1. Ano, aia no ma ke kanawai o Mosia, o kela kanaka keia kanaka i lilo i luna ma ke kanawai, oia hoi ka poe i wae ia i poe lunakanawai, e loaa no ia lakou ka uku e like me ka manawa a lakou i hana ai e hookolokolo i ka poe i lawe ia imua o lakou e hookolokolo ia ai.

2. Ano, ina ua aie kekahi kanaka ia hai, a, aole oia e hookaa i kona mea aie, alaila, ua hoopii ia oia i ka lunakanawai; a na ka lunakanawai i hana aku, a i kena aku i na ilamuku e lawe ia mai ke kanaka imua ona; a hookolokolo aku oia i ua kanaka la mamuli o ke kanawai a me na hoike i lawe ia mai e ku e ia ia, a pela e koi ia ai ua kanaka la e hookaa aku i kona aie, a i ole ia, e hookuke ia aku maiwaena aku o na kanaka, me he aihue la a me ka powa.

3. A loaa iho la i ka lunakanawai no kona uku e like me kona manawa; he senine o ke gula no ka la hookahi, a i ole ia, he senuma o ke kala, ua like pu ia me kekahi senine o ke gula; a ua like keia me ke kanawai i haawi ia mai ai.

4. Ano, eia na inoa o kela apana o keia apana o ko lakou gula, a o ko lakou kala, e like me ka nui o ia mau mea. A ua haawi ia na inoa e ko Nepai poe; no ka mea, aole lakou i helu mamuli o ka poe Iudaio ma Ierusalema; aole hoi lakou i ana mamuli o ke ano o ka poe Iudaio, aka hoololi lakou i ko lakou helu ana a me ko lakou ana ana, mamuli o na manao a me ka noho ana o na kanaka, i kela hanauna i keia hanauna, a hiki i ke au o na lunakanawai; a ua hoonohonoho ia ua mau mea nei e ke alii Mosia.

5. Ano, penei ka helu ana: he senine o ke gula, he seona o ke gula, he suma o ke gula, a he limina o ke gula.

6. He senuma o ke kala, he amanora o ke kala, he ezaroma o ke kala, a he onati o ke kala.

7. He senuma o ke kala ua like pu ia me kekahi senine o ke gula; a o kela a o keia no kekahi busela o ka bale, a no kekahi busela o kela ano keia ano o ka hua liilii.

8. Ano, o ka nui o kekahi seona o ke gula, ua palua ia i ka nui o kekahi senine;

9. A he suma o ke gula, ua palua ia i ka nui o kekahi seona;

10. A ua like ka nui o ka limina o ke gula me ko lakou nei a pau;

11. A ua like ka nui o kahi amanora o ke kala me ko na senuma elua;

12. A ua like ka nui o kekahi ezaroma o ke kala me ko na senuma eha;

13. A ua like ka nui o kekahi onati me ko lakou nei a pau.

14. Ano, eia no ka nui o na mea uuku o ko lakou helu ana:

15. O kahi sebalona he hapalua ia o kahi senuma; nolaila, hookahi sibalona no ka hapalua o ka busela hookahi o ka bale;

16. A o kahi sibaluma he hapalua ia o ka sibalona;

17. A o kahi lea o ka hapalua ia o ka sibaluma.

18. Ano, oia no ko lakou helu, mamuli o ko lakou helu ana.

19. Ano, ua like pu kahi anationa o ke gula me na subalona ekolu.

20. Ano, no ka manao wale no e loaa ka uku, no ka mea, loaa iho la ia lakou ko lakou uku e like me ka lakou hana; nolaila lakou i hookonokono ai i na kanaka i na hana uhauha, a i kela ano i keia ano o ka haunaele a me ka hewa, i nui aku ai ka lakou hana; e hiki ia lakou ke loaa ke kala e like me na hihia i lawe ia mai ai imua o lakou; nolaila, hooeueu ae la lakou i na kanaka e ku e ia Alama laua me Amuleka.

21. A hoomaka ua Zezeroma nei e niele ia Amuleka, i ka i ana: Ea, e pane mai anei oe iaʻu i mau wahi niele aʻu e niele aku ai ia oe? Ano, he kanaka akamai o Zezeroma ma na manao maalea o ke diabolo, i hiki ia ia ke hoopau i ka mea i pono; nolaila, i mai ai oia ia Amuleka, E pane mai anei oe i na niele aʻu e ninau aku ai ia oe?

22. A i aku la o Amuleka ia ia, Ae, ina e like ia me ka Uhane o ka Haku iloko oʻu; no ka mea, aole au e olelo aku i kekahi mea i ku e i ka Uhane o ka Haku. A i mai la o Zezeroma ia ia, Eia hoi na onati kala eono, a o ua mea nei a pau kaʻu e haawi aku ai ia oe, ina e hoole mai oe i ke ola ana o ka Mea Kiekie loa.

23. Ano, i aku la o Amuleka, Auwe oe, e ke keiki o gehena, no ke aha la oe e hoowalewale mai nei iaʻu? Aole anei oe i ike e ae ole ana ka poe pono i na hoowalewale me neia?

24. Ke manaoio nei anei oe aole he Akua? Ke i aku nei au ia oe, aole; ua ike oe aia no he Akua, aka ke aloha nui loa aku nei oe i ua kala la mamua o kou aloha ana ia ia.

25. Ano, ua wahahee mai oe imua o ke Akua iaʻu. I mai la oe iaʻu, Eia hoi ua mau onati eono nei, he nui ko lakou waiwai, a e haawi au ia oe, oiai oe i manao ai iloko o kou naau, e aua i ua mau mea la mai oʻu aku; a o kou makemake wale no e hoole aku au i ke Akua oiaio a ola, i loaa ai ia oe ke kumu e hoopoino mai iaʻu. A, ano hoi, no keia hewa nui e loaa auanei ia oe kou uku.

