1. Ano, i ko Alama ike ana ua paa o Zezeroma i na olelo a Amuleka, no ka mea, ike aku la oia ua loaa oia ia Amuleka i kona wahahee ana a hoopunipuni ana, e hoopoino ia ia, a e ike ana ua hoomaka oia e haalulu ma ka ike ana i kona hewa, oaka aku la oia i kona waha a hoomaka ae la e olelo aku ia ia, a e hooia aku i na olelo a Amuleka, a e hoomaopopo i na mea nui aku, a e wehewehe nui loa aku i na palapala hemolele mamua o ka Amuleka i hana e ai.

2. Ano, o na olelo a Alama i olelo aku ai ia Zezeroma, ua lohea e na kanaka a puni; no ka mea, ua nui loa ka lehulehu o kanaka, a olelo aku la oia penei:

3. Ano, e Zezeroma, i ka ike ana ua loaa oe ma kou wahahee ana a maalea, no ka mea, aole oe i wahahee mai i kanaka wale no, aka ua wahahee aku oe i ke Akua; no ka mea hoi, ke ike mai nei oia i na manao ou a pau; a ke ike mai nei oe ua hoike ia na manao ou ia maua ma kona Uhane;

4. A ke ike mai nei oe ua ike maua he manao maalea loa kou manao, ma ka maalea o ke diabolo, e wahahee a e hoopunipuni i keia poe kanaka, i hiki ia oe ke hooku e mai ia lakou ia maua, e hoino mai ia maua, a e hoolei mai ia maua mawaho.

5. Ano, he manao keia o kou mea ku e, a ua hana mai la oia i kona mana iloko ou. Ano, ke makemake nei au e hoomanao oe o kaʻu e olelo aku ai ia oe, o kaʻu ia e olelo aku ai i na mea a pau.

6. A, aia hoi, ke olelo aku nei au ia oukou a pau, he pahele keia o ka mea ku e, ana i hoomakaukau ai e hoopahele i ua poe kanaka nei, e hiki ia ia ke lawe ia oukou iloko o ka noho kauwa ana malalo iho ona, e hiki ia ia ke hoopuni ia oukou me kona mau kaulahao a puni, e hiki ia ia ke hoopaa aku ia oukou ilalo i ka make mau loa, e like me ka mana o kona noho pio ana.

7. Ano, ia Alama i olelo mai ai i keia mau olelo, hoomaka ae la o Zezeroma e haalulu nui loa aku, no ka mea, ua hoomaopopo nui loa ia oia, a nui loa aku no ka mana o ke Akua; a ua hoomaopopo ia no hoi oia he ike ko Alama laua me Amuleka nona, no ka mea, ua hoomaopopo ia oia ua ike laua i na manao a me na makemake o kona naau; no ka mea, ua haawi ia mai ka mana ia laua i hiki ia laua ke ike i keia mau mea, e like me ka Uhane o ka wanana.

8. A hoomaka o Zezeroma e ninau ikaika ia laua, e hiki ia ia ke ike hou no ke aupuni o ke Akua. A i mai la oia ia Alama, Heaha la ke ano o keia mea a Amuleka i olelo mai ai no ke alahouana o ka poe make, i ala ai auanei na mea a pau mai ka make mai, o ka poe pono a me ka poe pono ole, a e kai ia e ku imua o ke Akua, e hookolokolo ia e like me ka lakou mau hana?

9. Ano, hoomaka ae la o Alama e hoakaka i ua mau mea nei ia ia, i ka i ana, Ua haawi ia mai i na mea he nui e ike i na mea pohihihi o ke Akua; malalo iho nae lakou o kekahi kauoha ikaika, i ole ai lakou e haawi aku e like wale no me ka hapa o kana olelo, ana i haawi mai ai i na keiki a kanaka; e like me ka malama ana a me ka hoolohe ana o lakou ia ia;

10. A nolaila la, o ka mea nana e hoopaakiki i kona naau, oia ke loaa ai ka hapa uuku o ka olelo; a o ka mea nana e hoopaakiki ole i kona naau, ua haawi ia ia ia ka hapa nui ae o ka olelo, a hiki i ka wa e haawi ia ia ia e ike i na mea pohihihi o ke Akua, a hiki ia ia ke ike paka i ua mau mea nei a pau;

11. A o ka poe e hoopaakiki ana i ko lakou mau naau, ia lakou i haawi ia ai ka hapa uuku o ka olelo, a hiki aku lakou i ka ike ole no na mea pohihihi ona; alaila ua lawe pio ia lakou e ke diabolo, a alakai ia ma kona makemake ilalo i ka make. Ano, oia no ka mea i manao ia ma na kaulahao o gehena;

12. A ua olelo akaka mai o Amuleka no ka make, a no ka hookiekie ia ana mai ua make nei mai i ka noho make ole ana, a e lawe ia imua o ka noho hookolokolo o ke Akua, e hookolokolo ia ai e like me ka kakou mau hana.

