1. Eia kekahi, o ka poe i hoolohe ole mai ia Helamana a me kona poe hoahanau, ua houluulu pu ia lakou e ku e mai i ko lakou poe hoahanau.

2. Ano, aia hoi, ua nui loa ko lakou huhu, a ua paa ko lakou manao e pepehi mai ia lakou nei.

3. Ano, o ka luna o kela poe, ka poe i huhu mai i ko lakou poe hoahanau, he kanaka nunui a ikaika oia; a o Amalikia kona inoa.

4. A ua makemake o Amalikia e lilo ae i alii; a o kela poe kanaka, ka poe i huhu, ua makemake no hoi lakou e lilo oia i alii no lakou; a o ka nui loa o lakou o ka poe lunakanawai haahaa lakou o ka aina; a e imi ana lakou i ka mana.

5. A ua alakai ia aku lakou ma na olelo malimali a Amalikia, ina e kokua lakou ia ia, a e hoonoho ia ia i alii no lakou, e hoolilo iho oia ia lakou i poe luna maluna iho o na kanaka.

6. Pela lakou i alakai ia aku ai e Amalikia, e kuee mai, me ka haiolelo ana nae a Helamana a me kona mau hoahanau; he oiaio, me ko lakou malama nui ana nae maluna iho o ka ekalesia, no ka mea, he mau kahuna nui lakou maluna iho o ka ekalesia.

7. A he nui na mea iloko o ka ekalesia i manaoio i na olelo malimali a Amalikia; nolaila haalele kuee mai la hoi lakou i ka ekalesia; a pela ua naueue a weliweli loa ka noho ana o ka poe kanaka o Nepai, me ko lakou lanakila nui nae i loaa ai ia lakou maluna iho o ko Lamana poe, a me ko lakou hauoli nui ana i loaa ai ia lakou, no ko lakou hoopakele ia ana mai ma na lima o ka Haku.

8. Pela kakou i ike ai i ka hoopoina koke ana o na keiki a kanaka i ka Haku, i ko lakou Akua; he oiaio, i ka wikiwiki e hana i ka hewa, a e alakai ia aku ai e ka mea ino;

9. He oiaio, a ke ike nei no hoi kakou i ka hewa nui o kekahi kanaka hewa loa i hiki ai ke hoala mawaena o na keiki a kanaka;

10. He oiaio, ke ike nei kakou ia Amalikia he kanaka ia o ka noonoo maalea, a he kanaka o na olelo malimali he nui wale, no ia mea, alakai aku la oia i na naau o na kanaka he nui loa e hana hewa; he oiaio, a e imi e hoopau mai i ka ekalesia o ke Akua, a e hoopau iho i ke kahua o ke kuokoa ana a ke Akua i haawi mai ai ia lakou, oia hoi ka pomaikai a ke Akua i hoouna mai ai maluna iho o ka ili o ka aina, no ka pomaikai o ka poe pono.

11. Ano, eia kekahi, i ka wa a Moroni, oia no ka alihi kaua nui o ka poe koa o ko Nepai poe, i lohe ai i keia mau haalele kuee ana, ua huhu oia ia Amalikia.

12. A eia kekahi, haehae iho la oia i kona kapakomo; a lawe iho la oia i kekahi apana o ia mea a palapala iho la maluna iho o ia mea: I mea e hoomanao ai i ko kakou Akua, i ko kakou hoomana ana, a me ka noho kauwa ole ana, a me ko kakou maluhia, i ka kakou poe wahine, a me ka kakou mau keiki; a hoopaa iho la oia ia mea ma ka welau o kekahi laau.

13. A hoopaa iho la oia i kona pale-poo ia ia a me kona pale-umauma, a me kona mau pale-kaua, a kaei iho la oia i kona mea e kahiko ai ma kona puhaka; a lalau ae la oia i ka laau, aia ma ka welau ona kona kapakomo i haehae ia, (a kapa aku la oia ia mea ka hoailona o ke kuokoa ana,) a kulou iho la oia ilalo i ka honua, a pule ikaika aku la oia i kona Akua no na mea pomaikai o ke kuokoa ana e kau mai maluna iho o kona poe hoahanau i na manawa a pau oiai kekahi papa o ka poe Kristiano i koe e noho ana ma ka aina;

14. No ka mea, pela i kapa ia mai ai ka poe a pau i manaoio oiaio ia Kristo, ka poe i hui ia me ka ekalesia o ke Akua, e ka poe i hui ole ia me ka ekalesia;

15. A o ka poe i hui ia me ka ekalesia ua hoomau pono lakou; he oiaio, o ka poe a pau i manaoio oiaio ia Kristo, ua lawe mai la me ka olioli maluna iho o lakou, i ka inoa o Kristo, a i ka inoa Kristiano, me lakou i kapa ia mai ai, no ko lakou manaoio ia Kristo, ka mea e hele mai ana;

16. A nolaila, i keia manawa, pule aku la o Moroni e kokua ia mai ka aoao o ka poe Kristiano, a me ke kuokoa ana o ka aina.

