1. Ano, eia kekahi, mahope iho o ka make ana o Korihora, ua loaa iho la ia Alama na lono e hookapae ana ko Zorama poe i na aoao o ka Haku, a e alakai ana o Zorama, oia no ko lakou mea alakai, i na naau o na kanaka e kulou iho ilalo i na kii leo ole, a pela aku, a ua hoomaka hou ae la kona naau e hoopailua, no ka hewa o na kanaka;

2. No ka mea, he kumu ia mea no ke kaumaha nui o Alama, e ike i ka hewa mawaena o kona poe kanaka; nolaila, ua kaumaha nui loa iho la kona naau, no ke kaawale ana o ko Zorama poe mai ko Nepai poe ae.

3. Ano, ua houluulu ae la ko Zorama poe ia lakou iho iloko o kahi aina a lakou i kapa aku ai o Anationuma, ma ka hikina o ka aina o Zarahemela, e waiho kokoke ana ma ke kahakai, ma ka hema o ka aina o Ieresona, oia no hoi ka i kokoke ma ka waonahele hema, a ua piha ua waonahele nei i ko Lamana poe.

4. Ano, makau nui iho la ko Nepai poe o hoalauna aku ko Zorama poe me ko Lamana poe, a e lilo ia mea i mea e poino nui ai ma ka aoao o ko Nepai poe.

5. Ano, o ka hai ana i ka olelo he mea nui e alakai aku i na kanaka e hana i ka mea i pono; he oiaio, ua nui e aku ka mana o ia mea maluna iho o na naau o na kanaka mamua o ka pahikaua, a mamua o kekahi mea e ae, i hiki mai ia lakou; nolaila, manao iho la o Alama he mea e pono ai no lakou e hoao aku i ka mana o ka olelo a ke Akua.

6. Nolaila, lawe aku la oia ia Amona, a me Aarona, a me Omanera; a waiho iho la oia ia Himani iloko o ka ekalesia ma Zarahemela; aka, o na mea mua ekolu kana i lawe pu ai me ia, a me Amuleka laua me Zezeroma no hoi, ma Meleka laua; a lawe pu no hoi oia i na keiki ana elua.

7. Ano, aole oia i lawe pu aku i kana keiki hiapo me ia; a o Helamana no kona inoa; aka o na inoa o laua ana i lawe pu ai me ia, o Sibalona kekahi, a o Korianatona kekahi; a oia na inoa o ua poe la, ka poe i hele pu me ia mawaena o ko Zorama poe, e hai aku ia lakou i ka olelo.

8. Ano, o ko Zorama poe he poe kuee a haalele mai ko Nepai poe ae; nolaila, ua hai ia aku ka olelo a ke Akua ia lakou.

9. Aka ua haule iho la lakou iloko o na kuhihewa nui wale, no ka mea, aole lakou hoolohe e malama i na kauoha a ke Akua, a me na kanawai, e like me na kanawai o Mose;

10. Aole hoi lakou i malama i na hana a ka ekalesia, e hoomau aku ma ka pule a me ka noi aku i ke Akua i kela la i keia la, i komo ole ai lakou iloko o ka hoowalewale;

11. He oiaio, ua kapae ae lakou i na aoao o ka Haku ma na mea he nui; nolaila, no keia kumu, hele aku la o Alama a me kona poe hoahanau iloko o ka aina, e hai aku i ka olelo ia lakou.

12. Ano, ia lakou i hiki aku ai iloko o ka aina, aia hoi, me ko lakou kahaha, ike aku la lakou ua kukulu iho ko Zorama poe i na halepule, a e hoakoakoa ana lakou ia lakou iho i kahi hookahi i kekahi la o ka hebedoma, a kapa iho la lakou i ua la la o ka la o ka Haku; a hoomana aku la lakou mamuli o kekahi ano a Alama a me kona poe hoahanau i ike e ole ai mamua;

13. No ka mea, ia lakou kekahi wahi i kukulu ia iluna mawaena konu o ko lakou halepule, i kahi e ku ai, a ua kiekie ia maluna ae o ke poo; a ua hiki i ka mea hookahi wale no ke komo maluna ae.

