1. Ano, ia Amona e ao mau ana peia i ka poe kanaka o Lamoni, e hoi no kakou i ka mooolelo o Aarona a me kona mau hoahanau; no ka mea, mahope iho o kona hele ana mai ka aina o Midoni aku, ua alakai ia aku oia e ka Uhane i ka aina o Nepai, i ka hale o ke alii maluna iho o ka aina a pau, koe wale no ka aina o Isemaela; a oia no ka makuakane o Lamoni.

2. A eia kekahi, hele aku la oia iloko io na la, iloko o ko ke alii halealii, me kona mau hoahanau, a kulou iho la ia imua o ke alii, a i aku la ia ia, Aia hoi, e ke alii, o makou no na hoahanau o Amona au i hoopakele mai ai mailoko mai o ka halepaahao.

3. A, ano, e ke alii, ina e hookoe mai oe i ko makou mau ola, e lilo makou i mau kauwa nau. A i mai la ke alii ia lakou, E ala ae, no ka mea, e ae aku au ia oukou i ko oukou mau ola, a aole au e ae aku e lilo oukou i mau kauwa naʻu; aka, e koi aku au i lawelawe mai ai oukou iaʻu; no ka mea, ua anoninoni au ma kekahi mau mea ma ka naau, no ka lokomaikai, a me ka nui o na olelo a kou kaikaina o Amona; a ke makemake nei au e ike i ke kumu o kona pii pu ole mai mai Midoni mai, me oe.

4. A i aku la o Aarona i ke alii, Aia hoi, ua kahea ka Uhane o ka Haku ia ia i kekahi ala e; ua hele aku la oia i ka aina o Isemaela, e ao aku i ka poe kanaka o Lamoni.

5. Ano, i mai la ke alii ia lakou, Heaha la keia mea a oukou i olelo mai ai no ka Uhane o ka Haku? Aia hoi, o keia no ka mea e anoninoni mai nei iaʻu.

6. A, heaha keia hoi a Amona i i mai ai: Ina e mihi oe e hoola ia auanei oe, a ina aole oe e mihi, e hoolei ia aku auanei oe ma ka la hope?

7. A pane aku la o Aarona ia ia, a i aku la ia ia, Ke manaoio nei anei oe aia no he Akua? A i ae la ke alii, Ua ike au ke i mai la ko Amaleki poe aia no he Akua, a ua ae aku au ia lakou e kukulu i na halelaa, i akoakoa ai lakou ma kahi hookahi, e hoomana aku ia ia. A ina e olelo mai ana oe ano, aia no he Akua, aia hoi, e manaoio no au.

8. Ano, ia Aarona i lohe ai i keia, hoomaka ae la kona naau e hauoli, a i aku la oia, Aia hoi, he oiaio, me oe e ola nei, e ke alii, aia no he Akua.

9. A i aku la ke alii, O ke Akua anei kela Uhane Nui nana i lawe mai i ko kakou poe kupuna mailoko mai o ka aina o Ierusalema?

10. A i aku la o Aarona ia ia, Ae, oia no ua Uhane Nui la, a ua hana mai la oia i na mea a pau, ma ka lani a ma ka honua no hoi; ke manaoio nei anei oe i keia?

11. A i ae la oia, Ae, ke manaoio nei au na ka Uhane Nui i hana mai i na mea a pau, a ke makemake nei au ia oe e hai mai iaʻu no ua mau mea nei a pau, a e manaoio no au i kau mau olelo.

12. A eia kekahi, ia Aarona i ike ai e manaoio ana ke alii i kana mau olelo, hoomaka ae la oia ma ka hanai ia ana mai o Adamu, e heluhelu ana i na palapala hemolele i ke alii; no ka hana ana a ke Akua i kanaka mamuli o kona ano like iho, a haawi mai la ke Akua ia ia i na kauoha, a no ka lawehala ana, ua haule ke kanaka.

13. A hoomaopopo aku la o Aarona ia ia i na palapala hemolele, mai ka hana ia ana mai o Adamu, e hoomoakaka ana i ka haule o ke kanaka imua ona, a me ko lakou noho kino ana, a me ke kumumanao hoolapanai no hoi, i hoomakaukau ia ai mai ka hookumu ia ana mai o ke ao nei, ma o Kristo la, no ka poe a pau i manaoio ma kona inoa.

14. A mahope mai o ko ke kanaka haule ana, aole loa i hiki ia ia ke loaa kekahi mea ma ona iho; aka e kalahala ana na eha a me ka make o Kristo no ko lakou mau hewa, ma o ka manaoio a mihi la, a pela aku; a nana e moku i na mea paa o ka make, i lanakila ole ai ka lua, a i ale ia ai ka huelo awa o ka make iloko o na manaolana o ka nani; a hoomoakaka aku la o Aarona i keia mau mea a pau i ke alii.

