1. Ano, eia kekahi, ma ka makahiki iwakaluakumamaiwa o na lunakanawai, hoouna mai la o Amorona io Moroni la, e makemake ana ia ia e haawi aku a e haawi mai i na pio.

2. A eia kekahi, hauoli nui loa iho la o Moroni ma keia noi ana, no ka mea, ua makemake oia i ka ai i haawi ia aku i ka poe pio o ko Lamana i hoopio ia, e hanai aku i kona poe kanaka ponoi; a ua makemake no hoi oia i kona poe kanaka e hooikaika mai i kona poe koa.

3. Ano, ua hoopio mai ko Lamana poe i na wahine a me na keiki he nui loa; aole no kekahi wahine aole hoi kekahi keiki mawaena o ka poe pio o Moroni, oia hoi ka poe a Moroni i hoopio aku ai; nolaila, noonoo iho la o Moroni i hana maalea, i loaa ai na mea pio a pau o ko Nepai poe mai ko Lamana poe mai, e like me ka mea hiki ia ia;

4. Nolaila, palapala iho la oia he episetole, a hoouna aku la ia mea me ke kauwa a Amorona, ka mea i lawe mai i episetole io Moroni la. Ano, eia na olelo ana i palapala iho ai ia Amorona, i ka i ana ae,

5. Aia hoi, e Amorona e, ua palapala iho au i kekahi mau mea ia oe no keia kaua au i kaua mai ai i koʻu poe kanaka, i ole, a kou kaikuaana hoi i kaua mai ai ia lakou, a ua paa hoi oe ano e hoomau mai mahope iho o kona make ana.

6. Aia hoi, e hai aku au i kekahi mau mea no ka hoopai o ke Akua, a me ka pahikaua a kona inaina mana loa, e kau ana maluna iho ou, ke ole oe e mihi a hoihoi hou i na puali ou iloko o ko oukou aina iho, i ko oukou mau aina hooilina, oia no ka aina o Nepai;

7. He oiaio, e hai aku au ia oe i keia mau mea, ina ua hiki ia oe ke hoolohe mai i ua mau mea nei; he oiaio, e hai aku au ia oe no kela gehena weliweli i hoomakaukau ia e loaa na mea pepehi kanaka e like me oe a me kou kaikuaana, ke mihi ole oe a hooki mai i na manao pepehi kanaka ou, a e hoi hou me na puali ou i ko oukou mau aina iho;

8. Aka me oe i hoomalau mai ai i keia mau mea, a ua kaua mai i ka poe kanaka o ka Haku, pela au e manao nei e hana hou mai ana no oe.

9. Ano hoi, ua makaukau makou no ka hiki mai o oukou; he oiaio, a ke ole oukou e hooki i na manao hana o oukou, aia hoi, e huki iho oukou i ka inaina o kela Akua a oukou i hoomalau ai maluna iho o oukou, i ka luku loa ia ana o oukou;

10. Aka, ma ke ola o ka Haku, hiki aku auanei na puali o makou maluna iho o oukou, ke hoi ole oukou, a e hoopai koke ia auanei oukou me ka make, no ka mea, e hoopaa no makou i ko makou mau kulanakauhale a me ko makou mau aina; he oiaio, a e malama makou i ko makou hoomana ana a me ka aoao o ko makou Akua.

11. Aka, ea, ke manao nei au he makehewa paha koʻu kamailio ana aku ia oe no keia mau mea, a, ke manao nei au he keiki a gehena no oe; nolaila e hoopau ae au i koʻu episetole, ma ka hai ana ia oe, aole au e haawi aku i na pio, menei wale no, e haawi mai oe i kekahi kanaka, a me kana wahine, a me kana mau keiki, no ka pio hookahi; ina e hana mai oe pela, e haawi aku au a e loaa hou mai.

