1. A eia kekahi, ma ka makamua o ka makahiki kanakolukumamaono o ke au o na lunakanawai maluna iho o ka poe kanaka o Nepai, loaa iho la ia Sibalona kela mau mea laa i haawi e ia mai ia Helamana e Alama;

2. A he kanaka pono oia, a ua hele pololei ae la oia imua o ke Akua; a ua hoolohe oia e hana mau aku i ka maikai, a e malama aku i na kauoha a ka Haku kona Akua; a pela no hoi i hana ai kona kaikaina.

3. A eia kekahi, make aku la no hoi o Moroni. A pela i pau ai ka makahiki kanakolukumamaono o ke au o na lunakanawai.

4. A eia kekahi, ma ka makahiki kanakolukumamahiku o ke au o na lunakanawai, haele aku la he huakai he nui loa, elima tausani eha haneri kanaka, me ka lakou poe wahine a me ka lakou poe keiki, mai ka aina aku o Zarahemela iloko o ka aina ma ka akau.

5. A eia kekahi, o Hagota, he kanaka akamai loa oia, nolaila, hele aku la oia a kapili iho la nona i kekahi moku nui, ma na palena o ka aina Momona, ma ka aina o Neoneo, a hoolana aku la ia mea iloko o ke kai komohana, ma ka puali ololi i hiki aku ai i ka aina akau.

6. A, aia hoi, he nui na mea o ko Nepai poe i komo aku iloko, a holo aku la me ka ai a nui, a me na wahine a me na keiki he nui no hoi; a holo aku la lakou me ka ihu i ka akau. A pela i pau ai ka makahiki kanakolukumamahiku.

7. A i ka makahiki kanakolukumamawalu, kapili ae la ua kanaka nei i na moku e ae. A hoi mai la no hoi ka moku mua, a he nui wale na kanaka i komo hou iloko ona; a lawe pu no hoi lakou i ka ai a nui, a holo hou aku la i ka aina akau.

8. A eia kekahi, aole kekahi mea i lohe hou ia no lakou. A ke manao nei makou ua poho iho la lakou iloko o ka hohonu o ke kai. A eia kekahi, holo aku la hookahi moku hou no hoi; a kahi ona i holo aku ai, aole makou i ike.

9. A eia kekahi, ma ua makahiki nei, he nui na kanaka i hele aku iloko o ka aina akau. A pela i pau ai ka makahiki kanakolukumamawalu.

10. A eia kekahi, ma ka makahiki kanakolukumamaiwa o ke au o na lunakanawai, make aku la no hoi o Sibalona, a ua holo aku la o Korianatona i ka aina akau, maluna o kahi moku, e hali aku i ai i ua poe la, ka poe i hele aku iloko o ua aina la;

11. Nolaila, ua lilo i mea e pono ai na Sibalona e hooili ae i kela mau mea laa, mamua o kona make, maluna iho o ke keiki a Helamana, oia hoi ka i kapa ia o Helamana, mamuli o ka inoa o kona makuakane.

12. Ano hoi, ua palapala ia iho la kela mau kaha a pau a Helamana i malama ai, a hoouna ia aku mawaena o na keiki a kanaka mawaena o ka aina a puni, koe wale no kela mau mea i kauoha ia mai ai e Alama aole e hoouna ia aku.

13. Aka, e malama laa ia ua mau mea nei, a e haawi ia aku mai kekahi hanauna aku i kekahi hanauna aku; nolaila, i keia makahiki, ua hooili ia mai ia mau mea maluna iho o Helamana, mamua o ka make ana o Sibalona.

14. A eia hoi kekahi, i keia makahiki, ua haalele ku e kekahi poe a hele aku i ko Lamana poe la, a ua hookonokono hou ia lakou e huhu mai i ko Nepai poe.

15. A ma ua makahiki hookahi nei, iho mai la lakou me kekahi poe koa lehulehu e kaua mai i ka poe kanaka o Moroniha, oia hoi i ka poe koa o Moroniha, a ma ua kaua nei ua hahau ia lakou la, a hooauhee hou ia i ko lakou mau aina iho, me ka poino nui loa.

16. A pela i pau ai ka makahiki kanakolukumamaiwa o ke au o na lunakanawai maluna iho o ka poe kanaka o Nepai.

17. A pela i pau ai ka mooolelo o Alama a me Helamana kana keiki, laua pu me Sibalona, na keiki no hoi ana.