1. Aia hoi kekahi, mahope iho o ka hoonoho ia ana o ka poe kanaka o Amona, ma ka aina o Ieresona, he oiaio, a mahope hoi o ka hooauhee ia ana o ko Lamana poe mailoko aku o ka aina, ua kanu ia hoi ko lakou poe make e ka poe kanaka o ka aina.

2. Ano, aole i helu ia ko lakou poe make no ka nui loa o lakou; aole hoi i helu ia ka poe make o ko Nepai poe. Aka, mahope iho o ke kanu ana o lakou i ko lakou poe make, a mahope hoi o na la o ka hookeai ana, a uwe ana, a pule ana, (a ma ka makahiki umikumamaono ia o ke au o na lunakanawai maluna iho o ka poe kanaka o Nepai,) hoomaka ae la ka malu mau ma o a o ma ka aina a puni;

3. He oiaio, a malama aku la na kanaka i na kauoha a ka Haku; a ua ikaika lakou i ka malama ana i na oihana a ke Akua, e like me ke kanawai o Mose; no ka mea, ua ao ia aku lakou e malama i ke kanawai o Mose, a hiki i ka wa e hooko ia ai ia;

4. A pela hoi aole no o na kanaka haunaele iloko o ka makahiki umikumamaono a pau o ke au o na lunakanawai maluna iho o ka poe kanaka o Nepai.

5. A eia kekahi, ma ka makahiki umikumamahiku o ke au o na lunakanawai, ua maluhia mau.

6. Aka, ma ka hopena o ka makahiki umikumamahiku, hele mai la kekahi kanaka iloko o ka aina o Zarahemela; a oia no o Anati-Kristo, no ka mea, hoomaka ae la oia e hai aku i na kanaka me ke ku e i na wanana i olelo e ia mai ai e na kaula, no ka hiki ana mai o Kristo.

7. Ano, aohe kanawai e ku e ana i ko ke kanaka manaoio; no ka mea, e ku e ikaika ana i na kauoha a ke Akua, ke kau ia ana o kekahi kanawai e hoonoho like ole ai i na kanaka.

8. No ka mea, penei wahi a ka palapala hemolele, E koho oukou i keia la, i ka oukou mea e malama aku ai.

9. Ano, ina ua makemake kekahi kanaka e malama aku i ke Akua, ua hiki no ia ia, e aho paha e olelo, ina ua manaoio oia i ke Akua, ua hiki no ia ia ke malama aku ia ia; aka, ina aole oia i manaoio aku ia ia, aole he kanawai e hoopai aku ia ia.

10. Aka ina i pepehi kanaka oia, ina ua hoopai ia oia i ka make; a ina i powa aku, ina ua hoopai ia no hoi oia; a ina i aihue oia, ina ua hoopai ia no hoi oia; a ina i moekolohe oia, ina ua hoopai ia no hoi oia; he oiaio, no keia mau hana hewa a pau, ua hoopai ia lakou;

11. No ka mea, aia no he kanawai, i hoopai ia na kanaka e like me na hewa o lakou. Aka hoi, aohe kanawai e ku e ana i ko ke kanaka manaoio; nolaila, ua hoopai ia aku ke kanaka no na hewa wale no ana i hana ai; nolaila, ua like ka noho ana o na kanaka a pau.

12. A o ua Anati-Kristo nei o Korihora kona inoa, (a aohe o ke kanawai kuleana maluna iho ona,) hoomaka ae la oia e hai aku i na kanaka, aole loa no auanei he Kristo. A mamuli o keia ano oia i hai aku ai, i ka i ana:

13. E ka poe i hoopaa ia malalo iho o kahi manaolana naaupo a lapuwale, no ke aha la oukou e hookaumaha nei ia oukou iho me na mea lapuwale me ia? No ke aha la oukou e nana aku nei no kekahi Kristo? No ka mea, aohe kanaka i hiki ke ike i kekahi mea e hiki mai ana.

14. Aia hoi, o keia mau mea a oukou e kapa aku nei he mau wanana a oukou i olelo aku ai ua haawi ia mai e na kaula hemolele, aia hoi, he mau mooolelo lapuwale ia mau mea o ko oukou poe kupuna.

