1. Ano, eia kekahi, i ka wa a Amalikia i loaa ai ke aupuni, hoomaka ae la oia e hoopiha i na naau o ko Lamana poe e ku e i ka poe kanaka o Nepai; he oiaio, hoonoho iho la oia i na kanaka e olelo aku i ko Lamana poe mai ko lakou mau hale kiai aku, e ku e ana i ko Nepai poe;

2. A, pela oia i hoopiha ai i na naau o lakou e ku e i ko Nepai poe, a, ma ka hopena o ka makahiki umikumamaiwa o ke au o na lunakanawai, ua hooko aku oia i na mea ana i noonoo ai a hiki wale i keia manawa; he oiaio, ua hoolilo ia oia i alii maluna iho o ko Lamana poe, a imi no hoi oia e noho alii maluna iho o ka aina a puni; he oiaio, a maluna iho o na kanaka a pau ma ka aina, o ko Nepai pu me ko Lamana.

3. Nolaila, ua hooko oia i kona mea i noonoo ai, no ka mea, ua hoopaakiki iho la oia i na naau o ko Lamana poe, a hoopouli iho la i ko lakou hoomaopopo ana, a hookonokono ae la ia lakou e huhu, a, ua houluulu iho la oia i kekahi puali nui loa, e hele mai e kaua i ko Nepai poe.

4. No ka mea, ua paa kona manao, no ka lehulehu o kona poe kanaka, e lanakila maluna o ko Nepai poe, a e kai mai ia lakou iloko o ka noho hooluhi ana;

5. A pela oia i hoonoho ai i na luna nui o ko Zorama poe, o lakou no ka poe i ike lea i ka ikaika o ko Nepai poe, a me ko lakou mau wahi i akoakoa ai, a me na wahi nawaliwali loa o ko lakou mau kulanakauhale; nolaila, hoonoho iho la oia ia lakou i poe luna nui maluna iho o kona poe koa.

6. A eia kekahi, lawe aku la lakou i ko lakou mau halelewa, a nee mai la i ka aina o Zarahemela, ma ka waonahele.

7. Ano, eia kekahi, oiai e loaa e ana ia Amalikia ka mana ma ka epa a me ka hoopunipuni, aia o Moroni hoi ma kekahi aoao, e hoomakaukau e ana oia i na naau o na kanaka e malama pono i ka Haku i ko lakou Akua;

8. He oiaio, e hooikaika e ana oia i ka poe koa o ko Nepai poe, a e kukulu ana i na pakaua, i kau wahi e akoakoa ai; e hooahua ana i na puu lepo a puni, e apo ai i kona poe koa, a e kukulu ana i na pa pohaku e hoopuni ai ia lakou a puni, a puni hoi ko lakou mau kulanakauhale, a me na palena o ko lakou mau aina; he oiaio, a puni ka aina a pau;

9. A iloko o ko lakou mau pakaua nawaliwali, hoonoho iho la oia i ka nui o na kanaka; a pela oia i kukulu ai i na pakaua a i hooikaika ai i ka aina i noho ia ai e ko Nepai poe.

10. A pela oia i hoomakaukau ai e kokua i ko lakou kuokoa ana, a me ko lakou mau aina, i ka lakou poe wahine, a me ka lakou mau keiki, a me ko lakou maluhia, e hiki ia lakou ke ola i ka Haku, ko lakou Akua, a hiki no hoi ia lakou ke malama i ka mea i kapa ia e ko lakou poe enemi, ka aoao o ka poe Kristiano.

11. He kanaka ikaika a mana hoi o Moroni; he kanaka i oo ka ike; he oiaio, he kanaka i lealea ole i ka hookahe koko; he kanaka nona ka uhane i olioli ai i ka noho kauwa ole ana a me ke kuokoa ana o kona aupuni, a me kona poe hoahanau mai ka noho hooluhi ana a me ka noho kauwa ana ae;

12. He oiaio, he kanaka nona ka naau i hu nui ae la me ke aloha aku i kona Akua, no ka nui o na mea e pono ai a e pomaikai ai, ana i hooili mai ai maluna iho o kona poe kanaka; he kanaka hoi i hana ikaika loa no ka pomaikai a maluhia hoi o kona poe kanaka;

13. He oiaio, a he kanaka oia i paa ma ka manaoio o Kristo, a ua hoohiki e oia me kekahi olelo kupaa, e hoomalu aku i kona poe kanaka, a me kona mau mea e pono ai, i kona aupuni, a me kona hoomana ana, a hiki aku i ka hookahe ia ana o kona koko.

