1. Ano, eia kekahi, mahope iho o ka hoonoho ia ana o ka poe kanaka o Amona ma ka aina o Ieresona, a he ekalesia no hoi i kukulu ia ma ka aina o Ieresona; a ua hoonoho ia ka poe koa o ko Nepai a puni ka aina o Ieresona; he oiaio, ma na palena a pau a puni ka aina o Zarahemela; aia hoi, ua hahai mai la ka poe koa o ko Lamana poe i ko lakou poe hoahanau iloko o ka waonahele.

2. A pela hoi he kaua weliweli; he oiaio, he kaua i ike ole ia kona like mamua mawaena o ka poe kanaka a pau ma ka aina, mai ka manawa mai a Lehi i haalele aku ai ia Ierusalema; he oiaio ae la, ua luku ia na umi o na tausani o ko Lamana poe a hoopuehu ia aku la i o a ia nei.

3. He oiaio hoi, he luku weliweli no hoi mawaena o ka poe kanaka o Nepai; ua hooauhee ia a hoopuehu ia nae ko Lamana poe, a hoi hou aku la ka poe kanaka o Nepai i ko lakou aina.

4. Ano, he manawa keia i lohea ai ka uwe nui a me ke kanikau mawaena o ka aina a pau, mawaena o ka poe kanaka o Nepai a pau;

5. He oiaio, ke kupinai o na wahinekanemake e uwe ana no ka lakou poe kane, a me na makuakane e uwe ana no ka lakou poe keikikane, o ke kaikamahine no ke kaikunane; he oiaio, ke kaikunane no ka makuakane; a pela i lohe ia ai ke kupinai o ka uwe ana mawaena o lakou a pau; e uwe ana no ko lakou poe pili koko i pepehi ia ai.

6. Ano, he oiaio no, he la kaumaha no keia; he oiaio, he manawa luuluu io no, a he manawa hookeai nui a pule;

7. A pela i pau ai ka makahiki umikumamalima o ka noho luna ana o na lunakanawai maluna iho o ka poe kanaka o Nepai;

8. A oia no ka mooolelo o Amona a me kona poe hoahanau, o ko lakou hele ana ma ka aina o Nepai, o ko lakou mau eha ma ka aina, o ko lakou mau kaumaha, a me ko lakou mau popilikia, a me ko lakou olioli i hiki ole ke hoomaopopo ia aku a me ka hookipa ia ana a me ka malu o ka poe hoahanau ma ka aina o Ieresona. Ano, na ka Haku, ka Mea Hoolapanai o na kanaka a pau, e hoopomaikai i ko lakou mau uhane no ka wa pau ole.

9. A o keia no ka mooolelo o na kaua a me na paio mawaena o ko Nepai poe, a me na kaua no hoi mawaena o ko Nepai poe a me ko Lamana poe; a ua pau ae la ka makahiki umikumamalima o ke au o na lunakanawai;

10. A mai ka makahiki mua a hiki i ka umikumamalima, ua hiki mai ka hoopau ia ana o ke ola o na tausani he nui; he oiaio, ua hiki mai ka hookahe koko weliweli loa ana;

11. A ua waiho haahaa ia na kino o na tausani he nui iloko o ka lepo, oiai e popopo ana na kino o na mea he nui na tausani ma na ahu maluna iho o ka ili o ka honua; he oiaio, a ua nui na tausani e uwe ana no ka make ana o ko lakou poe pili koko, no ka mea, he kumu ko lakou e makau ai, e like me na olelo paa a ka Haku, ua hookuu ia lakou la i kahi o ka poino pau ole;

12. Oiai e uwe io ana na tausani o na mea e ae no ka make o ko lakou poe pili koko, e hauoli ana a e kaena ana nae lakou iloko o ka manaolana, a e ike ana no hoi, e like me na olelo paa a ka Haku, ua hookiekie ia lakou la e noho ma ka lima akau o ke Akua, i kahi o ka pomaikai pau ole, ia ao aku ia ao aku;

13. A pela kakou e ike nei i ka nui o ka like ole o na kanaka no ka hewa a me ka hala, a me ka mana o ke diabolo, i hiki mai ai ma o na manao maalea la, ana i noonoo ai e hoopahele mai i na naau o na kanaka;

14. A pela kakou e ike nei he mea nui loa ka e pono ai ka hooikaika o na kanaka e hana iloko o na pawaina o ka Haku; a pela no hoi kakou e ike nei i ke kumu nui no ke kaumaha, a no ka hauoli ana no hoi: o ke kaumaha no ka make a me ka luku mawaena o na kanaka, a o ka hauoli hoi no ka malamalama o Kristo i ke ola.