1. Ano, e hoi hou kakou i ka kakou mooolelo, ia Amalikia, a me ua poe la i hee pu ai me ia iloko o ka waonahele; no ka mea, ua lawe aku oia i ua poe la ka poe i hele pu me ia, a pii aku la i ka aina o Nepai, mawaena o ko Lamana poe, a hookonokono ae la i ko Lamana poe e huhu mai i ka poe kanaka o Nepai, a no ia mea, hoouna ae la ke alii o ko Lamana poe i olelo hoolaha mawaena o kona aina a puni, mawaena o kona poe kanaka a pau, i houluulu hou ai lakou ia lakou iho, no ka hele ana mai e kaua i ko Nepai poe.

2. A eia kekahi, i ka wa i kui ia aku ai ka olelo hoolaha mawaena o lakou, ua hopohopo nui loa iho la lakou; he oiaio, hopohopo lakou e hoonaukiuki i ke alii, a hopohopo no hoi lakou i ka hele ana mai e kaua me ko Nepai poe, o kaili ia aku ko lakou mau ola. A eia kekahi, aole lakou makemake, a, aole hoi i hoolohe ae ka hapa nui o lakou i na kauoha a ke alii.

3. Eia kekahi, huhu iho la ke alii no ko lakou hookuli ana; nolaila, haawi ae la oia ia Amalikia i ka noho luna ana o kela hapa o kona poe koa, ka poe i hoolohe i kana mau kauoha; a kena ae la ia ia e hele aku a e koi ia lakou la e kahiko i na mea kaua.

4. Ano hoi, oia no ka makemake o Amalikia; no ka mea, he kanaka maalea loa oia i ka hana ino, nolaila, ua kuka iho la oia i ka manao iloko o kona naau e kaili i ka noho alii o ke alii o ko Lamana poe.

5. Ano, ua loaa ia ia ka noho luna ana o ua poe la o ko Lamana, ka poe i aloha i ke alii; a imi iho la oia e loaa ke aloha o ka poe i hoolohe ole; hele aku la oia i ka wahi i kapa ia o Onida, no ka mea, malaila kahi o ko Lamana poe a pau i mahuka aku ai; no ka mea, ike aku la lakou i ka poe koa e hele mai ana, a me ka manao e hele mai ana ua poe la e luku mai ia lakou, nolaila, holo aku la lakou i Onida i kahi o na mea kaua.

6. A ua hoonoho iho lakou i kekahi kanaka i alii a i alihi kaua maluna iho o lakou, me ka manao paa loa ma ko lakou mau naau aole loa lakou e koi ia mai e hele e ku e i ko Nepai poe.

7. A eia kekahi, ua houluulu lakou ia lakou iho ma kahi hookahi maluna iho o ka piko o ka puu i kapa ia ai o Anatipasa, i hoomakaukau ia e kaua aku.

8. Ano, aole ia o ko Amalikia manao e kaua ae ia lakou, e like me na kauoha a ke alii; aka hoi, o kona manao no ia e loaa ka aloha o ka poe koa o ko Lamana, e hiki ia ia ke hoonoho ia ia iho maluna iho o lakou, a e kaili i ka noho alii mai ke alii ae, a e loaa ke aupuni.

9. Aia hoi kekahi, kena ae la oia i kona poe koa e kukulu iho i ko lakou mau halelewa ma ke awawa kokoke i ka puu Anatipasa.

10. A eia kekahi, i ka wa poeleele, hoouna ae la oia i ke kauoha malu i ka puu Anatipasa, e makemake ana i ka alihi kaua o ua poe la maluna o ka puu, o Lehonati no kona inoa, e iho mai oia malalo o ka puu, no ka mea, ua makemake oia e kamailio pu me ia.

11. A eia kekahi, ia Lehonati i loaa ai ke kauoha, aole ona aa e iho malalo iho o ka puu. A eia kekahi, hoouna hou ae la o Amalikia i ka lua o ka manawa, e makemake ana ia ia e iho ilalo. A eia kekahi, aole o Lehonati makemake; a hoouna hou oia i ke kolu o ka manawa.