13. Alaila, ina ua hoopaakiki ia ko kakou mau naau, he oiaio, ina ua hoopaakiki kakou i ko kakou mau naau e ku e i kana olelo, i loaa ole ai ia mea iloko o kakou, alaila he weliweli loa ko kakou noho ana, no ka mea, alaila e hoohewa ia ai kakou.

14. No ka mea, na ka kakou mau olelo kakou e hoohewa mai, he oiaio, na ka kakou mau hana a pau kakou e hoohewa mai; aole kakou e loaa me ke kina ole; a na ko kakou mau manao no hoi kakou e hoohewa; a ma keia noho weliweli loa ana, aole kakou e aa aku e nana ae iluna i ko kakou Akua; a e hauoli no kakou ina ua hiki ia kakou ke kena i na pohaku a me na kuahiwi e haule mai maluna iho o kakou, a e uhi mai ia kakou mai kona alo ae.

15. Aka, ua hiki ole keia; e hele aku kakou e pono ai a e ku imua ona iloko o kona nani, a iloko o kona mana, a iloko o kona ikaika, a hanohano, a hoomalu ana, a e ae aku me ka hilahila mau loa aku, ua pololei kona mau hoopai a pau; a ua pololei hoi oia i kana mau hana a pau, a ua aloha oia i na keiki a kanaka, a ia ia no ka mana a pau e hoola i kela kanaka i keia kanaka e manaoio ana ma kona inoa, a e hoohua mai ana i ka hua ku i ka mihi.

16. Ano hoi, ke i aku nei au ia oukou, alaila e hele mai ana kahi make, oia, he make lua, a he make uhane ia; alaila oia ka manawa o ka mea e make ana iloko o kona mau hewa, ma ka make ana ma ke kino, e make no auanei oia i kahi make uhane; he oiaio, e make no oia ma na mea e pili ana i ka pono;

17. Alaila, oia ka manawa e like ko lakou ehaeha me he loko ahi la a me ke kukae pele, a o kona lapalapa e pii ana ia, ia ao aku ia ao aku; alaila, oia ka manawa e hoopaa ia lakou ilalo i ka make mau loa ana, e like me ka mana a me ka noho pio ana o ka Satana; ua hookauwa aku oia ia lakou e like me kona makemake.

18. Alaila, ke i aku nei au ia oe, me he mea la lakou aole hoolapanai i hana ia; no ka mea, aole lakou e hiki ke hoolapanai ia mamuli o ko ke Akua hoopono; aole hoi e hiki ia lakou ke make, no ka mea, aole he palaho hou.

19. Ano, eia kekahi, ia Alama i hoopau ai i ka olelo ana i ua mau olelo nei, hoomaka ae la na kanaka e kahaha nui loa aku;

20. Aka, malaila kekahi mea, o Anationa, he luna nui oia mawaena o lakou, hele mai la oia a i mai la ia ia, Heaha keia au i olelo mai ai, e ala auanei ke kanaka mai ka make mai, a e hoolilo ia mai ua make nei i ka noho make ole ana, i ole ai e hiki i ka uhane ke make?

21. Heaha ke ano o ka palapala hemolele, i ka i ana, Hoonoho iho la ke Akua i na kerubima, a me ka pahi wakawaka ma ka hikina o ka mahinaai o Edena, o komo ko kakou mau kupuna mua a ai i ka hua o ka laau o ke ola, a ola mau loa aku? A pela kakou i ike ai aole loa he mea hiki ia laua ke ola mau loa.

22. Ano, i aku la o Alama ia ia, Oia no ka mea aʻu i manao iho ai e hoomaopopo aku. Ano, ke ike aku nei kakou haule iho la o Adamu ma kona ai ana i ka hua i papa ia, e like me ka olelo a ke Akua; a pela kakou i ike ai, ma kona haule ana, lilo iho la na kanaka a pau i poe poino a haule.

23. Aia hoi, ke i aku nei au ia oukou, ina he mea hiki ia Adamu ke ai i ka hua o ka laau o ke ola ia manawa, ina aole he make, a ua lilo ka olelo i mea ole, e hoolilo ana i ke Akua i mea wahahee; no ka mea, i mai la oia, Ina e ai oe, he oiaio no e make oe.

24. A ke ike nei kakou e hiki mai ana ka make maluna o na kanaka, he oiaio, o ka make i olelo ia e Amuleka, oia no ka make kino; ua haawi ia mai nae i kekahi wa i kanaka, e hiki ia ia iloko o ua wa la ke mihi; nolaila, lilo iho la keia ola ana i noho hoao ana; he manawa e hoomakaukau ai e halawai pu me ke Akua; he manawa e hoomakaukau ai no ua noho pau ole ana la, i olelo ia aku ai e maua, oia no mahope aku o ke alahouana o ka poe make.

