1. A eia kekahi, ia lakou i kukulu ai i ekalesia ma ia aina, makemake mai la ke alii Lamoni ia Amona e hele pu aku me ia i ka aina o Nepai, i hoikeike aku ai oia ia ia i kona makuakane.

2. A hiki mai la ka leo o ka Haku io Amona la, i ka i ana, Aole loa oe e pii aku i ka aina o Nepai, no ka mea hoi, e imi no ke alii i kou ola; aka, ea, e hele aku oe i ka aina o Midoni; no ka mea, aia kou kaikuaana o Aarona, a me Muloki, a me Ama hoi iloko o ka halepaahao.

3. Ano, eia kekahi, ia Amona i lohe ai i keia, i aku la oia ia Lamoni, Aia hoi kuu kaikuaana a me na hoahanau iloko o ka halepaahao ma Midoni, a e hele ana au, i hoopakele aku ai au ia lakou.

4. Ano, i mai la o Lamoni ia Amona, ke ike nei au, ma ka ikaika o ka Haku, ua hiki ia oe ke hana i na mea a pau. Aka hoi, e hele pu au me oe i ka aina o Midoni; no ka mea, o ke alii o ka aina o Midoni, o Anatiomano kona inoa, he hoaaloha ia noʻu; nolaila, e hele aku ai au i ka aina o Midoni, i hoomalimali aku ai au i ke alii o ka aina; a e hoolei mai oia i kou mau hoahanau iwaho o ka halepaahao. Ano, i mai la o Lamoni ia ia, Nawai la oe i hai aia o kou mau hoahanau iloko o ka halepaahao?

5. A i aku la o Amona ia ia, Aole na kekahi i hai mai iaʻu o ke Akua wale no; a i mai la oia iaʻu; E hele aku a e hoopakele aku i kou mau hoahanau, no ka mea, aia no lakou iloko o ka halepaahao ma ka aina o Midoni.

6. Ano, ia Lamoni i lohe ai i keia, kena aku la oia i kana poe kauwa e hoomakaukau i kona mau lio, a me kona mau kaakaua.

7. A i mai la oia ia Amona, E, e hele pu au me oe ilalo i ka aina o Midoni, a malaila au e noi aku ai i ke alii, e hookuu mai i kou mau hoahanau iwaho o ka halepaahao.

8. A eia kekahi, i ka hele ana ae o Amona laua me Lamoni, halawai pu iho la laua me ka makuakane o Lamoni, oia no ke alii maluna iho o ka aina a pau.

9. A, aia hoi, i ae la ka makuakane o Lamoni ia ia, No ke aha la oe i hele ole mai ai i ka ahaaina, ma kela la nui iaʻu i hana ai i kahi ahaaina i kaʻu mau keiki, a i koʻu poe kanaka?

10. A i ae la no hoi oia ia ia, E hele ana oe ihea me keia Nepai, oia no kekahi o na mamo a kekahi mea wahahee?

11. A eia kekahi, hai aku la o Lamoni ia ia i kona wahi e hele aku ai, no ka mea, makau iho la oia o huhu mai kela.

12. A hai aku la oia ia ia i ke kumu o kona noho ana ma kona aupuni iho, i hele ole aku ai oia i kona makuakane la, i ka ahaaina ana i hoomakaukau ai.

13. Ano, ia Lamoni i hai aku ai ia ia i ua mau mea nei a pau, aia hoi, me kona kahaha, ua huhu kona makuakane ia ia, a i mai la, E Lamoni, e hele ana oe e hoopakele aku i keia mau Nepai, he mau mamo lakou a kekahi mea wahahee. Aia hoi, hao wale mai la oia i ko kaua poe kupuna; a, ano la, ua hele mai no hoi kana poe mamo mawaena o kakou, e hiki ia lakou, ma ko lakou maalea a wahahee ana, e hoopunipuni mai ia kakou, e hiki ia lakou ke hao hou wale mai ia kakou i ko kakou waiwai.

14. Ano, kauoha ae la ka makuakane o Lamoni ia ia e pepehi ia Amona me ka pahikaua. A kauoha ae la no hoi oia ia ia, aole e hele oia i ka aina o Midoni, aka e hoi pu oia me ia, i ka aina o Isemaela.

15. Aka, i aku la o Lamoni ia ia, Aole au i pepehi aku ia Amona, aole hoi au e hoi hou i ka aina o Isemaela, aka, e hele ana au i ka aina o Midoni, e hiki iaʻu ke hookuu aku i na hoahanau o Amona, no ka mea, ua ike au he mau kanaka pono lakou, a he mau kaula hemolele o ke Akua oiaio.

16. Ano, i ka wa a kona makuakane i lohe ai i keia mau olelo, ua huhu oia ia ia, a unuhi ae la oia i kana pahikaua, e hiki ia ia ke hahau ia ia i ka honua.

