1. A eia kekahi, palapala hou ae la oia i ke kiaaina o ka aina, oia no o Pahorana, a eia na olelo ana i palapala iho ai, i ka i ana, Aia hoi, ke kakau nei au i kuu episetole ia Pahorana ma ke kulanakauhale o Zarahemela, oia no ka lunakanawai nui a me ke kiaaina hoi maluna iho o ka aina, a i ka poe a pau no hoi i wae ia ae ai e keia poe kanaka e hoomalu a e hooponopono iho i na mea o keia kaua;

2. No ka mea hoi, he mau mea kaʻu e olelo aku ia lakou ma ka hoohewa aku; no ka mea, ua ike oukou no oukou iho ua hoonoho ia ae oukou e houluulu ae i na kanaka, a e kahiko aku ia lakou me na pahikaua, a me na pahikaua pokole, a me na mea kaua a pau, o kela ano keia ano, a e hoouna mai e ku e aku i ko Lamana poe, ma kela wahi keia wahi a lakou i komo mai ai iloko o ko kakou aina.

3. Ano hoi, ke i aku nei au ia oukou, ua hooehaeha ia mai au, a koʻu poe kanaka no hoi, a o Helamana hoi me kona poe kanaka, e na ehaeha nui loa; he oiaio, e ka pololi, ka makewai, a me ka luhi, a me na pilikia o kela ano keia ano.

4. Ano, ea, ina o keia wale no ka makou i loaa ai, aole makou e ohumu, aole hoi hoohewa aku;

5. Aka ua nui no ka luku mawaena o ko makou poe kanaka; he oiaio, ua haule iho la na tausani ma ka pahikaua, oiai aole pela, ina ua haawi mai oukou i na puali o makou i ka ikaika a ke kokua ku pono no lakou. He oiaio, ua nui ko oukou malama ole ana mai ia makou.

6. Ano hoi, ke makemake nei makou e ike i ke kumu o keia malama ole loa ana ia makou; he oiaio, ke makemake nei makou e ike i ke kumu o ko oukou noho nanea ana.

7. E hiki anei ia oukou ke manao e noho maluna iho o ko oukou mau noho alii, me ka noho lolo, nanea ana, oiai e hoolaha mai ana ko oukou poe enemi i ka hana o ka make a puni oukou? He oiaio, oiai e pepehi loa ana lakou la i na tausani o ko oukou poe hoahanau;

8. He oiaio, i ka poe hoi i nana ae ai ia oukou no ka hoopakele ana mai, he oiaio, a i hoonoho iho ia oukou ma ia wahi, i hiki ai ia oukou ke kokua mai ia lakou; he oiaio, ua hiki e ia oukou mamua ke hoouna mai i na puali ia lakou, e hooikaika mai ia lakou, me ka hoopakele mai i na tausani o lakou mai ka haule ana mai ma ka pahikaua?

9. Aka hoi, aole keia wale, ua aua aku i ka oukou ai mai o lakou ae, a he lehulehu na mea i kaua aku a hookahe aku i ko lakou koko, no ka makemake nui o lakou no ka pomaikai o keia lahuikanaka; he oiaio, a oia ka lakou i hana ai, i ka wa e aneane ana lakou e make i ka pololi, no ko oukou malama ole loa ana ia lakou.

10. Ano, e koʻu poe hoahanau aloha ia; no ka mea, ua aloha ia oukou e pono ai; he oiaio, a o ko oukou pono e hooikaika oukou ia oukou iho me ka mikimiki nui loa ae no ka pomaikai a me ke kuokoa ana o keia lahuikanaka; aka hoi, ua malama ole mai oukou ia lakou, a no ia mea, e ili mai auanei ke koko o na tausani maluna iho o ko oukou mau poo no ka hoopai; he oiaio, no ka mea, ua ike ia e ke Akua ko lakou kahea ana a pau, a me ko lakou mau eha a pau.

11. Aia hoi, ua hiki anei ia oukou ke manao ua hiki ia oukou ke noho maluna iho o ko oukou mau noho alii, a no ka lokomaikai nui loa o ke Akua, ua hiki ia oukou ke noho wale, a e hoopakele ae oia ia oukou ea? Aia hoi, ina ua manao oukou i keia, ina ua manao makehewa oukou.

12. Ke manao nei anei oukou, no ka nui loa o ko oukou poe hoahanau i pepehi ia mai, no ko lakou hewa ia? Ke i aku nei au ia oukou, ina ua manao oukou i keia, ina ua manao makehewa oukou; no ka mea, ke i aku nei au ia oukou, he nui no na mea i haule iho ma ka pahikaua; a i ko oukou hoohewa ia ana no ia;

13. No ka mea, e hookuu mai ana ka Haku i ka poe pono i pepehi ia mai, i hiki mai ai kona hoopai a hoohewa maluna iho o ka poe hewa; nolaila, aole e pono no oukou e manao ua poino aku la ka poe pono no ka pepehi ia ana o lakou, aka hoi, ke komo aku la lakou iloko o ka maha o ka Haku ko lakou Akua.

