1. Eia hoi kekahi, ua hoohauoli nui loa ia ka poe kanaka o Nepai, no ka hoopakele hou ana mai o ka Haku ia lakou mailoko mai o na lima o ko lakou poe enemi; nolaila, aloha aku la lakou i ka Haku i ko lakou Akua; he oiaio, a hookeai nui a pule nui aku lakou, a hoomana aku la lakou i ke Akua me ka olioli nui loa.

2. A eia kekahi, ma ka makahiki umikumamaiwa o ke au o na lunakanawai maluna iho o ka poe kanaka o Nepai, hele mai la o Alama i kana keiki o Helamana, a i mai la ia ia, Ke manaoio nei anei oe i na olelo aʻu i olelo aku ai ia oe no kela mau mooolelo i malama ia ai?

3. A i ae la o Helamana ia ia, Ae, ke manaoio nei au.

4. A i hou mai la o Alama ia ia, Ke manaoio nei anei oe ia Iesu Kristo, ka mea e hele mai auanei?

5. A i ae la oia, Ae, ke manaoio nei au i na olelo a pau au i olelo mai ai.

6. A i hou mai la o Alama ia ia, E malama anei oe i kaʻu mau kauoha?

7. A i ae la oia, Ae, e malama no au i kau mau kauoha me koʻu naau a pau.

8. Alaila, i mai la o Alama ia ia, Pomaikai ooe; a na ka Haku e hoopomaikai auanei ia oe ma keia aina.

9. Aka hoi, he mau mea kaʻu e wanana aku ai ia oe; aka, o kaʻu e wanana aku ai ia oe, mai hoike aku oe; he oiaio, o kaʻu mea e wanana aku ai ia oe, aole ia e hoike ia aku, a hiki wale aku i ka wa e hooko ia ai ka wanana; nolaila, e kakau iho i na olelo aʻu e olelo aku ai.

10. A eia na olelo: Aia hoi, ke ike nei au o keia poe kanaka, o ko Nepai poe nei, e like me ka Uhane o ka hoikeana iloko oʻu, ma na makahiki eha haneri mai ka wa a Iesu Kristo e hoike mai ai ia ia iho ia lakou, e emi iho iloko o ka hoomaloka;

11. He oiaio, a, alaila e ike ai lakou i na kaua a me na mai ahulau, he oiaio, a me na kau wi, a me ka hookahe koko ana, a hiki aku i ka wa e anai loa ia ai ka poe kanaka o Nepai;

12. He oiaio, a o keia mea no ko lakou emi ana auanei iloko o ka hoomaloka, a haule ana iloko o na hana o ka pouli a me ka makaleho, a me kela ano keia ano o ka hewa; he oiaio, ke i aku nei au ia oe, no ka lakou hana auanei i ka hewa ku e i ka malamalama a i ka ike nui e like me neia; he oiaio, ke i aku nei au ia oe, mai ia la aku, aole e hala aku ka ha o ka hanauna a pau, mamua o ka hiki mai ana o keia hewa nui;

13. A i ka wa e hiki mai ai kela la, aia hoi, e hiki koke mai ana ka manawa o ka poe e noho ana ano, oia hoi ka poe mamo a ka poe i helu pu ia ano mawaena o ka poe kanaka o Nepai, aole e helu pu hou ia auanei ma ia hope aku me ka poe kanaka o Nepai;

14. Aka, o na mea e koe ana, a i luku ole ia ma kela la nui a weliweli, e helu pu ia auanei lakou me ko Lamana poe, a e lilo ae auanei e like me lakou, o lakou a pau loa, koe wale no he mau mea kakaikahi, he poe e kapa ia auanei he poe haumana na ka Haku; a e alualu no ko Lamana poe ia lakou, a hiki aku lakou i ka anai ia ana mai. Ano, no ka hana ino ana, e hooko ia auanei keia wanana.

15. A eia kekahi, mahope iho o ka olelo ana o Alama i keia mau mea ia Helamana, hoopomaikai mai la oia ia ia, a me kana mau keiki e ae no hoi; a hoopomaikai iho la oia i ka honua nei, no ko ka poe pono pomaikai.

16. A i mai la oia, penei wahi a ka Haku ke Akua: E hoopoino ia no ka aina, he oiaio, o keia aina, i na lahuikanaka, a me na ohana, i na olelo a me na kanaka a pau, e hana hewa ana, i ka luku loa ia ana, ia lakou i oo loa ai; a me aʻu i i aku ai, pela auanei ia; no ka mea, oia no ka hoopoino ana a me ka hoopomaikai ana o ke Akua maluna iho o ka aina nei, no ka mea, aole e hiki i ka Haku ke nana mai i ka hewa me ka oluolu uuku loa.

17. Ano, ia Alama i olelo mai ai i keia mau olelo, hoopomaikai ae la oia i ka ekalesia, he oiaio, i ka poe a pau e ku paa ana ma ka manaoio, ma ia hope aku;

18. A ia Alama i hana ai i keia, hele aku la oia iwaho o ka aina o Zarahemela, me he mea la e hele ana i ka aina o Meleka. A eia kekahi, aole i lohe hou ia nona ma ia hope aku; no kona make a me kona kanu ia ana hoi, aole o makou i ike.

19. Aia hoi, o keia ka makou i ike, he kanaka pono oia; a kui aku la ka olelo ma ka ekalesia, ua lawe ia aku oia e ka Uhane, a i ole ia, ua kanu ia ma ka lima o ka Haku, e like me Mose. Aka hoi, ke i mai nei ka palapala hemolele ua lawe aku ka Haku ia Mose io na la; a ke manao nei makou ua lawe no hoi oia ia Alama ma ka Uhane, io na la, nolaila, no keia mea, aole o makou i ike iki no kona make a kanu ia ana.

20. Ano, eia kekahi, ma ka makamua o ka makahiki umikumamaiwa o ke au o na lunakanawai maluna iho o ka poe kanaka o Nepai, hele ae la o Helamana mawaena o na kanaka e hai aku i ka olelo ia lakou;

21. No ka mea hoi, no ko lakou mau kaua me ko Lamana poe, a me na kuee uuku he nui wale, a me na haunaele mawaena o na kanaka mamua iho nei, ua lilo i mea e pono ai, e hai ia aku ka olelo a ke Akua mawaena o lakou; he oiaio, a e hana ia ka hooponopono mawaena o ka ekalesia;

22. Nolaila, hele aku la o Helamana a me kona mau hoahanau e kukulu hou i ka ekalesia ma ka aina a puni, he oiaio, ma kela kulanakauhale keia kulanakauhale ma ka aina a puni, i noho ia ai e ka poe kanaka o Nepai. A eia kekahi, hoonoho iho la lakou i na kahuna a me na kumu ma ka aina a puni, maluna iho o na ekalesia a pau.

23. Ano, eia kekahi; mahope iho o ka hoonoho ana o Helamana a me kona mau hoahanau i na kahuna a me na kumu maluna iho o na ekalesia, ea mai la kekahi kuee mawaena o lakou, a, aole lakou i hoolohe mai i na olelo a Helamana a me kona mau hoahanau;

24. Aka, lilo iho la lakou i poe haaheo, i hookiekie ia ai iluna ma ko lakou mau naau, no ko lakou waiwai nui loa; nolaila, lilo iho la lakou i poe waiwai ma ko lakou mau maka iho, a, aole i hoolohe mai i ka lakou nei mau olelo, e hele pololei imua o ke Akua.