1. Ano, eia kekahi, hoomaka ae la o Alama e hai aku i ka olelo a ke Akua i na kanaka, ka mua i ka aina o Zarahemela, a mailaila aku mawaena o ka aina a pau.

2. Ano, eia na olelo ana i olelo aku ai i na kanaka iloko o ka ekalesia i kukulu ia ma ke kulanakauhale o Zarahemela, e like me kona mooolelo ponoi, i ka i ana:

3. Owau o Alama, ua hoolaa ia mai au e koʻu makuakane o Alama i kahuna nui maluna iho o ka ekalesia o ke Akua, ia ia ka mana a me ka pono mai ke Akua mai e hana i keia mau mea, aia hoi, ke i aku nei au ia oukou, ua hoomaka ae la oia e kukulu i ekalesia ma ka aina e kokoke ana i na palena o Nepai; he oiaio, o ka aina i kapa ia ka aina o Moramona; he oiaio, a bapetizo iho la oia i kona poe hoahanau iloko o na wai o Moramona.

4. Aia hoi, ke i aku nei au ia oukou, ua hoopakele ia mai lakou mailoko mai o na lima o ka poe kanaka o Noa ke alii, ma ka lokomaikai a me ka mana o ke Akua.

5. A, aia hoi, mahope mai o ia mea, ua lawe ia mai lakou iloko o ka noho luhi ana e ko Lamana poe, iloko o ka waonahele; he oiaio, ke i aku nei au ia oukou, iloko o ka noho pio ana lakou a hoopakele hou mai la ka Haku ia lakou mailoko mai o ka noho pio ana ma ka mana o kana olelo; a lawe ia mai la kakou iloko o keia aina, a maanei kakou i hoomaka ai e kukulu iho i ka ekalesia o ke Akua mawaena hoi o keia aina.

6. Ano hoi, ke i aku nei au ia oukou, e oʻu poe hoahanau, ka poe noloko o keia ekalesia, ua hoomanao pono anei oukou i ka noho pio ana o ko oukou poe makua? He oiaio, a ua hoomanao pono anei oukou i kona aloha a hoomanawanui mai ia lakou? A eia hoi, ua hoomanao pono anei oukou, ua hoopakele ae la oia i ko lakou poe uhane mai gehena aku?

7. Aia hoi, hoololi mai la oia i ko lakou mau naau; he oiaio, hoala mai la oia ia lakou mai ka hiamoe loa ae, a ala ae la lakou i ke Akua. Aia hoi, mawaena o ka pouli lakou; aka hoi, ua hoomalamalama ia mai la ko lakou mau naau ma ka malamalama o kana olelo mau loa; he oiaio, ua hoopuni ia lakou i na apo o ka make a me na kaulahao o ka po, a e kali ana ka make mau loa ia lakou.

8. Ano, ke ninau nei au ia oukou, e oʻu poe hoahanau, ua luku ia anei lakou? Ke i aku nei au ia oukou, Aole, aole lakou i luku ia.

9. A ke ninau hou nei au, ua uhai ia anei na apo o ka make, a o na kaulahao o ka po a lakou i hoopuni ia ai, ua hookuu ia mai anei ia mau mea? Ke i aku nei au ia oukou, ae, ua hookuu ia mai, a hooakea ia na uhane o lakou, a memele aku la lakou i ke aloha hoolapanai. A ke i aku nei au ia oukou, ua hoola ia lakou.

10. Ano, ke ninau nei au ia oukou, ma na hana hea lakou i hoola ia ai? He oiaio, heaha ko lakou mau kumu i lana ai ka manao no ke ola? Heaha la ke kumu o ko lakou hookuu ia ana mai na apo ae o ka make? He oiaio, a o na kaulahao no hoi o ka po?

