1. A eia kekahi, ma ka hoomaka ana o ka makahiki elima o ko lakou au, hoomaka ae la kekahi paio mawaena o na kanaka, no kekahi kanaka, i kapa ia o Amaliki; a he kanaka maalea loa oia, he oiaio, he kanaka naauao, ma ka naauao o ko ke ao nei; mamuli no oia o ka aoao o ke kanaka nana i pepehi ia Gideona ma ka pahikaua, ka mea hoi i hoopai ia e like me ko ke kanawai.

2. Ano, ua hoohuli ae la ua Amaliki nei, ma o kona maalea la, i na kanaka he nui wale mamuli ona; a no ka nui loa i hoomaka ai lakou e lilo i ikaika loa; a hoomaka ae la lakou e hooikaika e hoonoho aku ia Amaliki i alii maluna iho o na kanaka.

3. Ano, he mea keia e makau ai na kanaka o ka ekalesia, a ka poe no hoi i alakai ole ia ai mamuli o na olelo hoohuli a Amaliki; no ka mea, ua ike lakou mamuli o ko lakou kanawai he pono ke hooholo ia na mea me neia ma ka leo o kanaka;

4. Nolaila, ina he mea hiki ia Amaliki ke loaa ka leo o na kanaka, a he kanaka hewa no ia, e hoonele mai no oia ia lakou i ko lakou mau mea i pono ai a i pomaikai ai hoi o ka ekalesia, a ia mea aku ia mea aku, no ka mea, o kona manao no ia e hoopau mai i ka ekalesia o ke Akua.

5. A eia kekahi, houluulu mai la na kanaka ia lakou iho mawaena o ka aina a pau, o kela mea keia mea e like me kona manao, ina paha no Amaliki, ina paha ku e ia ia, ma na aha okoa, ma ka hoopaapaa nui a me na paio kupanaha kekahi me kekahi;

6. A pela lakou i houluulu ai ia lakou iho, e koho aku no ua mau mea nei; a ua waiho ia mai imua o na lunakanawai.

7. A eia kekahi, hiki mai la ka leo o na kanaka e ku e ana ia Amaliki, i ole ai oia e lilo i alii maluna iho o na kanaka.

8. Ano, he mea keia i kupu mai ai ka hauoli nui iloko o na naau o ka poe i ku e ia ia; aka hookonokono ae la o Amaliki i ka poe i makemake ia ia, e huhu aku i ka poe i makemake ole ia ia.

9. A eia kekahi, houluulu aku la lakou ia lakou iho, a hoolaa iho la ia Amaliki i alii no lakou.

10. Ano, ia Amaliki i lilo ai i alii maluna iho o lakou, kena aku la oia e lalau aku lakou i na mea kaua e ku e i ko lakou poe hoahanau; a hana iho la oia i keia, e hiki ia ia ke hookauwa mai ia lakou nana.

11. Ano, ua hookoa ia ka poe kanaka o Amaliki ma ka inoa o Amaliki, i kapa ia ai ko Amaliki poe; a o ka poe i koe ua kapa ia ko Nepai poe, a o ko ke Akua poe kanaka;

12. Nolaila, ua ike ko Nepai poe i ka makemake o ko Amaliki, a nolaila, hoomakaukau lakou e halawai pu me lakou la; he oiaio, kahiko mai la lakou ia lakou iho me na pahikaua, a me na pahikaua pokole, a me na kakaka, a me na pua, a me na ala, a me na maa, a me na mea kaua a pau, o kela ano o keia ano;

13. A pela lakou i hoomakaukau ia ai e halawai me ko Amaliki i ka manawa a lakou e hiki mai ai. A ua wae ia na kapena, a me na kapena kiekie ae, a me na kapena kiekie loa, e like me ko lakou helu.

14. Eia kekahi, kahiko iho la o Amaliki i kona poe kanaka me na mea kaua a pau, o kela ano o keia ano; a wae iho la no hoi oia i na luna a me na alihi kaua maluna o kona poe kanaka, e alakai ia lakou e kaua i ko lakou poe hoahanau.

15. A eia kekahi, hiki mai la ko Amaliki poe maluna o ka puu Amanihu, aia no ma ka hikina o ka muliwai o Sidona, e kahe ana ma ka aina o Zarahemela, a malaila lakou i hoomaka ai e kaua me ko Nepai poe.

16. Ano, o Alama no ka lunakanawai nui, a kiaaina hoi no ka poe kanaka o Nepai, nolaila pii pu aku la oia me kona poe kanaka, he oiaio, me kona poe kapena, a poe kapena nui hoi, he oiaio, ma ke alo o kona poe kaua i ko Amaliki poe e kaua;

17. A hoomaka ae la lakou e hoouka aku i ko Amaliki poe maluna o ka puu ma ka hikina o Sidona. A paio mai la ko Amaliki poe me ko Nepai poe me ka ikaika nui, a haule iho la he nui wale o ko Nepai poe imua o ko Amaliki;

18. Aka hoi, hooikaika mai la ka Haku i ka lima o ko Nepai poe, a luku aku la lakou i ko Amaliki poe me ka luku nui, a hoomaka ae la lakou e hee aku imua o lakou nei.

19. Eia kekahi, alualu aku la ko Nepai poe i ko Amaliki a pau ae la kela la, a luku aku la ia lakou me ka luku nui, a pepehi ia aku la o ko Amaliki, he umikumamalua tausani elima haneri kanakolukumamalua; a ua pepehi ia mai la o ko Nepai poe, eono tausani elima haneri kanaonokumamalua.

