1. Ano, eia kekahi, i ko Alama hele ana mai ka aina o Gideona aku i ka hema, i ka aina o Manati, aia hoi! Me ka pihoihoi nui ona, halawai aku la oia me na keiki a Mosia, e hele ana i ka aina o Zarahemela.

2. Ano, me Alama pu ua poe keiki nei a Mosia i ka wa i ike mua ia ka anela e ia; nolaila, hauoli nui loa iho la o Alama, e ike i kona mau hoahanau; a o ka mea i hoonui aku ai i kona hauoli, o lakou no kona mau hoahanau iloko o ka Haku i keia manawa hoi, he oiaio, a ua mahuahua ikaika ma ka ike i ka oiaio; no ka mea, he mau kanaka me ka hoomaopopo kupono lakou, a imi molowa ole lakou i na palapala hemolele, i hiki ia lakou ke ike i ka olelo a ke Akua.

3. Aka aole o keia mau mea wale no; ua hoolilo lakou ia lakou iho i ka pule nui, a i ka hooke ai ana, nolaila, ia lakou ka Uhane o ka wanana, a me ka Uhane o ka hoikeana, a i ka wa a lakou e ao aku ai, ao aku lakou me ka ikaika a me ka mana o ke Akua.

4. A ua ao aku lakou i ka olelo a ke Akua no na makahiki he umikumamaha, mawaena o ko Lamana poe, a ua loaa ka pomaikai nui ma ka lawe ana i na mea he nui loa i ka ike i ka oiaio; he oiaio, ma ka mana o ka lakou mau olelo, ua nui loa ka poe i lawe ia imua o ke kuahu o ke Akua, e kahea aku i kona inoa, a e hai aku i ko lakou mau hewa imua ona.

5. Ano, eia na mea i pili pu me lakou ma ko lakou hele ana, no ka mea, ua loaa ia lakou na pilikia he nui wale; ua hoopilikia nui loa ia lakou, ma ke kino a ma ka naau hoi; ma ka pololi, a me ka makewai a luhi, a me ka hana nui hoi ma ka uhane.

6. Ano, eia ko lakou hele ana: Ua haalele iho i ko lakou makuakane ia Mosia, ma ka makahiki mua o ke au o na lunakanawai; ua hoole aku i ke aupuni a ko lakou makuakane i makemake ai e hooili mai maluna o lakou; a o ka manao no hoi keia o na kanaka;

7. Haalele iho la nae lakou i ka aina o Zarahemela, a lawe aku la i ka lakou mau pahikaua, a me ka lakou mau ihe; a me ka lakou mau kakaka, a me ka lakou mau pua, a me ka lakou mau maa; a o keia mau mea ka lakou i hana ai, i hiki ia lakou ke hoomakaukau i ai na lakou iho, oiai ma ka woanahele;

8. A pela lakou i hele aku ai iloko o ka waonahele ma ka poe a lakou i wae aku ai, e pii pu aku i ka aina o Nepai, e hai aku i ka olelo a ke Akua i ko Lamana poe.

9. A eia kekahi, haele aku la lakou i na la he nui wale ma ka waonahele, a hooke ai nui loa aku la lakou, i haawi mai ai ka Haku ia lakou i kona Uhane e hele pu me lakou, a e noho pu me lakou, i hiki ia lakou ke lilo i mea hana ma ka lima o ke Akua, e lawe mai, ina he mea hiki ia, i ko lakou poe hoahanau, i ko Lamana poe, i ka ike i ka oiaio; i ka ike i ka ino o na mooolelo o ko lakou poe kupuna, he pololei ole ia mau mea.

10. A eia kekahi, hoalauna mai la ka Haku ia lakou me kona Uhane, a i mai la ia lakou, E hooluolu ia; a ua hooluolu ia lakou.

11. A i mai la ka Haku ia lakou no hoi, E hele aku mawaena o ko Lamana poe, ko oukou poe hoahanau, a e hookupaa aku i kaʻu olelo; aka e ahonui oukou ma ka hoomanawanui a me na popilikia, e hiki ia oukou ke hoike aku i na kumu hoohalike maikai ia lakou iaʻu, a e hoolilo aku au ia oukou i mea hana ma koʻu mau lima, i ka hoola ana i na uhane he nui wale.

12. A eia kekahi, loaa iho la ka ikaika i na naau o na keikikane a Mosia, a me ka poe a pau no hoi i hele pu me lakou, e hele aku i ko Lamana poe, e hai aku ia lakou i ka olelo a ke Akua.

13. A eia kekahi ia lakou i hiki ai ma na palena o ka aina o ko Lamana poe, hookaawale aku la lakou ia lakou iho, a haalele aku la kekahi i kekahi, e paulele ana i ka Haku e halawai pu hou ma ka hopena o ko lakou ohi ana; no ka mea, manao iho la lakou ua nui ka hana a lakou i hoomaka ai.

