1. A eia hou, ua kauoha ia mai owau, o Alama, e ke Akua, i lawe aku ai au ia Amuleka, a e hele aku a e hai olelo hou aku i ua poe kanaka nei, i ka poe kanaka iloko o ke kulanakauhale o Amoniha; a i ka wa aʻu i hoomaka ai e hai olelo aku ia lakou, hoomaka ae la lakou e paio mai me aʻu, i ka i ana,

2. Owai oe? Ke manao nei anei oe e manaoio makou i ka hoike ana o ke kanaka hookahi, ina e hai mai paha oia ia makou e hala aku ana auanei ka honua?

3. Ano, aole lakou i hoomaopopo i na olelo a lakou i olelo mai ai; no ka mea, aole lakou i ike e hala aku auanei ka honua.

4. A i mai la hoi lakou, Aole makou e manaoio i kau mau olelo, ina paha e wanana mai oe e anai ia mai keia kulanakauhale nui i ka la hookahi.

5. Ano, aole lakou i ike ua hiki i ke Akua ke hana mai i na hana kupanaha me neia, no ka mea, he poe kanaka naau paakiki a ai oolea lakou.

6. A i mai la lakou: Owai la ke Akua nana i hoouna mai i hookahi kanaka hoike wale no mawaena o keia poe kanaka, e hai mai ia lakou i ka oiaio o na mea nui a kupaianaha me neia?

7. A ku mai la lakou e kau mai i ko lakou mau lima maluna oʻu; aka hoi, aole lakou i kau mai. A ku iho la au me ka wiwo ole e hai aku ia lakou, he oiaio, hoike wiwo ole aku la au ia lakou, i ka i ana:

8. Aia hoi, e ka hanauna hewa a kekee, nani wale ko oukou hoopoina ana i na mooolelo o ko oukou poe kupuna; he oiaio, hiki wawe ko oukou hoopoina ana i na kauoha a ke Akua.

9. Aole anei oukou i hoomanao ua kai ia mai ko kakou kupunakane mailoko mai o Ierusalema ma ka lima o ke Akua? Aole anei oukou i hoomanao ua alakai ia mai lakou a pau e ia mawaena o ka waonahele?

10. A ua hoopoina anei oukou i keia manawa pokole, i ka nui o na manawa ana i hoopakele mai ai i ko kakou poe kupuna, mailoko mai o na lima o ko lakou poe enemi, a i hoola mai ia lakou i ole ai e luku ia, ma na lima o ko lakou poe hoahanau ponoi?

11. He oiaio, a ina aole no kona mana loa, a me kona aloha, a me kona hoomanawanui mai ia kakou, ina ua luku loa ia kakou me kahi ole e pakele ai, mai ka ili aku o ka honua, mamua loa o keia manawa, a hahao ia paha i kahi o ka eha a poino pau ole.

12. Ano, ke i aku nei au ia oukou, ke kauoha mai la oia ia oukou e mihi; a ke ole oukou e mihi, aole loa e hiki ia oukou ke komo iloko o ke aupuni o ke Akua. Aka hoi, aole o keia wale: Ua kauoha mai la oia ia oukou e mihi, i ole ia e luku loa oia ia oukou mailuna aku o ka ili o ka honua nei; he oiaio, e hele mai oia ia oukou ma kona inaina, a ma kona inaina wela aole oia e huli ae.

13. Aia hoi, aole anei oukou e hoomanao i na olelo ana i olelo mai ai ia Lehi, i ka i ana, Ina e malama pono mai oukou i kaʻu mau kauoha, e hoopomaikai ia oukou ma ka aina? A eia hou, ua olelo ia, Ina aole oukou e malama i kaʻu mau kauoha, e hooki ia aku oukou mai ke alo aku o ka Haku.