15. Pehea la oukou i ike ai i ka oiaio o ia mau mea? Aia hoi, aole e hiki ia oukou ke ike i na mea a oukou i nana ole ai; nolaila, aole e hiki ia oukou ke ike aia no auanei he Kristo.

16. Ke nana nei oukou imua a olelo iho, ua ike oukou i ke kala ia ana o ko oukou mau hala. Aka, no ka naau i hoopupule ia keia mea; a o ua pupule nei o ko oukou mau naau ua hiki mai la no na mooolelo o ko oukou poe kupuna, na mea e alakai aku ana ia oukou e manaoio i na mea io ole.

17. A ua nui na mea e ae me ia ana i olelo ae ai ia lakou, e hai ana ia lakou aole e hiki ke hana ia ke kalahala ana no na hewa o na kanaka, aka ua loaa i kela kanaka i keia kanaka ma keia ola ana, e like me ka hooponopono ana o ka mea i hana ia; nolaila, ua pomaikai kela kanaka keia kanaka e like me kona ano akamai, a ua lanakila kela kanaka keia kanaka e like me kona ikaika; a o kela mea keia mea a ke kanaka i hana ai, aole no ia he hewa.

18. A pela oia i hai aku ai ia lakou, e alakai aku ana i na naau o na mea he nui, a ma o na la lakou i hookiekie ae ai i ko lakou mau poo iluna iloko o ka lakou hana hewa; he oiaio, e alakai aku ana i na wahine he nui wale, a me na kanaka no hoi, e moekolohe; e hai ana ia lakou i ka wa e make ai ke kanaka, o ka pau ae la no ia.

19. Ano, hele aku la o ua kanaka nei i ka aina o Ieresona no hoi, e hai aku i ua mau mea nei mawaena o ka poe kanaka o Amona, o lakou no ka poe kanaka o ko Lamana mamua.

20. Aka hoi, ua naauao nui ae lakou mamua o kekahi poe he nui o ko Nepai poe; a lalau aku la lakou ia ia, a nakii ia ia, a kai aku la ia ia imua o Amona, oia no kekahi kahuna nui maluna iho o kela poe kanaka.

21. A, eia kekahi, kauoha ae la ia e halihali ia oia iwaho o ka aina. A hele ae la oia iloko o ka aina o Gideona, a hoomaka ae la e hai aku ia lakou no hoi; a, aole nui kona pomaikai ma ua wahi nei, no ka mea, ua hopu ia iho la oia a nakinaki ia, a kaikai ia aku la imua o ke kahuna nui, a o ka lunakanawai nui hoi maluna iho o ka aina.

22. A, eia kekahi, i aku la ke kahuna nui ia ia, No ke aha la oe i hele ai i o a ia nei e hookapae ana i na aoao o ka Haku? No ke aha la oe i ao aku ai i keia poe kanaka, aole no auanei he Kristo, e alalai mai i ko lakou hauoli ana? No ke aha la oe i olelo ku e mai ai i na wanana a ka poe kaula hemolele a pau?

23. Ano, o ko ke kahuna nui inoa o Gidona ia. A i ae la o Korihora ia ia, No koʻu ao ole aku i na mooolelo lapuwale o ko oukou poe kupuna, a no koʻu ao ole aku i keia poe kanaka e nakii aku ia lakou iho malalo iho o na kanawai a me na oihana lapuwale i hookau ia e na kahuna kahiko, e lalau wale iho ai i ka mana a me ke alii ana maluna iho o lakou, e hoomau iho ai ia lakou iloko o ka naaupo, i hiki ole ai ia lakou ke hoea mai i ko lakou mau poo, aka e hoohaahaa ia ilalo e like me kau mau olelo.

24. Ke i mai nei olua, he poe kanaka paa ole ua poe kanaka nei. Aia hoi, ke i aku nei au, aia no lakou iloko o ka noho luhi ana. Ke i mai nei olua, he oiaio ua mau wanana kahiko la. Aia hoi, ke i aku nei au ia olua, aole olua i ike he oiaio ia mau mea.

25. Ke i mai nei olua, he poe kanaka hewa, a he poe kanaka haule ua poe kanaka nei, no ka lawehala ana o kekahi kupuna. Aia hoi, ke i aku nei au ia olua, aole i hewa ke keiki no kona mau kupuna.