14. Nolaila, o ka mea e makemake ana e hoomana aku, nana no e hele aku a e ku maluna ae olaila, a kikoo aku i kona mau lima i ka lani; a kahea aku me ka leo nui, i ka i ana:

15. Hemolele, hemolele ke Akua; ke manaoio nei makou ooe no ke Akua, ke manaoio nei makou ua hemolele oe, a he uhane no oe mamua, a he uhane no oe ano, a he uhane no oe a mau loa aku.

16. E ke Akua hemolele, ke manaoio nei makou ua hookaawale mai oe ia makou mai ko makou poe hoahanau ae; aole o makou manaoio i ka mooolelo o ko makou poe hoahanau, ka mea i haawi ia mai ai ia lakou ma o ke ano kamalii la o ko lakou poe kupuna; aka, ke manaoio nei makou ua wae mai oe ia makou e lilo i poe keiki hemolele nau; a ua hoike mai no hoi oe ia makou aole no auanei he Kristo;

17. Aka, oia mau no oe i ka la inehinei, i keia la a i ka wa pau ole; a ua wae mai oe ia makou, i hoola ia ai auanei makou, oiai i wae ia ka poe a pau a puni makou e hoolei ia e kou inaina ilalo i gehena; no keia hemolele, e ke Akua, ke aloha aku nei makou ia oe; a ke aloha aku nei no hoi makou ia oe no kou wae ana mai ia makou, i ole ai makou e alakai ia aku mamuli o na mooolelo lapuwale o ko makou poe hoahanau, na mea i hoopaa ai ia lakou ilalo e manaoio ia Kristo, na mea i alakai ai i ko lakou mau naau e auwana mamao aku mai ou aku la, ko makou Akua.

18. A eia hou: ke aloha aku nei makou ia oe, e ke Akua, no ka lilo ana o makou i poe kanaka wae ia a hemolele. Amene.

19. Ano, eia kekahi, mahope iho o ka lohe ana o Alama a me kona poe hoahanau, a me kana mau keiki, i keia mau pule, ua kahaha nui loa iho la.

20. No ka mea, aia hoi, hele aku la kela kanaka keia kanaka a pule ae la i na pule oia hookahi no.

21. Ano, ua kapa ia ua wahi la e lakou o Rameumapatoma, ma ka hoohalike ana, o ka Awai Hoano ia.

22. Ano, ma ua awai nei lakou i pule ai, o kela kanaka keia kanaka, i ua pule hookahi la i ke Akua, e aloha aku ana i ko lakou Akua no ko lakou wae ia ana e ia, a no kona alakai ole aku ia lakou mamuli o ka mooolelo o ko lakou poe hoahanau; a no ka aihue ole ia ana o na naau o lakou e manaoio i na mea e hiki mai ana, a lakou i ike ole ai.

23. Ano, mahope iho o ka haawi ana aku o na kanaka a pau i ke aloha mamuli o keia ano, hoi ae la lakou i ko lakou mau wahi i noho ai, e olelo hou ole ana no ko lakou Akua ma ia hope iho, a hiki aku i ka wa a lakou i akoakoa hou ai i ka Awai Hoano, e haawi aku i ke aloha mamuli o ko lakou ano.

24. Ano, ia Alama i ike ai i keia, ua eha kona naau; no ka mea, ike ae la oia he poe kanaka hewa a paakiki lakou; he oiaio, ike ae la oia ua kau ia ko lakou mau naau maluna iho o ke gula, a maluna iho o ke kala, a maluna iho o kela ano o keia ano o ka waiwai nani a pau.

25. He oiaio, a ike ae la no hoi oia ua hookiekie ia ko lakou mau naau iluna i ka haanou nui, iloko o ko lakou haaheo.

26. A hookiekie ae la oia i kona leo i ka lani, a hea ae la, i ka i ana: Pehea la ka loihi, e ka Haku, o kou ae ana mai i kau poe kauwa e noho ilalo nei ma ka io, e ike i ka hewa manomano me neia mawaena o na keiki a kanaka.

