1. Aia hoi kekahi, o ka makou hana hou ae, oia ka imi i loaa ai ke kulanakauhale o Manati; aka hoi, aole ala e hiki ai ia makou ke alakai mai ia lakou mailoko mai o ke kulanakauhale, ma na papa uuku o makou. No ka mea hoi, hoomanao iho la lakou i ka mea a makou i hana e ai mamua aku; nolaila, ua hiki ole ia makou ke hoowalewale aku ia lakou mai ko lakou mau wahi paa mai;

2. A no ka nui loa aku o lakou mamua o ko makou poe koa, aole makou i aa e hele aku a e hoouka ia lakou ma na wahi paa o lakou.

3. He oiaio, a ua lilo i mea pono no makou e hoohana aku i ko makou poe kanaka, i ka malama ana i kela mau wahi o ka aina, a makou i hoopaa mai ai o na hooilina o kakou; nolaila, lilo iho la ia i mea e pono ai no makou e kali, e loaa mai ai ka ikaika hou mai ka aina mai o Zarahemela, a me ka lako hou no hoi i ka ai.

4. A eia kekahi, pela au i hoouna ae ai i kauoha i ke kiaaina o ko kakou aina, e hoike aku ia ia no ka noho ana o ko makou poe kanaka. A kakali iho la makou e loaa mai ka ai a me ka ikaika, mai ka aina mai o Zarahemela.

5. Aka hoi, he uuku wale no ko makou pomaikai ma ia mea; no ka mea, e loaa ana no hoi i ko Lamana poe ka ikaika nui, ia la aku ia la aku, a me ka ai he nui hoi; a pela ko makou noho ana i neia wa.

6. A e puka ku e mai ana ko Lamana poe ia makou, ia manawa aku ia manawa aku, e manao paa ana ma o ka hana maalea la, e luku mai ia makou; aole nae i hiki ia makou ke loaa ke kaua me lakou, no ko lakou mau wahi e pee ai, a me ko lakou mau wahi paa.

7. A eia kekahi, kali iho la makou ma ua noho pilikia ana nei, no na malama he nui, a, aneane makou e make no ka nele i ka ai ole.

8. Aka, eia kekahi, loaa mai la ia makou ka ai, i kiai ia a hiki mai io makou la e kekahi poe koa elua tausani, no ke kokua ana ia makou; a oia ke kokua wale no a makou i loaa ai, no ka hoomalu ana ia makou iho a me ko makou aina mai ka haule ana ae iloko o na lima o ko makou poe enemi; he oiaio, a no ka paio ana me kekahi enemi e hiki ole ke helu ia.

9. Ano, o ke kumu o keia mau pilikia o makou, a i ole, ke kumu o ko lakou hoouna ole mai i ka ikaika hou ia makou, ua ike ole makou; nolaila, ua hookaumaha ia mai makou, a hoopiha ia mai no hoi i ka makau, o hiki mai paha na hoopai o ke Akua maluna iho o ko kakou aina, i ka hoohiolo ia mai a me ka luku loa ia mai o kakou;

10. Nolaila, ninini aku la makou i ko makou mau uhane ma ka pule i ke Akua, i hooikaika mai oia, a i hoopakele mai ia makou, mailoko mai o na lima o ko makou poe enemi; he oiaio, a e haawi mai no hoi i ikaika ia makou, e hiki ia makou ke hoopaa iho i ko makou mau kulanakauhale, a me ko makou mau aina, a me ko makou mau hooilina, no ka pomaikai o ko makou poe kanaka.

11. He oiaio, a hooiaio mai la ka Haku ko kakou Akua ia makou, nana makou e hoopakele mai; he oiaio, a olelo mai la oia i ka maluhia i ko makou mau uhane, a haawi mai la ia makou i ka manaoio nui, a hoolana mai la ia makou e hilinai aku no ko makou hoopakele ia ana ma ona la.

12. A hooikaika iho la makou me ko makou poe koa uuku i loaa ai ia makou, a ua paa me ka manao ikaika e lanakila aku maluna iho o ko makou poe enemi, a e malama i ko makou mau aina, a me ko makou mau hooilina, a i na wahine a makou, a me na keiki a makou, a me ka aoao o ko makou kuokoa ana.

13. A pela makou i hele aku ai me ko makou ikaika e ku e i ko Lamana poe, e noho ana ma ke kulanakauhale o Manati; a kukulu iho la makou i na halelewa o makou ma ka aoao waonahele, kokoke no ia i ke kulanakauhale.