14. A he oiaio iho la ua nui loa io no ia, no ka mea, ua hoomaka lakou e hai aku i ka olelo a ke Akua i kekahi lahuikanaka hihiu, paakiki, a hae; he lahuikanaka e hauoli ana i ka pepehi ana i ko Nepai poe, a i ka powa ana, a hao wale ana ia lakou; a ua kau ia na naau o lakou maluna o ka waiwai, oia maluna iho o ke gula a me ke kala, a me na pohaku makamae; imi iho la nae lakou e loaa ua mau mea nei ma ka pepehi kanaka ana a ma ka hao wale ana, i hana ole ai lakou no ua mau mea la me ko lakou mau lima ponoi;

15. A pela iho la he poe kanaka palaualelo loa lakou, a he nui wale ka poe o lakou i hoomana ai i na kii, a ua haule mai ka hoomainoino o ke Akua maluna iho o lakou no na mooolelo o ko lakou poe kupuna; aka hoi, ua o ia mai nae na olelo hoopomaikai a ka Haku ia lakou, ina lakou e mihi;

16. Nolaila, no keia mea ua hoomaka na keiki a Mosia i ka hana, e hiki paha ia lakou ke lawe mai ia lakou la i ka mihi; e hiki paha ia lakou ke lawe mai ia lakou la e ike i ke kumumanao hoolapanai;

17. Nolaila, hookaawale iho la lakou ia lakou iho kekahi mai kekahi ae, a hele aku la mawaena o lakou la, o kela kanaka keia kanaka oia wale no, e like me ka olelo a me ka mana o ke Akua, i haawi ia mai ai ia ia.

18. Ano, o Amona oia no ke pookela mawaena o lakou, a oia no ka i lawelawe ia lakou; a haalele iho la oia ia lakou, mahope iho o kona hoopomaikai ana ia lakou e like me ko lakou mau wahi i ku ai, a ua haawi aku i ka olelo a ke Akua ia lakou, a lawelawe aku la ia lakou mamua o kona hele ana; a pela lakou i hele aku ai i ko lakou kaahele ana iho i ka aina a puni.

19. A hele aku la o Amona i ka aina o Isemaela, ua kapa ia hoi ia aina mamuli o na keikikane a Isemaela, o lakou no hoi ka i lilo o ko Lamana poe.

20. A ia Amona i komo ai i ka aina o Isemaela, hopu mai la ko Lamana poe ia ia a nakinaki ia ia, me lakou i maa ai, i nakinaki ai i ko Nepai poe a pau, ka poe i haule iloko o ko lakou mau lima, a kaikai aku ia lakou a pau imua o ke alii; a pela i waiho ia ai i ka makemake o ke alii e pepehi ia lakou, a i ole ia, e hoopaa aku ia lakou iloko o ka noho pio ana, a i ole ia, e hoolei aku ia lakou iloko o ka halepaahao, a i ole ia, e kipaku aku ia lakou iwaho o kona aina, e like me kona makemake a me kona manao;

21. A pela o Amona i kaikai ia aku ai imua o ke alii, oia no maluna iho o ka aina o Isemaela; a o Lamoni no kona inoa; a he mamo oia na Isemaela.

22. A ninau mai la ke alii ia Amona, ina o kona makemake anei ia, e noho ai ma ka aina mawaena o ko Lamana poe, mawaena o kona poe kanaka.

23. A i aku la o Amona ia ia, Ae, ke makemake nei au e noho mawaena o keia poe kanaka i kekahi manawa; he oiaio, a hiki aku paha i ka la aʻu e make ai.

24. A eia kekahi, ua lealea nui ke alii Lamoni ia Amona, a kauoha aku la ia e wehe ia na mea paa ona; a ua makemake oia ia Amona e lawe mai i kekahi o kana mau kaikamahine i wahine nana.

25. Aka, i aku la o Amona ia ia, Aole, aka e lilo au i kauwa nau; nolaila, lilo iho la o Amona i kauwa na ke alii Lamoni. A eia kekahi, ua hoonoho ia oia, mawaena o kekahi poe kauwa e ae, e kiai aku i na pua holoholona o Lamoni, e like me ka aoao o ko Lamana poe.

26. A ia ia ma ka hana a ke alii i na la ekolu, i kona hele ana ae me na kauwa o ko Lamana poe, me na pua o lakou, i kahi o ka wai, oia ka i kapa ia ka wai o Sebusa; (ilaila i hoa ku ai ko Lamana poe a pau i na pua o lakou, i loaa ai ia lakou ka wai;)

27. Nolaila, ia Amona a me na kauwa a ke alii i hoa aku ai i na pua o lakou i ua wahi nei o ka wai, aia hoi, ku iho la kekahi poe o ko Lamana poe, ka poe i hele aku me na pua o lakou e hoohainu ai, a hoopuehu ae la i na pua o Amona, a me na kauwa a ke alii, a hoopuehu ae la lakou ia lakou, a naholo aku la lakou i na wahi he nui.

