1. Aia hoi kekahi, aole liuliu mahope iho o ko Moroni hoouna ana aku i kana episetole i ke kiaaina nui, loaa mai la ia ia kekahi episetole mai o Pahorana mai, ke kiaaina nui. A eia na olelo i loaa ia ia:

2. Owau o Pahorana, ke kiaaina nui o keia aina, ke hoouna aku nei au i keia mau huaolelo io Moroni la, i ka alihi kaua maluna iho o ka poe kaua, aia hoi, ke i aku nei au ia oe, e Moroni, aole oʻu olioli ma ko oukou mau pilikia nui; he oiaio, ke hookaumaha iho nei ia mea i kuu uhane.

3. Aka hoi, aia no kekahi poe e hauoli nei i ko oukou mau popilikia; he oiaio, a ua ea mai lakou ma ke kipi mai iaʻu, a i ka poe-kuokoa no hoi o koʻu poe kanaka; he oiaio, ka poe i ea mai ua lehulehu loa lakou.

4. A o ka poe i imi mai e kaili mai i ka noho hookolokolo mai oʻu aku, o lakou no ka i hookumu mai i keia ino nui; no ka mea, ua hana lakou me ka hoomalimali nui; a ua alakai aku lakou i na naau o na kanaka he nui wale, a e lilo ia i kumu no ka popilikia eha nui auanei mawaena o makou; ua aua aku lakou i ka lakou ai, a ua hooweliweli ae i ko makou poe-kuokoa, i ole lakou i hele aku io oukou la.

5. Aia hoi, ua kipaku mai lakou iaʻu mai o lakou aku, a ua holo aku au i ka aina o Gideona, me na kanaka a pau i hiki iaʻu ke loaa.

6. Aia hoi, ua hoouna aku au i kekahi olelo hoolaha mawaena o keia aoao o ka aina; a eia lakou e akoakoa mai ana io makou nei i kela la i keia la, me na mea kaua o lakou, ma ka hoomalu ana i ko lakou aina, a me ko lakou kuokoa ana, a e hoopai aku i ko makou apiki ia mai.

7. A ua hele nui mai lakou io makou nei, a no ia mea ua aa ia aku kela poe i ala mai ma ke kipi mai ia makou; he oiaio, a ke makau mai nei lakou ia makou, a aa ole e hele mai mawaho nei e ku e mai ia makou ma ke kaua.

8. Ua loaa ia lakou ka aina, a oia hoi ke kulanakauhale o Zarahemela; ua hoonoho iho lakou i alii maluna iho o lakou, a ua palapala ae la oia i ke alii o ko Lamana poe, a iloko o ia mea ua hana oia i kuikahi me ia; a ma ua kuikahi nei, ua ae aku oia e malama i ke kulanakauhale o Zarahemela, a ma ia malama ana i manao ai oia e kokua i ko Lamana poe e lanakila maluna o ke koena o ka aina, a e hoonoho ia oia i alii maluna iho o keia lahuikanaka, i ka wa a lakou e noho ai malalo iho o ko Lamana poe.

9. Ano, ma kau episetole ua hoohewa mai oe iaʻu; aka he mea ole ia, aole au i huhu, aka, ma ka nui o kou naau ke hauoli nei au. Aole au, o Pahorana, e imi ana no ka mana, eia wale no e hiki iaʻu ke noho ma koʻu noho hookolokolo, e hiki iaʻu ke malama aku i na pono a me ka noho kauwa ole ana o koʻu lahuikanaka. Ke kupaa nei koʻu uhane ma ua noho kauwa ole ana la, a ke Akua i hookuu mai ai ia kakou.

10. Ano hoi, e pale aku no kakou i ka hewa a hiki i ka hookahe koko ana. Aole kakou e hookahe aku i ke koko o ko Lamana poe, ina ua noho lakou ma ko lakou aina iho.

11. Aole kakou e hookahe aku i ke koko o ko lakou poe hoahanau, ina aole lakou i ea mai ma ke kipi ana a lalau iho i ka pahikaua e ku e mai ia kakou.

12. E hookauwa aku no kakou ia kakou iho i ka auamo hooluhi, ina ia he mea e pono ai me ka hoopono o ke Akua, a ina e kauoha mai oia ia kakou e hana pela.

13. Aka hoi, aole oia i kauoha mai ia kakou e hookauwa aku kakou na ko kakou poe enemi, aka, na kakou e paulele aku ia ia, a nana e hoopakele mai ia kakou.

14. Nolaila, e koʻu hoahanau i aloha ia o Moroni, e pale aku kakou i ka ino; a o kela ino keia ino i hiki ole ai ia kakou ke pale aku me ka kakou mau olelo, he oiaio, e like me na kipi ana a me na kuee ana, e pale aku kakou ia mau mea me ka kakou pahikaua, e hiki ia kakou ke paa ko kakou kuokoa ana, e hiki ia kakou ke hauoli i ka pono nui o ko kakou ekalesia, a i ka hana a ko kakou Mea Hoolapanai a me ko kakou Akua.

15. Nolaila, e hele koke mai oe ioʻu nei, me kekahi poe uuku o kou poe kanaka, a e waiho aku i ke koena malalo iho o Lehi laua me Teanakuma; e haawi aku ia laua i ka mana e hooponopono i ke kaua ma ia aoao o ka aina, e like me ka Uhane o ke Akua, oia no ka uhane o ke kuokoa ana iloko o laua.

16. Aia hoi, ua hoouna aku au i ai uuku ia lakou, i ole ai lakou e make a hiki mai oe ioʻu nei.

17. E houluulu ae oe i na kanaka a pau au e hiki ai ma kou hele ana mai ia nei, a e hele koke aku kakou e ku e i ua poe haalele kuee la, ma ka ikaika o ko kakou Akua, e like me ka manaoio iloko o kakou.

18. A e loaa ae ia kakou ke kulanakauhale o Zarahemela, i loaa ai ia kakou ka ai nui aku e hoouna aku io Lehi la laua me Teanakuma; he oiaio, e hele ku e aku kakou ia lakou ma ka ikaika o ka Haku, a e hoopau aku kakou i keia ino nui.

19. Ano, e Moroni, ke olioli nei au i ka loaa ana kau episetole; no ka mea, ua anoninoni uuku au no ka mea a makou e hana ai, ina paha he pono no makou e hele ku e aku i ko kakou poe hoahanau.

20. Aka ua i mai oe, ina aole lakou e mihi, ua kauoha mai la ka Haku ia oe e hele ku e aku oe ia lakou.

21. E makaala oe e hooikaika iho ia Lehi laua me Teanakuma ma ka Haku; e hai ae ia laua e makau ole, no ka mea, na ke Akua laua e hoopakele; he oiaio, a me ka poe a pau e kupaa ana ma ka noho kauwa ole ana, a ke Akua i hookuu mai ai ia lakou. Ano, ke hooki nei au i kuu episetole i koʻu hoahanau i aloha ia o Moroni.