11. Aia hoi, ua hiki iaʻu ke hai aku ia oukou, aole anei koʻu makuakane o Alama i manaoio i na olelo i hai ia mai ma ka waha o Abinadi? A, aole anei oia he kaula hemolele? Aole anei oia i olelo mai i na olelo a ke Akua, a i manaoio hoi koʻu makuakane o Alama ia mau mea?

12. A e like me kona manaoio pela i hana ia ai he hoololi mana loa ma kona naau. Aia hoi, ke i aku nei au ia oukou, he oiaio iho ua mau mea nei a pau.

13. Aia hoi, hai aku la oia i ka olelo i ko oukou poe makua, a ua hana ia he hoololi mana loa no hoi ma ko lakou mau naau; a hoohaahaa iho la lakou ia lakou iho, a paulele aku la lakou i ke Akua oiaio a ola. Aia hoi, ua onipaa iho la lakou a hiki aku i ka hopena; nolaila, ua hoola ia ai lakou.

14. Ano hoi, ke ninau nei au ia oukou, e oʻu poe hoahanau o ka ekalesia, ua hoohanau ia anei oukou ma ka uhane e ke Akua? Ua loaa anei ia oukou kona ano like ma ko oukou maka? Ua loaa anei ia oukou ua hoololi loa nei ma ko oukou mau naau?

15. Ke hana nei anei oukou me ka manaoio ma ka hoolapanai ana o ka mea nana oukou i hana mai? Ke nana aku nei anei oukou imua me ka maka o ka manaoio, a e ike i keia kino make e hoala ia mai i ka make ole, a o keia palaho e hoala ia mai i ka palaho ole, e ku iho imua o ke Akua, e hookolokolo ia e like me na hana i hana ia ma ua kino make nei?

16. Ke i aku nei au ia oukou, ua hiki anei ia oukou ke manao wale e hoolohe ana oukou i ka leo o ka Haku, i ka i ana ia oukou, ma ia la, E hele mai oukou ioʻu nei, e ka poe i hoomaikai ia, no ka mea, aia hoi, o ka oukou mau hana o na hana ia o ka pono maluna iho o ka ili o ka honua?

17. A i ole ia, ke manao wale nei anei oukou ua hiki ia oukou ke wahahee aku i ka Haku ma ua la la, a e i aku, E ka Haku, o ka makou mau hana he mau hana pono ia mau mea maluna iho o ka ili o ka honua, a e hoola mai auanei oia ia oukou?

18. A i ole ia, ua hiki anei ia oukou ke manao wale ua lawe ia oukou imua o kahi hookolokolo o ke Akua, me ko oukou mau naau i piha i ka hala a me ka walania; me ka hoomanao i ka oukou mau hala a pau; he oiaio, me ka hoomanao loa i ko oukou mau hewa a pau; he oiaio, me ka hoomanao ua aa aku e ku e i na kanawai o ke Akua?

19. Ke i aku nei au ia oukou, e hiki anei ia oukou ke nana iluna i ke Akua ma ia la, me ka naau maemae a me na lima lepo ole? Ke i aku nei au ia oukou, e hiki anei ia oukou ke nana iluna, me ke ano like o ke Akua i kahakaha ia ma ko oukou maka?

20. Ke i aku nei au ia oukou, e hiki anei ia oukou ke manao e hoola ia oukou, ia oukou i ae aku ai e lilo i poe kauwa na ke diabolo?

21. Ke i aku nei au ia oukou, e ike oukou ma ia la, aole e hiki ia oukou ke hoola ia; no ka mea, aole e hiki i kekahi kanaka ke hoola ia ke ole kona mau aahu i holoi ia a keokeo: he oiaio, e huikala ia no kona mau aahu, a, hoomaemae ia aku ia mau mea mai na kohu mai a pau, ma o ke koko la o ka mea i olelo ia e ko kakou poe kupuna, ka mea e hele mai a e hoolapanai mai i kona poe kanaka mai ko lakou mau hewa ae.

