1. A eia kekahi, ia ia i hooki ai i kana olelo ana i na kanaka, he nui wale o lakou i manaoio ma kana mau olelo, a hoomaka ae la e mihi, a e imi i na palapala hemolele.

2. Aka, o ka nui loa o lakou ua makemake e pepehi loa ia Alama a me Amuleka; no ka mea, huhu iho la lakou ia Alama, no ke akaka o na olelo ana ia Zezeroma; a i ae la hoi lakou ua wahahee aku la o Amuleka ia lakou, a hoino aku la i ko lakou kanawai, a i ko lakou poe loio a me na lunakanawai.

3. A ua huhu no hoi lakou ia Alama laua me Amuleka; no ko laua hoike maopopo ana me ke ku e i ka lakou hana hewa, imi iho la lakou e pepehi malu ia laua.

4. Aole nae lakou i hana pela; aka, hopu iho la lakou ia laua a hikii iho la me na kaula ikaika, a kai aku la ia laua imua o ka lunakanawai nui o ka aina.

5. A hele aku la na kanaka a hoike ku e mai ia laua, e hoike ana ua hoino aku laua i ke kanawai, a me ko lakou poe loio a i ka poe lunakanawai o ka aina, a me na kanaka hoi a pau ma ka aina; a hoike aku la no hoi hookahi Akua wale no, a nana e hoouna mai i kana Keiki mawaena o na kanaka, aka, aole oia e hoola ia lakou; a he nui na mea me ia i hoike ku e mai ai na kanaka ia Alama laua me Amuleka. Ano, ua hana ia keia imua o ka lunakanawai nui o ka aina.

6. A eia kekahi, ua kahaha o Zezeroma i na olelo i olelo ia ai; ua ike no hoi oia no ka pouli o na naau ana i hana ai mawaena o na kanaka, ma na olelo wahahee ana; a hoomaka ae la kona uhane e hoowalania ia ma ka ike ana i kona hewa iho; he oiaio, hoomaka oia e hoopuni ia a puni e na eha o gehena.

7. A, eia kekahi, hoomaka ae la oia e kahea aku i na kanaka, i ka i ana: Aia hoi, owau no ka i hewa, a ua kina ole ua mau kanaka nei imua o ke Akua. A hoomaka ae la oia e olelo kokua no laua, mai ia hope aku; aka hoino ae la lakou ia ia, i ka i ana: Ooe anei kekahi i uluhia no hoi me ke diabolo? A kuha ae la lakou maluna ona, a hoolei aku la ia ia mawaho maiwaena aku o lakou a me ka poe a pau no hoi i manaoio i na olelo i olelo ia ai e Alama a me Amuleka; a hoolei aku la lakou la ia lakou mawaho, a hoouna aku la i na kanaka e nou aku i na pohaku ia lakou.

8. A hoakoakoa pu mai la lakou la i ka lakou poe wahine a poe keiki, a o na mea i manaoio, a i ao ia e manaoio i ka olelo a ke Akua, kena aku la lakou la e hoolei ia lakou iloko o ke ahi; a lawe mai la no hoi lakou la i na mooolelo a lakou, i piha ai me na palapala hemolele, a hoolei aku la no hoi i ua mau mea nei iloko o ke ahi, i puhi ia ai a i pau ai ua mau mea la i ke ahi.

9. A eia kekahi, lawe aku la lakou ia Alama laua me Amuleka, a kaikai aku la ia laua i kahi e make ai, e hiki ia laua ke ike i ka make ana o ka poe i puhi ia ai i ke ahi.

10. A ia Amuleka i ike ai i na eha o na wahine a me na keiki, ua eha no hoi oia, a i mai la oia ia Alama, Pehea la i hiki ai ia kaua ke ike i keia mea weliweli loa? Nolaila, e o aku kaua i ko kaua mau lima, a e hana me ka mana o ke Akua iloko o kaua, a e hoopakele ia lakou nei i na lapalapa ahi ae.