14. Ano, ke makemake nei au e hoomanao oukou, i ko ko Lamana poe malama ole ana i na kauoha a ke Akua, ua hooki ia aku la lakou mai ke alo aku o ka Haku. Ano, ke ike nei kakou ua ko ka olelo a ka Haku ma keia mea, a ua hooki ia aku ko Lamana poe mai kona alo aku, mai ka hoomaka ana mai o ko lakou lawehala ana ma ka aina.

15. Aka hoi, ke i aku nei au ia oukou, e aho no ka hewa ana o lakou i ko oukou, ma ka la e hookolokolo, ke noho oukou iloko o ko oukou mau hewa; he oiaio, e aho no hoi lakou ia oukou, ma keia ola ana, ke mihi ole oukou,

16. No ka mea, ua nui na olelo hoopomaikai i o ia i ko Lamana poe; no ka mea, no na mooolelo o ko lakou poe kupuna i noho ai lakou iloko o ko lakou noho naaupo ana; nolaila, e aloha ae no ka Haku ia lakou, a e hooloihi ae i ko lakou ola ma ka aina.

17. A ma kekahi manawa e lawe ia mai ai lakou e manaoio i kana olelo, a e ike i ka pololei ole o na mooolelo a ko lakou poe kupuna; a e hoola ia he nui wale o lakou, no ka mea, e aloha mai no ka Haku i ka poe a pau i kahea aku i kona inoa.

18. Aka hoi, ke i aku nei au ia oukou, ina e hoomau aku oukou ma ka oukou hana hewa, aole loa e hooloihi ia ko oukou mau la ma ka aina, no ka mea, e hoouna ia mai auanei ko Lamana poe maluna o oukou; a ke mihi ole oukou, e hele mai lakou i kahi manawa a oukou e ike ole ai, a e hoopai ia oukou me ka luku loa ia ana; a e like ia me ka inaina wela o ka Haku;

19. No ka mea, aole oia e ae mai ia oukou e noho iloko o ka oukou mau hala, e luku mai ai i kona poe kanaka. Ke i aku nei au ia oukou, aole; ua oi aku ka makemake ona e hookuu mai i ko Lamana poe e luku mai i keia poe kanaka a pau, ka poe i kapa ia ka poe kanaka o Nepai, ina he mea e hiki ai ia lakou ke haule iloko o na hewa a me na hala, mahope iho o ka loaa ana ka malamalama a nui me neia, a me ka ike a nui me neia, i haawi ia mai ia lakou e ka Haku ko lakou Akua;

20. Mahope iho o ka lilo ana i lahui hoopomaikai nui loa ia mai me neia e ka Haku; he oiaio, mahope iho o ka hoopomaikai loa ia ana mamua o na aupuni, o na ohana, o na olelo, a o na lahuikanaka e ae a pau; mahope iho o ka hoike ia ana mai o na mea a pau ia lakou, e like me ko lakou makemake, a me ko lakou manaoio, a me ka lakou pule, no na mea i hala, a me na mea i neia wa, a e hiki mai ana;

21. I alakai ia ai ma ka Uhane o ke Akua; i kamailio pu ai me na anela, a i olelo ia mai ai e ka leo o ka Haku; a i loaa ai ka haawina o ka wanana, a me ka Uhane o ka hoikeana, a me na haawina he nui hoi; o ka haawina o ka olelo ana ma na olelo e, a me ka haawina o ka hai-olelo, a me ka haawina o ka Uhane Hemolele, a me ka haawina o ka unuhi olelo ana;

22. He oiaio, a mahope iho o ka hoopakele ia ana mailoko mai o ka aina o Ierusalema ma ka lima o ka Haku; i hoopakele ia mai ka wi mai, a mai ka mai mai, a mai na eha a pau mai o kela ano keia ano; a ua hoomahuahua ikaika ia mai ma ke kaua, i luku ole ia ai lakou; i lawe ia mai ai mailoko mai o ka noho luhi ana ia manawa aku ia manawa aku, a i malama ia a i hoola ia a hiki i keia manawa; a ua hoomaikai ia lakou a waiwai loa ma kela ano keia ano o na mea a pau.