22. Ano, ke ninau nei au ia oukou, e oʻu poe hoahanau, pehea la auanei ka manao o kekahi poe o oukou, ina e ku auanei oukou imua o kahi hookolokolo o ke Akua, me ko oukou mau aahu i kohu ia me ke koko, a me ka paumaele o na ano a pau? Aia hoi, heaha ka keia mau mea e hoike ku e mai ai ia oukou?

23. Aia hoi, aole anei ua mau mea nei e hoike mai he poe pepehi kanaka oukou, he oiaio, a he poe hewa no hoi oukou ma na hewa o na ano a pau?

24. Aia hoi, e koʻu poe hoahanau, ke kuhi nei anei oukou e hiki i kekahi mea me neia ke loaa kahi e noho ai iloko o ke aupuni o ke Akua, me Aberahama, me Isaaka, a me Iakoba, a me na kaula hemolele a pau, ka poe no lakou na aahu i huikala ia, a i kina ole, a maemae a keokeo?

25. Ke i aku nei au ia oukou, aole, ke ole oukou e hoolilo ae i ko kakou Mea nana kakou i hana i mea wahahee mai kinohi mai, a kuhi paha he mea wahahee oia mai kinohi mai, aole e hiki ia oukou ke kuhi e hiki i kekahi mea me neia ke loaa ke kau wahi iloko o ke aupuni o ka lani, aka, e kiola ia aku lakou no ka mea, o lakou no na keiki o ke aupuni o ke diabolo.

26. Ano hoi, ke i aku nei au ia oukou, e oʻu poe hoahanau, ina ua loaa ia oukou kekahi ano e o ka naau, a ina manao oukou e memele aku i ka mele o ke aloha hoolapanai, ke makemake nei au e ninau, e hiki anei ia oukou ke manao pela ano?

27. Ua hele anei oukou, e malama ana ia oukou iho me ka hewa ole imua o ke Akua? Ua hiki anei ia oukou ke olelo, iloko o oukou iho, ina ua kahea ia mai oukou e make i keia manawa, ua haahaa pono oukou? A ua hoomaemae ia no hoi ko oukou mau aahu a hoolilo ia i keokeo, ma o ke koko la o Kristo, ka mea e hele mai e hooalapanai mai i kona poe kanaka mai ko lakou mau hewa ae?

28. Aia hoi, ua nele anei oukou i ka haaheo? Ke i aku nei au ia oukou, i ole pela, aole oukou makaukau e halawai pu me ke Akua. Aia hoi, e hoomakaukau koke oukou, no ka mea, ua kokoke mai no ke aupuni o ka lani, aole hoi no kekahi mea me neia ke ola mau loa.

29. Aia hoi, ke i aku nei au, aia mawaena o oukou anei kekahi mea i haalele ole i ka paonioni? Ke i aku nei au ia oukou, aole i makaukau kekahi mea me neia, a ke makemake nei au e hoomakaukau koke oia, no ka mea, ua kokoke mai ka hora, aole oia i ike i ka manawa e hiki mai ai ka hora; no ka mea, aole e loaa kekahi mea me neia me ka hewa ole.

30. A eia hou kaʻu e i aku nei ia oukou, aia mawaena o oukou anei kekahi mea nana i hoolilo ae i kona hoahanau i mea e hoomaewaewa ia ai, a e hooili ana paha maluna ona i ka hoomaau ana?

31. Auwe kekahi mea me neia, no ka mea, aole oia i makaukau, a ua kokoke mai ka manawa e mihi oia e pono ai, i ole, aole e hiki ia ia ke hoola ia;

32. He oiaio, auwe oukou a pau ka poe e hana ana i ka hewa; e mihi, e mihi, no ka mea, ua olelo mai la ka Haku ke Akua ia mea.