14. Ano hoi, ke i aku nei au ia oukou, ke makau nui loa nei au e hiki mai na hoopai o ke Akua maluna iho o keia lahuikanaka, no ko lakou molowa loa; he oiaio, ka molowa hoi o ko kakou aupuni, a me ka nui loa o ko lakou malama ole i ko lakou poe hoahanau, he oiaio, i ua poe la i pepehi ia mai.

15. No ka mea, ea, ina aole no ka hewa i hoomaka mua ma ko kakou poo, ina ua hiki ia makou ke pale aku i ko kakou poe enemi, i ole lakou i hiki ke loaa mai ka mana maluna iho o kakou;

16. He oiaio no, ina aole no i puka mai ke kaua mawaena o kakou iho; he oiaio, ina aole no ua poe-makemake-alii la, ka poe i hoomaka i ka hookahe koko nui ana mawaena o kakou iho; he oiaio no, i ka wa o ko kakou paio ana mawaena o kakou iho ina ua hui pu kakou i ko kakou ikaika, e like me kakou i hana ai mamua aku; he oiaio, i ole no ke kuko mana a me ke alii ana hoi a ua poe-makemake-alii la i loaa ai maluna iho o kakou; ina ua onipaa lakou i ka aoao o ko kakou kuokoa ana, a hui pu mai me kakou, a hele aku e ku e aku i ko kakou poe enemi, aole ma ka lalau ana iho i na pahikaua a lakou e ku e mai ia kakou, a o ke kumu no ia mea o ke hookahe koko nui ana mawaena o kakou iho; he oiaio, ina ua hele aku kakou e ku e aku ia lakou, ma ka ikaika o ka Haku, ina ua hoopuehu aku kakou i ko kakou poe enemi; no ka mea, ina ua hana ia mai ia i ka hooko ia ana o kana olelo.

17. Aka hoi, e hele mai ana ano ko Lamana poe maluna iho o kakou, a e pepehi mai ana lakou i ko kakou poe kanaka nei me ka pahikaua; he oiaio, i ko kakou poe wahine a me ko kakou poe keiki, e noho ana ma ko kakou mau aina, a e lawe pio aku ana no hoi ia lakou nei; e hoeha ana ia lakou nei me na pilikia a pau; a o keia no ka hewa nui o ua poe la i imi i ka mana a me ke alii ana; he oiaio, o ua poe-makemake-alii la.

18. Aka, no ke aha la au e olelo nui nei no keia mea, no ka mea, aole makou i ike, anoai o oukou no kekahi e imi nei i ka mana? A aole makou i ike, anoai he poe kipi no hoi oukou i ko oukou aina?

19. A i ole ia, ua malama ole mai anei oukou ia makou no ko oukou noho ana mawaena konu o ka aina, a ua hoopuni ia oukou e ka maluhia, i ole oukou e kena ae e hoouna ia mai ka ai ia makou, a me na kanaka no hoi e hooikaika mai i ko makou mau puali?

20. Ua hoopoina anei oukou i na kauoha a ka Haku, a ko oukou Akua? He oiaio, ua hoopoina anei oukou i ka noho pio ana o ko kakou poe kupuna? Ea, ua hoopoina anei oukou i na manawa he nui o kakou i hoopakele ia mai ai, mailoko mai o na lima o ko kakou poe enemi?

21. Ke manao nei anei oukou e hoopakele mai ana ka Haku ia kakou ano, oiai e noho ana kakou maluna o ko kakou mau noho alii, a e hana ole aku ana me na mea a ka Haku i hoomakaukau mai ai no kakou?

22. He oiaio, e noho anei oukou iloko o ka molowa, oiai i hoopuni ia oukou me na tausani o kela poe, oia, a me na umi o na tausani, ka poe e noho ana no hoi iloko o ka molowa, oiai e haule ana na tausani ma na palena o ka aina a puni, ma ka pahikaua, he oiaio, i hooeha ia a me ke kahe ana o ke koko?

23. Ke manao nei anei oukou e nana mai ke Akua io oukou me he poe hewa ole la, oiai e noho malie ana oukou a e ike mai ana i keia mau mea? Aia hoi, ke i aku nei au ia oukou, aole. Ano, ke makemake nei au ia oukou e hoomanao ua i mai ke Akua, E hoomaemae mua ia ka ipu oloko, alaila e hoomaemae ia ka ipu owaho no hoi.

