1. Ano, e kaʻu keiki, eia hou kekahi aʻu e olelo aku nei ia oe; no ka mea, ke ike nei au ua hoohihia ia kou naau no ke alahouana o ka poe make.

2. Aia hoi, ke i aku nei au ia oe, aole he alahouana; a i ole ia, e olelo au ma na olelo e ae, aole e aahu ana keia make i ka make ole; aole e aahu ana keia palaho i ka palaho ole, a hiki aku i ka wa mahope iho o ka hiki ana mai o Kristo.

3. Aia hoi, e lawe mai ana oia i ke alahouana o ka poe make. Aka hoi, e kaʻu keiki, aole i keia manawa ke alahouana. Ano, he mea pohihihi kaʻu e wehewehe ana ia oe; aka hoi, ua nui na mea pohihihi, i aua ia ai i ike ole kekahi ia mau mea, o ke Akua wale no i koe. Aka, ke hoike aku nei au i kekahi mea, aʻu i ninau molowa ole ai i ke Akua, i ike ai au; oia keia, no ke alahouana.

4. Aia hoi, aia no he manawa e wae ia i puka mai ai auanei na mea a pau mai ka make mai. Ano, o ka wa e hiki mai ana ua manawa la, aole o kekahi mea i ike; aka, o ke Akua ka i ike i ka manawa i wae ia ai.

5. Ano, ina paha he manawa mua, a he manawa lua, a he manawa kolu, e puka mai ai na kanaka mai ka make mai, he mea pili ole ia; no ka mea, o ke Akua ka i ike i keia mau mea a pau; a ua lawa iaʻu e ike he oiaio keia; ua wae ia he manawa e ala ai na mea a pau mai ka make mai.

6. Ano, aia no he wa e pono ai mawaena o ka manawa o ka make, a me ka manawa o ke alahouana.

7. Ano, ke makemake nei au e ninau, heaha la ka mea i hana ia mai i na uhane o na kanaka, mai ka manawa o ka make ana, a hiki i ka manawa i wae ia no ke alahouana?

8. Ano, ina paha he nui aku na manawa mamua o ka manawa hookahi i wae ia no na kanaka e ala ai, he mea pili ole ia; no ka mea, aole e make ana na mea a pau i ka manawa hookahi, a he mea pili ole keia; o na manawa a pau ua like ia me ka la hookahi me ke Akua; a ua ana ia mai ka manawa i na kanaka wale no;

9. Nolaila, ua wae ia he manawa i na kanaka, e ala ai lakou mai ka make mai; a aia no he wa mawaena o ka manawa o ka make a me ke alahouana. Ano, no keia kowa o ka manawa; o ka mea i hana ia mai i na uhane o na kanaka, oia ka mea aʻu i ninau molowa ole ai i ka Haku e ike; a o keia no ka mea aʻu i ike ai.

10. A i ka hiki ana mai o ka manawa ia lakou a pau e ala ai, alaila, e ike no lakou ua ike o ke Akua i na manawa a pau i wae ia i na kanaka.

11. Ano, no ka noho ana o ka uhane mawaena o ka make ana a me ke alahouana. Aia hoi, ua hoike ia mai iaʻu, e kekahi anela, ua lawe ia aku na uhane o na kanaka a pau, i ka wa a lakou i haalele ai i keia kino make; he oiaio, na uhane o na kanaka a pau, ina he maikai lakou ina he hewa paha, ua lawe ia aku i kela Akua nana i haawi mai ia lakou i ke ola.

12. Alaila, e hiki mai keia, o na uhane o ka poe i pono, ua hookipa ia iloko o kahi o ka pomaikai, i kapa ia o paradaiso; he wahi maha; he wahi maluhia, kahi o lakou e noho hoomaha ai mai ko lakou mau pilikia ae a pau, a mai ke kaumaha ae a pau, a mai ka luuluu ae, a me ia mea aku ia mea aku.

13. Alaila, e hiki mai keia, o na uhane o ka poe hewa, he oiaio, o ka poe i ino; no ka mea hoi, aole o lakou wahi kuleana, aole hoi wahi lihi iki o ka Uhane o ka Haku; no ka mea, ua koho aku lakou i na hana ino, mamua o na hana maikai; nolaila, komo ae la ka uhane o ke diabolo iloko o lakou, a loaa iho la ko lakou hale; a e hoolei ia aku ua poe nei iloko o ka pouli mawaho; ilaila ka uwe ana, a me ke kumakena ana, a me ka uwi ana o na niho; a o keia mau mea no ko lakou mau hala iho; i alakai pio ia ai i ka makemake o ke diabolo.