26. A ke i mai nei no hoi olua e hiki mai auanei o Kristo. Aka hoi, ke i aku nei au ia olua, aole olua i ike aia no auanei he Kristo. A ke i mai nei no hoi olua, e pepehi ia oia no na hala a ko ke ao nei;

27. A pela olua e alakai aku nei i keia poe kanaka mamuli o na mooolelo lapuwale o ko olua poe kupuna, a e like me ko olua mau makemake iho; a ke hoopaa iho nei olua ia lakou ilalo, me he mea la iloko o ka noho luhi ana, i hiki ia olua ke hoopiha ia olua iho me na hana a ko lakou mau lima, i aa ole ai lakou e nana iluna me ka wiwo ole, a i aa ole ai lakou e loaa ko lakou mau mea e pono ai a e pomaikai ai;

28. He oiaio, aole lakou i aa aku e hana me ka lakou mau mea ponoi, o huhu mai ka lakou poe kahuna, ka poe i hookau aku ai i ka auamo maluna o lakou e like me ko lakou la mau makemake, a ua kai aku ia lakou e manaoio ma o ka lakou mau mooolelo la, a me ko lakou mau moeuhane, a me ko lakou mau manao wale, a me ko lakou mau hihio, a me ko lakou mau mea pohihihi wahahee, ina aole lakou e hana e like me ka lakou mau olelo, e hoohuhu aku lakou i kekahi mea i ike ole ia, a lakou i olelo mai ai o ke Akua oia; he mea aole i nana ia, aole hoi i ike ia, aole mai kinohi mai, aole hoi ma keia hope aku.

29. Ano, i ka wa a ke kahuna nui a me ka lunakanawai nui i ike ai i ka paakiki o kona naau; he oiaio, ia laua i ike ai e hoino aku no hoi oia i ke Akua, aole laua e pane aku i kana mau olelo; aka kena ae la laua e nakinaki ia oia; a haawi aku la laua ia ia iloko o na lima o na ilamuku, a hoouna aku la ia ia i ka aina o Zarahemela, e hiki ke kai ia oia imua o Alama, a me ka lunakanawai nui, oia no ke kiaaina maluna iho o ka aina a pau.

30. A eia kekahi, ia ia i kai ia ai imua o Alama laua me ka lunakanawai nui, hana mai la no oia ma ke ano hookahi me ia i hana ai ma ka aina o Gideona; he oiaio, kuamuamu iho la no oia.

31. A ku ae la oia iluna me na olelo nui haanou ana imua o Alama, a hoino ku e ae la i na kahuna a me na kumu, e hoohewa ana ia lakou no ke alakai ana aku i na kanaka mamuli o na mooolelo hupo o ko lakou poe kupuna, no ka makemake e hoolealea ma na hana a na kanaka.

32. Ano, i aku la o Alama ia ia, Ke ike nei oe aole makou i hoopiha mai ia makou iho ma na hana a keia poe kanaka; no ka mea hoi, ua hana au mai ka makamua mai o ke au o na lunakanawai, a hiki i keia manawa me koʻu mau lima ponoi, no kuu ola, me koʻu hele ana he nui wale nae a puni ka aina e hai aku i ka olelo a ke Akua i koʻu poe kanaka.

33. A me na hana he nui wale aʻu i hana ai iloko o ka ekalesia, aole loa i loaa iaʻu kekahi senine no kaʻu hana; aole hoi kekahi o koʻu poe hoahanau, ke ole iloko o ka noho hookolokolo; alaila, ua loaa ia makou e like me ko ke kanawai no ko makou manawa.

34. Ano, ina aole i loaa ia makou kekahi mea no na hana a makou iloko o ka ekalesia, heaha la ka pomaikai no makou ke hana iloko o ka ekalesia, ke ole ia e hai aku i ka oiaio, e hiki ia makou ke loaa ka hauoli ana ma ka olioli o ko makou poe hoahanau?

35. No ke aha la oe e olelo mai nei, ke hai olelo aku nei makou i keia poe kanaka i loaa ai ka waiwai, i ka wa au i ike ai nou iho aole i loaa ia makou ka waiwai. A, ano, ke manaoio nei anei oe e hoopunipuni ana makou i keia poe kanaka, i loaa ai ka olioli me neia iloko o ko lakou mau naau?

