1. Ano, eia kekahi, ma ka makamua o ka makahiki kanakolu o ke au o na lunakanawai, i ka la lua, ma ka malama mua, loaa iho la ia Moroni kekahi episetole mai o Helamana mai, e hai mai ana i ke ano o ka noho ana o na kanaka ma ia hapa o ka aina.

2. A eia na olelo ana i palapala mai ai, i ka i ana, E koʻu hoahanau i aloha nui ia, o Moroni, ma ka Haku a ma na pilikia o ko kakou kaua no hoi; aia hoi, e koʻu hoahanau aloha, he mau mea kaʻu e hai aku ai ia oe no ko makou kaua ma keia hapa o ka aina.

3. Aia hoi, eia na tausani elua o na keiki a kela poe kanaka, a Amona ma i kai mai ai ilalo, mailoko mai o ka aina o Nepai. Ano, ua ike oe he poe mamo lakou nei na Lamana, oia no ke keikikane makahiapo a ko kakou kupunakane o Lehi.

4. Ano, aole he mea e pono ai noʻu e hai aku ia oe no ko lakou mau mooolelo a me ko lakou hoomaloka, no ka mea, ua ike oe no keia mau mea a pau;

5. Nolaila, e pono noʻu e hai aku ia oe ua lalau aku na tausani elua o keia poe kanaka opiopio i na mea kaua, a makemake mai la iaʻu i luna no lakou; a ua hele mai makou e pale no ko kakou aina.

6. A, ano, ua ike no hoi oe no ka berita a ko lakou poe makua i hana ai, aole lakou e lalau iho i na mea kaua o lakou e ku e aku i ko lakou poe hoahanau, e hookahe aku i ke koko.

7. Aka, ma ka makahiki iwakaluakumamaono, ia lakou i ike ai i ko kakou mau eha a me ko kakou mau popilikia no lakou, ua anehe lakou e uhai iho i ka berita a lakou i hana ai, a e lalau iho i ko lakou mau mea kaua no ke pale ana no kakou.

8. Aka, aole au i ae aku ia lakou e uhai iho i ua berita nei a lakou i hana ai, me ka manao ana na ke Akua e hooikaika mai ia kakou, i ole ai e nui loa aku ko kakou pilikia no ka hooko ana i ka hoohiki a lakou i hana ai.

9. Aka hoi, eia no kekahi mea e olioli nui ai kakou. No ka mea hoi, ma ka makahiki iwakaluakumamaono, hele aku la owau, o Helamana, ma ke alo o keia mau tausani kanaka opiopio elua, i ke kulanakauhale o Iudea, e kokua ia Anatipusa, ka mea au i hoonoho iho ai i luna maluna iho o na kanaka o kela hapa o ka aina.

10. A hoohui aku la au i koʻu poe keikikane elua tausani, (no ka mea, ua ku pono lakou e kapa ia aku he poe keikikane oʻu) i ka poe koa o Anatipusa; a ma keia ikaika ua hauoli nui loa o Anatipusa; no ka mea, ua hoemi ia mai kona poe koa e ko Lamana poe, no ka mea, ua pepehi mai ka poe koa o lakou i na kanaka he lehulehu o kakou; no ia mea, he kumu ko makou e kanikau ai.

11. Aka hoi, ua hiki ia kakou ke hooluolu mai ia kakou iho ma keia mea; ua make lakou ma ka aoao o ko lakou aina a o ko lakou Akua; he oiaio, a ua pomaikai lakou.

12. A ua hoopaa ko Lamana poe i na pio he nui wale, he poe luna nui lakou a pau; no ka mea, aole lakou i hookoe mai i kekahi mea ola e ae. A ke manao nei makou aia no lakou ano i keia manawa iloko o ka aina o Nepai; pela io no ke pepehi ole ia lakou.

13. Ano, eia na kulanakauhale o ko Lamana i loaa ai, ma ka hookahe ana i ke koko o ko kakou poe kanaka koa he nui wale:

14. O ka aina o Manati, oia hoi ke kulanakauhale o Manati, a me ke kulanakauhale o Zezeroma, a me ke kulanakauhale o Kumeni, a me ke kulanakauhale o Anatipara.