15. A eia kekahi, mahope iho o ka hoomoakaka ana o Aarona i ua mau mea nei ia ia, i mai la ke alii, Heaha kaʻu e hana ai, i loaa mai ai iaʻu ua ola mau loa nei au i olelo mai ai? He oiaio, heaha la kaʻu e hana ai, i hoohanau ia mai ai au no ke Akua, me keia uhane ino i uhuki ia mailoko ae o koʻu naau, a e loaa iho kona Uhane, i hoopiha ia ai au me ka olioli, i hoolei ole ia aku ai au ma ka la hope? Aia hoi, wahi ana, e haawi aku no au i kuu mau mea a pau aʻu i loaa ai; he oiaio, e haalele aku au i kuu aupuni, e hiki iaʻu ke loaa keia olioli nui.

16. Aka, i aku la o Aarona ia ia, Ina e makemake ana oe i keia mea, ina e kulou iho oe ilalo imua o ke Akua, he oiaio, ina e mihi oe i kou mau hewa a pau, a e kulou iho ilalo imua o ke Akua, a e kahea aku ma kona inoa ma ka manaoio, e manaoio ana e loaa mai ana ia oe, alaila, e loaa no ia oe ka manaolana au i makemake ai.

17. A eia kekahi, ia Aarona i olelo mai ai i keia mau olelo, kulou iho la no ke alii ilalo imua o ka Haku, ma kona mau kuli; he oiaio, hoomoe ilalo oia ia ia iho ma ka honua, e kahea ikaika ana, me ka i ana.

18. E ke Akua e, ua hai mai o Aarona iaʻu aia no he Akua; a ina aia no he Akua, a ina o ke Akua ooe, ea, e hoike mai ia oe iho iaʻu, a e haawi aku no au i koʻu mau hewa a pau i ike ai au ia oe, a i hoala ia mai ai au mai ka make mai, a e hoola ia ma ka la mahope. A, ano, i ka wa a ke alii i olelo ae ai i ua mau olelo nei, ua loohia oia me he mea la ua make.

19. A eia kekahi, holo aku la kana poe kauwa, a hai aku la i ke aliiwahine i na mea a pau i hiki mai ai maluna iho o ke alii. A komo mai oia iloko i ke alii la; a ia ia i ike ai i kela e moe ana me he mea la ua make, a e ku ana no hoi o Aarona a me kona mau hoahanau me he mea la o lakou no ke kumu o kona haule ana, ua huhu oia ia lakou, a kena ae la i kana poe kauwa, oia hoi ka poe kauwa a ke alii, e hopu ae ia lakou a e pepehi ia lakou.

20. Ano, ua ike na kauwa i ke kumu o ko ke alii haule ana, nolaila, aole lakou i aa e kau aku i na lima o lakou maluna iho o Aarona, a me kona mau hoahanau; a noi aku la lakou i ke aliiwahine, i ka i ana, No ke aha la oe i kena mai ai ia makou nei e pepehi aku i keia mau kanaka, i ka wa hoi i oi aku ka mana o kekahi o lakou mamua o makou nei a pau? Nolaila, e haule no makou imua o lakou.

21. Ano, i ka wa a ke aliiwahine i ike ai i ka makau o na kauwa, hoomaka no hoi oia e makau nui loa, o hiki mai kekahi mea ino maluna iho ona. A kena ae la oia i kana poe kauwa e hele aku a e kahea aku i na kanaka, e hiki ia lakou ke pepehi mai ia Aarona a me kona mau hoahanau.

22. Ano, ia Aarona i ike ai i ka manao paa o ke aliiwahine, a e ike ana no hoi oia i ka paakiki o na naau o na kanaka, makau iho la oia o hoakoakoa ia mai na kanaka he lehulehu, a e paio nui, a e haunaele nui auanei mawaena o lakou; nolaila, o aku la oia i kona lima a hoala mai la i ke alii mai ka honua ae, a i aku la ia ia, E ku. A ku iho la oia ma kona mau wawae, e loaa ana kona ikaika.

23. Ano, ua hana ia keia ma ke alo o ke aliiwahine, a me na mea he nui o ka poe kauwa. A ia lakou i ike ai ia mea, kahaha nui iho la lakou, a hoomaka ae la e makau. A ku iho la ke alii imua a hoomaka aku la e lawelawe aku ia lakou. A lawelawe aku la oia ia lakou, a hoohuli ia ko kona hale a pau i ka Haku.

24. Ano, ua hoakoakoa ia mai no he poe lehulehu no ke kauoha a ke aliiwahine, a hoomaka ae la na ohumu nui ana mawaena o lakou, no Aarona a me kona mau hoahanau.