27. Aia hoi, e ke Akua, ke kahea aku nei lakou ia oe, a ua ale ia nae ko lakou mau naau iloko o ko lakou haaheo. Aia hoi, e ke Akua, ke hea aku nei lakou ia oe me ko lakou mau waha, oiai no nae ua haakei ia lakou a kiekie, me na mea lapuwale o ko ke ao nei.

28. E nana ae, e koʻu Akua, i ko lakou lole kumukuai nui, a me ko lakou lauoho owili ia, a me ko lakou mau kupee lima, a me ko lakou mau mea gula e nani ai, a me kela ano keia ano o na mea maikai a lakou i hoonani ia ai; a, aia hoi, ua kau ia no ko lakou mau naau maluna iho o ua mau mea nei, a ke hea aku nei nae lakou ia oe, Ke aloha aku nei makou ia oe, e ke Akua, no ka mea, he poe kanaka wae ia makou nou, oiai e make ana na mea e ae.

29. He oiaio, a ke i ae nei lakou ua hoike mai oe ia lakou, aohe auanei he Kristo.

30. E ka Haku ke Akua, pehea la ka loihi o kou ae ana i ka hewa a me ka hala me neia e noho nei mawaena o keia poe kanaka? E ka Haku, e haawi mai anei oe i ka ikaika iaʻu, e hiki iaʻu ke haawe i kuu mau nawaliwali? No ka mea, ua nawaliwali au, a ke hoeha mai nei ka hewa me neia mawaena o keia poe kanaka i koʻu uhane.

31. E ka Haku, ua kaumaha nui loa koʻu naau; e hooluolu mai anei oe i koʻu uhane iloko o Kristo? E ka Haku, e ae mai anei oe iaʻu i loaa ai iaʻu ka ikaika, e hiki iaʻu ke hoomanawanui me keia mau pilikia e hiki mai ana maluna iho oʻu no ka hewa o keia poe kanaka?

32. E ka Haku, e hooluolu mai anei oe i koʻu uhane, a e haawi mai i ka pomaikai iaʻu, a me koʻu poe hoalawehana no hoi eia pu me aʻu, he oiaio, ia Amona a me Aarona, a me Omanera, a ia Amuleka laua me Zezeroma no hoi, a i kaʻu mau keikikane elua no hoi; he oiaio, o lakou nei a pau kau e hooluolu mai ai, ea, e ka Haku? He oiaio, e hooluolu mai oe i ko lakou mau uhane iloko o Kristo?

33. E ae mai anei oe ia lakou e loaa ia lakou ka ikaika, e hiki ia lakou ke haawe aku i ko lakou mau pilikia e hiki mai ana maluna iho o lakou, no na hewa o keia poe kanaka?

34. E ka Haku, e ae mai anei oe ia makou i loaa ai ia makou ka pomaikai i ke kai hou ana ia lakou la iou la, iloko o Kristo?

35. Aia hoi, e ka Haku, ua makamae ko lakou poe uhane, he nui wale o lakou he poe hoahanau no makou, nolaila, e haawi mai oe ia makou, e ka Haku, i ka mana a me ka naauao, e hiki ia makou ke kai hou ae i ua poe nei, ko makou poe hoahanau iou la.

36. Ano, eia kekahi, ia Alama i olelo ae ai i ua mau olelo nei, kau iho la oia i kona mau lima maluna iho o lakou a pau me ia. A, aia hoi, me ia i kau iho ai i kona mau lima maluna iho o lakou, ua hoopiha ia lakou me ka Uhane Hemolele.

37. A mahope iho o ia mea, hookaawale iho la lakou ia lakou iho kekahi mai kekahi ae; e manao ole ana no lakou iho i ka lakou mea e ai ai, a i ka lakou mea e inu ai, aohe hoi i ko lakou mea e aahu ai.

38. A hoomakaukau mai la ka Haku no lakou i ole ai lakou e pololi, i ole ai hoi lakou e makewai; he oiaio, a haawi mai la no hoi i ka ikaika ia lakou, i ole ai lakou e loohia i kekahi ano o ka pilikia, ke ale ole ia iloko o ka olioli o Kristo. Ano, ua like no keia me ka pule a Alama; a o keia mea no kana pule ana me ka manaoio.