14. Ano, ua ao ia ko Nepai poe e hoomalu aku ia lakou iho i ko lakou poe enemi, a hiki aku i ka hookahe ana i ke koko, ina he mea ia e pono ai; he oiaio, a ua ao ia no hoi lakou e hoohihia ole loa aku; he oiaio, a e hoaka ole loa aku i ka pahikaua, ke ole ia i kahi enemi, ke ole ia e hoopakele i ko lakou mau ola;

15. A o keia no ko lakou manaoio, ma ka hana ana peia, e hoopomaikai mai ke Akua ia lakou ma ka aina; oia hoi ma na olelo e ae, ina e ikaika lakou ma ka malama ana i na kauoha a ke Akua, e hoopomaikai mai oia ia lakou ma ka aina; he oiaio, e ao mai ia lakou e hee aku, a i ole ia, e hoomakaukau no ke kaua e like me ko lakou popilikia;

16. A e hoike mai no hoi ke Akua ia lakou, i kahi a lakou e hele aku ai e hoomalu aku ia lakou iho i ko lakou poe enemi; a ma ka hana ana pela, e hoopakele mai ka Haku ia lakou, a oia no ka manaoio o Moroni; a ua olioli kona naau iloko o ia mea; aole ma ka hookahe ana i ke koko, aka i ka hana ana i ka maikai, i ka hoopakele ana i kona poe kanaka; he oiaio, i ka malama ana i na kauoha a ke Akua; he oiaio, a i ka pale ana aku i ka ino.

17. Oiaio, he oiaio kaʻu e olelo aku nei ia oukou, ina ua like na kanaka a pau mamua aku, a i keia manawa, a ma keia hope aku, me Moroni, aia hoi, alaila ua hoonaueue ia na mea mana o gehena no ka wa pau ole; he oiaio, aole loa i loaa i ke diabolo ka mana maluna iho o na naau o na keiki a kanaka.

18. Aia hoi, he kanaka like oia me Amona, ke keiki a Mosia; he oiaio, a me na keiki e ae a Mosia; he oiaio, a me Alama no hoi a me kana mau keiki, no ka mea he poe kanaka lakou a pau o ke Akua.

19. Ano hoi, o Helamana a me kana mau kaikaina, aole i emi iho ka lakou hana no na kanaka malalo iho o ka Moroni; no ka mea, hai aku la lakou i ka olelo a ke Akua, a bapetizo iho la lakou i ka mihi i na kanaka a pau, ka poe i hoolohe mai i ka lakou mau olelo.

20. A pela lakou i hele aku ai, a ua hoohaahaa na kanaka ia lakou iho no ka lakou mau olelo, a, ua kokua nui ia lakou e ka Haku; a pela lakou i kaawale ai mai na kaua a me na paio ae mawaena o lakou iho; he oiaio, no na makahiki eha.

21. Aka, me aʻu i i aku ai ma ka hopena o ka makahiki umikumamaiwa; he oiaio, me ko lakou maluhia nae mawaena o lakou iho, ua koi ia lakou me ka makemake ole e paio aku me ko lakou poe hoahanau, ko Lamana poe;

22. He oiaio, aole loa i hooki ia na kaua o lakou no na makahiki he nui wale me ko Lamana poe, me ka nui nae o ko lakou makemake ole.

23. Ano, ua kaumaha lakou i ka lalau ana i na mea kaua e ku e i ko Lamana poe, no ka mea, aole lakou i lealea ma ka hookahe ana i ke koko; he oiaio, aole o ia mea wale no; ua kaumaha hoi lakou e lilo ae i kumu e hoouna aku ai i na uhane he nui o ko lakou poe hoahanau iwaho o ke ao nei iloko o kekahi ao mau loa, me ka makaukau ole e halawai pu me ko lakou Akua;

24. Aka, aole e hiki ia lakou ke ae aku e waiho iho i ko lakou mau ola, i luku ia ai ka lakou poe wahine a me ka lakou poe keiki, e ka hana lokoino a aloha ole hoi o ua poe la, o ko lakou poe hoahanau lakou i kekahi manawa mamua, he oiaio, a ua kuee mai i ko lakou ekalesia, a ua haalele mai ia lakou, a ua hele aku e anai mai ia lakou, ma ka hui ana i ko Lamana poe.

25. He oiaio, a ua hiki ole ia lakou ke ae aku e hauoli ko lakou poe hoahanau maluna iho o ke koko o ko Nepai poe, oiai e noho ana kekahi poe nana e malama i na kauoha a ke Akua, no ka mea, eia no ka hoohiki a ka Haku, Ina e malama lakou i kana mau kauoha, e hoopomaikai ia lakou ma ka aina.