14. A eia kekahi, ia la ae, i ko Lamana poe i ike mai ai ua hiki makou ma na palena ma ka waonahele kokoke i ke kulanakauhale, hoouna ae la lakou i na kiu o lakou a puni makou, i hiki ia lakou ke ike i ka nui a me ka ikaika o ko makou poe koa.

15. A eia kekahi, ia lakou i ike mai ai aole o makou ikaika, mamuli o ko makou nui, a e makau ana o hooki aku makou ia lakou mai ko lakou hoolako ia ana ae, ke ole lakou e hele mai mawaho e kaua mai ia makou, a pepehi mai ia makou, a e manao ana no hoi ua hiki ia lakou ke luku mai ia makou me ka maalahi me na puali lehulehu o lakou; nolaila, hoomaka ae la lakou e hoomakaukau iho e hele mai io makou la e kaua.

16. A ia makou i ike aku ai e hoomakaukau ana lakou e hele mai mawaho e ku e mai ia makou, aia hoi, kena ae la au ia Gida, me kekahi poe kanaka uuku, e pee oia iloko o ka waonahele, a ia Teomanera hoi, me kekahi poe kanaka uuku, e pee no hoi lakou iloko o ka waonahele.

17. Ano, ma ka akau o Gida a me kona poe kanaka, a o lakou la ma ka hema; a ia lakou i pee ai pela, aia hoi, kakali iho la au me ke koena o koʻu poe koa, ma kahi hookahi a makou i kukulu mua ai i ko makou mau halelewa, no ka manawa e hele mai ai ko Lamana poe ma ke kaua.

18. Ano, hele mai la ko Lamana poe mawaho me ko lakou poe koa lehulehu e ku e mai ia makou. A ia lakou i hiki mai ai, a e aneane ana e haule mai maluna iho o makou me ka pahikaua, kena ae la au i koʻu poe kanaka, i ka poe pu me au, e hee aku iloko o ka waonahele.

19. A eia kekahi, alualu mai la ko Lamana poe mahope o makou me ka wikiwiki loa, no ka mea, ua ake nui lakou e loaa makou, e hiki ia lakou ke pepehi mai ia makou; nolaila, alualu mai la lakou ia makou iloko o ka waonahele; a holo ae la makou mawaena konu o Gida ma laua me Teomanera ma, a ua ike ole ia lakou e ko Lamana poe.

20. A eia kekahi, i ka wa a ko Lamana poe i maalo ae ai, oia i ka wa a ka poe koa i maalo ae ai; ala ae la o Gida ma me Teomanera ma mai ko lakou mau wahi huna ae, a hooki ae la i na kiu o ko Lamana poe, i ole ai lakou e hoi hou i ke kulanakauhale.

21. A eia kekahi, ia lakou i hooki aku ai ia lakou la, holo ae la i ke kulanakauhale, a haule iho la maluna iho o ka poe kiai i hoonoho ia ai, e kiai i ke kulanakauhale, a luku aku la lakou ia lakou la, a loaa iho la ke kulanakauhale.

22. Ano, ua hana ia aku keia no ka hookuu ana mai o ko Lamana poe i ko lakou poe kaua a pau, e alakai ia mai ai iloko o ka waonahele, koe he mau kiai he kakaikahi wale no.

23. A eia kekahi, ma keia hana ua loaa ia Gida a me Teomanera ko lakou mau wahi paa. A eia kekahi, hele aku la makou, mahope o ka hele nui ana ma ka waonahele, me ka ihu i ka aina o Zarahemela.

24. A i ko Lamana poe i ike ai e hele ana lakou i ka aina o Zarahemela, ua hopohopo nui loa lakou, o kuka ia kekahi mea e alakai ia lakou i ka make; nolaila, hoomaka ae la lakou e hoi hou aku iloko o ka waonahele, he oiaio, e hoi hou ma ke ala hookahi a lakou i hele mai ai.

25. Aia hoi, ua po iho la, a kukulu ae la lakou i na halelewa o lakou; no ka mea, ua manao na luna nui o ko Lamana poe ua maluhiluhi ko Nepai poe, no ko lakou hele ana; a ma ka manao ana ua hooauhee mai i ko lakou nei poe kaua a pau, nolaila, aole o lakou la manao iki no ke kulanakauhale o Manati.

26. Ano, eia kekahi, i ka wa i hiki mai ai ka po, kena ae la au i koʻu poe kanaka aole e hiamoe, aka e hele aku lakou, ma kekahi ala e, i ka aina o Manati.