33. Aia, ke hoouna mai la oia i olelo kono i na kanaka a pau; no ka mea, ua o ia na lima o ke aloha ia lakou, a ke i ma la oia, E mihi, a e hookipa no au ia oukou;

34. He oiaio, ke i mai la oia, E hele mai ioʻu nei, a e ai no oukou i ka hua o ka laau o ke ola; he oiaio e ai a e inu no oukou i ka berena a me na wai o ke ola me ke alalai ole ia;

35. He oiaio, e hele mai ioʻu nei a e hoohua mai i na hana o ka pono, a, aole oukou e kua ia ilalo a e kiola ia aku iloko o ke ahi;

36. No ka mea, aia hoi, ua kokoke mai ka manawa, o ka mea i hoohua ole mai i na hua pono, a o ka mea i hana ole i na hana o ka pono, he kumu kona e uwe ai a e kanikau ai.

37. E, auhea oukou ka poe e hana nei i ka hewa; ka poe i haakei ma na mea lapuwale o ko ke ao nei; ka poe i olelo ua ike oukou i na ala o ka pono; aka hoi, ua hele hewa nae, me he hipa la me ke kahu ole, ua kahea nae he kahuhipa ia oukou, a e kahea ana i keia manawa ia oukou, aka aole oukou e hoolohe i kona leo.

38. Aia hoi, ke i aku nei au ia oukou, ke kahea mai nei ke kahuhipa maikai ia oukou; he oiaio, ma kona inoa iho oia e kahea nei ia oukou, oia no ka inoa o Kristo; a ina aole oukou e hoolohe mai i ka leo o ke kahuhipa maikai, i ka inoa a oukou i kahea ia mai ai, aia hoi, ina no aole oukou na hipa o ke kahuhipa maikai.

39. Ano, ina aole oukou na hipa o ke kahuhipa maikai, no ka pa hea oukou? Aia hoi, ke i aku nei au ia oukou, o ke diabolo no ko oukou kahuhipa, a no kona pa oukou; ano, owai la ka mea e hiki ia ia ke hoole mai i keia? Aia hoi, ke i aku nei au ia oukou, o ka mea e hoole mai ana i keia, he mea wahahee a he keiki o ke diabolo oia;

40. No ka mea, ke i aku nei au ia oukou, o kela mea maikai keia mea maikai, mai ke Akua mai ia, a o kela mea ino keia mea ino, mai ke diabolo mai ia;

41. Nolaila, ea, ina e hoohua mai ana ke kanaka i na hana maikai, e hoolohe ana oia i ka leo o ke kahuhipa maikai, a e hahai ana oia ia ia; aka, o ka mea e hoohua mai ana i na hua ino, oia ka i lilo i keiki na ke diabolo; no ka mea, e hoolohe ana oia i kona leo, a e hahai ana ia ia.

42. A o ka mea nana e hana i keia, he pono ke loaa kona uku mai ona mai; nolaila, no kona uku, e loaa ana ia ia ka make, ma na mea e pili ana i ka pono, oiai ua make oia ma na hana maikai a pau.

43. Ano, e oʻu poe hoahanau, ke makemake nei au e hoolohe mai oukou iaʻu, no ka mea, ke olelo aku nei au ma ka ikaika o koʻu uhane; no ka mea, ua olelo moakaka aku au ia oukou, i hiki ole ai ia oukou ke kuhihewa, a ua olelo aku e like me na kanawai o ke Akua.

44. No ka mea, ua kahea ia mai au e olelo aku mamuli o keia ano, e like me ka aoao hemolele o ke Akua, aia no iloko o Kristo Iesu; he oiaio, ua kauoha ia mai au e ku a e hoike aku i keia poe kanaka, i na mea i olelo ia e ko kakou poe kupuna, no na mea e hiki mai ana.

45. Aole o keia wale no. Aole anei oukou i manao ua ike au i ua mau mea nei noʻu iho? Aia hoi, ke hoike aku nei au ia oukou, ua ike au he oiaio keia mau mea aʻu i olelo aku ai. A pehea la oukou i manao ai ua ike au i ka oiaio o ua mau mea nei?

