1. Ano, eia kekahi, aole i hooki ae o Moroni i kona hoomakaukau ana no ke kaua, a i ole e pale aku hoi i kona poe kanaka mai ko Lamana poe ae, no ka mea, kauoha ae la oia i na puali ona e hoomaka ma ka makamua o ka makahiki iwakalua o ke au o na lunakanawai, e kope ae i na puu lepo a puni na kulanakauhale, ma ka aina a puni i noho ia ai e ko Nepai poe;

2. A maluna ae o ua mau puu lepo nei, kena ae la oia e kapili ia na laau, he oiaio, na laau i like ke kiekie me ko ke kanaka, a puni na kulanakauhale.

3. A kauoha ae la oia e kapili ia he pa laau ooi maluna iho o na laau, a puni; a ua ikaika a kiekie hoi ia mau mea;

4. A kauoha ae la oia e kukulu ia na hale kiai e hiki ai ke nana maluna o ua mau pa laau ooi la; a kauoha ae la oia e kukulu ia na wahi e malu ai maluna iho o kela mau hale kiai, i hiki ole ai i na pohaku a me na pua o ko Lamana poe ke hoeha mai ia lakou.

5. A ua hoomakaukau ia lakou, e hiki ia lakou ke nou aku i na pohaku mailuna ae olaila, e like me ko lakou makemake a me ko lakou ikaika, a e pepehi i ka mea e hoao mai ana e hookokoke mai i na pa o ke kulanakauhale.

6. Pela o Moroni i hoomakaukau ai i na wahi paa, no ka wa e hiki mai ai ko lakou poe enemi, a puni kela kulanakauhale keia kulanakauhale ma ka aina a pau.

7. A eia kekahi, kauoha ae la o Moroni i na puali ona e hele aku iloko o ka waonahele hikina; he oiaio, a hele aku la lakou, a hooauhee aku la i ko Lamana poe a pau, ka poe e noho ana ma ka waonahele hikina, i ko lakou mau aina iho, aia ma ka hema o ka aina o Zarahemela;

8. A moe pololei iho la ka aina o Nepai mai ke kai hikina a i ke komohana.

9. A eia kekahi, ia Moroni i hooauhee aku ai i ko Lamana poe mawaho o ka waonahele hikina, ma ka akau ia o ko lakou mau aina hooilina iho, kauoha ae la oia i na kanaka e noho ana ma ka aina o Zarahemela, a ma ka aina a puni, e hele aku iloko o ka waonahele hikina, a hiki wale aku i na palena, ma ke kahakai, a e noho ma ka aina.

10. A hoonoho iho la no hoi oia i ka poe koa ma ka hema, ma na palena o na hooilina o lakou, a kauoha ae la ia lakou e kukulu iho i na pakaua, e hiki ia lakou ke malama i ka poe koa o lakou a me ko lakou poe kanaka mai na lima ae o ko lakou poe enemi.

11. A pela oia i hooki aku ai i na wahi paa o ko Lamana poe, ma ka waonahele hikina; he oiaio, a ma ke komohana no hoi, e hooikaika ana i ka palena mawaena o ko Nepai poe a me ko Lamana poe, mawaena o ka aina o Zarahemela a me ka aina o Nepai; mai ke kai komohana, e hele ana ma ke poo o ka muliwai Sidona; e noho ana ko Nepai poe i ka aina a pau ma ka akau; he oiaio, i ka aina a pau ma ka akau o ka aina o Momona, e like me ko lakou makemake.

12. Pela o Moroni, me na puali ona, i mahuahua ai lakou i kela la i keia la, no ka manaolana i ka hoomaluhia ana o kana mau hana i hookupu mai ai ia lakou; nolaila, imi iho la lakou e hooki aku i ka ikaika a me ka mana o ko Lamana poe, mai ko lakou mau aina hooilina aku, i ole mana ko lakou la maluna iho o ko lakou mau aina hooilina.

13. A eia kekahi, hoomaka iho la o ko Nepai poe i ke kahua o kekahi kulanakauhale; a kapa ae la lakou i ka inoa o ke kulanakauhale o Moroni; a ma ke kai hikina ia; a ma ka hema ia ma ka palena o na hooilina o ko Lamana poe.

14. A hoomaka iho la no hoi lakou i ke kahua no kekahi kulanakauhale mawaena o ke kulanakauhale o Moroni a me ke kulanakauhale o Aarona, e pili ana i na palena o Aarona a me Moroni; a kapa ae la lakou i ka inoa o ke kulanakauhale, a o ka aina hoi, o Nepaiha.

