1. Ano, i ka wa a Amona a me kona mau hoahanau i hookaawale ae ai ia lakou iho ma na palena o ka aina o ko Lamana poe, aia hoi, hele aku la o Aarona i ka aina i kapa ia ai e ko Lamana poe, o Ierusalema; ua kapa ia ia mamuli o ka aina hanau o ko lakou poe kupuna, a ma o aku ia e pili ana i na palena o Moramona.

2. Ano, o ko Lamana poe, a me ko Amaleki poe, a me ka poe kanaka o Amulona, ua kukulu iho la i kekahi kulanakauhale nui, i kapa ia o Ierusalema.

3. Ano, ua nui ka paakiki o ko Lamana poe, no lakou iho, aka, ua paakiki nui ae ko Amaleki, a me ko Amulona; nolaila, ma o lakou la i hoopaakiki iho ai ko Lamana poe i ko lakou mau naau, i mahuahua ikaika ai lakou ma ka hana hewa, a me ko lakou mau mea ino.

4. A eia kekahi, hiki aku la o Aarona i ke kulanakauhale o Ierusalema, a hoomaka mua oia e haiolelo aku i ko Amaleki poe. A hoomaka ae la oia e hai aku ia lakou iloko o ko lakou mau halehalawai, no ka mea, ua kukulu iho la lakou i na halehalawai, mamuli o ka aoao o ko Nehora; no ka mea, ua nui ka poe o ko Amaleki poe a me ko Amulona poe mamuli o ka aoao o ko Nehora.

5. Nolaila, me Aarona i komo aku ai iloko o kekahi o ko lakou mau halehalawai e hai aku i na kanaka, a i kana olelo ana ia lakou, aia hoi, ku iho la kekahi o ko Amaleki, a hoomaka iho la e paio me ia, i ka i ana, Heaha kela mea au i hoike mai ai? Ua ike anei oe i kekahi anela? No ke aha la aole i ikea na anela e makou? Aia hoi, aole anei i like ka maikai o keia poe kanaka me kou poe kanaka?

6. A ke i mai nei no hoi oe, Ina aole makou e mihi, e make no auanei makou. Pehea la oe i ike ai i ka manao a me ka makemake o ko makou naau? Pehea la oe i ike ai he kumu ko makou e mihi ai? Pehea la oe i ike ai aole makou he poe kanaka pono? Aia hoi, ua kukulu iho makou i na halelaa, a ke akoakoa nei makou e hoomana aku i ke Akua. Ke manaoio nei makou e hoola mai no ke Akua i na kanaka a pau.

7. Ano, i aku la o Aarona ia ia, Ke manaoio nei anei oe, e hele mai auanei ke Keiki a ke Akua e hoolapanai mai i na kanaka a pau mai ko lakou mau hala ae?

8. A i mai la ua kanaka la ia ia, Aole makou i manaoio ua ike oe i kekahi mea e like me ia. Aole makou i manaoio i keia mau mooolelo lapuwale. Aole makou i manaoio ua ike oe no na mea e hiki mai ana, aole hoi makou i manaoio ua ike kou poe kupuna, a me ko makou poe kupuna no hoi, no na mea a lakou i olelo mai ai, no na mea e hiki mai ana.

9. Ano, hoomaka ae la o Aarona e wehewehe aku i na palapala hemolele ia lakou, no ka hiki ana mai o Kristo, a no ke alahouana no hoi o ka poe make, a, aole hoi e hiki mai ka hoolapanai ia ana o na kanaka a pau, ke ole ia ma o ka make ana la a me na eha ana o Kristo, a me ke kalahala ana o kona koko.