17. Aka ku iho la o Amona a i aku la ia ia, Aia hoi, aole loa oe e pepehi mai i kau keiki; e aho nae kona haule ana mamua o kou; no ka mea hoi, ua mihi oia i kona mau hewa; aka, ina e haule oe i keia manawa, iloko o kou huhu, aole e hiki ke hoola ia kou uhane.

18. A eia hou, he mea pono nou e oki; no ka mea, ina e pepehi mai oe i kau keiki, (he kanaka hala ole no ia,) e kahea aku no kona koko mai ka lepo ae, i ka Haku i kona Akua, no ka hoopai e hiki mai maluna ou; a e lilo aku paha kou uhane.

19. Ano, ia Amona i olelo aku ai i ua mau olelo nei ia ia, pane mai la oia ia ia, i ka i ana, Ua ike au ina e pepehi aku au i kaʻu keiki, e hookahe no au i ke koko hala ole; no ka mea, ooe no ka mea nana i imi e hoopoino ia ia.

20. A o mai la oia i kona lima e pepehi mai ia Amona. Aka, pale ae la o Amona i kona hahau ana, a hahau iho la no hoi i kona lima i hiki ole ai ia ia ke hoohana ia mea.

21. Ano, i ka wa a ke alii i ike ai ua hiki ia Amona ke pepehi mai ia ia, hoomaka ae la oia e noi aku ia Amona, e hookoe mai i kona ola.

22. Aka, hoaka ae la o Amona i kana pahikaua, a i aku la ia ia, Aia hoi, e hahau aku no au ia oe, ke ole oe e ae mai iaʻu e hookuu ia mai koʻu mau hoahanau iwaho o ka halepaahao.

23. Ano, no ka makau o ke alii o lilo aku kona ola, i mai la, Ina e hookoe mai oe iaʻu, e haawi aku au ia oe i kela mea keia mea au e noi mai ai, ina paha ia o ka hapalua o ke aupuni.

24. Ano, ia Amona i ike ai ua hana aku ma ke alii kahiko e like me kona makemake, i aku la oia ia ia, Ina e ae mai oe e hoolei ia mai koʻu mau hoahanau iwaho o ka halepaahao, a e noho no hoi o Lamoni ma kona aupuni, aole hoi oe e huhu aku ia ia, aka e ae mai e hana aku oia e like me na makemake ona, ma na mea ana e manao ai, alaila, e hookoe au ia oe; a i ole, e hahau au ia oe i ka honua.

25. Ano, ia Amona i olelo aku ai i keia mau olelo, hoomaka ae la ke alii e hauoli no kona ola.

26. A ia ia i ike ai aole o Amona makemake e pepehi ia ia, a ia ia i ike ai hoi i ke aloha nui ona i kana keiki ia Lamoni, ua kahaha nui loa iho la oia, a olelo mai la, No kou makemake ana i keia mau mea wale no, i hookuu aku ai au i kou mau hoahanau, a i ae aku ai i kaʻu keiki Lamoni e noho ma kona aupuni, aia hoi, e ae aku no au ia oe e noho kaʻu keiki ma kona aupuni mai keia manawa aku a mau loa aku; aole au e noho alii hou maluna ona ma neia hope aku.

27. A e ae aku no hoi au ia oe e hookuu ia aku kou mau hoahanau mawaho o ka halepaahao, a ooe me kou mau hoahanau e hele mai iaʻu, ma koʻu aupuni; no ka mea, e makemake nui auanei au e ike ia oe; no ka mea, ua pihoihoi nui ke alii ma na olelo ana i olelo aku ai, a ma na olelo hoi i olelo ia ai e kana keiki o Lamoni; nolaila, ua makemake oia e ao ia mau mea.

28. A eia kekahi, hele aku la o Amona laua me Lamoni i ka aina o Midoni. A loaa iho la ia Lamoni ka oluolu ma na maka o ke alii o ka aina; nolaila, ua lawe ia mai na hoahanau o Amona mailoko mai o ka halepaahao.

29. A ia Amona i halawai pu ai me lakou, ua kaumaha nui loa ia, no ka mea hoi, ua olohelohe lakou, a ua pohole nui ko lakou ili, no ka nakinaki ia ana me na kaula ikaika. A ua loaa no hoi ia lakou ka pololi, ka makewai, a me kela ano keia ano o na pilikia a pau; aka hoi, ua hoomanawanui lakou iloko o ko lakou mau eha ana a pau.

30. A me ia i hiki mai ai, o ko lakou puu ia e haule iloko o na lima o kekahi poe kanaka i oi aku ka paakiki a ai oolea; nolaila, aole o lakou la i hoolohe i na olelo a lakou, a ua hoolei mai ia lakou iwaho, a ua hahau mai ia lakou, a i hookuke mai ia lakou ia hale aku ia hale aku, a ia wahi aku ia wahi aku, a hiki aku lakou i ka aina o Midoni; a malaila lakou i hopu ia ai a i hoolei ia ai iloko o ka halepaahao, a i nakinaki ia me na kaula ikaika, a hoopaa ia iloko o ka halepaahao no na la he nui; a ua hoopakele ia e Lamoni laua me Amona.