36. A pane mai la o Korihora ia ia, Ae.

37. Alaila, i aku la o Alama ia ia, Ke manaoio nei anei oe aia he Akua?

38. A i mai la oia, Aole.

39. Ano, i aku la o Alama ia ia, E hoole hou mai anei oe i ke Akua, a e hoole mai hoi i ke Kristo? No ka mea, aia hoi, ke i aku nei au ia oe, ke ike nei au aia no he Akua, a e hiki mai auanei o Kristo.

40. A heaha la kou mea e hoikeike ai aole he Akua, aole hoi e hiki mai ana o Kristo? Ke i aku nei au ia oe, aole ou mea, o kau olelo wale iho no.

41. Aka hoi, iaʻu na mea a pau i hoike no ka oiaio o ua mau mea nei; a ia oe no hoi na mea a pau i hoike ia oe no ka oiaio o ua mau mea nei; a e hoole mai anei oe i ua mau mea la? Ke manaoio nei anei oe he oiaio keia mau mea?

42. Aia hoi, ke ike nei au ua manaoio no oe, aka ua uluhia oe me kahi uhane wahahee, a ua pale ae la oe i ka Uhane o ke Akua i loaa ole ai ia ia kahi e noho ai iloko ou; aka he mana ko ke diabolo maluna ou, a ke kai ae nei oia ia oe i o ia nei, e hana i na mea maalea, e hiki ia ia ke hoopau mai i ka poe keiki a ke Akua.

43. Ano, i mai la o Korihora ia Alama, Ina e hoike mai oe i hoailona iaʻu, i hoomaopopo ia ai au aia no he Akua, he oiaio, e hoike mai oe iaʻu he mana no kona, alaila, e hoomaopopo ia au no ka oiaio o kau mau olelo.

44. Aka, i aku la o Alama ia ia, Ua loaa no ia oe na hoailona a lawa; e hoao aku anei oe i kou Akua? E olelo mai nei anei oe e hoike mai i hoailona iaʻu i ka wa ia oe ka hoikeike o lakou nei a pau kou poe hoahanau, a o ko ka poe kaula hemolele no hoi a pau? Ua waiho ia na palapala hemolele imua ou, he oiaio, a ke hoike mai la na mea a pau aia no he Akua; he oiaio, o ka honua, a me na mea a pau maluna iho o ka ili ona, a me kona kaa ana no hoi; he oiaio, a me na hoku a pau no hoi e hele ana me ka pololei, ke hoike mai la aia no he Mea Hana kiekie loa;

45. A ke hele nei nae oe i o ia nei, e alakai lalau aku ana i na naau o keia poe kanaka, e hoike mai ana ia lakou aohe he Akua? A ke hoole nei nae oe me ke ku e i ua mau hoike nei a pau? A i mai la oia, Ae, e hoole no au, ke ole oe e hoike mai i hoailona iaʻu.

46. Ano, eia kekahi, i aku la o Alama ia ia, Aia hoi, ua eha no au no ka paakiki o kou naau; he oiaio, no kou hoomau ana e hoopale ae i ka Uhane o ka oiaio, i make ai kou uhane.

47. Aka hoi, e aho e make kou uhane, mamua o ka lilo ana ou i mea e kai aku ai i na uhane he nui ilalo i ka make, ma kou wahahee ana a ma kau mau olelo hoomalimali; nolaila, ina e hoole hou mai oe, aia hoi e hahau ae no ke Akua ia oe, i lilo ai oe i aa, i ole ai oe e hoohamama hou aku i kou waha ma ia hope aku, i ole ai oe e hoopunipuni hou aku i ua poe kanaka nei.

48. Ano, i mai la o Korihora ia ia, Aole au e hoole aku nei i ke ola ana i kahi Akua, aka, aole au i manaoio aia he Akua; a ke i aku nei no hoi au ia oe, aole oe i ike aia he Akua; a ke ole oe e hoike mai i hoailona iaʻu, aole au e manaoio.

49. Ano, i aku la o Alama ia ia, O keia kaʻu e haawi aku ai ia oe i hoailona, e hoolilo ia oe i aa, e like me kaʻu mau olelo; a ke i aku nei au, ma ka inoa o ke Akua, e hoolilo ia oe i aa, i ole ai oe e ekemu hou ae.