27. A no keia hele ana o makou i ka po, aia hoi, i kakahiaka ae, mamua makou o ko Lamana poe, a hiki e makou mamua o lakou i ke kulanakauhale o Manati.

28. A pela i hiki mai ai, ma keia hana maalea, i loaa mai ai ia makou ke kulanakauhale o Manati, me ka hookahe ole ana i ke koko.

29. A eia kekahi, i ka wa a na puali o ko Lamana poe i hiki mai ai a kokoke i ke kulanakauhale, a ike mai la ua makaukau makou e halawai pu me lakou, ua kahaha nui loa iho la lakou, a loohia me ka makau nui, a hee aku la iloko o ka waonahele.

30. He oiaio, eia kekahi, hee aku la na puali o ko Lamana poe mailoko aku o keia hapa o ka aina. Aka hoi, ua lawe pu ia aku me lakou na wahine a me na keiki he nui wale mailoko aku o ka aina.

31. A o kela mau kulanakauhale i hoopio e ia e ko Lamana poe, aia no lakou a pau i keia manawa i noho ia ai e makou; a e hoi hou mai ana ko makou poe makua, a me ko makou poe wahine, a me ko makou poe keiki, i ko lakou mau wahi i noho ai, o lakou a pau koe kela poe wale no, ka poe i hoopio ia a lawe ia aku e ko Lamana poe.

32. Aka hoi, ua uuku na puali o makou, e malama aku i na kulanakauhale he nui me ia, a me na hooilina nui me ia.

33. Aka hoi, ke paulele nei makou i ko kakou Akua, nana i haawi mai i ka lanakila ia makou maluna iho o kela mau aina, i loaa mai ai ia makou ua mau kulanakauhale la a me ua mau aina la, no kakou ponoi mamua.

34. Ano, aole makou i ike i ke kumu no ka haawi ole mai o ke aupuni i ikaika nui ae ia makou; aole hoi ua poe kanaka la ka poe i pii mai ia makou, i ike i ke kumu o ko makou loaa ole ka ikaika nui ae.

35. Aia hoi, ua ike ole makou, malia paha ua pomaikai ole oe, a ua kauo ae oe i na koa iloko o kela hapa o ka aina; ina pela, aole o makou makemake e ohumu.

36. A ina aole pela, aia hoi, ke makau nei makou aia no he mokuahana ma ke aupuni, i ole ai lakou i hoouna mai i na kanaka nui ae e kokua mai ia makou; no ka mea, ua ike makou ua oi aku ko lakou lehulehu mamua o ka poe a lakou i hoouna mai ai.

37. Aka, he mea ole ia; ke lana nei ko makou manao na ke Akua makou e hoopakele mai, me ka nawaliwali nae o na puali o makou, he oiaio, a e hoopakele mai ia makou, mailoko mai o na lima o ko makou poe enemi.

38. Aia hoi, o ka makahiki iwakaluakumamaiwa neia, ma ka hope o ka makahiki, a ke noho nei makou ma ko makou mau aina; a ua hee aku ko Lamana poe i ka aina o Nepai.

39. A eia pu me au nei ua poe keiki la a ko Amona aʻu i kaena ai, ma ke kulanakauhale o Manati; a ua kokua mai ka Haku ia lakou, he oiaio, a hoopakele mai ia lakou i ka haule ana ma ka pahikaua, i pepehi ole ia ai kekahi mea.

40. Aka hoi, ua loaa ia lakou na palapu he nui; aka ke kupaa nei lakou ma ua kuokoa ana la a ke Akua i hookuu mai ai ia lakou; a ua ikaika lakou ma ka hoomanao ana i ka Haku ko lakou Akua, ia la aku ia la aku; he oiaio, ke malama mau nei lakou i kana mau kanawai, a me kona mau hoopono, a me kana mau kauoha; a ua ikaika ko lakou manaoio ma na wanana no na mea e hiki mai ana.

41. Ano, e koʻu hoahanau i aloha ia o Moroni, na ka Haku ko kakou Akua, nana kakou i hoolapanai mai a i hookuu mai, e malama mau ia oe imua o kona alo; he oiaio, a nana e lokomaikai mai i keia poe kanaka, i loaa ai ia oe ka pomaikai ma ka loaa ana na mea a pau a ko Lamana poe i kaili aku ai mai o kakou aku, na mea e hoolako ai ia kakou. Ano hoi, ke hoopau iho nei au i koʻu episetole. Owau no o Helamana, ke keiki a Alama.