10. A eia kekahi, ia ia i hoomaka ai e hoomaopopo aku i ua mau mea nei ia lakou, ua huhu iho la lakou ia ia, a hoomaka ae la e hoomaewaewa ia ia; a, aole lakou i hoolohe mai i na olelo ana i olelo aku ai;

11. Nolaila, ia ia i ike ai aole lakou i hoolohe mai i kana mau olelo, haalele aku la oia i ko lakou halehalawai, a hele aku la i kekahi kauhale i kapa ia o Ani-anati, a malaila i loaa ai ia ia o Muloki e hai ana i ka olelo ia lakou; a me Ama hoi, a me kona mau hoahanau. A paio aku la lakou me na mea he nui no ka olelo.

12. A eia kekahi, ua ike lakou e hoopaakiki ana na kanaka i ko lakou mau naau; nolaila, haalele iho la lakou, a haele aku la i ka aina o Midoni. A hai aku la lakou i ka olelo i na mea he nui, a he kakaikahi ka poe i manaoio ma na olelo a lakou i ao aku ai.

13. Aka hoi, o Aarona a me kekahi mau mea o kona poe hoahanau, ua hopu ia a hoolei ia iloko o ka halepaahao, a o na mea i koe, mahuka aku la lakou mailoko aku o ka aina o Midoni, ma na wahi e kokoke ana a puni.

14. A o ka poe i hoolei ia iloko o ka halepaahao, loaa iho la na mea eha he nui wale ia lakou, a ua hoopakele ia lakou ma ka lima o Lamoni laua me Amona; a ua hanai ia a hoaahu ia.

15. A hele hou aku la lakou e hai i ka olelo; a pela lakou i hoopakele ia mai ai no ka manawa mua mailoko mai o ka halepaahao; a pela lakou i eha ai.

16. A hele aku la lakou i kahi a lakou i alakai ia ai e ka Uhane o ka Haku, e hai ana i ka olelo a ke Akua i kela halehalawai i keia halehalawai o ko Amaleki poe, a iloko o na ahakanaka o ko Lamana poe, kahi i hiki ai ia lakou ke komo.

17. A eia kekahi, hoomaka mai la ka Haku e hoopomaikai mai ia lakou, a lawe mai la lakou i na mea he nui i ka ike i ka oiaio; he oiaio, ua hoomaopopo ia kekahi poe he nui no ko lakou mea hewa, a no na mooolelo o ko lakou poe kupuna, i pololei ole.

18. A eia kekahi, hoi hou aku la o Amona laua me Lamoni mai ka aina mai o Midoni, i ka aina o Isemaela, oia no ko lakou aina hooilina.

19. Aole i ae mai o ke alii Lamoni ia Amona e lawelawe nana, aole hoi e lilo i kauwa nana;

20. Aka, kauoha aku la oia e kukulu ia na halehalawai ma ka aina o Isemaela; a kauoha aku la no hoi ia i kona poe kanaka, oia hoi ka poe kanaka e noho ana malalo iho o kona au, e hoakoakoa ia lakou iho.

21. A hauoli iho la oia maluna o lakou, a ao aku la oia ia lakou i na mea he nui wale. A hai aku la no hoi oia ia lakou, he poe kanaka lakou malalo iho ona, a he poe kanaka kuokoa lakou, ua kaawale lakou mai ka hooluhi hewa ana ae o ke alii, kona makuakane; no ka mea, ua ae mai kona makua ia ia, e noho alii oia maluna iho o ka poe kanaka iloko o ka aina o Isemaela, a iloko o ka aina a pau a puni.

22. A hai aku la no hoi oia ia lakou, ua hookuu ia lakou e hoomana i ka Haku, i ko lakou Akua, e like me ko lakou makemake, ma kela wahi keia wahi a lakou i komo ai, ina iloko ia o ka aina malalo iho o ka noho alii ana o ke alii Lamoni. A hai olelo aku la o Amona i ka poe kanaka o ke alii Lamoni.

23. A eia kekahi, ao aku la oia ia lakou i na mea a pau no na mea e pili ana i ka pono. A kauleo aku la oia ia lakou i kela la i keia la, me ka ikaika a pau; a hoolohe mai la lakou i kana olelo, a ua ikaika lakou i ka malama ana i na kauoha a ke Akua.