12. A eia kekahi, ia Amalikia i ike ai aole i hiki ia ia ke koi ae ia Lehonati e iho malalo o ka puu, pii aku la oia i ka puu, a kokoke i ko Lehonati wahi i hoomoana ai; hoouna hou aku la oia i ka ha o ka manawa, i kana kauoha ia Lehonati, e makemake ana ia ia e iho ilalo, a e lawe pu i kona poe koa kiai me ia.

13. A eia kekahi, ia Lehonati i iho iho ai ilalo me kona poe koa kiai io Amalikia la, makemake ae la o Amalikia ia ia e iho iho ilalo me kona poe koa i ka po, a e poai puni i kela poe kanaka iloko o ko lakou mau wahi i hoomoana ai, i ka poe a ke alii i haawi iho ai malalo iho ona e noho luna ia ai, a nana e haawi ae ia lakou iloko o ko Lehonati mau lima, ina e hoolilo mai oia ia ia (ia Amalikia) i alihi kaua lua maluna iho o ka poe koa a pau.

14. A eia kekahi, iho iho la o Lehonati me kona poe kanaka, a hoopuni i ka poe kanaka o Amalikia, a mamua o ko lakou ala ana ma ka wanaao, ua hoopuni ia lakou, e ka poe koa o Lehonati.

15. A eia kekahi, ia lakou i ike ai ua hoopuni ia lakou, noi ae la lakou ia Amalikia e ae mai oia ia lakou e hui pu me ko lakou poe hoahanau, i luku ole ia ai lakou. Ano, oia no ka mea a Amalikia i makemake loa ai.

16. A eia kekahi, hookuu ae la oia i kona poe kanaka, me ke ku e i na kauoha a ke alii. Ano, oia no ka mea a Amalikia i makemake ai, e hiki ia ia ke hooko i kona mau manao i ke kaili ana i ka noho alii o ke alii.

17. Ano, he mea mau me ko Lamana poe, ina e pepehi ia ko lakou alihi kaua nui, e hoonoho iho i ka lua o na alihi kaua i alihi nui no lakou.

18. A eia kekahi, kena ae la o Amalikia i kekahi o kana poe kauwa e hanai liilii i ka laau make ia Lehonati, a make aku la oia.

19. Ano, i ka wa i make ai o Lehonati, hoonoho iho la o ko Lamana poe ia Amalikia i luna a i alihi kaua nui no lakou.

20. A eia kekahi, hele aku la o Amalikia me kona poe koa (no ka mea, ua loaa ia ia kona mau mea i makemake ai,) i ka aina o Nepai, i ke kulanakauhale o Nepai, oia no ke kulanakauhale nui.

21. A hele mai la ke alii e halawai pu me ia, me kona poe koa kiai; no ka mea, manao iho la oia ua hooko aku o Amalikia i kana mau kauoha, a ua houluulu iho la o Amalikia i na puali nui me neia e hele ae i ko Nepai poe e kaua.

22. Aka hoi, i ke alii i haele mai ai e halawai pu me ia, kena ae la o Amalikia i kana poe kauwa e hele aku e halawai pu me ke alii. A hele aku la lakou a kulou iho la lakou imua o ke alii, me he mea la e hoomaikai ia ia, no kona nui.

23. A eia kekahi, kikoo mai la ke alii i kona lima e hoala ia lakou e like me ka aoao o ko Lamana poe, me he hoailona la o ka maluhia, a ua loaa ia lakou keia hana mai ko Nepai poe ae.

24. A eia kekahi, ia ia i hoala mai ai i ka mea mua mai ka honua ae, aia hoi, hou ae la oia i ke alii ma ka puuwai; a haule iho la oia i ka honua.

25. Ano, mahuka aku la ka poe kauwa a ke alii; a hooho ae la ka poe kauwa a Amalikia, i ka i ana,

26. Aia ka! Ua hou iho la ka poe kauwa a ke alii ia ia ma ka puuwai, a ua haule iho la oia, a ua mahuka aku la lakou; aia hoi, e hele mai a nana.

