1. A eia hou, e koʻu poe hoahanau, ke makemake nei au e kuhikuhi aku i ko oukou mau naau, i ka manawa a ka Haku ke Akua i haawi mai ai i ua mau kauoha nei i kana poe keiki; a ke makemake nei au e hoomanao oukou ua hoolilo mai ka Haku ke Akua i poe kahuna, mamuli o kona aoao hemolele, oia no mamuli o ka aoao o kana Keiki, e ao aku i ua mau mea nei i na kanaka;

2. A ua hoolilo ia ua poe kahuna la mamuli o ka aoao o kana Keiki, ma kekahi ano i hiki ai i ka poe kanaka ma o ua mea la, ke ike i ke ano ku pono e nana imua i kana Keiki no ka hoolapanai ia ana.

3. A eia no ke ano o ko lakou hoolilo ia ana: Ua kahea ia a hoomakaukau ia mai, mai ka hookumu ia ana mai o ke ao nei, e like me ka ike mua ana o ke Akua, no ko lakou manaoio nui loa a me na hana maikai; ma ka mua ua waiho ia e koho aku i ka maikai, a i ole ia, i ka ino; nolaila, o lakou ka i koho aku i ka maikai, a e hooikaika ana me ka manaoio nui loa, ua kahea ia lakou me kahi oihana hoano me kela oihana hoano i hoomakaukau ia ai me kekahi hoolapanai hoomakaukau, a mamuli no hoi o ia mea, no ka poe e like me ia;

4. A pela lakou i kahea ia ai i ua oihana hoano nei no ko lakou manaoio, oiai na mea e ae i hoomalau ai i ka Uhane o ke Akua no ka paakiki o ko lakou mau naau a me ka pouli o ka lakou hoomaopopo, oiai, ina aole no ia mea, ina ua hiki ia lakou ke loaa ka pomaikai nui e like me ko lakou poe hoahanau.

5. No ka mea, mamua aia pu lakou ma kahi hookahi e ku ana me ko lakou poe hoahanau; pela i hoomakaukau ia ai ua oihana hoano nei mai ka hookumu ia ana mai o ke ao nei no ka poe i hoopaakiki ole i ko lakou mau naau, aia no ia iloko a ma o ke kalahala ana la o ke Keiki hanau-kahi, oia ka i hoomakaukau ia;

6. A pela i kahea ia ai ma ua oihana hoano nei, a hoolilo ia i ka oihana kahuna kiekie o ka aoao hoano o ke Akua, e ao aku i kana mau kauoha i na keiki a kanaka, e hiki no hoi ia lakou ke komo iloko o kona maha;

7. A o keia oihana kiekie mamuli ia o ka aoao o kana Keiki, a o ua aoao la mai ka hookumu ia ana mai ia o ke ao nei; a ma na olelo e, me ka makamua ole o na la aole hoi hopena o na makahiki, i hoomakaukau ia mai ai ia ao aku ia ao aku a mau loa aku, e like me kona ike mua ana ma na mea a pau.

8. Ano, ua hoolilo ia lakou mamuli o keia ano: Ua kahea ia me kekahi oihana hoano, a hoolilo ia me kekahi kauoha hoano, a e lawe ana maluna o lakou i ka oihana kahuna kiekie o ka aoao hemolele, a, o keia oihana hoano, a kauoha hoano, a oihana kahuna kiekie, aole makamua aole hoi hopena;

9. Pela lakou i lilo ai i poe kahuna kiekie no ka wa pau ole, mamuli o ka aoao o ke Keiki, ka hanau-kahi a ka Makua, aole ona makamua o na la aole hoi hopena o na makahiki, a oia ka i piha i ka lokomaikai, i ka pololei a me ka oiaio. A pela io no. Amene.

10. Ano, ua olelo aku au no ka aoao hemolele o ua oihana kahuna kiekie nei; a he nui no ka poe i hoolilo ia a lilo ae i poe kahuna kiekie o ke Akua; a no ka nui o ko lakou manaoio a mihi ana, a me ko lakou pono imua o ke Akua ia mea, e makemake loa ana lakou e mihi a e hana i ka pono mamua o ka make;

11. Nolaila, ua kahea ia lakou mamuli o ua aoao hemolele nei, a ua hoomaemae ia, a ua holoi ia ko lakou mau aahu a keokeo, ma o ke koko la o ke Keikihipa.

12. Ano, o keia poe, mahope iho o ka hoomaemae ia ana e ka Uhane Hemolele, me ko lakou mau aahu i holoi keokeo ia, a ua maemae a kina ole imua o ke Akua, aole i hiki ia lakou ke nana aku i ka hewa, ke ole me ka hoopailua; a ua nui loa ka poe i hoomaemae ia, a komo aku la iloko o ka maha o ka Haku, o ko lakou Akua.

13. Ano, e koʻu poe hoahanau, ke makemake nei au ia oukou e hoohaahaa ia oukou iho imua o ke Akua, a e hoohua mai i ka hua ku i ka mihi, e hiki no hoi ia oukou ke komo iloko o ua maha la;

14. He oiaio, e hoohaahaa oukou ia oukou iho, e like me na kanaka ma na la o Melekisedeka, oia no hoi ke kahuna nui mamuli o keia aoao hookahi aʻu e olelo nei, nana hoi i lawe maluna iho ona i ka oihana kahuna kiekie no ka wa pau ole.

15. A oia ua Melekisedeka hookahi nei ia ia i haawi aku ai o Aberahama i ka hapaumi; he oiaio, haawi aku la ko kakou kupuna kane o Aberahama i ka hapaumi o na mea a pau i loaa ai ia ia.

