1. Ano, e kaʻu keiki, ke ike nei au aia no kekahi mea e ae e hoohihia ana i kou naau, i hiki ole ai ia oe ke hoomaopopo, oia no ka pololei o ke Akua, ma ka hoopai ana i ka mea lawehala; no ka mea, ke hoao nei oe e manao he mea pololei ole ka waiho ia ana o ka mea lawehala i kahi o ka poino.

2. Ano hoi, e kaʻu keiki, e wehewehe aku no au i keia mea ia oe; no ka mea, aia hoi, mahope iho o ke kipaku ana mai o ka Haku ke Akua i ko kakou mau kupuna mua mailoko mai o ka mahinaai o Edena, e mahi i ka honua, i kahi o laua i lawe ia mai ai; he oiaio, kauo ae la oia i ke kanaka mawaho, a hoonoho iho la oia ma ka hikina o ka mahinaai o Edena, i kerubima, a me kekahi pahi wakawaka e ka ana i o ia nei, i malama ia ai ka laau o ke ola.

3. Ano, ke ike nei kaua ua lilo ke kanaka e like me ke Akua, e ike ana i ka pono a me ka hewa; a o kikoo aku oia i kona lima, a e lalau hoi i ko ka laau o ke ola, a e ai iho a ola mau loa, hoonoho iho la ka Haku ke Akua i kerubima a me ka pahi wakawaka, i ole ai oia e ai i ka hua;

4. A pela kakou i ike ai, ua haawi ia mai he manawa i kanaka, e mihi ai, he oiaio, he manawa hoao, he manawa e mihi ai a e malama ai i ke Akua.

5. No ka mea, ina ua o koke aku o Adamu i kona lima, a ai iho la i ko ka laau o ke ola, ina ua ola mau loa oia, e like me ka olelo a ke Akua, me ka wa ole e mihi ai; he oiaio, a ina ua ko ole no hoi ka olelo a ke Akua, a e hoolilo ia ae ke kumumanao o ka hoolapanai i mea ole.

6. Aka hoi, ua haawi ia mai i ke kanaka e make; nolaila, me lakou i hooki ia mai ai mai ka laau o ke ola aku, pela lakou e hooki ia mai ai mai ka ili aku i ka honua; a lilo iho la ke kanaka i mea poino no ka wa pau ole; he oiaio, lilo iho la lakou i kanaka haule.

7. Ano, ke ike nei ma keia mea, ua oki ia mai ko kakou mau kupuna mua ma ko ke kino a ma ko ka uhane no hoi mai ke alo aku o ka Haku; a pela kakou i ike ai ua lilo iho la laua i mau mea hahai mamuli o ko laua makemake iho.

8. Ano hoi, aole ia he mea e pono ai i hoopakele ia mai ai ke kanaka mai keia make kino ana ae, no ka mea, he mea ia e hoopau ai i ke kumumanao nui o ka pomaikai;

9. Nolaila, me ka hiki ole loa i ka uhane ke make, a ua hooili mai ka haule ana i ka make uhane maluna iho o na kanaka a pau, a me ka make kino no hoi; peneia, ua hooki ia mai lakou mai ke alo aku o ka Haku; he mea e pono ai i hoopakele ia mai ai na kanaka mai keia make uhane ana aku;

10. Nolaila, me lakou i lilo ai i ko ke kino, i makaleho, a i ko ke diabolo, ma ke ano maoli, ua lilo iho la keia noho hoao ana i wahi no lakou e hoomakaukau ai; lilo iho la ia i wahi hoomakaukau.

11. Ano, e hoomanao, e kaʻu keiki, ina aole no ke kumumanao hoolapanai, (a ina aole ia,) e poino ana na uhane o lakou, i ka wa a lakou e make ai, i oki ia mai ai mai ke alo aku o ka Haku.

12. Ano, aohe mea e hoopakele mai ai i na kanaka mai keia noho haule ana ae, a ke kanaka i lawe mai ai maluna ona iho, no kona hookuli ana.

13. Nolaila, mamuli o ka pololei, aole e hiki i ke kumumanao hoolapanai ke hooko ia mai, eia wale no ma ka mihi ana o na kanaka ma keia noho hoao ana; he oiaio, ma ua wahi hoomakaukau nei; no ka mea, i ole keia mau mea, ua hiki ole i ke aloha ke hana ke ole e hoopau aku ia i ka hana o ka hoopai. Ano, ua hiki ole i ka hana o ka hoopai ke hoopau ia; ina pela, ua pau ae ko ke Akua noho Akua ana.

14. A pela kakou i ike ai ua haule iho la na kanaka a pau, a ua paa lakou iloko o ka hoopai; he oiaio, ka hoopai o ke Akua, ka mea i waiho ai ia lakou no ka wa pau ole e oki ia aku ai mai kona alo aku.

15. Ano, aole e hiki ke kumumanao o ke aloha ke lawe ia mai, ke ole e hana ia kekahi mea e kalahala ai; nolaila, e kalahala ana ke Akua, oia iho, no na hala o ko ke ao nei, i lawe mai ai i ke kumumanao o ke aloha, e hoomalielie aku i na koi ana o ka hoopai, i hemolele ke Akua, i pololei oia, a he Akua aloha no hoi oia.

