1. A, aia hoi kekahi, ua huhu nui loa ae ua poe la o Lamana, no ko lakou pepehi ana i ko lakou poe hoahanau; nolaila, hoohiki iho la lakou e hookau aku i ka hoopai maluna iho o ko Nepai poe; a, aole lakou i hoao hou e pepehi mai i ka poe kanaka o Anati-Nepai-Lehi ia manawa;

2. Aka, lawe aku la lakou i ko lakou poe koa a hele aku la ma na palena o ka aina o Zarahemela a haule iho la maluna iho o ka poe kanaka e noho ana ma ka aina Amoniha, a luku ae la ia lakou.

3. A mahope iho o ia mea, ua nui na kaua o lakou me ko Nepai poe, a ma ua mau kaua nei ua hooauhee ia aku a pepehi ia aku lakou;

4. A mawaena o ko Lamana poe i pepehi ia, ua aneane pau loa ka poe hua a Amulona a me kona poe hoahanau, ka poe kahuna lakou mamua a Noa, a ua pepehi ia lakou ma na lima o ko Nepai poe;

5. A o ka poe o lakou i koe ua holo aku iloko o ka waonahele hikina, a ua lawe pakaha iho i ka mana a me ka noho alii ana maluna iho o ko Lamana poe, a kena ae la o kekahi poe he nui o ko Lamana poe e puhi ia ma ke ahi, no ko lakou manaoio;

6. No ka mea, o kekahi poe he nui loa o lakou, mahope iho o ka loaa ana ka poino nui a me na mea pilikia he nui wale me neia, hoomaka iho la e hooeueu ia e hoomanao iho i na olelo a Aarona me kona poe hoahanau i hai aku ai ia lakou ma ko lakou aina; nolaila, hoomaka ae la lakou e hoomaloka aku i na mooolelo o ko lakou poe kupuna, a e manaoio i ka Haku, nana i haawi i ka mana nui i ko Nepai poe; a pela hoi he nui wale o lakou i hoohuli ia ai ma ka waonahele.

7. A eia kekahi, kena ae la ua poe luna la, o lakou no ka poe i koe o na keiki a Amulona, e pepehi ia lakou nei, he oiaio, o ka poe a pau i manaoio i ua mau mea nei.

8. Ano, no keia luku ana ua hooeueu ia kekahi poe he nui loa o ko lakou poe hoahanau me ka huhu; a hoomaka ae la ka paio ma ka waonahele; a hoomaka ae la ko Lamana poe e imi i ka poe keiki a Amulona a me kona poe hoahanau, a hoomaka ae la e pepehi aku ia lakou, a hee aku la lakou iloko o ka waonahele hikina.

9. A, aia hoi, ua imi ia lakou i keia manawa e ko Lamana poe; pela i ko mai ai na olelo a Abinadi, ana i olelo mai ai no na hua a ka poe kahuna, ka poe i kena mai i loaa ai ia ia ka make ma ke ahi.

10. No ka mea, i aku la oia ia lakou, O ka mea a oukou e hana mai ai iaʻu, he hoailona auanei ia no na mea e hiki mai ana.

11. Ano, o Abinadi no ka mua i loaa ai na eha o ka make ma ke ahi, no kona manaoio aku i ke Akua; ano, eia no ke ano o kana olelo, e loaa auanei i kekahi poe he nui ka make ma ke ahi, e like me kana i loaa ai.

12. A i aku la oia i ka poe kahuna a Noa, na ka lakou poe hua e kena aku auanei e pepehi ia a make na mea he nui, ma ke ano e like me ia, a e hoopuehu ia aku a e pepehi ia aku lakou, me he hipa la me ke kahu ole i hoa ia aku a i pepehi ia aku e na holoholona hihiu; ano, aia hoi, ua ko mai ua mau olelo nei, no ka mea, ua hoa ia aku lakou e ko Lamana poe, a ua imi ia aku lakou, a ua hahau ia aku lakou.

13. A eia kekahi, i ka wa a ko Lamana poe i ike ai ua hiki ole ia lakou ke lanakila maluna iho o ko Nepai poe, hoi hou aku la lakou i ko lakou aina iho; a ua nui loa ka poe o lakou i hele mai i ka aina o Isemaela a me ka aina o Nepai, a hoohui pu iho la ia lakou iho me ka poe kanaka o ke Akua, oia ka poe kanaka o Anati-Nepai-Lehi;

14. A kanu iho la hoi lakou i na mea kaua o lakou, e like me ka hana ana a ko lakou poe hoahanau a hoomaka ae la lakou e lilo i poe kanaka pono; a hele aku la lakou ma na aoao o ka Haku, a malama iho la i kana mau kauoha a me kona mau kanawai;

15. He oiaio, a ua malama iho lakou i ke kanawai o Mose; no ka mea, he mea e pono ai no lakou e malama i ke kanawai o Mose i keia manawa, no ka mea, aole i pau ia i ka hooko ia. Aka, me ke kanawai nae o Mose, ua nana lakou imua i ka hiki ana mai o Kristo, e manao ana he hoailona ke kanawai o Mose no kona hiki ana mai, a e manaoio ana he mea e pono ai na lakou e malama i kela mau oihana kuwaho, a hiki i ka manawa e hoike ia mai ai oia ia lakou.

16. Ano, aole lakou i manao ua hiki mai ke ola ma o ke kanawai la o Mose; aka, o ke kanawai o Mose he mea ia e hooikaika ai i ko lakou manaoio iloko o Kristo; a pela hoi lakou i hoopaa mai ai i kekahi manaolana, ma o ka manaoio la, i ke ola mau loa, e hilinai ana i ka Uhane o ka wanana, ka mea i olelo mai no ua mau mea la e hiki mai ana.

17. Ano, aia hoi, hauoli nui loa iho la o Amona, a me Aarona, a me Omanera, a me Himani, a me ko lakou poe hoahanau, no ka pomaikai i loaa ai ia lakou mawaena o ko Lamana poe, me ka ike ana ua haawi mai la ka Haku ia lakou e like me ka lakou mau pule, a ua hooko mai no hoi i kana olelo ia lakou ma na mea a pau.