26. A i mai la o Zezeroma ia ia, Ke i mai nei anei oe aia no he Akua oiaio a ola?

27. A i aku la o Amuleka, Ae, aia no he Akua oiaio a ola.

28. Ano, i mai la o Zezeroma, He nui aku anei na akua mamua o ke Akua hookahi?

29. A pane aku la oia, Aole.

30. Ano, i hou mai la o Zezeroma ia ia, Pehea la oe i ike ai i ua mau mea nei?

31. A i aku la oia, Ua hoike mai la kekahi anela i ua mau mea nei iaʻu.

32. A i hou mai la o Zezeroma ia ia, Owai la ka mea e hele mai auanei? O ke Keiki anei ia o ke Akua?

33. A i aku la oia ia ia, Ae.

34. A i hou mai la o Zezeroma, E hoola anei oia i kona poe kanaka iloko o ko lakou mau hala? A i aku la o Amuleka ia ia, Ke i aku nei au ia oe, aole loa, no ka mea, he mea hiki ole ia ia ke hoole mai i kana olelo.

35. Ano, i ae la o Zezeroma i na kanaka, E hoomanao oukou i keia mau mea; no ka mea, i mai la oia aia hookahi Akua wale no; aka, ke i mai nei nae oia e hele mai auanei ke Keiki a ke Akua, aole nae oia e hoola mai i kona poe kanaka, me he mea la no ia nei ka mana e kauoha aku i ke Akua.

36. Ano, i aku la o Amuleka ia ia, Aia hoi, ua wahahee oe, no ka mea, ke i mai nei oe ua olelo aku au me he mea la, noʻu ka mana e kauoha aku i ke Akua, no kuu i ana aku aole oia e hoola i kona poe kanaka iloko o ko lakou mau hala.

37. A ke i hou aku nei au ia oe, aole e hiki ia ia ke hoola mai ia lakou iloko o ko lakou mau hala; no ka mea, aole i hiki iaʻu ke hoole aku i kana olelo, a ua i mai oia, aole e hiki i kekahi mea paumaele ke loaa ke aupuni o ka lani; nolaila, pehea la oukou e hoola ia ai, ke loaa ole ia oukou ke aupuni o ka lani? Nolaila, aole e hiki ia oukou ke hoola ia iloko o ka oukou mau hala.

38. Ano, i hou mai la o Zezeroma ia ia, O ke Keiki a ke Akua o ka Makua mau loa anei ia?

39. A i aku la o Amuleka ia ia, Ae, o ka Makua mau loa io oia o ka lani a o ka honua, a me na mea a pau i piha ai; oia no ke kumu a o ke welau, o ka mua a o ka hope;

40. A e hele mai auanei oia iloko o ke ao nei e hoolapanai mai i kona poe kanaka; a e lawe oia maluna iho ona i na hala o ka poe i manaoio ma kona inoa; a o lakou nei no ka poe e loaa ai auanei ke ola mau loa, a e hiki ole mai ana ke ola i kekahi poe e ae;

41. Nolaila, e noho ana ka poe hewa me he mea la aole hoolapanai ana i hana ia mai, eia wale no ma ka hookuu ana mai i na apo o ka make; no ka mea, e hiki mai ana ka la e ala ae ai na kanaka a pau mai ka make mai, a e ku imua o ke Akua, a e hookolokolo ia e like me ka lakou mau hana.

42. Ano, aia no he make i kapa ia he make kino; a e hookuu mai auanei ka make ana o Kristo i na apo o ua make kino nei;

43. O ka uhane a me ke kino e hoohui pu hou ia auanei, ma kona ano maoli; e hoihoi hou ia ka lala a me ke ami hoi i kona wahi ponoi, e like me kakou e noho nei i keia manawa; a e kai ia kakou e ku imua o ke Akua, e ike ana me kakou e ike nei, a me ka hoomanao hiki wawe i ko kakou mau hewa a pau.

44. Ano, e hiki mai keia hoihoi hou ana i na mea a pau, o ka poe kahiko a me ka poe hou, o ka poe paa a me ka poe paa ole, o ka poe kane a me ka poe wahine, o ka poe hewa a me ka poe pono; a, aole i lilo ae kekahi mea uuku loa me he lauoho la o ko lakou mau poo; aka e hoihoi hou ia na mea a pau i kona wahi ponoi, me ia i keia manawa, ma ke kino, a e kai ia a e hooku ia imua o ka noho hookolokolo o Kristo ke Keiki, a me ke Akua ka Makua, a me ka Uhane Hemolele, oia ke Akua mau loa hookahi, e hookolokolo ia ai e like me ka lakou mau hana, ina paha he maikai, ina paha he ino.

45. Ano hoi, ua olelo aku au ia oukou no ka make o ke kino maoli, a no ke alahouana o ke kino maoli. Ke i aku nei au ia oe, ua hookiekie ia ua kino make wale nei i kahi kino make ole; oia no mai ka make mai; mai ka make mua mai hoi, i ke ola, i hiki ole ai ia lakou ke make hou; e hui ana ko lakou poe uhane me ko lakou poe kino, e hookaawale hou ole ia; pela ia mea a pau i lilo ai i kino uhane a i make ole, i hiki ole ai ia lakou ke ike hou i ka palaho.

46. Ano, ia Amuleka i hooki ai i ua mau olelo nei, hoomaka hou ae la na kanaka e kahaha, a hoomaka hoi o Zezeroma e haalulu. A pela i pau ai na olelo a Amuleka, a o keia na mea a pau aʻu i palapala ai.