15. A hoomaka iho la no hoi lakou i ua makahiki la, e kukulu i na kulanakauhale he nui ma ka akau; o kekahi ua kaulana a lakou i kapa ai o Lehi, ma ka akau, ma na kapa o ke kahakai ia.

16. A pela i pau ai ka makahiki iwakalua.

17. A ma keia noho pomaikai ana ko Nepai poe i ka makamua o ka makahiki iwakaluakumamakahi o ke au o na lunakanawai maluna iho o ka poe kanaka o Nepai.

18. A ua hoopomaikai nui loa ia lakou, a lilo iho la lakou i poe waiwai loa; he oiaio, a hoonui aku la lakou, a ua ikaika ma ka aina.

19. A pela kakou i ike ai i ka nani o ka lokomaikai a pololei o na hana a pau a ka Haku, i ka hooko ana i kana mau olelo a pau i na keiki a kanaka; he oiaio, ua hiki ia kakou ke ike ua hooiaio ia mai kana mau olelo i keia manawa, ana i olelo mai ai ia Lehi, i ka i ana,

20. Pomaikai oe a me kau poe mamo; a e hoomaikai ia auanei lakou, a ina e malama mai lakou i kaʻu mau kauoha, e hoopomaikai ia auanei lakou ma ka aina. Aka e hoomanao, ina aole lakou e malama mai i kaʻu mau kauoha e hooki ia aku lakou mai ke alo aku o ka Haku.

21. A ke ike nei kakou ua hooiaio ia mai ua mau olelo pomaikai nei i ka poe kanaka o Nepai; no ka mea, na ko lakou hakaka ana a me ko lakou paio ana, he oiaio, no ko lakou pepehi kanaka ana, a me ko lakou powa ana, a me ko lakou hoomanakii ana, ko lakou moekolohe ana, a me ko lakou mau mea hoopailua, mawaena o lakou iho, i lawe mai ai maluna iho o lakou i ko lakou mau kaua a me ko lakou luku ia ana.

22. A o ka poe i molowa ole i ka malama ana i na kauoha a ka Haku, ua hoopakele ia mai i na manawa a pau, oiai i hookuu ia ai na tausani o ko lakou poe hoahanau hewa i ka noho hooluhi ana, a i ole ia, e make i ka pahikaua, a i ole ia, e emi iho iloko o ka hoomaloka, a e hui pu me ko Lamana poe.

23. Aka hoi, aole he manawa i oi aku ka pomaikai mawaena o ka poe kanaka o Nepai, mai na la o Nepai mai, mamua o na la o Moroni; he oiaio, ma keia manawa, ma ka makahiki iwakaluakumamakahi o ke au o na lunakanawai.

24. A eia kekahi, pau ae la no hoi ka makahiki iwakaluakumamalua o ke au o na lunakanawai me ka maluhia; he oiaio, a me ka iwakaluakumamakolu makahiki.

25. A eia kekahi, ma ka makamua o ka makahiki iwakaluakumamaha o ke au o na lunakanawai, he maluhia no hoi mawaena o ka poe kanaka o Nepai, ina aole i ea mai he paio mawaena o lakou no ka aina o Lehi, a me ka aina o Morianatona, e pili pu ana na palena o Lehi; ma na palena laua a elua ma kahakai.

26. No ka mea hoi, o ka poe kanaka i noho ma ka aina o Morianatona, ua koi ae i kekahi hapa o ka aina o Lehi; nolaila, hoomaka ae la ka paio ikaika mawaena o lakou, a lalau iho la ko Morianatona i na mea kaua e ku e i ko lakou poe hoahanau, a ua paa ko lakou manao e pepehi ia lakou nei me ka pahikaua.

27. Aka hoi, o ka poe kanaka i noho ma ka aina o Lehi, hee ae la lakou i kahi a Moroni i hoomoana ai, a hoopii ae ia ia no ke kokua; no ka mea, aole lakou iloko o ka hewa.

28. A eia kekahi, i ka wa a ko Morianatona poe, ka poe i alakai ia e kekahi kanaka o Morianatona kona inoa, i ike ai ua hee ae ko Lehi i kahi a Moroni i hoomoana ai, ua hopohopo nui loa lakou o hiki mai ka poe koa o Moroni maluna iho o lakou, a e luku aku ia lakou;

29. Nolaila, hookomo iho la o Morianatona iloko o ko lakou mau naau e mahuka aku lakou i ka aina ma ka akau, i uhi ia me na moanawai nui, a e noho i ka aina ma ka akau.

