelo aku ai no ka hoihoi hou ia ana i olelo e ia ai; no ka mea, aia hoi, ua hookapae ae kekahi poe i na palapala hemolele, a hele auwana loa aku no ia mea. A ke ike nei au ua hoohihia ia kou naau no hoi, no keia mea. Aka hoi, e hoomaopopo aku no au ia mea ia oe.

2. Ke i aku nei au ia oe, e kaʻu keiki, he mea e pono ai ke kumumanao o ka hoihoi hou ia ana me ka pololei o ke Akua; no ka mea, he mea e pono ai e hoihoi hou ia na mea a pau i ko lakou ano ponoi. Aia hoi, he mea e pono ai a ua pololei hoi, e like me ka mana a me ke alahouana o Kristo, e hoihoi hou ia ka uhane o kanaka i kona kino, a e hoihoi hou ia kela apana keia apana o ke kino i kona wahi iho.

3. A he mea e pono ai me ka pololei o ke Akua, e hookolokolo ia auanei na kanaka e like me ka lakou mau hana; a ina he maikai ka lakou mau hana ma keia ola ana, a ua maikai na makemake o ko lakou mau naau, e hoihoi hou ia lakou no hoi, ma ka la hope, i ka mea i maikai;

4. A ina he ino ka lakou mau hana, e hoihoi hou ia auanei ia mau mea ia ia no ka ino; nolaila, e hoihoi hou ia na mea a pau i ko lakou ano ponoi; o kela mea keia mea i kona wahi maoli; o ka make e hoala ia i ka make ole; o ka palaho i ka palaho ole; e hoala ia i ka pomaikai pau ole, e noho ma ke aupuni o ke Akua, a i ole ia, i ka poino pau ole, e noho ma ke aupuni o ke diabolo, kekahi ma kekahi lima, a kekahi ma kekahi lima;

5. O kekahi mea e hoala ia i ka pomaikai, e like me kona mau makemake i ka pomaikai; a i ka maikai, e like me kona mau makemake i ka maikai; a o kekahi hoi i ka ino, e like me kona mau makemake i ka ino; no ka mea, me ia i makemake ai e hana ino a pau ae ka la, pela no oia e loaa ai kona uku o ka ino, i ka wa e hiki mai ai ka po.

6. A pela no ia ma kekahi lima iho. Ina ua mihi oia i kona mau hewa, a makemake ae la i ka pono a hiki aku i ka hopena o kona mau la, pela no oia e uku ia ai i ka pono.

7. O lakou nei no ka poe i hoolapanai ia e ka Haku; he oiaio, o lakou nei no ka poe i unuhi ia ae a i hoopakele ia ae mai kela po pau ole ae o ka pouli; a pela lakou e ku ai a i ole e hina ai; no ka mea, aia hoi, na lakou e wae aku no lakou iho, e hana i ka maikai, a i ole ia, e hana i ka ino.

8. Ano, ua hiki ole ke hoololi ia na kanawai o ke Akua; nolaila, ua hoomakaukau ia ke ala, i hiki i ka mea makemake, ke hele iloko olaila a e hoola ia mai.

9. Ano, aia hoi, e kaʻu keiki, mai aa aku i kekahi lawehala hou i kou Akua ma keia mau kumumanao o ke ao ana, e like me oe i aa ai mamua aku nei e lawehala ai.

10. Mai manao oe no ka olelo ia ana no ka hoihoi hou ia ana, e hoihoi hou ia auanei oe mai ka hewa i ka pomaikai. Aia hoi, ke i aku nei au ia oe, aole loa ka hewa he pomaikai.

11. Ano, e kaʻu keiki, o na kanaka a pau i noho iloko o ka noho maoli ana, oia hoi iloko o ka noho kino ana, aia no lakou iloko o ke au awaawa, a iloko o na mea paa o ka hewa; a ua nele lakou i ke Akua ma ke ao nei, a ua hele ku e aku lakou i ke ano o ke Akua; nolaila, aia no lakou ma kahi ku e i ke ano o ka pomaikai.

12. Ano, aia hoi, o keia anei ke ano o ka huaolelo hoihoihouana, e lawe i kekahi mea no kahi ku pono, a e waiho ia ia iloko o kahi ku pono ole, a i ole ia, e waiho aku ia ia iloko o kahi ku e i kona ano maoli?

13. E kaʻu keiki, aole loa ia pela; aka eia ke ano o ka hoihoihouana: e hoihoi hou aku i ka ino no ka ino, i ko ke kino no ko ke kino, i ko ke diabolo no ko ke diabolo; i ka maikai no ka mea i maikai; i ka pono no ka mea i pono; i ka pololei no ka mea i pololei; i ke aloha no ka mea i aloha;

14. Nolaila, e kaʻu keiki, e makaala e aloha aku oe i kou poe hoahanau; e hana me ka pololei, e hooponopono me ka pono, a e hana mau i ka maikai; a ina e hana aku oe i keia mau mea a pau, alaila, e loaa no ia oe kou uku; he oiaio, a e hoihoi hou ia auanei ke aloha ia oe; e hoihoi hou ia auanei ka pololei ia oe; e hoihoi hou ia auanei ka hoopono pololei ia oe; a e hoouku hou ia auanei ka maikai ia oe;

15. No ka mea, o ka mea au e hoouna aku ai e hoi hou mai ia ia oe, a e papani hou ia; nolaila, e hoohewa nui loa ana ka huaolelo hoihoihouana i ka lawehala, a, aole loa e hoapono iki ana ia ia.