27. A eia kekahi, kena ae la o Amalikia i kona poe koa e hele aku, a e ike i ka mea o ke alii i loohia ai; a ia lakou i hiki ai i ua wahi la, a loaa iho la ke alii e moe ana iloko o kona koko, hookokohu iho la o Amalikia me he mea huhu la, a i ae la, O kela mea keia mea i aloha i ke alii, e hele aku oia a e alualu i kana poe kauwa, i pepehi loa ia ai lakou.

28. A eia kekahi, ia lakou ka poe a pau i aloha i ke alii i lohe ai i keia mau olelo, hele mai la lakou a alualu aku la i ka poe kauwa a ke alii.

29. Ano, i ka wa i ike ai ka poe kauwa a ke alii i kekahi poe koa e alualu ana ia lakou, ua makau hou lakou, a mahuka ae la iloko o ka waonahele, a hele mai la i ka aina o Zarahemela, a hui pu iho la me ka poe kanaka o Amona;

30. A hoi hou aku la ka poe koa i alualu ia lakou, ua alualu makehewa ia lakou la; a pela o Amalikia ma kona hoopunipuni, i loaa ai na naau o na kanaka.

31. A eia kekahi, ia la ae, komo ae la oia iloko o ke kulanakauhale o Nepai, me kona poe koa, a noho iho la ma ke kulanakauhale.

32. Eia kekahi, i ke aliiwahine i lohe ai ua pepehi ia ke alii a make; no ka mea, ua hoouna ae la o Amalikia i kahi elele i ke aliiwahine la, e hoike ana ia ia ua pepehi ia ke alii e kana poe kauwa; a ua alualu aku la oia ia lakou me kona poe koa, aka ua makehewa ia, a ua pakele ae la lakou;

33. Nolaila, i ka wa a ke aliiwahine i loaa ai ua olelo nei, hoouna ae la oia ia Amalikia, e makemake ana ia ia e hookoe iho i ka poe kanaka o ke kulanakauhale; a ua makemake no hoi oia ia ia e komo mai io na la a e lawe pu mai i na mea hoike me ia, e hoike mai no ka make o ke alii.

34. A eia kekahi, lawe pu ae la o Amalikia i ua kauwa la nana ke alii i pepehi, a me ka poe a pau i ku pu me ia, a hele ae la iloko i ke aliiwahine la, i ka wahi ana i noho ai; a hoike ae la lakou a pau ia ia ua pepehi ia ke alii e kana poe kauwa ponoi; a i ae la no hoi lakou, Ua mahuka aku la lakou; aole anei o keia he mea e hoike ku e ai ia lakou? A pela lakou i hoonana i ke aliiwahine no ka make o ke alii.

35. A eia kekahi, imi iho la o Amalikia i ke aloha o ke aliiwahine, a lawe ae la oia i kela i wahine nana; a pela oia ma kona epa a ma ke kokua ana o kana poe kauwa maalea, loaa iho la ia ia ke aupuni; he oiaio, ua ae ia oia i alii mawaena o ka aina a puni, mawaena o ka poe kanaka a pau o ko Lamana a me ko Lemuela, a me ko Isemaela, a me na mea a pau i kuee a haalele i ko Nepai poe, mai ke au ia Nepai a hiki loa i keia manawa.

36. Ano, na ua poe kuee nei ke ao hookahi ana a me ka naauao hookahi me ko Nepai poe; he oiaio, ua ao ia i ka ike hookahi o ka Haku; aka hoi, he mea kupaianaha e hai aku, aole liuliu mahope iho o ko lakou kuee ana, lilo iho la lakou i poe paakiki a palaka loa, a i poe hihiu, hewa a hae loa, mamua o ko Lamana poe e hui pu ana me na mooolelo o ko Lamana poe; e ae ana i ka molowa, a i kela ano i keia ano o ka makaleho; he oiaio, e hoopoina loa ana i ka Haku, i ko lakou Akua.