23. Ano, ke i aku nei au ia oukou, ina e hana hewa keia poe kanaka, ka poe i loaa ai na mea pomaikai a nui loa me neia mai ka lima mai o ka Haku, me ke ku e i ka malamalama a me ka ike a lakou i loaa ai; ke i aku nei au ia oukou, ina pela ka hana; ina e haule lakou iloko o ka hewa, e aho loa no ko Lamana poe ia lakou.

24. No ka mea hoi, ua o ia mai na olelo pomaikai a ka Haku i ko Lamana poe, aka, aole ua mau mea nei ia oukou, ke lawehala oukou; no ka mea, aole anei ka Haku i olelo paa mai a i hooholo paa iho, ina e kipi aku oukou ia ia, e luku loa ia auanei oukou mai ka ili aku o ka honua?

25. Ano, no keia mea, i ole ai oukou e luku ia, ua hoouna mai ka Haku i kona anela e ike i na mea he nui o kona poe kanaka, e hai ana ia lakou, e hele aku no lakou a e kahea ikaika aku i keia poe kanaka, i ka i ana, E mihi oukou, no ka mea, ua kokoke mai ke aupuni o ka lani;

26. Aole nui na la ma keia hope aku, e hele mai ke Keiki a ke Akua ma kona nani; a o kona nani, o ka nani auanei ia o ka Hanau-kahi o ka Makua, piha i ka lokomaikai, i ka pololei a oiaio, piha i ke ahonui, i ke aloha, a me ka hoomanawanui, hiki wawe e hoolohe i na kahea ana a kona poe kanaka, a e haawi mai e like me ka lakou pule.

27. A, aia hoi, e hele mai ana oia e hoolapanai mai i ka poe a pau e bapetizo ia i ka mihi, ma o ka manaoio la ma kona inoa;

28. Nolaila, ea, e hoomakaukau oukou i ke ala o ka Haku; no ka mea, ua kokoke mai ka manawa e ohi ai na kanaka a pau i ka uku o ka lakou mau hana, e like me ke ano o ka lakou mau hana; ina he pono ua mau hana la, e ohi auanei lakou i ke ola no ko lakou poe uhane, e like me ka mana a me ka hoopakele ana o Iesu Kristo; a ina he ino ua mau hana la, e ohi no auanei lakou i ka poino no ko lakou poe uhane, e like me ka mana a me ka hoopio ana o ke diabolo.

29. Ano hoi, o ka leo o ka anela keia, e kahea aku ana i na kanaka.

30. Ano, e koʻu poe hoahanau i aloha ia, no ka mea, o koʻu poe hoahanau oukou, a e aloha ia oukou e pono ai, a e hua mai hoi oukou i na hana i ku i ka mihi e pono ai, i ka ike ana ua hoopaakiki loa ia ko oukou mau naau e ku e i ka olelo a ke Akua, a i ka ike ana hoi he poe kanaka lilo a haule oukou.

31. Aka, eia kekahi, i ka wa aʻu, a Alama, i olelo aku ai i ua mau olelo nei, aia hoi, huhu iho la na kanaka iaʻu, no kaʻu i ana ae ia lakou, he poe kanaka naau paakiki a ai oolea lakou;

32. A no kaʻu i ana ae ia lakou, he poe kanaka lilo a haule lakou, ua huhu mai lakou iaʻu, a imi iho la e kau mai i ko lakou mau lima maluna iho oʻu, e hiki ia lakou ke hoolei mai iaʻu iloko o ka halepaahao.

33. Aka, aole i ae mai la ka Haku ia lakou e lawe mai iaʻu ia manawa, a e hoolei mai iaʻu iloko o ka halepaahao.

34. A eia kekahi, hele ae la o Amuleka a ku iho la, a hoomaka ae la e hai olelo aku ia lakou no hoi. Ano, aole i palapala ia na olelo a pau a Amuleka; he hapa nae o kana mau olelo ka i palapala ia iloko o keia buke.