1. Eia kekahi, ma ka makahiki iwakaluakumamaono o ke au o na lunakanawai maluna iho o ka poe kanaka o Nepai, aia hoi, i ka wa a ko Lamana poe i ala ai i ke kakahiaka mua o ka malama mua, aia hoi, ike ae la lakou ua make o Amalikia ma kona halelewa ponoi; a ike mai la no hoi lakou ua makaukau o Teanakuma e kaua aku ia lakou ia la.

2. Ano, i ko Lamana poe i ike ai i keia, ua makau lakou; a haalele loa iho la lakou i ko lakou manao e hele ae iloko o ka aina akau, a hoi aku la lakou me ko lakou poe koa a pau iloko o ke kulanakauhale o Muleka, a imi i ka malu iloko o ko lakou mau pakaua.

3. A eia kekahi, ua hoonoho ia iho la ke kaikaina o Amalikia i alii maluna iho o na kanaka; a o Amorona no kona inoa; pela i hoonoho ia ai o ke alii Amorona, ke kaikaina o Amalikia, e noho alii ma kona hakahaka.

4. A eia kekahi, kauoha ae la oia i kona poe kanaka e malama i ua mau kulanakauhale la a lakou i hoopio ai ma ka hookahe ana i ke koko; no ka mea, aole lakou i hoopio i kekahi kulanakauhale me ke kahe nui ole o ke koko.

5. Ano, ike aku la o Teanakuma ua paa ka manao o ko Lamana poe e malama i kela mau kulanakauhale a lakou i hoopio ai, a me kela mau wahi o ka aina a lakou i loaa ai; a i ka ike ana no hoi i ka lehulehu o lakou, manao iho la o Teanakuma aole ia he mea e pono ai e hoouka aku ia lakou iloko o ko lakou mau pakaua;

6. Aka, hoonoho iho la oia i kona poe kanaka a puni, me he mea la e hoomakaukau ana oia no ke kaua; he oiaio, a e hoomakaukau io ana oia e hoomalu ae ia ia iho mai o lakou aku, ma ka hoahu ana i na paia a puni, a e hoomakaukau ana i na wahi e akoakoa ai.

7. A eia kekahi, a pela oia i hoomakaukau mau ai no ke kaua, a hiki i ka wa a Moroni i hoouna ae ai i kekahi poe kanaka he nui loa e hooikaika i kona poe koa;

8. A hoouna ae la no hoi o Moroni i na kauoha ia ia, e malama paa oia i na pio a pau i haule iloko o kona mau lima; no ka mea, me ko Lamana poe i hoopio mai ai i na mea he nui, pela no hoi e hoopaa ai oia i na pio a pau o ko Lamana poe, i panai no ua poe la a ko Lamana poe i hoopio mai ai.

9. A hoouna ae la no hoi oia i na kauoha ia ia nei, e kukulu i pakaua i ka aina o Momona, a e hoopaa aku i ka puali ololi e hiki aku ana i ka aina akau, o loaa auanei i ko Lamana poe ua wahi la, a e loaa ka mana e hoopilikia mai ia lakou ma kela aoao keia aoao.

10. A hoouna ae la no hoi o Moroni ia ia, e makemake ana ia ia e onipaa oia i ka malama ana ia hapa o ka aina, a e imi oia i kela manawa maikai keia manawa maikai e hahau aku i ko Lamana poe ma ua wahi la, e like me ka mea e hiki ai ia ia, i hiki paha ia ia ke hoopio hou aku, ma ka hana maalea, a i ole ia ma kekahi hana e ae, i ua mau kulanakauhale la i kaili ia aku ai mailoko aku o ko lakou mau lima; a i hana ai no hoi oia i na pakaua a e hooikaika i na kulanakauhale e kokoke ana a puni, i haule ole iloko o na lima o ko Lamana poe.

11. A i ae la no hoi oia ia ia, Ua makemake au e hele aku io oukou la, aka hoi, aia no ko Lamana poe maluna iho o makou ma na palena o ka aina ma ke kai komohana; aia hoi, e hele aku ana au e ku e ia lakou, nolaila, aole i hiki iaʻu ke hele aku io oukou la.

12. Ano, ua hele aku la ke alii (o Amorona) iwaho o ka aina o Zarahemela, a ua hoike aku i ke aliiwahine no ka make o kona kaikuaana, a ua houluulu ae la i na kanaka he nui loa, a ua hele ku e mai la i ko Nepai poe, ma na palena ma ke kai komohana;

13. A pela oia i hoao ai e hoopilikia mai i ko Nepai poe, a e kai aku i kekahi hapa o ko lakou nei poe koa i kela hapa o ka aina, oiai hoi oia i kauoha ae ai i kela poe ana i waiho aku ai e noho ma na kulanakauhale ana i hoopio ai, i hoopilikia mai ai no hoi lakou i ko Nepai poe ma na palena ma ke kai hikina; a e loaa ai ko lakou nei mau aina e like me ka mea e hiki ai ia lakou la, e like me ka mana o na puali o lakou la.