25. Ano, ina aole no ka manao hoolapanai, i hookumu ia ai mai ka hookumu ia ana o ke ao nei, ina aole loa he alahouana o ka poe make; aka, aia no he kumumanao hoolapanai i hookumu ia ai, oia no ke lawe mai auanei i ke alahouana o ka poe make, i olelo ia ai.

26. Ano hoi, ina ua hiki i ko kakou mau kupuna mua ke hele aku a ai i ka hua o ka laau o ke ola, ina ua poino mau loa laua, me kahi ole e hoomakaukau ai; a pela e hoolilo ia ai ke kumumanao hoolapanai i mea ole, a o ka olelo a ke Akua hoi i mea ole, aole ia e ko.

27. Aka hoi, aole ia pela; aka ua hookau ia mai i kanaka e make lakou e pono ai; a mahope iho o ka make, e hele aku lakou i ka hookolokolo e pono ai; oia ua hookolokolo hookahi la a maua i olelo aku ai, aia no ka hopena.

28. A mahope iho o ko ke Akua hookau ana i ua mau mea nei e hiki mai ai i kanaka, aia hoi, alaila ike aku la oia, he mea pono e ike ke kanaka no na mea ana i hookau mai ai ia lakou;

29. Nolaila, hoouna mai la oia i na anela e kamailio pu me lakou, a ma o lakou la na kanaka i ike ai no kona nani.

30. A hoomaka ae la lakou ma ia manawa aku e kahea aku ma kona inoa; nolaila, kamailio mai la ke Akua me na kanaka, a hoike mai la ia lakou i ke kumumanao hoolapanai i hoomakaukau ia ai mai ka hookumu ia ana mai o ke ao nei; a o keia kana i hoike mai ai ia lakou e like me ko lakou manaoio a mihi, a me ka lakou mau hana hemolele;

31. Nolaila, haawi mai la oia i na kauoha i na kanaka, ua ae e ae la lakou maluna o na kauoha mua ma na mea o ke kino, a e lilo ana me he poe akua la, e ike ana i ka pono mai ka hewa ae, e hoonoho ana ia lakou iho ma kahi e hana ai, a i hoonoho ia ma kahi e hana ai e like me ka makemake a me na mea oluolu o lakou, ina paha e hana aku i ka ino, a ina paha e hana aku i ka maikai;

32. Nolaila, haawi mai la ke Akua ia lakou i na kauoha, mahope iho o ka hoike ana ia lakou i ke kumumanao hoolapanai, i ole ai lakou e hana i ka ino, o ka hoopai ana no ia mea oia no he make lua ana, he make mau loa ia ma na mea e pili ana i ka pono; no ka mea, aole loa he mana ko ke kumumanao hoolapanai maluna o ka poe me neia, no ka mea, aole i hiki ke hoopau ia na hana o ka hoopai, e like me ka lokomaikai kiekie loa o ke Akua.

33. Aka, kahea mai la ke Akua i na kanaka, ma ka inoa o kana Keiki, (oia no ke kumumanao hoolapanai i hookumu ia ai,) i ka i ana: Ina oukou e mihi, a hoopaakiki ole i ko oukou mau naau, alaila, e aloha aku au ia oukou, ma o kaʻu Keiki hanau-kahi la;

34. Nolaila, o ka mea e mihi ana, a e hoopaakiki ole ana i kona naau, e loaa auanei ia ia ke kuleana ma ke aloha ma o kaʻu Keiki hanau-kahi la, i ke kala ia ana o kona mau hala; a o lakou nei no ka poe e komo ae iloko o koʻu maha.

35. A o ka mea nana e hoopakiki i kona naau, a e hana i ka hewa, aia hoi, ua hoohiki au ma koʻu inaina aole loa oia e komo mai iloko o koʻu maha.

36. Ano, e oʻu poe hoahanau, aia hoi, ke i aku nei au ia oukou, ina e hoopaakiki oukou i ko oukou mau naau, aole loa oukou e komo ae iloko o ka maha o ka Haku; nolaila, e hoonaukiuki ana ko oukou mau hewa ia ia a e hoouna mai oia i kona inaina maluna iho o oukou me ia ma kona hoonaukiuki mua ia ana, he oiaio, e like me kana olelo me ka hoonaukiuki hope ia ana, me ia no hoi ma ka mua, i ka make loa ana o ko oukou poe uhane; nolaila, e like me kana olelo, i ka make hope ana, me ia no hoi i ka make mua ana.

37. Ano, e koʻu poe hoahanau, no ko kakou ike ana i ua mau mea nei, a he oiaio no ia mau mea, e mihi kakou, a e hoopaakiki ole i ko kakou mau naau, i hoonaukiuki ole ai kakou i ka Haku, i ko kakou Akua, e huki mai i kona inaina maluna o kakou ma ka lua o kana mau kauoha ana, ana i haawi mai ai ia kakou; aka e komo aku kakou iloko o ka maha o ke Akua, i hoomakaukau ia ai e like me kana olelo.