17. A eia kekahi, ia ia i ninini aku ai i kona uhane i ke Akua, kapa ae la oia i ka aina a pau ma ka hema o ka aina Neoneo; he oiaio, a me ka aina a puni, ma ka akau a me ka hema no hoi, he aina e wae ia, a me ka aina o ke kuokoa ana.

18. A i iho la ia, He oiaio ae la aole ke Akua e ae mai ia makou, ka poe i hoowahawaha ia no ka lawe ana mai maluna iho o makou i ka inoa o Kristo, e hehi ia mai ilalo a e luku ia, a hiki aku i ka wa e lawe mai ai makou ia mea maluna iho o makou, ma o ko makou lawehala ana la.

19. A ia Moroni i olelo iho ai i keia mau olelo, hele aku la oia mawaena o na kanaka, e hooluhi ana i ka apana o kona kapakomo ma ka lewa, e hiki i na mea a pau ke ike i ka palapala ana, ana i palapala ai ma ka apana, a e hea ana me ka leo nui, i ka i ana:

20. Aia hoi, o kela mea keia mea e malama ana i keia hoailona maluna iho o ka aina, e hele mai lakou ma ka ikaika o ka Haku; a e komo mai iloko o kekahi berita e malama i ko lakou mau mea e pono ai, a me ko lakou hoomana ana, i hoopomaikai mai ai ka Haku ke Akua ia lakou.

21. Ano, eia kekahi, ia Moroni i kukala aku ai i keia mau olelo, aia hoi, hele mai na kanaka e holo paapu mai ana, me na mea e kahiko ai o lakou i kaei ia ma ko lakou mau puhaka, e haehae ana i ko lakou mau aahu i hoailona, a me he berita la, aole lakou e haalele aku i ka Haku i ko lakou Akua; oia hoi, ma na olelo e ae, ina e ae lakou maluna iho o na kauoha a ke Akua, a e haule iho iloko o ka hala, a e hilahila i ka lawe ana maluna o lakou i ka inoa o Kristo, na ka Haku e haehae mai ia lakou me lakou i haehae ai i na aahu o lakou.

22. Ano, oia no ka berita a lakou i hana ai; a hoolei ae la lakou i na aahu o lakou ma na wawae o Moroni, me ka i ana ae, Ke hana berita nei makou me ko makou Akua, e anai ia mai makou, e like me ko makou poe hoahanau ma ka aina akau, ina e haule iho makou iloko o ka hala; he oiaio, nana e hoolei mai ia makou ma na wawae o ko makou poe enemi, me makou i hoolei aku ai i na aahu o makou ma kou mau wawae, e hehi ia malalo iho o na wawae, ina haule iho makou iloko o ka hala.

23. I ae la o Moroni ia lakou, Aia hoi, he koena kakou o ka hua a Iakoba; he oiaio, he koena kakou o ka hua a Iosepa, ka mea nona ke kapakomo i haehae ia e kona mau kaikuaana, i na apana he nui; he oiaio, ano hoi, e hoomanao kakou e malama i na kauoha a ke Akua, i ole ia e haehae ia mai auanei na aahu o kakou e ko kakou poe hoahanau, a e hoolei ia mai kakou iloko o ka halepaahao, a i ole ia e kuai ia aku, a i ole ia, e pepehi loa ia mai;

24. He oiaio, e malama kakou i ko kakou kuokoa ana, me he koena la o Iosepa; he oiaio, e hoomanao kakou i na olelo a Iakoba, mamua o kona make ana; no ka mea hoi, ike aku la oia ua hookoe ia he apana o ke koena o ke kapakomo o Iosepa, a ua popopo ole ia. A i mai la oia, Me keia koena o ke kapakomo o kaʻu keiki i hookoe ia mai ai, pela e hookoe ia mai auanei he koena o ka hua a kaʻu keiki ma ka lima o ke Akua, a e lawe ia aku io na la, oiai e make auanei ka poe i koe o ka hua a Iosepa, e like me ke koena o kona kapakomo.

25. Ano hoi, ke haawi mai nei keia mea i ke kaumaha i koʻu uhane; aka, he hauoli ko koʻu uhane iloko o kaʻu keiki, no ua hapa la o kana poe hua, e lawe ia aku ai auanei i ke Akua la.

26. Aia hoi, oia no ka olelo a Iakoba.

27. Ano, owai la ka i ike anoai o ka poe i kuee mai a haalele mai ia kakou, o lakou no ke koena o ka hua a Iosepa, e make ana e like me kona kapakomo; he oiaio, a o kakou no hoi auanei, ke kupaa ole kakou iloko o ka manaoio o Kristo.

