1. E kaʻu keiki, e haliu mai ka pepeiao i kaʻu mau olelo; no ka mea, ke hoohiki nei au ia oe, ina e malama oe i na kauoha a ke Akua, e hoopomaikai ia auanei oe ma ka aina.

2. Ke makemake nei au e hana oe me aʻu i hana ai i ka hoomanao ana i ka noho pio ana o ko kakou poe makua; no ka mea, iloko lakou o ka noho luhi ana, a ua hiki ole i kekahi mea ke hoopakele mai ia lakou ke ole ia ke Akua o Aberahama, a o ke Akua o Isaaka, a o ke Akua o Iakoba; a hoopakele io mai la oia ia lakou i ko lakou mau pilikia.

3. Ano, e kaʻu keiki, e Helamana, aia hoi, ma kou wa kamalii oe, a nolaila ke noi aku nei au ia oe e hoolohe mai i kaʻu mau olelo, a e ao ia e au; no ka mea, ua ike no au o ka poe e hilinai aku ana i ke Akua, e kokua ia no lakou iloko o na hoao ia ana o lakou, a me na pilikia o lakou, a me na ehaeha o lakou, a e hookiekie ia iluna auanei ma ka la hope;

4. A, aole oʻu makemake e manao oe ua ike au noʻu iho mamuli o ko ke kino, aka mamuli o ko ka uhane; aole mamuli o ka naau kino, aka o ke Akua.

5. Ano, hoi, ke i aku nei au ia oe, ina ua hoohanau ole ia au e ke Akua, ina ua ike ole au i ua mau mea nei; aka, ua hoike mai ke Akua, ma ka waha o kona anela hemolele, i ua mau mea nei iaʻu, aole no kekahi pono noʻu iho,

6. No ka mea, haalele ae la au me na keikikane a Mosia, e imi ana e hoohiolo aku i ka ekalesia o ke Akua; aka hoi, hoouna mai la ke Akua i kona anela hemolele e keakea mai ia makou ma ke ala.

7. A, aia hoi, olelo mai la oia ia makou, me he mea la he leo o ka hekili ia, a haalulu iho la ka honua a pau malalo iho o ko makou mau kapuai, a hina iho la makou a pau i ka honua, no ka mea, hiki mai la ka makau o ka Haku maluna iho o makou.

8. Aka hoi, i mai la ka leo iaʻu, E ala ae. A ala ae la au a ku iluna, a ike aku la i ka anela.

9. A i mai la oia iaʻu, Ina paha e makemake ana oe i ka make nou iho, mai imi hou ma neia hope aku e hoohiolo aku i ka ekalesia o ke Akua.

10. A eia kekahi, hina iho la au i ka honua; a no na la ekolu a me na po ekolu, ua hiki ole iaʻu ke hoohamama i kuu waha; aole hoi i hiki iaʻu ke hoonioni i na lala oʻu.

11. A olelo mai la ka anela iaʻu i na mea e ae, i lohea e koʻu mau hoahanau, aka aole au i lohe ia mau mea; no ka mea, iaʻu i lohe ai i na olelo, Ina paha e makemake ana oe i ka make nou iho, mai imi hou e hoohiolo aku i ka ekalesia o ke Akua, ua loohia au me ka eehia a pihoihoi, o hoopoino ia mai paha au, a haule iho la au i ka honua, a lohe hou ole aku la au;

12. Aka ua hoowalania ia iho au me ka ehaeha mau loa, no ka mea, ua hakukoi nui loa koʻu uhane, a hoowalania ia me koʻu mau hewa a pau.

13. He oiaio, hoomanao iho la au i koʻu mau hala a hana ino a pau, no keia mau mea ua hoomainoino ia au me na eha o gehena; he oiaio, ike iho la au ua kipi aku au i kuu Akua, a ua malama ole au i kana mau kauoha hemolele;

14. He oiaio, a ua pepehi loa au i na keiki he nui ana, a he oiaio, ua alakai lalau aku au ia lakou i ka make; he oiaio, a no ka nui o kaʻu mau hana ino, o ka manao wale ana i ke komo ana ma ke alo o koʻu Akua, he mea ia i hoowalania iho ai i koʻu uhane me ka weliweli hiki ole ke hai ia aku.

15. Manao iho la au, ina ua hiki au ke kipaku ia mai a lilo i mea ole, o ka uhane a me ke kino pu, i ole au e kai ia aku e ku ma ke alo o koʻu Akua, e hookolokolo ia no kaʻu mau hana.

16. Ano, no na la ekolu a me na po ekolu wau i hoowalania ia mai ai au, me na eha o kahi uhane poino loa.

17. A eia kekahi, i ka wa aʻu i hoowalania ia mai ai me ka ehaeha, oiai au i hoohakukoi ia mai ai ma ka hoomanao i koʻu mau hala he nui loa, aia hoi, hoomanao iho la no hoi au i ka hoolohe ana oʻu i koʻu makuakane i wanana aku ai i na kanaka, no ka hiki ana mai o kahi Iesu Kristo, ke Keiki a ke Akua, e panai ai no na hala o ko ke ao nei.