30. A, aia hoi, e hooko ana lakou i keia kuka manao, (a ina pela he mea ia e minamina nui ia,) aka, he kanaka huhu nui o Morianatona, nolaila, ua huhu oia i kekahi o kana mau kauwawahine, a lele ae la oia maluna iho ona, a pepehi nui ia ia.

31. A eia kekahi, mahuka ae la oia, a hele mai la i kahi a Moroni i hoomoana ai, a hai mai la ia Moroni i na mea a pau no ia hana; a no ko lakou mau manao e holo aku iloko o ka aina akau.

32. Ano hoi, o ka poe kanaka e noho ana ma ka aina o Momona, i ole o Moroni, ua makau oia o hoolohe ae lakou i na olelo a Morianatona, a e hui pu me kona poe kanaka, a pela oia e loaa ai kela mau wahi o ka aina, a e lilo ia mea i kumu no na mea poino nui mawaena o ka poe kanaka o Nepai; he oiaio, a e lilo keia mau mea poino i mea e hookahuli ai i ko lakou kuokoa ana;

33. Nolaila, hoouna ae la o Moroni i kekahi poe koa, me ko lakou mau halelewa, e alai i ko Morianatona poe, e oki aku i ko lakou holo ana iloko o ka aina akau.

34. A eia kekahi, aole lakou i alai ia lakou la a hiki aku lakou i na palena o ka aina Neoneo; a malaila lakou i alai ai ia lakou la, ma ka puali ololi, kahi e hele aku ai ma ke kai iloko o ka aina akau; he oiaio, ma ke kai, ma ke komohana, a ma ka hikina.

35. A eia kekahi, halawai pu ka poe koa i hoouna ia aku e Moroni, i alakai ia ai e kekahi kanaka o Teanakuma, me ko Morianatona poe; a ua paakiki loa iho la ko Morianatona poe, (i hoeueu ia ai e kona hewa a me kana mau olelo malimali,) a hoomaka ae la ke kaua mawaena o lakou, a ma ua kaua la pepehi aku la o Teanakuma ia Morianatona, a lanakila maluna iho o kona poe koa, a lawe pio ae la ia lakou, a hoi mai la i kahi a Moroni i hoomoana ai. A pela i pau ai ka makahiki iwakaluakumamaha o ke au o na lunakanawai maluna iho o ka poe kanaka o Nepai.

36. A pela i hoihoi hou ia mai ai ko Morianatona poe. A ma ka lakou hana berita ana e noho malie, ua hoihoi hou ia lakou i ka aina o Morianatona, a ua hana ia he kuikahi mawaena o lakou a me ko Lehi; a ua hoihoi hou ia lakou no hoi i ko lakou mau aina.

37. A eia kekahi, ma ua makahiki la o ko Nepai poe i hoihoi ia mai ai ka malu ia lakou, make aku la o Nepaiha, ka lua o na lunakanawai nui, a ua hoopiha oia i ka noho hookolokolo me ka pololei loa imua o ke Akua;

38. Aka hoi, ua hoole ae oia ia Alama e lawe i kela mau mooolelo a me kela mau mea i manao ia e Alama a me kona poe kupuna he laa loa; nolaila, ua hooili mai o Alama i ua mau mea la maluna iho o kana keikikane o Helamana.

39. Aia hoi kekahi, ua hoonoho ia ke keiki a Nepaiha e hoopiha ai i ka noho hookolokolo, ma ka hakahaka o kona makuakane; he oiaio, ua hoonoho ia oia i lunakanawai nui, a i kiaaina hoi maluna iho o na kanaka, me kekahi hoohiki a oihana laa hoi e hookolokolo pono, a e malama i ka maluhia, a me ke kuokoa ana o na kanaka, a e ae aku ia lakou i ko lakou mau pono laa e hoomana aku i ka Haku, i ko lakou Akua; he oiaio, e kokua a e malama i ka aoao o ke Akua i kona mau la a pau, a e kai mai i ka poe hewa i ka hoopai, e like me ko lakou hewa.

40. Ano hoi, o Pahorana no kona inoa. A hoopiha iho la o Pahorana i ka noho o kona makuakane, a hoomaka ae la oia i kona au ma ka hopena o ka makahiki iwakaluakumamaha, maluna iho o ka poe kanaka o Nepai.