46. Aia hoi, ke i aku nei au ia oukou, ua hoike ia mai ia mau mea iaʻu ma ka Uhane Hemolele o ke Akua. Aia hoi, ua hookeai au a pule aku la i na la he nui, i ike ai au i ua mau mea nei noʻu iho. A, ano, ke ike nei au noʻu iho he oiaio ia mau mea; no ka mea, ua hoike mai la ka Haku ke Akua ia mau mea iaʻu ma kona Uhane Hemolele; a oia no ka Uhane o ka hoikeana iloko oʻu.

47. A eia hoi, ke i aku nei au ia oukou, e like me ia i hoike ia mai ai iaʻu, ua oiaio na olelo i olelo ia e ko kakou poe kupuna, pela io no e like me ka Uhane o ka wanana iloko oʻu, oia no hoi ma ka hoike ana o ka Uhane o ke Akua.

48. Ke i aku nei au ia oukou, ua ike au noʻu iho o ka mea aʻu e olelo aku ai ia oukou no na mea e hiki mai ana, ua oiaio ia; a ke i aku nei au ia oukou, ua ike au e hele mai ana no o Iesu Kristo; he oiaio, o ke Keiki, ka hanau-kahi a ka Makua, piha me ka lokomaikai, a me ke aloha, a me ka oiaio. A, aia hoi, oia no ka mea e hele mai ana e lawe aku i na hala o ko ke ao nei; he oiaio, i na hala o kela kanaka keia kanaka ke manaoio naueue ole ma kona inoa.

49. Ano, ke i aku nei au ia oukou, oia no ka aoao mamuli ona i kahea ia ai au; he oiaio, e hai aku i koʻu poe hoahanau i aloha ia; a i kela mea i keia mea hoi e noho ana ma ka aina; he oiaio, e hai aku i na mea a pau loa, i ka poe kahiko a i ka poe opiopio no hoi, i ka poe paa a i ka poe paa ole no hoi; he oiaio, ke i aku nei au ia oukou, e ka poe kahiko, a me ka poe oo hoi, a me ka hanauna e ea mai ana; he oiaio, e kahea aku ia lakou e mihi a e hanau hou ia lakou e pono ai;

50. He oiaio no, penei wahi a ka Uhane, E mihi oukou, e ko na welau a pau o ka honua, no ka mea, ua kokoke mai ke aupuni o ka lani; he oiaio, ke hele mai la ke Keiki a ke Akua ma kona nani, ma kona ikaika, hanohano, mana a noho alii ana. He oiaio, e koʻu poe hoahanau, ke i aku nei au ia oukou, e i mai ana ka Uhane, E nana aku i ka nani o ke alii o ka honua a pau; a e alohilohi koke mai no hoi ke Alii o ka lani mawaena o na keiki a pau a kanaka;

51. A ke i mai nei no hoi ka Uhane iaʻu, he oiaio, ke kahea mai nei iaʻu me ka leo mana, i ka i ana, E hele aku a e olelo aku i keia poe kanaka, E mihi, no ka mea, ke ole oukou e mihi, aole loa e hiki ia oukou ke loaa ke aupuni o ka lani.

52. A eia hou kaʻu e i aku nei ia oukou, ke i mai la ka Uhane, Aia hoi, ke waiho nei ke koi lipi ma ke kumu o ka laau; nolaila, o kela laau a o keia laau e hua ole mai ana i ka hua maikai, e kua ia ia ilalo, a e kiola ia aku iloko o ke ahi; he oiaio, he ahi e hiki ole ke hoopau ia; a he ahi pio ole. Aia hoi, e hoomanao, ua olelo mai ka Mea Hemolele ia mea.