11. Aka, i ae la o Alama ia ia, ke koi mai nei ka Uhane e o ole aku au i kuu lima; no ka mea hoi, ke hookipa aku nei ka Haku ia lakou io na la, iloko o ka nani; a ke ae mai nei oia ia lakou e hana i keia mea, a e hana ae na kanaka i keia mea ia lakou, e like me ka paakiki o ko lakou la mau naau, i pololei na hoopai, ana e hana mai ai auanei maluna iho o lakou la ma kona inaina; a e ku auanei ke koko o ka poe hala ole me he hoike ku e la ia lakou, he oiaio, a e kahea ikaika me ke ku e ia lakou ma ka la hope.

12. Ano, i mai la o Amuleka ia Alama, Aia hoi, malia paha e puhi mai no lakou ia kaua no hoi.

13. A i ae la o Alama, Aia no e like me ka makemake o ka Haku. Aka hoi, aole i pau ka kaua hana; nolaila, aole lakou e puhi mai ia kaua.

14. Ano, eia kekahi, i ka wa i pau ai na kino o ka poe i hoolei ia iloko o ke ahi, a me na mooolelo i hoolei pu ia me lakou, hele mai la ka lunakanawai nui o ka aina, a ku iho la imua o Alama laua me Amuleka, ia laua i paa ai; a papai mai la oia ia laua me kona lima ma na papalina o laua, a i mai la ia laua, Ea, mahope iho o ka mea a olua i ike iho nei, e haiolelo hou anei olua i keia poe kanaka, e hoolei ia mai auanei lakou iloko o kekahi loko ahi a me ke kukae pele?

15. Aia hoi, ke ike nei olua, aole o olua mana e hoopekele aku i ua poe nei, ka poe i hoolei ia iloko o ke ahi; aole hoi ke Akua i hoopakele mai ia lakou, no ko lakou manaoio ana e like me ko olua. A papai hou mai la ua lunakanawai la ia laua ma na papalina, a ninau mai la, Heaha ka olua e i mai ai no olua iho?

16. Ano, o ua lunakanawai nei mamuli ia o ka aoao a me ka manaoio o Nehora, nana i pepehi aku ia Gideona.

17. A, eia kekahi, aole ekemu aku o Alama laua me Amuleka ia ia; a papai hou mai la oia ia laua, a haawi aku la ia laua i na ilamuku e hoolei ia iloko o ka halepaahao.

18. A ia laua i hoolei ia ai iloko o ka halepaahao no na la ekolu, hele mai la na loio he nui, a me na lunakanawai, a me na kahuna, a me na kumu, he poe no ka oihana a Nehora; a komo mai la lakou iloko o ka halepaahao e ike mai ia laua, a nieniele mai la lakou ia laua no na olelo he nui; aka aole laua i ekemu iki aku ia lakou.

19. A eia kekahi, ku iho la ka lunakanawai imua o laua, a i mai la, No ke aha la olua e ekemu ole mai ai i na olelo a keia poe kanaka? Aole anei olua i ike he mana koʻu e haawi aku ai ia olua i na lapalapa? A kauoha mai la oia ia laua e olelo; aka aole loa laua i ekemu aku.

20. A eia kekahi, haalele aku la lakou a hoi aku la, aka, haele hou mai la i kakahiaka ae; a papai no hoi ka lunakanawai ia laua ma na papalina o laua. A he nui no hoi ka poe i hele mai, a i papai mai ia laua, i ka i ana, E ku hou anei olua a e hookolokolo mai i keia poe kanaka, a e hoohewa mai i ko makou kanawai? Ina na olua ua mana nui nei, no ke aha la olua e hoopakele ole ai ia olua iho?

21. A he nui wale na mea me neia a lakou i olelo mai ai ia laua, e uwi ana na niho o lakou ia laua, a e kuha ana maluna o laua, a me ka i ana, Pehea la auanei ke ano o ko makou helehelena i ka wa a makou e hoomainoino ia ai?