28. Ano, hoomaka iho la na kauwa a ke alii e ohumu, i ka i ana, Ano, e pepehi mai no ke alii ia kakou, me kana i ko kakou poe hoahanau, no ka hoopuehu ia ana o na pua o lakou o ka hana hewa la a keia poe kanaka. A hoomaka ae la lakou e uwe nui loa, i ka i ana, Aia hoi, ua hoopuehu ia aku na pua o kakou ano la.

29. Ano, uwe iho la lakou no ko lakou makau i ka pepehi ia mai. Ano, ia Amona i ike ai i keia mea, ua piha kona naau i ka hauoli; no ka mea, wahi ana, e hoike aku no au i kuu mana i keia poe, koʻu poe hoakauwa, a i ka mana no iloko oʻu, i ka hoihoi hou ana i keia mau pua i ke alii, e hiki iaʻu ke loaa na naau o ua poe nei, o koʻu poe hoakauwa, e hiki uaʻu ke alakai mai ia lakou e manaoio mai i kaʻu mau olelo.

30. Ano, oia no na manao o Amona, ia ia i ike ai i na pilikia o ka poe ana i kapa ai he poe hoahanau nona.

31. A eia kekahi, hoolana aku la oia ia lakou ma kana mau olelo, me ka i ana, E koʻu poe hoahanau, e hoolana i ka manao a e hele aku kakou e imi i na pua, e houluulu mai kakou ia lakou, a e hoihoi hou mai i kahi o ka wai; a pela kakou e malama ai i na pua no ke alii, a aole ao ia e pepehi mai ia kakou.

32. A eia kekahi, haele aku la lakou e imi i na pua, a hahai mai la lakou ia Amona, a holo kiki aku la lakou, a hoopuni iho la i na pua o ke alii, a houluulu hou mai la i kaho o ka wai.

33. A ku hou iho la ua poe kanaka la e hoopuehu mai i na pua o lakou; aka i aku la o Amona i kona poe hoahanau, E, e hoopuni oukou i na pua a puni i auhee ole aku ai lakou; a e hele au a e paio aku me ua poe kanaka nei, ka poe i hoopuehu mai nei i na pua o kakou.

34. Nolaila, hana iho la lakou me Amona i kauoha aku ai ia lakou, a hele aku la ia a ku iho la e paio aku me ua poe la, ka poe i ku ma na wai o Sebusa; aole he kakaikahi o lakou ma ka heluna;

35. Nolaila, aole lakou i makau ia Amona, no ka mea, ua kuhi lakou ua hiki i kakahi o ko lakou poe kanaka ke pepehi ia ia, e like me ko lakou makemake, no ka mea, aole lakou i ike ua olelo paa mai ka Haku ia Mosia, e hoopakele ae oia i kana mau keiki mailoko mai o ko lakou mau lima; aole hoi lakou i ike i kekahi mea no ka Haku; nolaila, ua hauoli lakou ma ka luku ia ana o ko lakou poe hoahanau; a no keia kumu i ku iho ai lakou e hoopuehu aku i na pua o ke alii.

36. Aka, ku iho la o Amona a hoomaka ae la e nou aku i na pohaku ia lakou me kona maa; he oiaio, me ka mana ikaika oia i maa aku ai i na pohaku mawaena o lakou; a pela oia i pepehi aku ai i kekahi poe o lakou, a hoomaka ae la lakou e kahaha i kona mana; aka hoi, ua huhu lakou no ka make ana o ko lakou poe hoahanau, a ua paa ko lakou manao e make oia; nolaila, i ka ike ana ua hiki ole ke pa oia ia lakou me ko lakou mau pohaku, hele mai la lakou me na newa e pepehi mai ia ia.

37. Aka, o kela kanaka keia kanaka i hoaka ae i kona newa e pepehi mai ia Amona, ooki aku la oia i kona lima me kana pahikaua; no ka mea, pale aku la oia i ko lakou hahau ana ma ka hahau ana i ko lakou mau lima me ka maka o kana pahikaua, a hoomaka lakou e hakaka, a hoomaka ae la e auhee aku imua ona; he oiaio, aole hoi he kakaikahi o lakou; ua hooauhee aku oia ia lakou ma ka ikaika o kona lima.

38. Ano, ua haule eono o lakou i ka maa, aole oia i pepehi loa i kekahi, me kana pahikaua, o ko lakou luna wale no; a ooki aku la oia i na lima a pau o lakou e like me ka nui i hapai ku e mai ia ia, aole lakou he kakaikahi.

39. A ia ia i hooauhee aku ai ia lakou a mamao aku, hoi aku la oia, a hoohainu iho la lakou i na pua o lakou a hoihoi hou aku ia lakou i ke kula o ke alii, alaila, haele aku la iloko i ke alii la, e hali ana i na lima i ooki ia aku ai ma ka pahikaua a Amona, o ka poe i imi e pepehi mai ia ia; a ua hali ia lakou iloko i ke alii la, i mea hoike no na mea a lakou i hana ai.