50. Ano, ia Alama i olelo aku ai i ua mau olelo nei, ua hoolilo ia o Korihora i aa, i hiki ole ia ia ke ekemu ae, e like me na olelo a Alama.

51. Ano, i ka wa a ka lunakanawai nui i ike ai i keia mea, o aku la oia i kona lima a palapala aku la ia Korihora me ka i aku: Ua hoomaopopo ia anei oe no ka mana o ke Akua? Ma owai la oe i makemake ai ia Alama e hoike ae ai i kona hoailona? Ua makemake anei oe ia ia e hoopilikia ae i na mea e ae, e hoike aku ai i hoailona ia oe? Aia hoi, ua hoike aku oia ia oe i hoailona; a, ano, e hoopaakiki hou anei oe?

52. A o mai la o Korihora i kona lima, a palapala iho la, i ka i ana: Ua ike au ua aa wau, no ka mea, ua hiki ole iaʻu ke olelo; a ua ike au aohe kekahi mea, i ole ia ka mana o ke Akua, i hiki ai ke hooili mai i keia mea maluna iho oʻu; a he oiaio, ua ike no hoi au aia he Akua.

53. Aka hoi, ua hoopunipuni mai ke diabolo iaʻu; no ka mea, ikea mai la oia e au ma ke ano o kahi anela, a i mai la iaʻu, E hele aku a e hoohuli ae i keia poe kanaka, no ka mea, ua auwana aku la lakou a pau mamuli o kekahi Akua i ike ole ia. A i mai la oia iaʻu, Aohe he Akua; he oiaio, a ao mai la oia iaʻu i kaʻu mau mea e olelo aku ai. A ao aku au i kana mau olelo; a ua ao aku au ia mau mea, no ka mea, e hoolealea ana ia mau mea i ko ke kino naau; a ao aku la au ia mau mea, a loaa mai iaʻu ka pomaikai nui, a manaoio loa iho la au he oiaio ia mau mea; a no keia mea, ku e aku la au i ka oiaio, a hiki i ka wa aʻu i hooili mai ai i ua poino nui nei maluna iho oʻu.

54. Ano, ia ia i i mai ai i keia, noi mai la oia ia Alama e pule aku i ke Akua i lawe ia aku ai ka poino mai ona aku.

55. Aka, i aku la o Alama ia ia, Ina e lawe ia aku ua poino nei mai ou aku, e alakai lalau hou ae oe i na naau o keia poe kanaka; nolaila, e like auanei ia ia oe, me ko ka Haku makemake.

56. A eia kekahi, aole i kaili ia aku ka poino mailuna aku o Korihora; aka ua hookuke ia oia iwaho, a hele ae la oia ia hale aku ia hale aku, e noi ana i ai nana.

57. Ano, ua hoolaha koke ia ka lono no ka mea i loohia ai ia Korihora, mawaena o ka aina a puni; he oiaio, ua hoouna ia aku ka olelo hoolaha e ka lunakanawai nui, i na kanaka a pau ma ka aina, e kukala ana i ka poe i manaoio i na olelo a Korihora, e mihi lakou e pono ai, o ili mai ia hoopai hookahi maluna iho o lakou.

58. A eia kekahi, ua hoomaopopo ia lakou a pau loa no ka hewa o Korihora; nolaila, hoohuli hou ia lakou i ka Haku; a hoopau iho la keia mea i ka hewa mamuli o ke ano o Korihora. A hele ae la o Korihora mai ia hale aku ia hale aku, e noi ana i ai no kona ola.

59. A eia kekahi, i kona hele ana mawaena o kekahi poe kanaka, he oiaio, mawaena o kekahi poe kanaka, ka poe i hookaawale ai ia lakou iho mai ko Nepai poe ae, a kapa iho la ia lakou iho o ko Zorama poe, i alakai ia e kekahi kanaka o Zorama kona inoa; a ia ia i hele aku ai mawaena o lakou, aia hoi, ua holo ia oia, a hehi ia ilalo, a make loa aku la;

60. A pela kakou e ike nei i ka hope o ka mea e hookapae ana i na aoao o ka Haku; a pela hoi kakou e ike nei aole ke diabolo e kokua i kana poe keiki ma ka la hope, aka, e kauo koke aku ana ia lakou ilalo i gehena.