20. A eia kekahi, ia Alama i hiki ole ai ke alualu hou aku i ko Amaliki, kauoha ae la oia i kona poe kanaka e kukulu iho i na halelewa o lakou, ma ke awawa o Gideona, ua kapa ia ke awawa mamuli o ua Gideona la i pepehi ia ai ma ka lima o Nehora me ka pahikaua; a maloko o ua awawa nei ko Nepai poe i kukulu ai i na halelewa o lakou no ka po.

21. A hoouna aku la o Alama i na kiu e hahai aku i ka poe i koe o ko Amaliki poe, e hiki ia ia ke ike no ko lakou mau manao a me ko lakou mau mea e kuka ai, e hiki ia ia ke hoomalu mai ia ia iho ia lakou, e hiki ia ia ke hoopakele mai i kona poe kanaka mai ka luku ia ana mai.

22. Ano, o ka poe ana i hoouna aku ai e hoomakakiu aku i ka poe kaua o ko Amaliki, ua kapa ia o Zerama, a me Amanora, a me Manati, a me Limera; o lakou no ka poe i hele aku me ko lakou poe kanaka e hoomakakiu aku i ka poe kaua o ko Amaliki.

23. Eia kekahi, ma ia la ae, hoi hou mai la lakou i kahi hoomoana o ko Nepai, me ka wikiwiki nui, i kahaha nui ia ai, a i loohia ai me ka makau nui, i ka i ana:

24. Aia hoi, hahai aku la makou i ko Amaliki poe, a me ke kahaha nui o makou, ma ka aina o Minona, maluna ae o ka aina o Zarahemela, i ka ihu o ka aina o Nepai; ike aku la makou i ka puali kinikini o ko Lamana poe; a, aia hoi, ua hui pu aku ko Amaliki poe me lakou,

25. A, aia no lakou maluna iho o ko kakou poe hoahanau ma ua aina la; a e auhee ana lakou mamua o lakou la me na pua holoholona o lakou, a me na wahine a lakou, a me na keiki a lakou, i ko kakou kulanakauhale; a ke ole kakou e wikiwiki, e loaa ana ia lakou la ko kakou kulanakauhale; a e pepehi ia ko kakou poe makua, a me ka kakou poe wahine, a me ka kakou poe keiki.

26. A eia kekahi, lawe aku la ka poe kanaka o Nepai i na halelewa o lakou, a haele aku la mawaho o ke awawa o Gideona i ko lakou kulanakauhale, oia no ke kulanakauhale o Zarahemela.

27. A, aia hoi, me lakou e hele aku ana i kela aoao o ka muliwai Sidona, hiki mai la ko Lamana poe a me ko Amaliki poe, ua kokoke ka lehulehu o lakou, me he mea la, o na one o ke kai, maluna o lakou e luku mai ia lakou;

28. Aka hoi, o ko Nepai poe, ua hooikaika ia mai la ma ka lima o ka Haku, ua pule ikaika aku ia ia, nana e hoopakele mai ia lakou, mailoko mai o na lima o ko lakou poe enemi; nolaila, hoolohe mai la ka Haku i ko lakou hea ana, a hooikaika mai la ia lakou, a haule iho la ko Lamana poe a me ko Amaliki poe imua o lakou.

29. A eia kekahi, kaua aku la o Alama me Amaliki me ka pahikaua, he maka no he maka; a paio ikaika ae la laua, kekahi i kekahi.

30. Eia kekahi, he kanaka no ke Akua o Alama, a ua piha oia i ka manaoio nui, kahea aku la oia, i ka i ana, E ka Haku, e aloha mai a e hookoe mai i koʻu ola, i lilo ai au i mea hana ma kou mau lima, e hoola a e hoopakele ae i keia poe kanaka.

31. Ano, ia Alama i olelo ai i keia mau olelo, paio hou aku la oia me Amaliki; a ua hooikaika ia mai oia, a pepehi aku la oia ia Amaliki me ka pahikaua.

32. A paio aku la hoi oia me ke alii o ko Lamana poe; aka hee aku la ke alii o ko Lamana poe mai ke alo aku o Alama, a hoouna ae la oia i kona poe koa kiai e paio mai me Alama.

33. Aka, paio aku la o Alama, me kona poe koa kiai, me ka poe koa kiai o ke alii o ko Lamana poe, a, luku aku la a hooauhee aku la oia ia lakou;

34. A pela oia i hooakea ai i ka aina, a me ke kapa, ma ke komohana o ka muliwai Sidona, e hoolei ana i na kino o ko Lamana poe i pepehi ia, iloko o na wai o Sidona, i hiki i kona poe kanaka ma ia mea ke loaa kahi akea e hele aku ai i kela aoao, a e paio aku me ko Lamana poe a me ko Amaliki poe, ma ka aoao komohana o ka muliwai Sidona.

35. A eia kekahi, ia lakou a pau i hele aku ai i kela aoao o ka muliwai o Sidona, hoomaka ae la ko Lamana poe a me ko Amaliki poe e hee aku imua o lakou, he poe lehulehu loa nae lakou i hiki ole ai ke helu ia;

36. A auhee aku la lakou imua o ko Nepai poe, i ka waonahele ma ke komohana a ma ka akau, ma o aku o na palena o ka aina; a alualu aku la ko Nepai poe ia lakou me ko lakou ikaika, a luku aku la ia lakou;

37. He oiaio, ua halawai lakou ma kela a me keia aoao, a luku ia, a hooauhee ia, a, hoopuehu ia lakou ma ke komohana a ma ka akau, a hiki aku lakou i ka waonahele i kapa ia o Heramauna; a oia kahi o ka waonahele i noho ai na holoholona hihiu a hae.

38. A eia kekahi, he nui ka poe i make ma ka waonahele no na palapu o lakou, a ua ai ia e ua poe holoholona la, a e na manu hoi o ka lewa; a ua loaa mai la ko lakou mau iwi, a ua hoahu ia iho la ma ka honua.