12. Aia hoi, ina e hana ole mai oe i keia, e hele aku no au e ku e ia oukou, me na puali oʻu; he oiaio, e kahiko iho au i na wahine oʻu a me na keiki oʻu, a e hele aku au io oukou la, a e hahai aku au ia oukou a hiki iloko o ko oukou aina iho, oia no ka aina o ko makou hooilina mua; he oiaio, a lilo ia ke koko no ke koko auanei; he oiaio, ke ola no ke ola; a e kaua aku au ia oukou, a hiki i ka wa e luku ia ai oukou mai ke alo aku o ka honua.

13. Aia hoi, ua huhu no au, a me koʻu poe kanaka no hoi; ua imi mai oukou e pepehi mai ia makou, a ua imi wale no makou e hoomalu aku ia makou iho. Aka hoi, ina e imi hou oukou e luku mai ia makou, e imi no makou e luku aku ia oukou; he oiaio, a e imi aku no makou i ka aina o ko makou hooilina mua.

14. Ano, ke hoopau nei au i kuu episetole. Owau no o Moroni; he alihi kaua no owau o ka poe kanaka o Nepai.

15. Ano eia kekahi, ia Amorona i loaa ai keia episetole, ua huhu oia, a palapala mai oia i kekahi episetole hou ia Moroni; a eia na olelo ana i palapala mai ai, i ka i ana,

16. Owau no Amorona, ke alii o ko Lamana poe; o ke kaikaina no wau o Amalikia, ka mea a oukou i pephi iho ai. Aia hoi, e hoopai aku au i kona koko maluna iho o oukou, he oiaio, a e hiki aku au maluna iho o oukou me na puali oʻu, no ka mea, aole oʻu makau i ka oukou mau olelo hooweliweli.

17. No ka mea, ea, hookolohe mai la ko oukou poe kupuna i na kaikuaana o lakou, a hao mai la lakou i ko lakou pono ma ka noho luna ana, oiai no lakou ponoi no ia.

18. Ano hoi, ina e waiho iho oukou ilalo i na mea kaua o oukou, a e hookuu mai ia oukou iho e noho alii ia e ka poe nona ponoi ka noho alii ana, alaila, e kena ae au i koʻu poe kanaka e waiho iho i na mea kaua o lakou, a e kaua hou ole aku ma ia hope aku.

19. Aia hoi, ua ha mai oe i na olelo hooweliweli e ku e ana iaʻu a me koʻu poe kanaka; aka, ea, aole o makou makau i na olelo hooweliweli au;

20. E ae aku nae au e haawi aku i na pio, a e loaa hou mai e like me kou noi mai, me ka olioli, e hiki iaʻu ke malama i kaʻu ai no koʻu poe kanaka kaua; a e kaua aku makou i ke kaua e mau loa ana, i ka hookauwa ana aku i ko Nepai poe i ko makou noho alii ana, a i ole ia, i ko lakou anai mau loa ia ana.

21. A no kela Akua au i i mai ai ua hoomalau aku makou, aia hoi, aole o makou i ike he mea o ia ano; aole hoi oukou; aka, ina paha he oiaio ia aia no he mea o ia ano, aole makou i ike ina ua hana ole ia mai makou e ia e like me oukou;

22. A ina paha he oiaio ia aia no he diabolo a he gehena, aia hoi, aole anei oia i hoouna iho ia oukou ilaila, e noho pu me koʻu kaikuaana, ka mea a oukou i pepehi iho ai, ka mea no hoi au i olelo mai ai me he mea la ua hele aku la oia i kekahi wahi e like me ia? Aka hoi, he mau mea ole ua mau mea nei.

23. Owau no o Amorona, a he mamo na Zorama, ka mea a ko oukou poe kupuna i hopu ai a kai mai ai mailoko mai o Ierusalema.

24. Aia hoi, ano, he Lamana wiwo ole au. A ua kaua ia aku ua kaua nei, e hoopai aku i na apiki ia mai o lakou, a e malama, a e loaa hou na pono o lakou ma ka noho alii ana; a ke hoopau aku nei au i koʻu episetole ia Moroni.