22. A he nui na mea me neia, he oiaio, o na mea a pau me neia o kela ano keia ano ka lakou i olelo mai ai ia laua; a pela lakou i hoomaewaewa mai ai ia laua, no na la he nui. A aua mai la lakou i ka ai ia laua, i pololi laua, a i ka wai hoi, i makewai laua; a kaili mai la no hoi lakou i ko laua mau kapa mai o laua aku, i olohelohe laua; a pela laua i nakinaki ia ai me na kaula ikaika, a hoopaa ia iloko o ka halepaahao.

23. A eia kekahi, mahope iho o ko laua hooeha ia ana mai peia no na la he nui wale, (a ma ka la umikumamalua ia, ma ka malama umi, ma ka makahiki umi o ke au o na lunakanawai maluna iho o ka poe kanaka o Nepai,) hele mai la ka lunakanawai nui maluna iho o ka aina o Amoniha, a me na mea he nui o ko lakou poe kumu a me ko lakou poe loio, iloko o ka halepaahao, kahi o Alama laua me Amuleka i nakinaki ia ai me na kaula.

24. A ku iho la ka lunakanawai nui imua o laua, a papai hou mai la ia laua, a i mai la ia laua, Ina ia olua ka mana o ke Akua, e hoopakele ia olua iho i ua mau mea paa nei, alaila, e manaoio makou na ka Haku e hoopau mai i keia poe kanaka, e like me ka olua mau olelo.

25. A eia kekahi, hele mai la lakou a pau a papai mai la ia laua, e olelo ana i ua mau olelo hookahi la, a hiki aku i ka mea hope; a i ka wa a ka mea hope i olelo mai ai ia laua, maluna iho o Alama laua me Amuleka ka mana o ke Akua, a ala ae la laua a ku iho la ma ko laua mau wawae;

26. A kahea aku la o Alama, i ka i ana, Pehea la ka loihi, e ka Haku, e auamo ai o maua i keia mau popilikia nui? E ka Haku, e haawi mai ia maua i ka ikaika e like me ko maua manaoio iloko o Kristo, i ka hoopakele ia ana; a moku aku la laua i na kaula i nakinaki ia ai laua; a i na kanaka i ike ai ia mea, hoomaka lakou e naholo aku, no ka mea, ua hiki mai ka makau i ka make maluna iho o lakou.

27. A eia kekahi, no ka nui o ko lakou makau, haule iho la lakou i ka honua, aole i loaa ia lakou ka puka mawaho loa o ka halepaahao; naueue ikaika ae la ka honua, a naha iho la na paia o ka halepaahao iwaena, a hiolo iho la ia mau mea i ka honua; a o ka lunakanawai nui, a me na loio, a me na kahuna, a me na kumu, ka poe i papai mai ia Alama laua me Amuleka, ua pau loa lakou i ka make ma ka hiolo ana o ia mau mea.

28. A puka mai la o Alama laua me Amuleka mailoko mai o ka halepaahao, aole laua i eha; no ka mea, ua haawi mai ka Haku i mana ia laua, e like me ko laua manaoio iloko o Kristo. A hele koke mai la laua mailoko mai o ka halepaahao; a ua hookuu ia mai laua i ko laua mau mea i paa ai; a ua hiolo iho la ka halepaahao i ka honua, a ua pau i ka make kela mea keia mea i komo iloko o na paia ona, koe wale no o Alama laua me Amuleka; a hele koke aku la laua iloko o ke kulanakauhale.

29. Ano, i ka lohe ana o na kanaka i kekahi halulu nui, holo mai la lakou he poe lehulehu loa, e ike i ke kumu o ia mea; a ia lakou i ike ai ia Alama laua me Amuleka e puka mai ana mailoko mai o ka halepaahao, a ua hiolo iho la na paia ona i ka honua, ua loohia iho la lakou i ka makau nui, a auhee aku la mai ke alo aku o Alama laua me Amuleka me he kao la i auhee aku ai me na keiki ana mai na liona elua aku; a pela lakou i hee aku ai mai ke alo aku o Alama laua me Amuleka.