15. A oia na kulanakauhale a lakou e paa ana i ka wa aʻu i hiki ai ma ke kulanakauhale o Iudea; a loaa iaʻu o Anatipusa me kona poe kanaka e kamau hana ana me ko lakou ikaika e hana paa i ke kulanakauhale;

16. He oiaio, a ua kaumaha lakou ma ke kino a ma ka uhane no hoi; no ka mea, ua kaua makau ole aku lakou ma ke ao, a kamau hana iho la ma ka po, e malama ai i ko lakou mau kulanakauhale; a pela lakou i loaa ai na pilikia nui o kela ano keia ano.

17. A, ano, ua paa ko lakou manao e lanakila ma keia wahi, a i ole ia, e make; nolaila, ua hiki ia oe ke hoomaopopo ua haawi ae keia poe koa he uuku aʻu i lawe pu ai me aʻu; he oiaio, ua poe keiki la oʻu, i na manaolana nui a me ka olioli nui ia lakou.

18. Ano, eia kekahi, i ko Lamana poe i ike ai ua loaa ia Anatipusa ka ikaika nui ae i kona poe koa, ua koi ia lakou, ma o na kauoha la a Amorona, e hele ole mai i ke kulanakauhale o Iudea, e kaua mai ia makou.

19. A pela kakou i hoopomaikai ia mai ai e ka Haku; no ka mea, ina ua hele mai lakou maluna iho o makou i ko makou nawaliwali nei, ina ua luku mai paha lakou i ko makou poe koa uuku; aka, pela makou i hoopakele ia mai ai.

20. Ua kauoha ia lakou e Amorona e malama i kela mau kulanakauhale a lakou i hoopio mai ai. A pela i pau ai ka makahiki iwakaluakumamaono. A i ka makamua o ka makahiki iwakaluakumamahiku, ua hoomakaukau iho makou i ko makou kulanakauhale a me makou iho e pale aku ia lakou.

21. Ano ua makemake makou e hele mai ko Lamana poe maluna iho o makou; no ka mea, aole o makou makemake e hoouka aku ia lakou ma na wahi paa o lakou.

22. A eia kekahi, hoonoho iho la makou i na kiu a puni, e hoomakakiu aku i na hana a ko Lamana poe, i ole ai lakou e maalo ae ia makou ma ka po, aole hoi ma ke ao, a hoouka ae i kekahi o ko makou mau kulanakauhale, ma ka akau;

23. No ka mea, ua ike makou aole lawa ko lakou ikaika, ma ua mau kulanakauhale la e halawai pu me lakou; nolaila la, ua makemake makou, ina e maalo ae lakou ia makou, e haule maluna iho o lakou ma ko lakou hope, a pela e hoouka aku ai ia lakou ma ka hope, i ka manawa hookahi a lakou e hoouka ia ai ma ke alo. Ua manao makou ua hiki ia makou ke lanakila aku maluna iho o lakou; aka hoi, ua loaa ole ia makou keia makemake o makou.

24. Aole lakou i aa e maalo ae ia makou me ko lakou poe koa a pau, aole hoi lakou i aa me kekahi hapa, o lawa ole auanei ko lakou ikaika, a e haule iho lakou.

25. Aole hoi lakou i aa e hele ae ilalo i ke kulanakauhale o Zarahemela; aole hoi lakou aa e hele aku i kela aoao o ke poo o Sidona, i ke kulanakauhale o Nepaiha.

26. A pela, me ko lakou poe koa, ua paa ko lakou manao e malama i ua mau kulanakauhale la a lakou i hoopio mai ai.

27. Ano, eia kekahi, i ka malama lua o keia makahiki, ua lawe ia mai ka ai a nui ia makou, mai na makuakane mai o koʻu poe keiki elua tausani.

28. A ua hoouna ia mai na kanaka elua tausani ia makou mai ka aina mai o Zarahemela. A pela ua hoomakaukau makou me na kanaka he umi tausani, a me ka ai no lakou, a no na wahine a lakou, a me ka lakou mau keiki no hoi.

29. A i ka ike ana o ko Lamana poe i na koa o makou e mahuahua ana pela i kela la i keia la, a me ka hiki ana o ka ai no ka hoolawa ana ia makou, hoomaka ae la lakou e hopohopo, a hoomaka ae la e puka mai, ina he mea hiki, ke hooki mai i ko makou loaa ana ka ai a me na koa.

30. Ano, ia makou i ike ai e hoomaka ana ko Lamana poe e oluolu ole ma keia mea, ua makemake makou e hana aku i hana maalea e puni ai lakou; nolaila, kauoha mai la o Anatipusa iaʻu e hele aku me koʻu poe keiki uuku, i kekahi kulanakauhale e pili koke mai ana, me he mea la e hali ana makou i ai i kekahi kulanakauhale kokoke.