28. A eia kekahi, ia Moroni i olelo ae ai i keia mau olelo, hele aku la oia, a hoouna aku la no hoi ma na wahi a pau o ka aina, kahi o na kuee ana, a houluulu mai la i na kanaka a pau, ka poe e makemake ana e malama i ko lakou kuokoa ana, e ku e ia Amalikia, a me ka poe i kuee a haalele mai, ka poe i kapa ia ko Amalikia.

29. Eia kekahi, ia Amalikia i ike ai ua oi aku ka nui o ka poe kanaka o Moroni mamua o ko ko Amalikia; a ike no hoi oia ua kanalua kona poe kanaka no ka pololei o ka aoao a lakou i apo aku ai; nolaila, me ka makau o loaa ole ia ia ka mea ana i makemake ai, lawe aku la oia i kekahi o kona poe kanaka e makemake ana, a haele aku la iloko o ka aina o Nepai.

30. Ano, manao iho la o Moroni he mea pono ole e loaa hou i ko Lamana poe ka ikaika hou; nolaila, manao iho la oia e hooki aku i ka poe kanaka o Amalikia, a i ole ia, e hopu ia lakou a e hoihoi hou mai i hope nei, a e pepehi aku ia Amalikia a make; he oiaio, no ka mea, ua ike oia e hooeueu ae oia i ko Lamana poe e huhu mai ia lakou nei, a e hookonokono mai ia lakou e hele mai e kaua mai ia lakou nei; a ua ike oia e hana no o Amalikia i keia, e hiki ia ia ke loaa kona mau mea i manao ai;

31. Nolaila, manao iho la o Moroni he mea e pono ai nona e lawe aku i kona poe koa, ka poe i houluulu ia lakou iho, a i kahiko ia lakou iho, a komo i ka berita e malama i ka maluhia; a lawe aku la oia i kona poe koa, a hele aku la iloko o ka waonahele, e alai aku i ke ala o Amalikia ma ka waonahele.

32. A eia kekahi, hana iho la oia e like me kona mea i manao ai, a hele aku la iloko o ka waonahele, a poai puni i ka poe koa o Amalikia.

33. A hee aku la o Amalikia me kekahi poe he uuku o kona poe kanaka, a o ka poe i koe, ua haawi ia mai iloko o na lima o Moroni, a ua kai hou ia iloko o ka aina o Zarahemela.

34. Ano he kanaka o Moroni i hoonoho ia e na lunakanawai nui a me ka leo o na kanaka, nolaila, he mana kona e like me kona makemake, me ka poe koa o ko Nepai, e hooponopono a e hana me ka mana maluna iho o lakou.

35. A eia kekahi, o kela mea keia mea o ko Amalikia i komo ole iloko o ka berita e kokua mai i ka aoao o ke kuokoa ana, e hiki ia lakou ke malama i kekahi aupuni kuokoa, kena ae la oia e pepehi ia a make; a he mau mea kakaikahi wale no ka i hoole mai i ka berita o ke kuokoa ana.

36. A eia hoi kekahi, kena ae la oia e kau ia ka hoailona o ke kuokoa ana maluna iho o kela hale kiai keia hale kiai ma ka aina a puni, i noho ia ai e ko Nepai poe; a pela o Moroni i kukulu ai i ka hae o ke kuokoa ana mawaena o ko Nepai poe.

37. A hoomaka lakou e loaa hou ka maluhia ma ka aina; a pela lakou i malama ai i ka maluhia ma ka aina, a aneane hiki aku i ka hopena o ka makahiki umikumamaiwa o ke au o na lunakanawai.

38. A malama iho la no hoi o Helamana a me na kahuna nui i ka pololei iloko o ka ekalesia; he oiaio, no na makahiki eha, ua loaa iho la ia lakou ka maluhia nui a me ka hauoli ana iloko o ka ekalesia.

39. A eia kekahi, he nui no na mea i make, me ka manaoio paa ua hoolapanai ia ko lakou mau uhane e ka Haku o Iesu Kristo; pela lakou i puka aku ai mailoko aku o ke ao nei me ka hauoli ana.

40. A make aku la kekahi poe me na mai kuni, na mea i hoea pinepine mai ma ka aina ma kekahi mau kau o ka makahiki; aka, aole i make ka nui o lakou me na mai kuni, no ke ano maikai loa o na mea kanu a me na aa a ke Akua i hoomakaukau mai ai, e hoopau mai i ke kumu o na mai o na kanaka i loohia mai ai, ma o ke ano la o ka aina.

41. Aka, he nui loa ka poe i make no ke kahiko mauli no; a o ka poe i make iloko o ka manaoio o Kristo, ua pomaikai iloko ona, me makou e pono ai ke manaoio.