24. Ano, ina aole oukou e mihi i ka mea a oukou i hana ai, a e hoomaka e eu a e hana, a e hoouna mai i ai a me na kanaka io makou nei, a io Helamana la no hoi, e hiki ia ia ke malama i ua mau wahi la o ko kakou aina ana i hoopaa ai, a e hiki no hoi ia makou nei ke loaa hou mai ke koena o na hooilina o kakou ma keia mau wahi, aia hoi, alaila he mea e pono ai e paio hou ole aku makou me ko Lamana poe, a pau mua ia makou ka ipu oloko i ka hoomaemae ia; he oiaio, o ke poo nui o ko kakou aupuni;

25. A ke ole oukou a ae mai i koʻu episetole nei, a e puka mai a e hoike mai i ka uhane oiaio o ke kuokoa ana, a e hooikaika iho e kokua mai a e hoonui mai i na puali o makou, a e haawi mai ia lakou i ai no ko lakou ola, aia hoi, e waiho aku au i kekahi hapa o koʻu poe kuokoa e malama i ua hapa nei o ko kakou aina, a e waiho aku no au i ka ikaika a me na pomaikai o ke Akua maluna iho o lakou, i hiki ole ai i kekahi mana e ae ke hana ku e mai ia lakou;

26. A o keia no ko lakou manaoio nui loa a me ko lakou hoomanawanui ma na popilikia o lakou;

27. A e hele aku au io oukou la, a ina mawaena o oukou kekahi nona ka makemake i ke kuokoa ana, he oiaio, ina e koe ana kekahi huna o ke kuokoa ana, aia hoi, e hookonokono au i na kipi ana mawaena o oukou, a hiki i ka wa e pau ai ka poe nana ka makemake e lalau wale iho i ka mana a me ke alii ana;

28. He oiaio hoi, aole oʻu makau i ko oukou mana, aole hoi i ko oukou alii ana, aka, o koʻu Akua no kaʻu i makau ai, a mamuli no ia o kana mau kauoha aʻu i lalau iho ai i kaʻu pahikaua e hoomalu aku i ka aoao o koʻu aina, a no ko oukou ino i loaa ai ia makou ka poino nui me ia.

29. Aia hoi, ua ku pono ka manawa; he oiaio, ua kokoke loa mai ka manawa, ina aole oukou e hoolalelale ia oukou iho ma ka hoomalu ana i ko oukou aina a me ko oukou poe uuku, e kau ana ka pahikaua o ka hoopai maluna iho o oukou; he oiaio, a e haule iho auanei ia maluna o oukou a e hoopai ia oukou a hiki i ko oukou luku loa ia ana.

30. Aia hoi, ke kali nei au i ke kokua, mai ia oukou mai, a ke ole oukou e lawelawe mai i ke kokua ia makou, aia hoi, e hele aku au io oukou la i ka aina o Zarahemela, a e hahau aku ia oukou me ka pahikaua, i ole ai o oukou mana hou e alalai mai i ka holomua ana o keia lahuikanaka ma ka aoao o ko kakou kuokoa ana;

31. No ka mea hoi, aole e ae mai ka Haku e ala oukou a e mahuahua ikaika ma ko oukou mau hana ino, e anai mai ai i kona lahuikanaka pono.

32. Aia hoi, ua hiki anei ia oukou ke manao e hookoe mai ka Haku ia oukou, a e puka ae ma ka hoopai i ko Lamana poe, i ka wa hoi a na mooolelo o ko lakou poe kupuna i hookumu ai i ko lakou inaina; a ua papalua ia ia e ua poe la i haalele ku e mai ia kakou, oiai ko oukou ino no ko oukou aloha i ka hanohano, a me na mea lapuwale o ke ao nei?

33. Ua ike oukou ke lawehala nei oukou i na kanawai o ke Akua, a ua ike no oukou ke hahi nei oukou ia mau mea malalo iho o na kapuai o oukou. Aia hoi, ke i mai nei ka Haku iaʻu, Ina aole kela poe a oukou i wae ae ai i poe kiaaina no oukou, e mihi i ko lakou mau hewa a me na hala, e hele aku auanei oukou e kaua ku e ia lakou.

34. Ano hoi, ua koi ia mai wau, o Moroni, mamuli o ka berita aʻu i hana ai e malama i na kauoha a koʻu Akua; nolaila, ua makemake au ia oukou e hoopili aku i ka olelo a ke Akua, a e hoouna koke mai ioʻu nei i ka oukou ai a i ko oukou poe kanaka, a io Helamana la no hoi.

35. Aia hoi, ina aole oukou e hana mai i keia, e hele koke aku au io oukou la; no ka mea hoi, aole ke Akua e kuu mai ia makou e make i ka pololi; nolaila, e haawi mai no oia ia makou i ka oukou ai, ina no ma ka pahikaua. Ano, e makaala oukou e hooko aku i ka olelo a ke Akua.

36. Aia hoi, owau no o Moroni, ko oukou alihi kaua. Aole au e imi ana no ka mana, aka, e hoohiolo iho ia mea ilalo. Aole au e imi ana no ka hanohano o ko ke ao nei, aka no ka nani o koʻu Akua, a me ke kuokoa ana a me ka pomaikai o koʻu aina. A pela au e hoopau nei i kaʻu episetole.