16. Ano, ua haawi ia mai ua mau kauoha nei mamuli o keia ano, i hiki i na kanaka ma o ua mea la ke nana imua maluna o ke Keiki a ke Akua, he hoailona ia mea o kona aoao, a o kona aoao no hoi ia; a o keia, e hiki ia lakou ke nana imua ia ia no ke kala ia ana o ko lakou mau hala, e hiki ia lakou ke komo iloko o ka maha o ka Haku.

17. Ano, he alii o ua Melekisedeka nei maluna iho o ka aina o Salema; a ua mahuahua ikaika aku la kona poe kanaka ma ka hewa a me na mea hoopailua; he oiaio, ua hili aku la lakou a pau; ua piha i kela ano i keia ano a pau o ka hewa;

18. Aka, ua hooikaika o Melekisedeka me ka manaoio ikaika, a loaa iho la ia ia ka oihana kahuna kiekie, e like me ka aoao hemolele o ke Akua, a hai aku la i ka mihi i kona poe kanaka. A, aia hoi, mihi iho la lakou; a hookupaa iho la o Melekisedeka i ka malu ma ka aina i kona mau la; nolaila, ua kapa ia oia ke alii o ka malu, no ka mea, o ke alii oia o Salema; a ua noho alii oia malalo iho o kona makuakane.

19. Ano, he nui wale ka poe mamua aku ona, a he nui wale ka poe mahope mai, aka aole kekahi mea nui aku; nolaila, ua olelo nui mai lakou nona.

20. Ano, aohe he mea e pono ai noʻu e hai hou aku ia mea; ua lawa kaʻu olelo ana. Aia hoi na palapala hemolele imua o oukou; ina e hookapae ae oukou ia mau mea e lilo auanei ia mea no ko oukou make iho.

21. Ano, eia kekahi, ia Alama i olelo aku ai i ua mau olelo nei ia lakou, o aku la oia i kona lima ia lakou a hea aku la me ka leo ikaika, i ka i ana, Ano ka wa e mihi ai, no ka mea, ke hookokoke mai nei ka la o ke ola;

22. He oiaio, a ke hai nei ka leo o ka Haku ia mea, ma ka waha o na anela, i na lahuikanaka a pau; he oiaio, ke hai ia nei e hiki ia lakou ke loaa ka olelo olioli o ka hauoli nui; he oiaio, a ke hoolaha nei oia i ua mau olelo olioli nei mawaena o kona poe kanaka a pau, he oiaio, i ka poe hoopuehu ia maluna o ka ili o ka honua; nolaila, ua hiki mai ia mau mea ia kakou.

23. A ua hoike ia mai ua mau mea la ia kakou ma na olelo maopopo, i hiki ia kakou ke hoomaopopo, i hiki ole ai ia kakou ke kuhihewa; a o keia, no ka mea, he poe aea kakou ma kahi aina e, nolaila kakou i hoopomaikai loa ia ai peia, no ka mea, ua hai ia mai ua mau olelo olioli nei ia kakou ma na wahi a pau o ko kakou pawaina.

24. No ka mea, aia hoi, e hai ana na anela ia mea i kekahi poe he nui wale i keia manawa ma ko kakou aina; a o keia no ka manao e hoomakaukau ae i na naau o na keiki a kanaka e hookipa mai i kana olelo, ma ka manawa o kona hiki ana mai iloko o kona nani.

25. Ano, ke kakali wale nei no kakou e lohe i ka olelo olioli e hai ia mai ia kakou, ma ka waha o na anela, no kona hiki ana mai; no ka mea, e hiki mai ana ka manawa, aole kakou i ike i ka loihi. O koʻu makemake i ke Akua e hiki mai ia mea ma koʻu mau la; aka ina he kokoke ina paha he loihi, ma ia mea wau e hauoli ai.

26. A e hoike ia mai auanei ia mea i na kanaka hemolele a hoopono ma ka waha o na anela, i ka wa o kona hiki ana mai, i ko ai na olelo a ko kakou poe kupuna, e like me ka mea a lakou i olelo mai ai nona, a ua like ia me ka Uhane wanana iloko o lakou.

27. Ano, e oʻu poe hoahanau, ke makemake nei au mailoko mai o koʻu naau, he oiaio, me ka iini nui, a me ka eha, e hoolohe mai oukou i kaʻu mau olelo, a e hoolei aku i ko oukou mau hewa, a e hoopanee ole aku i ka la o ko oukou mihi ana;

28. Aka, e hoohaahaa ia oukou iho imua o ka Haku, a e kahea aku ma kona inoa hoano, a e makaala a e pule mau, i hoao ole ia ai oukou mamua o ka mea i hiki ai ia oukou ke hoomanawanui, a pela e alakai ia ai e ka Uhane Hemolele, e lilo ana i haahaa, i akahai, i hoolohe, i ahonui, piha i ke aloha a me ka hoomanawanui;

29. Me ka manaoio i ka Haku; me ka manaolana e loaa auanei ia oukou ke ola mau loa; me ke aloha o ke Akua i na manawa a pau ma ko oukou mau naau, i hookiekie ia ai oukou iluna ma ka la hope, a e komo iloko o kona maha;

30. A na ka Haku e haawi ia oukou i ka mihi, i ole ai oia e hoohaule mai ilalo nei i kona inaina maluna iho o oukou, i ole ai oukou e hoopaa ia ma na kaulahao o gehena, i ole ai oukou e loaa i ka make lua.

31. A olelo aku la o Alama i na olelo e ae he nui i na kanaka, i palapala ole ia iloko o keia buke.