14. A pela ko Nepai poe ma kela noho pilikia ana, i ka pau ana o ka makahiki iwakaluakumamaono o ke au o na lunakanawai maluna iho o ka poe kanaka o Nepai.

15. Aka hoi, eia kekahi, ma ka makahiki iwakaluakumamahiku o ke au o na lunakanawai, ua hoonoho iho o Moroni i na puali e hoomalu aku i na palena hema a komohana o ka aina, a ua hoomaka ae la oia i kona hele i ka aina o Momona, e hiki ia ia ke kokua ia Teanakuma me kona poe kanaka, i ka loaa hou ana na kulanakauhale o lakou i lilo aku ai.

16. A eia kekahi, ua loaa ia Teanakuma na kauoha mai o Moroni mai e hoouka aku i ke kulanakauhale o Muleka, a loaa hou ia ina he mea hiki.

17. A eia kekahi, hoomakaukau iho la o Teanakuma e hoouka aku i ke kulanakauhale o Muleka, a e hele aku me kona poe koa e ku e i ko Lamana poe; aka, ike aku la oia he mea hiki ole ia ia ke lanakila ae maluna iho o lakou, oiai lakou iloko o na pakaua o lakou; nolaila, haalele iho la oia i kona mau manao, a hoi hou ae la i ke kulanakauhale Momona, e kali iho ai no ka hiki ana mai o Moroni, i loaa ai ia ia i poe hou no kona poe koa.

18. A eia kekahi, hiki aku la o Moroni me kona poe koa i ka aina o Momona, ma ka hopena o ka makahiki iwakaluakumamahiku o ke au o na lunakanawai maluna iho o ka poe kanaka o Nepai.

19. A i ka makamua o ka makahiki iwakaluakumamawalu, akoakoa ae la o Moroni laua me Teanakuma, a me na luna nui he nui wale, e kuka no ke kaua, i ka mea a lakou e hana ai e kai mai i ko Lamana poe e puka mai ia lakou nei e kaua; a i ole ia e hiki ia lakou ma o kekahi mea la, ke hoopunihei aku ia lakou mailoko mai o ko lakou mau wahi paa, i loaa ai ia lakou nei ka lanakila maluna iho o lakou, a e loaa hou ke kulanakauhale o Muleka.

20. A eia kekahi, hoouna aku la lakou i na elele i ka poe koa o ko Lamana poe, ka poe e malama ana i ke kulanakauhale o Muleka, i ka luna o lakou, o Iakoba kona inoa, e noi ana ia ia e hele mai mawaho me na puali ona e halawai pu me lakou ma ke kula mawaena o na kulanakauhale elua. Aka hoi, o Iakoba, he Zorama no oia, aole oia e puku mai me kona poe koa e halawai pu me lakou ma ke kula.

21. A eia kekahi, aole o Moroni manaolana no ka halawai ana me lakou ma na kahua pololei, nolaila, holo iho la kona manao e hoowalewale aku i ko Lamana poe mailoko mai o na wahi paa o lakou.

22. Nolaila, kena ae la oia ia Teanakuma e lawe ae i kekahi poe kanaka he uuku, a e hele aku ilalo a kokoke i ke kahakai; a hele ae la o Moroni a me kona poe koa, ma ka po, i ka waonahele, ma ke komohana o ke kulanakauhale Muleka; a pela, ia la ae, i ka wa a na koa kiai o ko Lamana poe i ike mai ai ia Teanakuma, holo ae la lakou a hai ia mea ia Iakoba, i ka luna o lakou.

23. A eia kekahi, hele ae la ka poe koa o ko Lamana e ku e ia Teanakuma, me ka manao ana no ka nui loa o lakou e lanakila maluna iho o Teanakuma ma, no ka uuku o kona heluna. A ia Teanakuma i ike aku ai i na puali o ko Lamana poe e hele mai ana io na la, hoomaka ae la oia e hee aku ilalo ma ke kahakai, i ka akau.

24. A eia kekahi, i ka wa a ko Lamana poe i ike mai ai e hoomaka ana oia e hee aku, hooikaika iho la lakou a alualu mai la ia lakou nei me ka lohi ole. A oiai o Teanakuma e alakai aku ana i ko Lamana poe pela, ka poe e alualu ana ia ia me ka loaa ole, aia hoi, kauoha ae la o Moroni i kekahi hapa o kona poe koa pu me ia, e hele aku iloko o ke kulanakauhale, a e lawe ae a paa ia wahi.