18. Ano, i ka hopu ana o koʻu naau i ua manao nei, hea aku la au iloko o koʻu naau, E Iesu, e ke Keiki a ke Akua, e aloha mai iaʻu, ka mea iloko o ke au o ka awaawa, a i hoopuni ia a puni me na kaula mau loa o ka make.

19. Ano hoi, iaʻu i manao ai i keia, ua hiki ole iaʻu ke hoomanao hou aku i koʻu mau eha; he oiaio, ua hoowalania hou ole ia au e ka hoomanao ana i koʻu mau hala.

20. A nani wale ka olioli a me ka malamalama kupaianaha aʻu i ike ai; he oiaio, ua hoopiha ia koʻu uhane me ka olioli e oi aku ana e like me koʻu eha i oi aku ai;

21. He oiaio, ke i aku nei au ia oe, e kaʻu keiki, aole loa he mea e like ai ka eha a me ka awaawa, me koʻu mau eha. He oiaio, a ke i hou aku nei au ia oe, e kaʻu keiki, ma kekahi aoao, aole loa he mea e like ai ka maikai a me ke ono loa, me koʻu olioli;

22. He oiaio, manao au ua ike au me ko ko kakou kupunakane o Lehi i ike ai, i ke Akua e noho ana maluna iho o kona nohoalii, i hoopuni ia me ka poe anela he lehulehu i hiki ole ke helu ia, e himeni ana a e hiilani ana i ko lakou Akua; he oiaio, a iini nui iho la koʻu uhane e hiki ilaila.

23. Aka hoi, loaa hou iho la i koʻu mau lala ko lakou ikaika, a ku ae la wau ma koʻu mau wawae, a hoike aku la i na kanaka ua hoohanau ia mai au e ke Akua;

24. He oiaio, a mai ia manawa mai a hiki i keia wa, ua hana aku au me ka hooki ole, i hiki iaʻu ke kai mai i na uhane i ka mihi; i hiki iaʻu ke kai mai ia lakou e hoao i ka olioli nui loa aʻu i hoao ai; i hiki ia lakou no hoi ke hoohanau ia e ke Akua, a ke hoopiha ia me ka Uhane Hemolele.

25. Ano, aia hoi, e kaʻu keiki, ke haawi mai nei ka Haku iaʻu i ka olioli nui loa i na hua o kaʻu hana ana;

26. No ka mea, no ka olelo ana i haawi mai ai iaʻu, aia hoi, he nui no ka poe i hoohanau ia e ke Akua, a ua hoao aku me aʻu i hoao aku ai, a ua alikealike ko lakou ike ana, me aʻu i ike ai; nolaila, ke ike la lakou no ua mau mea nei aʻu i olelo iho ai, me aʻu i ike ai; a o ka ike i loaa ai iaʻu no ke Akua ia.

27. A ua kokua ia mai au malalo iho o na hoao ia ana a me na pilikia o kela ano keia ano, he oiaio, a iloko o na eha a pau he nui wale; he oiaio, ua hoopakele mai ke Akua iaʻu mai ka halepaahao mai, a mai na mea paa, a mai ka make mai; he oiaio, a ke paulele nei au ia ia, a e hoopakele no oia iaʻu i keia manawa;

28. A ua ike au e hookiekie mai no oia iaʻu i keia manawa; a ua ike au e hookiiekie mai no oia iaʻu ma ka la hope, e noho pu me ia ma ka nani; he oiaio, a e hoolea aku no au ia ia no ka wa pau ole, no ka mea, ua lawe mai la oia i ko kakou poe kupuna mailoko mai o Aigupita, a ua ale oia i ko Aigupita iloko o ke Kai Ula; a alakai mai la oia ia lakou ma kona mana iloko o ka aina i olelo mua ia ai; he oiaio, ua hoopakele mai la oia ia lakou mailoko mai o ka luhi a me ka noho pio ana, ia manawa aku ia manawa aku;

29. He oiaio, a ua lawe mai la no hoi oia i ko kakou poe kupuna mailoko mai o ka aina o Ierusalema; a ua hoopakele mai no hoi oia ia lakou ma kona mana mau loa, mailoko mai o ka luhi a me ka noho pio ana, ia manawa aku ia manawa aku a hiki i keia la; a ua hoomanao mau au i ko lakou noho pio ana; he oiaio, a he mea e pono ai nou no hoi e hoomanao mau, me aʻu i hoomanao ai i ko lakou noho pio ana.

30. Aka hoi, e kaʻu keiki, aole o keia wale no; no ka mea, he mea e pono ai nou e ike, me aʻu e ike nei, ina e malama oe i na kauoha a ke Akua, e hoopomaikai ia auanei oe ma ka aina; a he mea e pono ai nou ke ike no hoi, ina aole oe e malama i na kauoha a ke Akua, e hooki ia aku auanei oe mai kona alo aku. Ano, ua ku keia i kana olelo.