16. Ano, ua hiki ole ka mihi ke lawe ia mai i na kanaka, ke ole kekahi hoopai ana, he mea mau loa no hoi ia, e like me ke ola o ka uhane, e hookau ku e ia i ke kumumanao o ka pomaikai, he mea mau loa no hoi ia e like me ke ola o ka uhane.

17. Ano, pehea la e hiki ai i ke kanaka ke mihi, ke ole oia e hana hewa? Pehea la e hiki ai ia ia ke hana hewa, ina aole he kanawai, a pehea la he kanawai, ke ole he hoopai ana?

18. Ano, ua hookau ia mai kekahi hoopai ana, a ua haawi ia mai he kanawai pololei, ka mea i lawe mai i kanaka i ka walania o ka naau.

19. Ano, ina ua haawi ole ia mai kekahi kanawai: Ina e pepehi kanaka aku kekahi kanaka e make oia, e makau anei oia e make oia ina oia e pepehi kanaka?

20. A eia hoi kekahi, ina aole i haawi ia mai kekahi kanawai e ku e ana i ka hewa, ina aole makau na kanaka ke hana hewa.

21. A ina aole i haawi ia mai kekahi kanawai ke hana hewa na kanaka, heaha ka mea i hiki ai i ka hoopai ke hana, a me ke aloha no hoi; no ka mea, aole o laua kuleana maluna iho o ke kanaka?

22. Aka, ua haawi ia mai ke kanawai, a he hoopai ana ka i hookau ia mai, a ua ae ia mai ka mihi ana; a e koi ana ke aloha i keia mihi; i ole ia, e koi ana ka hoopai i ke kanaka, a e hooko aku ana i ke kanawai, a e hooili ana ke kanawai i ka hoopai ana; ina aole pela, e hoopau ia na hana o ka hoopono, a e pau ko ke Akua noho Akua ana.

23. Aka, aole e pau ana ko ke Akua noho Akua ana, a e koi ana ke aloha i ka poe mihi io, a e hele mai ana ke aloha ma o ke kalahala ana la; a e lawe mai ana ke kalahala ana i ke alahouana o ka poe make; a e lawe hou mai ana ke alahouana o ka poe make i na kanaka imua o ke alo o ke Akua; a pela lakou e hoihoi hou ia aku ai imua o kona alo, e hookolokolo ia e like me ka lakou mau hana; e like me ke kanawai a me ka hoopai,

24. No ka mea hoi, e hana ana ka hoopai i na koi ana ona a pau, a e koi ana ke aloha i kona mau mea a pau; a pela hoi, aole e hoola ia kekahi mea koe wale no ka poe mihi io.

25. Ka! Ke manao nei anei oe ua hiki i ke aloha ke hao i ka hoopai? Ke i aku nei au ia oe, aole; aole i kekahi lihi iki. Ina pela, e pau ko ke Akua noho Akua ana.

26. A pela e lawe mai ai ke Akua i kana mau hana nui a mau loa, i hoomakaukau ia ai mai ka hookumu ia ana mai o ke ao nei. A pela e hiki mai ana ke ola mau loa a me ka hoolapanai ana o ke kanaka, a me ko lakou make mau loa a me ka poino no hoi;

27. Nolaila, e kaʻu keiki, o ka mea e makemake ana e hele mai, ua hiki ke hele mai, a inu i na wai o ke ola me ke alalai ole ia mai; a o ka mea e makemake ole ana e hele mai, aole e koi ia ua mea la e hele mai; aka ma ka la hope, e hoihoi hou ia ia ia ia, e like me kana mau hana.

28. Ina ua makemake oia e hana aku i ka ino, a ua mihi ole oia ma kona mau la, aia hoi, e hana ia aku ka ino ia ia, e like me ka hoihoi hou ana o ke Akua.

29. Ano, e kaʻu keiki, ke makemake nei au e ae ole aku oe i keia mau mea e hookaumaha hou mai ia oe ma neia hope aku, a e ae aku i kou mau hewa wale no e hookaumaha ia oe, me kela kaumaha, ka mea e lawe mai ia oe ilalo i ka mihi.

30. E kaʻu keiki, ke makemake nei au e hoole hou ole oe i ka pololei o ke Akua ma neia hope aku. Mai hoao e hoapono ia oe iho ma keia mea, no kou mau hewa, ma ka hoole ana i ka pololei o ke Akua, aka e ae aku oe i ka pololei o ke Akua, a me kona aloha, a me kona hoomanawanui, e noho lanakila iloko o kou naau; aka e ae aku oe ia mea e hooiho mai ia oe ilalo i ka lepo i ka haahaa.

31. Ano, e kaʻu keiki, ua kahea ia oe e ke Akua e hai aku i ka olelo i keia poe kanaka. Ano, e kaʻu keiki, e hele aku oe, e hai aku i ka olelo me ka oiaio a me ke kuoo, e hiki ia oe ke kai mai i na uhane i ka mihi, i loaa ai i ke kumumanao o ke aloha ke kuleana maluna iho o lakou. A na ke Akua e haawi mai ia oe e like me kaʻu mau olelo. Amene.