31. A na makou e hele kokoke i ke kulanakauhale o Anatipara, me he mea la e hele ana makou i ke kulanakauhale ma o aku ma na palena ma ke kahakai.

32. A eia kekahi, hele aku la makou, me he mea la me ko makou ai pu kekahi, e hele aku i ua kulanakauhale la.

33. A eia hoi kekahi, hele mai la o Anatipusa, me kekahi hapa o kona poe koa me ka waiho ana i ke koena e malama i ke kulanakauhale. Aole nae oia i hele mai, a hiki e au mawaho me koʻu poe koa he uuku, a hookokoke ae la i ke kulanakauhale o Anatipara.

34. Ano, ua hoonoho ia iho la ma ke kulanakauhale o Anatipara, ka poe koa ikaika loa o ko Lamana poe; he oiaio, ka poe i oi aku ka nui.

35. A eia kekahi, i ka wa i hai ia ai ia lakou e ko lakou poe kiu, puka mai la lakou me ko lakou poe koa, a hele ku e mai la ia makou.

36. A eia kekahi, hee aku la makou imua o lakou i ka akau. A pela makou i alakai aku ai i ka poe koa ikaika loa o ko Lamana poe;

37. He oiaio, i kahi loihi, a no ia mea, ia lakou i ike aku ai i ka poe koa o Anatipusa e alualu ana ia lakou la, me ko lakou ikaika, aole lakou la i kapae i ka akau, aole hoi i ka hema, aka alualu mai la lakou ma ke ala pololei mahope o makou; a ia makou i manao ai e manao ana lakou e luku mai ia makou mamua o ka loaa ana o lakou ia Anatipusa, a o keia mea i ole ai lakou e hoopuni ia ae e ko makou poe kanaka.

38. Ano, i ka ike ana o Anatipusa i ko makou pilikia, hoolalelale ae la oia i ka hele ana o kona poe koa. Aka hoi, ua po iho la; nolaila, aole i loaa makou ia lakou, aole hoi i loaa lakou ia Anatipusa; nolaila, hoomoana iho la makou no ka po.

39. A eia kekahi, mamua o ka wehe ana o ke alaula, aia hoi, e alualu mai ana ko Lamana poe ia makou. Ano, aole i lawa ko makou ikaika e paio aku me lakou; he oiaio, aole au i ae aku e haule iho koʻu poe keiki uuku iloko o na lima o lakou; nolaila, hoomau aku la makou i ko makou hele ana; a hele aku la makou iloko o ka waonahele.

40. Ano, aole lakou i aa e kapae i ka akau, aole hoi i ka hema, o hoopuni ia lakou; aole hoi au e kapae i ka akau aole hoi i ka hema, o loaa mai auanei au ia lakou, a hiki ole paha ia makou ke kupaa imua o lakou, aka e luku ia mai, a e pakele aku lakou; a pela makou i hee aku ai ia la a po iloko o ka waonahele, a hiki i ka poeleele ana.

41. A eia kekahi, i ka puka hou ana mai o ka malamalama o ke kakahiaka, ike aku la makou i ko Lamana poe maluna iho o makou, a hee aku la makou imua o lakou.

42. Aka, aole lakou i alualu loihi mai ia makou, mamua o ko lakou ku ana; a i ke kakahiaka ia o ka la ekolu, ma ka malama ehiku.

43. Ano, ina ua loaa lakou ia Anatipusa, aole makou i ike, aka, i aku la au i koʻu poe kanaka, Aia hoi, aole kakou i ike malia paha ua ku lakou me ka manao e hele ku e aku kakou ia lakou, e hiki ia lakou ke hoohei mai ia kakou ma ko lakou pahele.

44. Nolaila, e koʻu poe keiki, heaha la ka oukou olelo, e hele ku e aku anei oukou ia lakou ma ke kaua?

45. Ano, ke i aku nei au ia oe, e koʻu hoahanau aloha o Moroni, aole au i ike e i ka nui o ka makau ole me ia, aole loa mawaena o ko Nepai poe a pau.

