1. Ano, e kaʻu keiki, he mau olelo he nui aku kaʻu e olelo aku ai ia oe, mamua o kaʻu i olelo aku ai i kou kaikuaana; no ka mea hoi, aole anei oe i ike i ka naueue ole o kou kaikuaana, o kona hoomau pono ana, a me kona ikaika i ka malama ana i na kauoha a ke Akua? Aole anei oia i hana i kahi kumu maikai nou e hoohalike ai?

2. No ka mea, aole oe i hoolohe nui mai i kaʻu mau olelo e like me kou kaikuaana, mawaena o ko Zorama poe. Ano, eia no kaʻu i ku e ai ia oe; hele ae la no oe e kaena ana i kou ikaika, a i kou naauao.

3. Aole o keia wale no, e kaʻu keiki. Hana iho la oe i ka mea i hoeha mai iaʻu; no ka mea, haalele mai la oe i kau hai olelo ana, a hele ae la iloko o ka aina o Sirona, mawaena o na palena o ko Lamana poe, mamuli o ka wahine hookamakama, o Isabela;

4. He oiaio, aihue ae la kela i na naau o na mea he nui wale; aka, aole ia he mea e hoapono ia ai nou, e kaʻu keiki. O ka malama ana i kau oihana i waiho ia ai ia oe kou mea i pono ai.

5. Aole anei oe i ike, e kaʻu keiki, he mau mea keia i hoopailua ia ma ka maka o ka Haku; he oiaio, i hoopailua loa ia mamua o na hewa a pau, koe wale no ka hookahe ana i ke koko hala ole, a me ka hoole ana i ka Uhane Hemolele?

6. No ka mea, aia hoi, ina e hoole aku oe i ka Uhane Hemolele ia ia i noho ai iloko ou, a ua ike oe e hoole ana oe ia ia; aia hoi, he hala keia e kala ole ia ana; he oiaio, o ka mea e pepehi kanaka ana me ke ku e i ka malamalama a me ka ike o ke Akua, he mea paakiki nona e loaa ai ke kala ia ana; he oiaio, ke i aku nei au ia oe, e kaʻu keiki, aole ia he mea maalahi nona e loaa ai ke kala ia ana.

7. Ano, e kaʻu keiki, ua makemake au i ke Akua ina ua hewa ole oe i ka hewa nui me neia. Aole au e olelo loihi ma kou mau hewa, e hoowalania i kou uhane, ina aole ia no kou pono.

8. Aka hoi, ua hiki ole ia oe ke huna i kou mau hewa mai ke Akua ae; a ke mihi ole oe, e ku no ia mau mea me he hoike la e ku e ia oe ma ka la hope.

9. Ano, e kaʻu keiki, ua makemake au e mihi oe, a e haalele aku i kou mau hewa, a e hele hou ole aku mamuli o na kuko o kou mau maka, aka e alalai ia oe iho ma keia mau mea a pau; no ka mea, ke hana ole oe i keia, aole loa e hiki ia oe ke loaa ke aupuni o ke Akua. E hoomanao, a e lawe ia mea maluna iho ou, a e alalai ia oe iho ma ua mau mea nei.

10. A ke kauoha aku nei au ia oe e lawe maluna iho ou e ao ia e kou mau kaikuaana ma kau mau mea e hana ai; no ka mea hoi, eia no oe i kou wa opio, a ua ku pono oe e hooikaika a e kou mau kaikuaana. A e hoolohe aku oe i ka laua olelo ao;

11. Mai ae aku oe e alakai ia aku e kekahi mea lapuwale a naaupo; mai ae aku i ke diabolo e alakai hou aku i kou naau, mamuli o kela mau wahine hookamakama ino. E nana iho oe, e kaʻu keiki, i ka hala nui au i lawe mai ai maluna iho o ko Zorama poe; no ka mea, ia lakou i ike ai i kau hana, aole lakou i manaoio mai i kaʻu mau olelo.

12. Ano, ke i mai nei ka Uhane o ka Haku iaʻu, E kauoha aku oe i kau mau keiki e hana pono, o alakai aku lakou i na naau o na kanaka he nui i ka make loa; nolaila, ke kauoha aku nei au ia oe, e kaʻu keiki, iloko o ka makau i ke Akua, e haalele aku oe i kau mau hana hewa;

13. I huli ai oe i ka Haku me kou naau, a ikaika, a mana a pau; i alakai ole ai oe i na naau o na mea e ae, e hana i ka hewa; aka, e aho e hoi aku ia lakou, a e hai aku i kou mau hewa, a e hoomanao i ka hana pono ole au i hana ai;

14. Mai imi aku i ka waiwai, aole hoi i na mea lapuwale o ko ke ao nei; no ka mea hoi, aole e hiki ia oe ke hali pu ia mau mea me oe.

15. Ano, e kaʻu keiki, ke makemake nei au e olelo aku i kekahi mau mea ia oe no ka hiki ana mai o Kristo. Aia hoi, ke i aku nei au ia oe, oia no ka mea e hele io mai auanei, e lawe aku i na hala o ko ke ao nei; he oiaio, e hele mai ana oia e hai aku i na mea olioli o ke ola mau loa i kona poe kanaka.

16. Ano, e kaʻu keiki, o keia no ka oihana i kahea ia ai oe, e hai aku i keia mau mea olioli i keia poe kanaka, e hoomakaukau i ko lakou mau naau; oia hoi, i hiki mai ke ola ia lakou, e hiki ia lakou ke hoomakaukau i na naau o ka lakou poe keiki e hoolohe i ka olelo, i ka wa o kona hiki ana mai.

17. Ano, e hooluolu aku au i kou naau ma keia mea. Aia hoi, ke haohao nei oe no ka ike ia ana o keia mau mea i ka manawa loihi me neia mamua o ka hiki ana mai. Aia hoi, ke i aku nei au ia oe, aole anei i like ka maikai o kekahi uhane i keia manawa i ke Akua, me kekahi uhane i ka manawa o kona hiki ana mai?

18. Aole anei o ke kumumanao hoolapanai he mea e pono ai ke hoike ia mai i keia poe kanaka, e like me ia i ka lakou poe keiki?

19. Aole anei i like ka oluolu i keia manawa no ka Haku e hoouna mai i kona anela e hai mai i keia mau mea olioli ia kakou, me ia i ka kakou poe keiki; a me ia hoi mahope iho o kona hiki ana mai?