25. Aka, ku iho la ke alii mawaena o lakou, a lawelawe aku la ia lakou. A ua hoonana ia lakou ia Aarona, a me ka poe pu me ia.

26. A eia kekahi, i ka wa a ke alii i ike ai ua hoona ia na kanaka, hooku iho la oia ia Aarona a me kona mau hoahanau mawaena konu o na kanaka, i hai aku ai lakou i ka olelo ia lakou la.

27. A eia kekahi, hoouna aku la ke alii i olelo hoolaha mawaena o ka aina a pau, mawaena o kona poe kanaka a pau, ka poe e noho ana ma na wahi a pau, e waiho ana ma ke kai, ma ka hikina, a ma ke komohana hoi, a i hookaawale ia mai ka aina ae o Zarahemela e kekahi wahi paiki loloa o ka waonahele, mai ke kai hikina a hiki wale aku i ke kai komohana, a, a puni ma na kapa o kahakai, a ma na kapa o ka waonahele aia ma ka akau, ma ka aina o Zarahemela, mawaena o na mokuna o Manati, ma ke poo o ka muliwai o Sidona, mai ka hikina aku i ka komohana; a pela i hookaawale ia ai ko Lamana poe a me ko Nepai poe.

28. Ano, o ka poe palaualelo loa o ko Lamana poe, noho iho la lakou ma ka waonahele, a noho iloko o na halelewa; a ua hoopalahalaha ia lakou mawaena o ka waonahele, ma ke komohana, ma ka aina o Nepai; he oiaio, a ma ke komohana no hoi o ka aina o Zarahemela, ma na palena, ma ke kahakai, a ma ke komohana, ma ka aina o Nepai, ma kahi o ko ko lakou poe kupuna hooilina mua, a pela e moe ana ma kahakai.

29. A he nui no hoi ko Lamana poe ma ka hikina ma kahakai, kahi a ko Nepai poe i hooauhee aku ai ia lakou. A pela ua aneane poai puni ia ko Nepai poe e ko Lamana poe; aka hoi, ua loaa iho la i ko Nepai poe na wahi a pau ma ka akau o ka aina, e moe ana ma ka waonahele ma ke poo o ka muliwai Sidona, mai ka hikina a hiki aku i ke komohana, a puni ma ka aoao waonahele; ma ka akau, a hiki wale aku lakou i ka aina a lakou i kapa aku ai o Momona.

30. A moe iho la ia ma ka aina a lakou i kapa aku ai o Neoneo; ma ka akau loa ia a hiki aku i ka aina i piha e mamua i na kanaka, a i luku ia, no lakou na iwi a makou i olelo aku ai, ka mea i loaa ai i ka poe kanaka o Zarahemela; oia no kahi a lakou i pae mua ai.

31. A hele mai la lakou mailaila mai iluna ae i loko o ka waonahele hema. Pela ae la ua kapa ia ka aina ma ka akau o Neoneo, a o ka aina ma ka hema ua kapa ia o Momona; oia no ka waonahele i piha i na holoholona hihiu o kela ano o keia ano; o kekahi poe o lakou ua hele mai mai ka aina akau, no ka ai.

32. A, ano, hookahi la a me ka hapalua wale no ka loihi o ka hele ana no kekahi o ko Nepai poe, ma ka palena o ka aina Momona, a me ka aina Neoneo, mai ke kai hikina i ke kai komohana; a pela iho la ua aneane hoopuni ia ka aina o Nepai, a me ka aina o Zarahemela, me ke kai; aia no he puali uuku o ka aina mawaena o ka aina ma ka akau, a me ka aina ma ka hema.

33. A eia kekahi, ua noho iho la ko Nepai poe ma ka aina Momona, mai ke kai hikina a hiki aku i ke kai komohana, a pela ko Nepai poe ma ko lakou naauao, me ko lakou poe koa kiai a me ko lakou poe kaua, i hoopuni aku ai i ko Lamana poe ma ka hema, i hiki ole ai ia lakou ke loaa hou kahi e noho ai ma ka akau, i hiki ole ai ia lakou ke kawowo aku i ka aina ma ka akau;

34. Nolaila, ua hiki ole i ko Lamana poe ke loaa hou aku na wahi e noho ai, ma ka aina o Nepai wale no, a me ka waonahele a puni. A he mea naauao keia ma ko Nepai poe; no ka mea, he enemi ko Lamana poe ia lakou, i ole ai lakou e loaa ko lakou mau mea pilikia ma kela aoao keia aoao, a i hiki ia lakou ke loaa no hoi kekahi aina kahi a lakou e holo aku ai, e like me ko lakou mau makemake.

35. Ano, mahope iho o kaʻu olelo ana i keia, ke hoi hou nei au i ka mooolelo o Amona, a me Aarona, o Omanera, a me Himani, a me ko lakou mau hoahanau.