14. Ano, oia no ka noho ana o na uhane o ka poe hewa; he oiaio, iloko o ka pouli, e nana weliweli, hopohopo ana no ka ukiuki wela o ka inaina o ke Akua maluna iho o lakou; pela lakou i noho ai ma keia wahi, a o ka poe pono hoi iloko o paradaiso, a hiki aku i ka manawa o ko lakou alahouana.

15. Ano, ua manao kekahi poe he ala mua ana keia wahi o ka pomaikai, a me keia wahi o ka poino o ka uhane, mamua o ke alahouana. He oiaio, ke ae aku nei au ua hiki keia ke kapa ia he alahouana; o ke ala ana o ka uhane, a me kona waiho ia ana i ka pomaikai, a i ole ia, i ka poino, e like me na olelo i olelo ia ai.

16. A eia hou, ua olelo ia, aia no he ala mua ana; he alahouana o ka poe a pau i noho mamua, a me ka poe e noho la, a me ka poe e noho ana auanei, a hiki aku i ke alahouana o Kristo mai ka make mai.

17. Ano, aole o kakou manao o keia ala mua ana i olelo ia mai ai ma keia ano, o ke alahouana o na uhane ia, a me ko lakou waiho ia ana i ka pomaikai, a i ole ia, i ka poino. Aole e hiki ia oe ke manao o keia no ka mea i manao ia.

18. Aia hoi, ke i aku nei au ia oe, aole; aka, o ka mea i manao ia oia no ka hui hou ana o ka uhane me ke kino o ka poe mai na la o Adamu, a hiki wale aku i ke alahouana o Kristo.

19. Ano, ina paha e hoohui hou ia na uhane a me na kino o kela poe a pau i olelo ia ae nei, ma ka manawa hookahi, o ka poe hewa pu me ka poe pono, aole au e olelo aku nei; ua lawa kaʻu e i aku nei e puka mai lakou a pau; ma na olelo e ae, e hiki mai ana ko lakou alahouana mamua o ke alahouana o ka poe e make ana mahope iho o ke alahouana o Kristo.

20. Ano, e kaʻu keiki, aole au e i aku nei e hiki mai ana ko lakou alahouana ma ke alahouana o Kristo; aka hoi, ke haawi aku nei au ia mea me he manao la noʻu, ua hoohui hou ia na uhane a me na kino o ka poe pono, ma ke alahouana o Kristo, a me kona pii ana i ka lani.

21. Aka, ina paha ma kona alahouana, ina paha mahope aku, aole au e i aku; aka, o keia kaʻu e i aku nei, aia no he kowa mawaena o ka make a me ke alahouana o ke kino, a he noho ana o ka uhane iloko o ka pomaikai, a i ole ia, iloko o ka poino, a hiki aku i ka manawa i wae ia e ke Akua e puka mai ai ka poe make, a e hoohui hou ia, o ka uhane pu me ke kino, a e kai ia e ku iho imua o ke Akua, a e hookolokolo ia e like me ka lakou mau hana;

22. He oiaio, e lawe mai ana keia i ka hoihoi hou ia ana o kela mau mea i olelo ia ai ma na waha o ka poe kaula.

23. E hoihoi hou ia ka uhane i ke kino, a o ke kino i ka uhane; he oiaio, a o kela lala keia lala, a o kela ami keia ami, e hoihoi hou ia auanei i kona kino;

24. He oiaio, aole e lilo kekahi lauoho o ke poo, aka e hoihoi hou ia na mea a pau i ko lakou wahi ponoi a maikai. Ano, e kaʻu keiki, o keia no ka hoihoi hou ia ana i olelo ia ma na waha o ka poe kaula;

25. A, alaila, e alohi aku auanei ka poe pono iloko o ke aupuni o ke Akua.

26. Aka hoi, e hiki mai ana kekahi make weliweli maluna iho o ka poe hewa; no ka mea, e make ana lakou ma na mea e pili ana i na mea o ka pono; no ka mea, ua paumaele lakou, aole e hiki i kekahi mea paumaele ke loaa ae ke aupuni o ke Akua; aka, ua hoolei ia aku lakou, a waiho ia e ai i na hua o ka lakou mau hana a me na mea a lakou i hana ai, he ino ia mau mea; a ke inu la lakou i ka maku o kekahi apu awaawa.