25. A pela lakou i hana ai, a luku aku la i ka poe a pau i waiho ia e malama iho i ke kulanakauhale; he oiaio, i ka poe a pau i haawi ole mai i ko lakou mau mea kaua.

26. A pela i loaa ai ia Moroni ke kulanakauhale o Muleka, me kekahi hapa o kona poe koa, oiai oia i hele aku ai me ke koena e halawai pu me ko Lamana poe, i ka wa a lakou e hoi mai ai mai ke alualu ana mai ia Teanakuma.

27. A eia kekahi, alualu ae la ko Lamana poe ia Teanakuma a hiki aku lakou kokoke i ke kulanakauhale o Momona, a, alaila ua halawai lakou me Lehi, a me kekahi poe koa he uuku, i waiho ia e malama iho i ke kulanakauhale o Momona.

28. Ano hoi, i ka wa i ike ai na luna nui o ko Lamana poe ia Lehi, me kona poe koa, e hele mai ana e ku e ia lakou, naholo aku la lakou me ka pioloke nui, o hiki ole paha ia lakou ke loaa ke kulanakauhale o Muleka, mamua o ka loaa ana o lakou ia Lehi; no ka mea, ua maluhiluhi lakou no ko lakou hele ana, a ua maluhiluhi ole ko Lehi poe.

29. Ano, aole ko Lamana poe i ike aia ma ko lakou hope o Moroni me kona poe koa; a o Lehi me kona poe kanaka ko lakou mea wale no i makau ai.

30. Ano, aole i makemake o Lehi e loaa lakou, a hiki i ka wa e halawai pu ai lakou me Moroni a me kona poe koa.

31. A eia kekahi, mamua o ko lakou auhee loihi ana, ua hoopuni ia lakou e ko Nepai poe; e ka poe kanaka o Moroni ma kekahi lima a me ka poe kanaka o Lehi ma kekahi, he poe maluhiluhi ole a piha lakou a pau me ka ikaika; aka, ua maluhiluhi ko Lamana poe, no ko lakou hele loihi ana.

32. A kauoha ae la o Moroni i kona poe e haule iho lakou maluna iho o lakou la, a hiki i ka wa i haawi mai ai lakou la i ko lakou la mau mea kaua.

33. A eia kekahi, o Iakoba no ka luna o lakou, he Zorama no hoi oia, a he uhane no kona e hiki ole ke hoopio ia; alakai ae la oia i ko Lamana poe e kaua, me ka ukiuki nui loa e ku e ia Moroni.

34. Aia o Moroni ma, ma ko lakou ala e hele ai, nolaila, ua paa ka manao o Iakoba e pepehi mai ia lakou, a e ooki mai i kona alanui mawaena a i ke kulanakauhale o Muleka. Aka hoi, ua oi aku ko Moroni a me ko kona poe kanaka ikaika; nolaila, aole lakou i hee aku imua o ko Lamana poe.

35. A eia kekahi, kaua pu lakou ma na aoao elua me ka ukiuki nui loa; a he nui no ka poe i pepehi ia ma kela aoao keia aoao; he oiaio, a ua hoeha ia mai o Moroni, a ua pepehi ia aku o Iakoba a make.

36. A hooikaika ae la o Lehi ma ko lakou la hope me ka ukiuki nui, me kona poe kanaka ikaika, a haawi pio mai la ko Lamana poe ma ka hope i ko lakou mau mea kaua; a o ke koena o lakou, ua pioloke nui, a ike ole kahi a lakou e hele ai a e hahau ai.

37. Ano, i ka ike ana o Moroni i ko lakou pioloke, i aku la oia ia lakou, Ina e lawe mai oukou i ko oukou mau mea kaua, a e haawi pio mai ia mau mea, aia hoi, e hooki makou i ka hookahe ana i ko oukou koko.

38. A eia kekahi, i ko Lamana poe i lohe ai i keia mau olelo, hele mai la na luna nui o lakou, o ka poe a pau i pepehi ole ia, a hoolei mai la i ko lakou mau mea kaua ma na wawae o Moroni, a kena ae la no hoi i ko lakou poe kanaka e hana e like me ia;

39. Aka hoi, ua nui no ka poe i hana ole pela; a o ka poe i haawi ole mai i ka lakou mau pahikaua ua hopu ia a nakinaki ia ae, a kaili ia ae la na mea kaua o lakou mai o lakou ae, a ua koi ia e hele pu aku me ko lakou poe hoahanau iloko o ka aina o Momona.

40. Ano, ua oi aku ka nui o na mea i hoopio ia aku, mamua o ka nui o ka poe i pepehi ia; he oiaio, mamua o ka poe i pepehi ia ma na aoao elua.