53. Ano, e oʻu poe hoahanau, ke i aku nei au ia oukou, e hiki anei ia oukou ke ku e mai i ua mau mea nei, he oiaio, e hiki anei ia oukou ke waiho wale i keia mau mea, a e hehi aku i ka Mea Hemolele malalo iho o ko oukou mau wawae; he oiaio, e hiki anei ia oukou ke haakei ia ma ka haaheo o ko oukou naau; he oiaio, e hoomau anei ma ke komo ana i ke kapa kumukuai nui, a e kau ana i ko oukou mau naau maluna o na mea lapuwale o ke ao nei, maluna iho o ko oukou waiwai;

54. He oiaio, e hoomau anei oukou ma ka manao ana ua maikai ae kekahi mamua o kekahi; he oiaio, e hoomau anei oukou ma ka hoomaau ana i ko oukou poe hoahanau, ka poe i hoohaahaa ia lakou iho, a i hele mamuli o ka aoao hemolele o ke Akua, ma o ua mea la lakou i lawe ia mai ai iloko o keia ekalesia, hoomaemae ia e ka Uhane Hemolele; a ke hoohua mai nei lakou i na hana i ku i ka mihi;

55. He oiaio, a e hoomau anei oukou ma ka huli ana ae i ko oukou mau kua i ka poe hune, a me ka poe nele, a ma ka aua ana i ko oukou waiwai mai o lakou ae?

56. A eia ka mea hope, e ka poe a pau e hoomau ana ma ka oukou hana hewa ana, ke i aku nei au ia oukou, o ua poe nei no ka poe e kua ia ilalo a e kiola ia iloko o ke ahi, ke ole lakou e mihi koke.

57. Ano, ke i aku nei au ia oukou, e ka poe a pau e makemake ana e hahai mai i ka leo o ke kahuhipa maikai, e puka mai oukou mai ka poe hewa mai, a e kaawale a ae oukou, a, aole hoopa aku i ko lakou mau mea haumia; a, aia hoi, e holoi ia auanei ko lakou mau inoa, i helu pu ole ia na inoa o ka poe hewa me na inoa o ka poe pono, i ko ai ka olelo a ke Akua, i ka i ana, E hui pu ole ia na inoa o ka poe hewa me na inoa o koʻu poe kanaka.

58. No ka mea, e palapala ia na inoa o ka poe pono iloko o ka buke o ke ola; a ia lakou wau e haawi aku ai i hooilina ma koʻu lima akau. Ano, e koʻu poe hoahanau, heaha la ka oukou e olelo ku e mai ai i keia? Ke i aku nei au ia oukou, ina e olelo ku e mai oukou i keia, he mea ole ia, no ka mea, e hooko ia no ka olelo a ke Akua.

59. No ka mea, owai la ke kahuhipa mawaena o oukou nona na hipa he nui wale, i kiai ole ai ia lakou, i komo ole na ilio hae a e ai i kona pua? A, aia hoi, ina e komo kahi ilio hae iloko o kona pua, aole anei oia i kipaku aku ia ia iwaho? He oiaio, a mahope, ina e hiki ia ia, e pepehi aku no oia ia ia.

60. Ano, ke i aku nei au ia oukou, ke kahea mai nei ke kahuhipa maikai ia oukou; a ina e hoolohe oukou i kona leo, nana no e lawe mai ia oukou iloko o kona pa, a o kona poe hipa no oukou; a ke kauoha mai nei oia ia oukou aole oukou e ae aku i kahi ilio hae e komo mawaena o oukou, i make ole ai oukou.

61. Ano, ke kauoha aku nei owau, o Alama, ia oukou ma ka olelo a ka mea nana au i kauoha mai, e malama oukou e hana i na olelo aʻu i olelo aku nei ia oukou.

62. Ke olelo aku nei au ma ke ano he kauoha ia oukou, ka poe i hui ia mai me ka ekalesia; a i ka poe i hui ole ia me ka ekalesia, ke olelo aku nei au ma ke kono, i ka i ana, e hele mai a e bapetizo ia i ka mihi, i lilo oukou i poe hoaai pu hoi i ka hua o ka laau o ke ola.