46. No ka mea, me aʻu i kapa mau ai ia lakou kaʻu poe keiki, (no ka mea, he poe opiopio loa lakou a pau,) pela no lakou i i mai ai iaʻu, E ka makua, aia hoi, me kakou pu ko kakou Akua, aole oia e ae mai e haule iho kakou; nolaila, e haele aku kakou; aole kakou e pepehi aku i ko kakou poe hoahanau, ina e hoopilikia ole mai lakou ia kakou; nolaila, e hele kakou, o lanakila auanei lakou maluna iho o ka poe koa o Anatipusa.

47. Ano la, aole o lakou nei i kaua e mamua, eia nae, aole o lakou makau i ka make; a ua manao nui loa aku lakou ma ka noho kauwa ole ana o ko lakou poe makuakane, mamua o ko lakou manao ana ma ko lakou mau ola iho; he oiaio, ua ao ia lakou e ko lakou poe makuwahine, ina aole o lakou kanalua, na ke Akua e hoopakele mai ia lakou.

48. A hai mai la lakou iaʻu i na olelo a ko lakou poe makuwahine, i ka i ana, aole o makou kanalua no ka ike o ko makou poe makuwahine ia mea.

49. A eia kekahi, hoi hou aku la au me koʻu mau tausani elua, e ku e aku i ua poe nei o ko Lamana ka poe i alualu mai ia makou. Ano hoi, ua loaa lakou i na puali o Anatipusa, a ua hoomaka kekahi kaua weliweli.

50. Ua maluhiluhi ka poe koa o Anatipusa no ko lakou hele loihi i ka wa pokole a ua aneane lakou e haule iho iloko o na lima o ko Lamana poe; a ina ua hoi ole ae au me koʻu mau tausani elua, ina ua loaa ia lakou la ka mea a lakou la i manao ai;

51. No ka mea, ua haule iho o Anatipusa ma ka pahikaua, a he nui no hoi o kona poe luna papa, no ko lakou luhi, i loaa ai ma ka hele kiki o lakou; nolaila, ua pioloke ka poe kanaka o Anatipusa, no ka haule iho o na luna o lakou, a hoomaka ae la lakou e hee aku imua o ko Lamana poe.

52. A eia kekahi, hooikaika iho la ko Lamana poe, a hoomaka ae la e alualu ae ia lakou; a pela ko Lamana poe e alualu ana ia lakou me ka ikaika nui, i ka wa a Helamana i hoouka aku ai ma ko lakou la hope me kona mau tausani elua, a hoomaka ae la e pepehi nui loa aku ia lakou la, a no ia mea, oki iho la ka poe koa a pau o ko Lamana, a huli mai la io Helamana la.

53. Ano, i ka wa o ka poe koa o Anatipusa i ike ai ua huli ae la ko Lamana poe, houluulu ae la lakou i na kanaka o lakou, a hoouka hou ae ma ka hope o ko Lamana poe.

54. Ano, eia kekahi, hoopuni iho la makou, ka poe kanaka o Nepai, o ka poe kanaka o Anatipusa, a owau hoi me koʻu mau tausani elua, i ko Lamana poe, a luku aku la ia lakou; he oiaio, a ua koi ia aku lakou e haawi mai i na mea kaua o lakou, a me lakou iho no hoi i poe pio o ke kaua.

55. Ano, eia kekahi, ia lakou i haawi pio mai ai ia lakou iho ia makou, aia hoi, helu ae la au i ua poe kanaka opiopio la, ka poe i kaua pu me au, me ka hopohopo ana o pepehi ia mai paha he nui o lakou a make.

56. Aka hoi, me ka olioli nui oʻu, aole i haule iho kekahi o lakou i ka honua; he oiaio, a ua kaua aku lakou me he la me ka ikaika o ke Akua; he oiaio, aole i ike e ia he poe kanaka mamua i kaua aku me ka mana kupaianaha me ia; a no ka mana loa o lakou i haule iho ai maluna o ko Lamana poe, ua hooweliweli aku ia lakou la; a no keia mea ua haawi mai ko Lamana poe ia lakou iho i poe pio o ke kaua.

57. A, aole o makou wahi no ko makou poe pio, i hiki ia makou ke kiai iho ia lakou e malama ai ia lakou mai na puali ae o ko Lamana poe, nolaila, hoouna aku la makou ia lakou i ka aina o Zarahemela, a o kekahi poe pu me lakou o kela poe kanaka o Anatipusa, ka poe i pepehi ole ia ai; a lawe ae la au i ke koena a hoohui pu mai la me koʻu poe opio Amona, a hoi hou aku la i ke kulanakauhale o Iudea.